Niireke waahikhala okathi mwaaphavela anyu omusoma Biibiliya mukhulumuwa ntoko Jovy, Queennie ni Ezekiel? Atthu anceene anuupuwela wira khanikhala-khala aweryaka omusoma Biibiliya. Ankhi vaakhanle wira mwaamusuwela wira Biibiliya onimookhaliheryani okhalana okumi woohakalaliha? Nave mwaarowa woonela sai mwaaphwannye inamuna saarowa wookhaliheryani osiveliwa omusoma Biibiliya? Niireke eyo yanwiirihani ophavela osuwela ele Biibiliya oniphavela awe wooleelani?

Atthu akina ahoona wira ti vooloka omusoma Biibiliya. Nwehe matakiheryo vakhaani.

Ezekiel orina iyaakha sinivikana 20, onihimya so: “Khalai kaakhala ntoko wira keettiha ekaaro kihisuwelaka opuro kaarowa aka. Masi omusoma Biibiliya wookikhaliherya okhalana okumi woohakalaliha. Maana miruku sa mBiibiliyani sinnikikhaliherya khula nihiku”.

Frieda, orina iyaakha sinivikana 20 onihimya so: “Okathi wotheene kaamakela oxanka ni muru waanikiwela. Masi nuumala opacerya omusoma Biibiliya kaahipacerya okasoopa moonelo aka. Nto atthu akina vannaakhweela opatthana ni miyo, vano kookhalana apatthani anceene”.

Omuhimyaka Biibiliya, muthiyana orina iyaakha sinivikana 50 oniihaniwa Eunice ohimmye so: “Biibiliya ookikhaliherya okhala mutthu ooloka ni ohiya soolema saka soohiloka”.

Omusoma Biibiliya ohaakhaliherya atthu imilyau sinceene. Nave Biibiliya pooti wookhaliheryani okhalana okumi wooloka. (Yesaya 48:17, 18) Mwa ntakiheryo, Biibiliya pooti wookhaliheryani (1) opaka soothanla sooloka, (2) waapaka apatthani eekeekhai, (3) ovilela oriipiwa murima ni (4) osuwela ekeekhai voohimya sa Muluku. Miruku sa mBiibiliyani sinikhuma wa Muluku, nto Muluku khonikhala-khala ovahaka miruku soohiloka. Nto mutthareke miruku iyo siri mBiibiliyani.

Tthiri ti vooloka opacerya omusoma Biibiliya. Itthu xeeni sinrowa wookhaliheryani opacerya omusoma Biibiliya ni osiveliwa omusoma?