1. Oxinttana oniwiiriha atthu opaka exeeni?

OLELO-VA, olumwenku wotheene, oxinttana onniwiiriha atthu anceene okhala oowiitthuna. Mwa ntakiheryo, mulipa a nakoso pooti orumeela olavilavi wira aaxintte akhwaawe. Nave ale aniweetta axooku, pooti waakakha akhwaaya a ekiipa ekina wira axintte. Nave naxikola oniphavela orowa osoma wuniversidade yoovuwa, pooti wootha vaavo onipaka awe isaame. Hiyo maKristau, ninnisuwela wira itthu iyo ti soohiloka, maana siniirela mpantta “erutthu yoottheka”. (aGal. 5:19-21) Masi, musuweleke wira hata nihisuwelaka, hiyo pooti opacerya oxinttana ni anna ni arokora a mmulokoni. Ti vooloka wuupuwela oratteene mwaha owo, maana oxinttana pooti ohonona murettele nirina ahu mmulokoni.

2. Mwaha ola, ninrowa othokorerya exeeni?

² Mwaha ola, nnoothokorerya mikhalelo soohiloka saarowa oniiriha opacerya oxinttana ni anna ni arokora. Nave nnooweha matakiheryo ooloka a alopwana ni athiyana oororomeleya anilavuliwa mBiibiliyani, yaawo yahaamorenle ntapha na oxinttana. Wanipacerya, nrowe niwehe itthu sinniiriha ovara muteko wa Yehova.

3. Makoho xeeni ninreerela ahu wiikoha?

³ Okathi wotheene, ti vooloka oweha itthu sinniiriha omukokhorela Yehova. Nto nihaana wiikoha so: ‘Etthu xeeni enikiiriha wiilikanyiha ni atthu akina? Kiireke kiniphavela wiisoniherya wira ka mutthu oolokexa waavikana atthu akina? Etthu xeeni enikiiriha ovara muteko wa Muluku? Kiireke kiniphavela wiisoniherya wira ka mutthu oolokexa waavikana anna ni arokora a mmulokoni? Wala kiniphavela wiimananiha ovara muteko wa Yehova mpakha vaniwerya aka? Ti vooloka hiyo wiikoha makoho  awo. Mwaha wa xeeni? Nrowe niwehe ele Nuulumo na Muluku ninhimya aya.

4. Moovarihana ni aGalasia 6:3, 4, xeeni vari ya vootakhala wiilikanyiha ni atthu akina?

⁴ Biibiliya onnintumererya ohiilikanyiha ni atthu akina. (Mmusome aGalasia 6:3, 4.) Mwaha wa xeeni? Mwaha woowi akhala wira nnoona wira naatthu oolokexa waavikana anna ni arokora akina, hiyo pooti opacerya wiixinnuwiha. Nave akhala wira nnimwiilikanyiha ni atthu akina, nnoona wira khaninwerya opaka itthu sooloka ntoko atthu awo anipaka aya, hiyo pooti okhulumuwa. Tthiri vannooneya wira miyoonelo iyo sotheene khahiyo sa ankhili. (aRom. 12:3) Murokora oniitthaniwa Katerina, * yoowo onikhala oGrécia onihimya so: “Okathi wotheene kaamakela wiilikanyiha ni arokora akina, yaawo yaari ooreera, yaakhumela saana muteko woolaleerya ni vaakhweela waapaka apatthani. Nto mwaha waivaavo, miyo koona wira nkirina efaita”. Muhiliyale wira Yehova ooneemererya omusuwela ohiya mwaha woowi naatthu ooreera, ninnilavula oratteene wala ninnisuweliwa ni atthu anceene, masi mwaha woowi ninnimphenta ni ninninwiriyana Mwanawe.—Yoh. 6:44; 1 aKor. 1:26-31.

5. Yowiiraneya ya munna Hyun, ewiixuttinheni exeeni?

⁵ Nikoho nikina ninreerela ahu wiikoha tinla: ‘Niireke kinisuweliwa okhala mutthu oniphavela murettele wala mutthu oomusivela onyakulihana?’ Nwehe yowiiraneya ya munna oniihaniwa Hyun, yoowo onikhala oCoreia do Sul. Waahikhala okathi anna yaarina iparakha mmulokoni aawoona awe okhala awanani awe. Owo onihimya so: “Miyo kaamakela waavaanyiha anna awo ni nkeemererya itthu yaahimya aya”. Etthu xeeni yaakhumelenle? Hyun onihimya so: “Mweettelo aka waahihonona wiiraana mmulokoni”. Moohakalaliha apatthani awe Hyun yaahimukhaliherya oweha muxankiho awe. Hyun aahipaka marukunuxo mookumini mwawe, olelo-va onirumeela ntoko mutokweene. Akhala wira nnoona wira noopacerya oxinttana ni atthu akina, ohiya ophavela murettele, nihaana opaka marukunuxo.

