Mamwene Oopacerya 3:1-28
3 Salomoni aahipaka nivarihano na ekasamento ni Farawo, mwene a wExiitu. Owo aahimuthela* mwaana mwaamuthiyana a Farawo, omuroiha epooma ya Davidi mpakha omalihiwa otekiwa empa awe, empa ya Yehova, ni ixiri sa oYerusalemu.
2 Masi atthu nlelo yaapaha mikuttho mapuro oorakamela osulu, okhala wiira mpakha okathi ole nlelo khiyaatekiwe empa yaarina nsina na Yehova.
3 Salomoni khaahiyale omphenta Yehova, eettelaka ikano sa paapa awe, Davidi. Masi nlelo aanivaha ni opaha mikuttho mapuro oorakamela osulu.
4 Mwene aahirowa oXibeyoni ovaha mukuttho, okhala wiira weiwo waahikhala opuro muulupale ni woorakamela osulu. Salomoni aahivaha inama 1.000 wiira sipahiwe mukuttho valtaari.
5 Yehova aahimukhumelela Salomoni oXibeyoni, moolohani ohiyu, onahimya wiira: “Mukivekele etthu muniphavela anyu wiira koovaheeni”.
6 Nto Salomoni aahihimya oriki: “Nyuwo moomooniherya ophenta wuulupale woororomeleya paapa aka, murumeyi anyu Davidi, okhala wiira owo oheetta moororomeleya, mwa xariya, ni murima wooloka ohoolo wanyu. Nave nyuwo nlelo munnimooniherya ophenta wuulupale woororomeleya, mpakha olelo, mmwiirihaka mwanawe okilaathi veehiceni vawe.
7 Vano, Yehova Muluku aka, mookikhaliha mwene, miyo murumeyi anyu, opuro wa paapa aka Davidi, nnaamwi kiri ene mmiravo paahi ni kihisuwelaka itthu sinceene.*
8 Murumeyi anyu onikhala eriyari ya atthu mwaathanlale anyu, yaawo ahireere waatta ni ahinkontareya.
9 Munvahe murumeyi anyu murima woowiiwelela, wiira aaphukeleke atthu anyu, ni wiira osuweleke ohiyaniha etthu yooloka ni yoohiloka. Tani oniwerya waaphukela atthu anyu ala ahireere waatta?”
10 Etthu Salomoni aavekenle awe yaahimusivela Yehova.
11 Nto Muluku aahimuhimeerya wiira: “Mwaha woovekela etthu ela, muhivekela okhala mahiku manceene, aahiiso okhalana mihakhu, wala okhwa awanani anyu, masi nvekela osuwela ophuka milattu ni exariya,
12 miyo kinimoovahani etthu nvenke anyu. Kinimoovahani murima wa ankhili ni woosuwela, ohinakhalaniwe nyuwo muhinatthi oyariwa, wala ohinrowa okhalaniwa ohoolo munrowa anyu.
13 Nave-tho, kinimoovahani etthu muhivekenle anyu, eyo piiyo, mihakhu ni ovuwa, wiira ohikhale mwene mukina onrowa olikana ni nyuwo okumi anyu wootheene.
14 Mwatthara iphiro saka, mwiiwelelaka malamulo aka ni sooruma saka, ntoko paapa anyu Davidi iirale awe, kinimuncererya mahiku a okumi anyu”.
15 Okathi Salomoni aavennye awe, aahisuwela wiira aamuloha. Nuumala-vo, aahirowa oYerusalemu, eemela ohoolo wa nivuku na nivarihano na Yehova, ovaha mikuttho soopahiwa, mikuttho sa opatthani, ni aahaapakela efesta arumeyi awe ootheene.
16 Okathi ole, athiyana anli anamararuwa* yaahirowa wa mwene, yeemela ohoolo wawe.
17 Muthiyana oopacerya aahihimya wiira: “Xontte pwiyaka, miyo ni muthiyana ola ninkhala empa emosa, nave miyo koomuyara mwaana nlelo nikhalaka empa emosa.
18 Vano nihiku na neeraru nuumala miyo oyara, muthiyana ola nave aahiyara. Hiyo naakhala anli paahi, khuuvo mutthu mukina aakhala empa ele.
19 Ohiyu, mwaana a muthiyana ola aahikhwa, okhala wiira aaroomumpaathela.
20 Nto ohiyu eriyari, owo aahimukuxa mwanaka kaamwaatalenle aka vakhiviru vaka, miyo murumeyi anyu kirupaka, omwaatalela vakhiviru vawe. Nave aahimukuxa mwanawe ookhwa, omwaatalela vakhiviru vaka.
21 Okathi kaavennye aka voosiisu wiira kimwaamwihe mwanaka, kaahiweha wiira aahikhwa. Nto kaahinwehaweha oratteene, koona wiira khahiyo aari mwanaka kaamuyanre aka”.
22 Masi muthiyana mukina aanihimya wiira: “Nnaari, mwanaka tuula mukumi, mwaninyu tuula ookhwa!” Masi muthiyana oopacerya aanihimya wiira: “Nnaari, mwaninyu tuula ookhwa, mwanaka tuula mukumi”. Awo yaaninyakulihana siiso ohoolo wa mwene.
23 Vano mwene aahihimya wiira: “Ola onihimya wiira: ‘Mwanaka tuula ori mukumi, mwaninyu tuula ookhwa!’ Nto ole onihimya wiira: ‘Nnaari mwaninyu tuula ookhwa, mwanaka tuula ori mukumi!’”
24 Vano mwene aahihimya wiira: “Mukiruuhele espaata”.* Siiso mwene aahiruuheliwa espaata.
25 Mwene aahihimya wiira: “Mmwiikitthe mwaana owo mukumi ipantta piili, mpantta mmosa munvahe muthiyana ola, vano mpantta mukina munvahe muthiyana ole”.
26 Moowaakuveya, muthiyana ole mwanawe aari mukumi aahimuxonttela mwene, okhala wiira aanimoonela othunku mwanawe. Owo aahihimya wiira: “Xontte, pwiyaka! Munvahe mwaana owo muthiyana ola! Muhimwiive mwaana owo!” Masi muthiyana mukina aahihimya wiira: “Mwaana owo khonrowa okhala awaka, nnakhala awinyu! Mmuhiye iikitthiwe ipantta piili!”
27 Mwene aahihimya wiira: “Munvahe mwaana owo muthiyana ola oopacerya! Muhimwiive mwaana owo, okhala wiira ola tori maama awe”.
28 Aisarayeli ootheene yaahiiwa moota mwene aaphunke awe mwaha owo, nave yaahitikinihiwa vanceene ni mwene, okhala wiira yaahiweha moota mwene aarumenle awe ankhili a Muluku wiira ophuke mwaha owo ni exariya.
Inoota
^ Aahiiso, “aahimukuxa”.
^ Eheeberi, “kihisuwelaka moota wookela ni moota wookhuma”.
^ Onihimmwa muthiyana onirupihiwa ni mulopwana ophavelaka musurukhu.
^ Aahiiso, “xoowa”.
