NUUVIRA mahiku manceene erupaka epula ni woopa epheyo yinceene, eSegunda-feira, nihiku 1 a Setembro, 1919, vaaxiiye noopaka nsuwa ni vavihaka. Makaaripi aya, atthu yaattamela 1.000, yaahithukumana esaala yaarina mapuro 2.500, wira awiriyane epantte yoopacerya ya muthukumano, waapakiwe oCedar Point, Ohio, EUA. Ohiyu yoole, atthu akina 2.000, yaahiphiya opuro ole, arwaaka ni pakiti, ekaaro ni akampoi a vameekhaaya. Namanli, atthu yaahitepa waatta, nto mahiku makina yaahanle wiiriwa muthukumano ole, atthu yaahaana othukumana vate, vamuuttutthini sa miri suulupale.

Nsuwa noopa naanivira mmakukhuni, nnakumiherya muuttutthi waakhala ntoko makuruthu vakasakoni va alopwana yaari opuro ole. Mapururu yaari vaxapewuni va axirokora, yaanivava mwaha wa epheyo yaakhuma ntthiya nniitthaniwa Erie. Munna mmosa onnuupuwelela oriki: “Mapuro ale a muthukumano yaari ooreera, oomaaleleya, nto anna ni arokora yaahivalaana tthiri ni olumwenku, tivonto yaakhala ntoko ari mparayiisu”.

Nnaamwi opuro ole waari wooreera, masi khiwaavikana ohakalala waarina aya atthu yaathukumanne vale. Exornaale emosa yaalempe so: “Atthu otheene yaakhala ntoko yaari atthu yaamurumeela Muluku tthiri, ni yaari oohakalala vanceene”. Alipa-oomusoma Biibiliya yaanoona okhala etthu yootepexa oreera othukumana ni annaya, vanceenexa nuumala oviriha mixankiho sinceene, ntoko olupatthiwa okathi wa ekhotto; ohiiwanana mmulokoni; owaliwa eBetheli ya oBrooklyn; otthukweliwa anna anceene mwaha wa Omwene, waahela muhina anna athanu naararu yaahoolela, yaawo yaalamuliwe okhala mukhatteya iyaakha 20. *

Mwaha wa okhumuwa ni onyoonyiheya mwaha wa mixankiho saakhumelela okathi wa ekhotto, Alipa-oomusoma Biibiliya anceene yaahihiya olaleerya. Masi anamunceene yaahiimananiha ovikaniha ovilela nnaamwi yaakhoottihiwa ni guvernu. Ekwaha emosa, mulipa ootokosa myaha aahihimya wira, nnaamwi yaalopoliwa ni guvernu, Alipa-oomusoma Biibiliya yena aalavulanne awe, yaahihimya wira “yaarowa ovikanihaka olaleerya nuulumo na Muluku mpakha wanikisa”.

Okathi ole wooxankiha, Alipa-oomusoma Biibiliya “yanaaweha Apwiya [Yehova] ahoolelaka, . . . yaanivekela okathi wotheene wira Tiithi aya oweettiheke”. Vano yaahithukumana moohakalala, nipuro nla niiriwa asembeleya, oCedar Point. Murokora mmosa aahilavula masu yooniherya muupuwelo wa atthu anceene, yaawo yuupuwela moota yaarowa aya “otthikela ovara muteko wa Muluku mooluttuweliwa ni mowiiraana”. Tthiri awo yaaphavela opacerya ovara muteko moohipisa.

Esumana yotheene, atthu yaamurwenle asembeleya ole yaanitikinihiwa ni ileetera iye piili saalempwe “GA” va programani a kongresu, vakartawuni, ni ikanyeryo saaphwanyaneya opuro ole. Namathanu, nihiku niitthaniwa “Nihiku na Anamakhaliherya”, munna Joseph F. Rutherford aahuupulula ele yaataphulela aya ileetera iye, aahimeeryaka atthu 6.000 yaathukumanne. Nuulumo noowi “GA”, naataphulela Golden Age (A Idade de Ouro), nto ela yaari erevista esya yaarowa orumeeliwaka okathi woolaleerya. *

Olavulaka sa maKristau akhwaawe owoottihiwa, Munna Rutherford aahimmye so: “Ni maitho a nroromelo, anniwerya oweha Okathi Wooloka wa olamulela wa Mesiya, [ohiya oweha] itthu sinikhumelela okathi ola wooxankiha. . . . Annoona okhala muteko aya ni eparakha aya yuulupale olaleya orwa wa Okathi Wooloka. Eyo eniirela mpantta muteko arummwe aya ni Muluku”.