6. Moovarihana ni aGalasia 5:26, mikhalelo xeeni soohiloka sinimwiiriha mutthu oxinttana?

⁶ Mmusome aGalasia 5:26. Mikhalelo xeeni soohiloka sinimwiiriha mutthu oxinttana? Mukhalelo mmosa, wiikuxererya. Mutthu oowiikuxererya, toowiixinnuwiha ni toowiitthuna. Mukhalelo mukina onimwiiriha mutthu oxinttana ti nrima. Mutthu a nrima khahiyo paahi oniphavela etthu ya mutthu mukina, masi-tho oniphavela wira mutthu onimukhalela awe nrima empweteye etthu orina awe. Tthiri nrima ninnimwiiriha mutthu omunyokha mukhwaawe. Nto nihaana opaka sotheene ninwerya ahu wira nihihapuxiwe ni mikhalelo iyo soohiloka!

7. Nlikanyiho xeeni ninnikhaliherya osuwela otakhala waya wiikuxererya ni nrima?

⁷ Wiikuxererya ni nrima, ori ntoko mukwitha wala ikokhola sinimuhonona kaaxi a eviyau. Ekeekhai wira eviyau eyo pooti ovava, masi nuuvira okathi mukwitha wala ikokhola iyo pooti ottiya etuubu wala mankeera onivara awe kaaxi owo. Nto eyo pooti wiiriha mutooro wa eviyau eyo ohikhalana ikuru wala ohivara muteko ni wiiriha eviyau eyo omora, niire so, ompaka asitenti. Etthu emosaru, pooti omwiiraneela mutthu opacenrye khalai omurumeela Yehova. Nto akhala wira mutthu owo onniikuxererya ni ookhalana nrima, owo pooti omora. (Mir. 16:18) Mutthu owo pooti ohiya omukokhorela Yehova ni wiikumiherya mixankiho ni waakumiherya mixankiho atthu akina. Nihaana opaka exeeni wira nihimorele muraakho wa wiikuxererya ni nrima?

8. Xeeni vari aya vooloka osyaka wiikuxererya?

 ⁸ Hiyo nnoowerya osyaka wiikuxererya akhala wira khaninliyala miruku Paulo aavanhe awe aFilipi oriki: “Muhiireke itthu mphavelaka oxinttana wala wiittottopa, nto mwiiyeviheke, khula mutthu awooneleke vatthu akhwaawe ovikana mmensawe”. (aFil. 2:3) Akhala wira nnimwaathokorerya atthu akina okhala aalupale onivikana hiyo, khaninrowa wiimananihaka oxinttana ni atthu ale anisuwela itthu sinceene onivikana hiyo. Ohiya-vo, nnoohakalala mwaha wa itthu iyo anisuwela aya. Ti voohakalaliha vaavo anirumeela aya itthu iyo anisuwela aya wira amukokhorele ni onvuwiha Yehova. Nave anna ni arokora anisuwela itthu sinceene ahaana otthara miruku murummwa Paulo onivanhe awe. Anoopaka eyo awehaka mikhalelo sahu sooloka. Akhala wira nnimwiimananiha, muloko onrowa okhala wa murettele ni wowiiraana.

9. Ninrowa osyaka sai waakhalela nrima atthu akina?

⁹ Hiyo nnoosyaka waakhalela nrima atthu akina akhala wira nnimwiisuumaaliha, niire so, osuwela wira sookhala itthu ninwerya ahu opaka ni nihinwerya ahu opaka. Akhala wira naatthu oowiisuumaaliha, hiyo nnoosyakaka owooniherya atthu akina wira ninnisuwela itthu sinceene waavikana atthu otheene. Ohiya-vo, nnimwiimananihaka wiixutta itthu ni atthu ale anisuwela itthu sinceene onivikana hiyo. Mwa ntakiheryo, akhala wira muloko anyu ookhala munna onisuwela olavula myaha oratteene, etthu xeeni mukhanle anyu oopaka? Mmukoheke moota onilokiherya awe myaha sawe. Niireke munnimusuwela murokora oosuwela waapeya? Akhala wira ti siiso, munvekeleke wira oovaheeni malakiheryo a moota wowaapeya saana. Niireke nyuwo mwa mmiravo onoovilani waapaka apatthani? Mwaavekeleke miruku amiravo akina onaakhweela waapaka apatthani ooloka. Akhala wira munoopaka eyo, munoosyaka waakhalela nrima atthu akina ni munimwiixutta itthu sinceene.