A Idade de Ouro, “Erevista ya Myaha Sekeekhai, ni Nroromelo”, yaarowa orumeeliwaka ntoko enamuna esya ya omwarya-mwarya ekeekhai, yaarowa weesihiwaka khula empa. Okathi waakohiwe aya ti pani aaphavela okela muteko owo, atthu otheene yaaheemela. Nuumala-vo, “yooniheryaka ohakalala ni nthiti, nenno nnooniheriwa paahi ni ale animutthara Yesu,” atthu awo yaahiipa ariki: “Apwiya, muniruuhele muthuku ni ekeekhai anyu”. Munna J. M. Norris, onnuupuwelela oriki: “Kinnuupuwela moota anna yiipa aya moorunya, nto miri saakhala wira saamuttikinyeya”.

Nuumala epantte ele ya eprograma, anna ni arokora yaahithataana wira yaakhele erevista aya. Anceene yoonela ntoko soonela awe murokora Mabel Philbrick, yoowo aahimmye so: “Naahihakalala vanceene osuwela wira vano naamutthikela ovara muteko!”

Alipa-oomusoma Biibiliya oowiiraka 7.000, yaari oolikana wira yavareke muteko wa Muluku. Epaphelo Organization Method (Moota Woolokiherya Muteko) ni elivirinyu To Whom the Work Is Entrusted (Ole Ororomeliwe Ovara Muteko), yaahivaha malakiheryo oowi: EDepartamento ya Muteko oseedi, ti yaarowa weettiheryaka muteko woolaleerya. Khula muloko waahaana okhalana Ekomisau ya Muteko ni aahaana othanliwa muhooleli wira ovaheke malakiheryo. Mittetthe sahaana okawanyiwa, sikhalaka ipa 150 wala 200. Wahaana opakiwa muthukumano Namaxexe ohiyu, wira anna aleelaneke sowiiraneya ni ovahererya erelatoorio ya muteko woolaleerya.

Munna Herman Philbrick ohimmye so: “Nuumala otthikela owaani, otheene ahu naahiluttuweliwa ni ekampaanya ya weesiha erevista”. Yaahiphwanyiwa atthu anceene yaaphavela owiriyana. Beulah Covey ohimmye so: “Vanikhala ntoko wira nuumala ekhotto ni ohaawa vanceene, atthu otheene yaanisiveliwa owiriyana voohimya sa okathi itthu sotheene saarowa aya olokiheriwa, ni atthu otheene yaarowa okhalaka saana”. Arthur Claus olempe so: “Muloko wotheene waahitikinihiwa oweha wira atthu anceene yaahivaha masina aya wira yaakheleke erevista eyo”. Myeeri miili paahi nuumala okumiheriwa ekwaha yoopacerya, irevista A Idade de Ouro waattamela 500.000 saahikaiwa, ni atthu 50.000 yaahivahererya masina aya wira yaakheleke.

Ntoko saalavunle awe munna A. H. Macmillan, nuuvira okathi, muru oni “Evangelho do Reino” (Evangelyo ya Omwene), waakumiheriwe A Sentinela a 1 a Julyo, 1920, waari “mwaha woopacerya waathokorerya moota muteko woolaleerya waatthuneya aya ovariwaka olumwenku wotheene, ntoko silimalenle ahu olelo-va”. Muru ole waahaatumererya maKristau otheene oowoottihiwa “ovaha onamoona mulaponi motheene wira omwene wa wiirimu woophiya”. Olelo-va, anna a Kristu, yaawo ‘aroromeliwe ovara muteko’, annivara vamosa ni imilyau sinceene sa atthu anilaleya ihapari, alipelelaka okathi woohakalaliha wa olamulelo wa oMesiya.