10. Muxankiho xeeni Gideyoni aarina awe?

¹⁰ Nkahaya muupuwele ele yaamwiiranenle Gideyoni, a nloko na Manase ni alopwana a nloko na Efrayimi. Okhaliheriwaka ni Yehova, Gideyoni ni atthu awe 300 yaahaaxintta awanani aya. Nto awo yanwerya wiittottopa mwaha wa  etthu ele yaapanke aya. Vano alopwana a nloko na Efrayimi yaahirowa okumana ni Gideyoni, awo khiyaaronwe omuttottopela, masi yaaronwe onyakulihana ni Gideyoni. Vanikhala ntoko wira awo yaahinyoonyiheya mwaha woowi Gideyoni khaalattunle orowa owana ni awanani a Muluku. Vannooneya wira alopwana ale yaawehexexa ottittimihiwa wa nloko naya, nto yaahiliyala etthu ya faita yinceene wira Gideyoni aahikhaliherya ovuwihiwa nsina na Yehova ni waakhapelela atthu a wIsarayeli.—Makh. 8:1.

11. Etthu xeeni Gideyoni aalenle awe alopwana a nloko na Efrayimi?

¹¹ Moowiiyeviha Gideyoni aahaaleela alopwana a nloko na Efrayimi wira: “Itthu sìralyaka soyeva, khasinlikana n’itthu sìralyanyu”. Nuumala-vo, Gideyoni aahiwuupuxerya alopwana ale a nloko na Efrayimi moota Yehova aakhalihenrye awe opaka itthu suulupale. Etthu xeeni yaakhumelenle? “Atthu a Efrayimi yahikhurunuwa murima”. (Makh. 8:2, 3) Vannooneya oratteene wira Gideyoni aahihiya wiixinnuwiha wira okhalihe murettele eriyari ya atthu a Muluku.

12. Yowiiraneya ya alopwana a nloko na Efrayimi ni Gideyoni, enniixuttiha exeeni?

¹² Yowiiraneya ela, enniixuttiha exeeni? Alopwana a nloko na Efrayimi anniixuttiha wira nihikhala-khale niwehexexaka ottittimihiwa wahu ohiya onvuwiha Yehova. Ele Gideyoni aapanke awe enniwiixuttiha etthu yuulupale ahooleli a etthoko ni axitokweene. Akhala wira ookhala mutthu onyoonyinwe mwaha wa etthu nipanke ahu, nihaana omananiha oweha etthu emwiirinhe mutthu owo onyoonyiwa. Nave nihaana omuttottopela mutthu owo mwaha wa itthu sooloka opanke awe, opaka eyo onitthuneya wiiyeviha otepexa wene akhala wira vannooneya oratteene wira mutthu owo oovonya. Musuweleke wira ti vootepa otthuneya okhalana murettele ni anna ni arokora ohiya wooniherya wira nookhalana erasau.

13. Muxankiho xeeni Ana aarina awe ni aaxinttale sai?

¹³ Nkahaya muupuwele yowiiraneya ya Ana. Owo aatheliwe ni mulopwana a nloko na Levi, iihaniwa Elikana. Nto Elikana aanimphenta vanceene Ana. Masi Elikana aarimwaatteya, maana aahikhalana mwaarawe mukina iihaniwa Penina. Elikana aanimphenta vanceene Ana onvikana Penina. Masi “Peninn’owo ahikhalana an’awe, vano Hanna kharina mwana”. Nto okhala wira Ana khaayara “Peninna animuthanya Hanna, ananveha” wira omuriipihe murima. Ana oonenle sai? Owo aahiriipiwa murima vanceene! Nave “ahipajerya wunla, khunyanyala yolya”. (1 Sam. 1:2, 6, 7) Masi hata vari siiso, Biibiliya khonooniherya wira Ana aahipaka etthu wira omunlele ikuhu Penina. Ohiya-vo, Ana aahimutthukulela murima awe Yehova ni aanikupali wira Yehova amphuka muxankiho ole. Niireke muhoolo mwaya Penina aahipacerya omuthokorerya saana Ana? Biibiliya khonihimya. Masi etthu ninsuwela ahu, Ana aahiphwanya murettele wekeekhai. Nave “owitho wawe wahimukokola”.—1 Sam. 1:10, 18.

14. Yowiiraneya ya Ana enniixuttiha exeeni?

 ¹⁴ Yowiiraneya ya Ana enniixuttiha exeeni? Akhala wira ookhala mutthu oniphavela oxinttana ni nyuwo, muhiliyale wira khamunwerya osyaka muxankiho owo. Nto muheereryeke oxinttana ni mutthu owo. Nave muhimuttikiheryeke yootakhala ni yootakhala ekhwaaya, masi mphaveleke murettele. (aRom. 12:17-21) Hata mutthu owo ohiturukaka moonelo awe, nyuwo munoowerya okhalana murettele wekeekhai.

15. Itthu xeeni Apolo ni Paulo yaasuwela aya?

¹⁵ Vano, nkahaya muupuwele ntakiheryo na mwiixutti Apolo ni murummwa Paulo. Otheene aya yaanisuwela oratteene Soolempwa. Nave awo yaanisuwela oratteene wiixuttiha. Ohiya-vo, oowanli aya yaahaakhaliherya atthu anceene okhala awiixutti a Yesu. Hata vaari siiso, awo khiyaaxinttana ni khiyaathokoreryana ntoko awanani.

16. Apolo aari mutthu a enamuna xeeni?

¹⁶ Apolo “aayariwe wAlexandriya” epooma yeeyo atthu anceene yaarowa aya osoma. Vanikhalana ntoko wira Apolo aanisuwela olavula myaha oratteene ni “aanisuwela saana Soolempwa”. (Mit. 18:24) Okathi Apolo aari awe muloko wa oKorinto, anna ni arokora a muloko ole yaanooniherya oratteene wira yaanisiveliwa vanceene ni Apolo waavikana anna akina omuhela muhina Paulo. (1 aKor. 1:12, 13) Niireke Apolo aanikhaliherya muupuwelo owo? Nnaari. Maana muhoolo mwaya Apolo aahikhuma oKorinto, vano Paulo aahinvekela Apolo otthikela oKorinto. (1 aKor. 16:12) Paulo khaarowa opaka eyo vaakhanle wira oona wira Apolo aanikumiherya ohiiwanana mmulokoni. Vannooneya oratteene wira Apolo aanirumeela itthu aasuwela awe wira olaleye ihapari sooreera ni waalipiha anna ni arokora. Moohaanyiherya Apolo aari mutthu oowiiyeviha. Mwa ntakiheryo,  Biibiliya khonihimya wira Apolo aahinyoonyiheya vaavo Aakila ni Prisila ‘yaamutthokiherye aya oratteene ephiro ya Muluku’.—Mit. 18:24-28.

17. Paulo aapanke exeeni wira okumiherye murettele?

¹⁷ Murummwa Paulo aanisuwela oratteene itthu sooloka Apolo aapanke awe. Masi Paulo khaaxanka uupuwelaka wira anna ni arokora akina yaarowa wuupuwelaka wira Apolo aari oolokexa onvikana Paulo. Tthiri Paulo aari mutthu oowiiyeviha, oowiisuumaaliha ni ankhili. Mikhalelo iyo, sinnooneya vaavo aavanhe awe miruku muloko wa oKorinto. Owo khaanyoonyiheyale vaavo anna akina a muloko yaahimya aya wira “Miyo kinimutthara Paulo”. Ohiya-vo, ovuwa wotheene Paulo anvaha Yehova Muluku ni Yesu Kristu.—1 aKor. 3:3-6.

18. Moovarihana ni 1 aKorinto 4:6, 7, ntakiheryo na Paulo ninniixuttiha exeeni?

¹⁸ Ntakiheryo na Apolo ni Paulo ninniixuttiha exeeni? Hiyo pooti ovara vanceene muteko wa Yehova ni waakhaliherya atthu anceene mpakha opatisiwa. Masi ninnisuwela oratteene wira ninnivara saana muteko wa Yehova, mwaha woowi Yehova onninireeliha. Ntakiheryo na Apolo ni Paulo ninniniixuttiha etthu ekina. Etthu ene tiila: Vaavo ninvahiwa ahu iparakha, nihaana otepa okumiherya murettele. Ninnixukhurela vanceene okhalana mmulokoni axitokweene ni arumeyi ookhaliherya, yaawo anikhaliherya muloko okhala wowiiraana ni wa murettele. Awo annipaka eyo, vaavo miruku saya sinikhuma aya Nuulumo na Muluku, Biibiliya. Awo khaniivuwiha, masi anninikhaliherya otthara ntakiheryo nahu, Yesu Kristu!—Mmusome 1 aKorinto 4:6, 7.

19. Khula mmosa a hiyo ohaana opaka exeeni? (Nwehe ekaaxa eni: “ Muhixinttaneke”.)

¹⁹ Khula mmosa a hiyo oovahiwa etthu ya faita ni Muluku. Nto nihaana orumeela itthu iyo ninsuwela ahu wira ‘naavareleke muteko akina’. (1 Ped. 4:10) Woonasa wene, nyuwo munuupuwela wira khamuniwerya opaka itthu sinceene, musuweleke wira itthu saamukhaani munipaka anyu sinikumiherya murettele siri ntoko ipeesa saamukhaani sinilupanyiwa khukhala ekuwo yooreera. Nto mpakeke sotheene muniwerya anyu wira muhixinttaneke ni atthu akina, nave mwiimananiheke okumiherya wiiraana ni murettele mmulokoni.—aEef. 4:3.