MUTEKO ahu woolaleerya ti wootthuneya ni wa faita. Eyo khentaphulela wira atthu otheene annisiveliwa ni ele eniixuttiha ahu. Nnaamwi atthu asiveliwaka ni ele Biibiliya eniixuttiha awe, ikwaha sikina khaniphavela omusoma Biibiliya ni hiyo.

Eyo ti etthu yiiraneyale ni Gavin, yoowo aapacenrye orowela mithukumano, masi kheemerenrye omwiixutta Biibiliya. Owo onihimya so: “Miyo nkaasuwela itthu sinceene sa Biibiliya, masi nkaaphavela wooniherya eyo. Kaanoova owokiwa, ni nkaaphavela opaka nivarihano ni mutthu”. Munoonela sai? Niireke Gavin khaakhala-khala eemereryaka omwiixutta Biibiliya? Nnaari! Nkahaya muthokorerye mireerelo sinikumiherya aya sowiixuttiha sa Biibiliya. Yehova aahaaleela aIsarayeli khalai, oriki: “Olaleya waka omwaramwareye ntoko okame, ntoko makakhara animorela munyepu”. (Otum. 31:19, 30; 32:2) Makhalelo a okame, annivaha nlikanyiho nookhalela na moota ninrowa ahu waakhaliherya saana atthu a mikhalelo sotheene, okathi onilaleerya ahu.​—1 Tim. 2:3, 4.

Okame ti wooveya. Okame onipakeya vakhaani-vakhaani, onipacerya othukumanyeyaka mattoi-ttoi a maasi anikhumelela mwaha wa etthapwe. Moolumo a Yehova yaakhala ntoko “okame”, eyo piiyo, owo aalavula mooreerela murima, ni mowaathokorerya atthu awe. Hiyo ninnimutakiha Yehova vaavo vanittittimiha ahu moonelo wa atthu akina. Ninnaatumererya atthu orumeela muupuwelo aya, wira awo aneene aphwanye waakhuliwa waya. Waathokorerya moota owo, atthu awo pooti weemereryaka ele enihimya ahu, ni olaleerya wahu onookhumela saana.

Okame ti wookurunuxa murima. Olaleerya wahu onnaakurunuxa murima akina, vaavo vanuupuwelela ahu toko moota woowiiriha osiveliwa muhupi wa Biibiliya. Gavin, yoole omuromonle ahu, khaakhanyereriwe waakhulela omwiixutta Biibiliya. Ohiya vo, Chris, yoowo aamulalenrye wanipacerya, aahiphavelasa inamuna sa omwiiriha Gavin ophavela ovaanela myaha sa Biibiliya. Chris aahimutthokiherya Gavin wira Biibiliya ookhalana mwaha muulupale, nto osuwela mwaha owo, wammukhaliherya wiiwexexa oratteene ele oniwiriyana awe mmuthukumanoni. Moottharelana, Chris aahimuleela Gavin wira etthu yaamukhalihenrye omukupali Biibiliya, waari wiiraneya wa iprofesia sa Biibiliya. Ela yaahiwiiriha oowanli aya oviriha okathi munceene athokoreryaka iprofesia siiraneyale. Ovaanela iwo waahikurunuxa murima wa Gavin, nto muhoolo mwaya aaheemererya omwiixutta Biibiliya.

Okame onnilipiha okumi. Myeeri seiye epula ehinirupa aya wIsarayeli, etthaya ennuuma ni vanniviha vanceene. Wahaari okame, nto miri saamunyaala ni okhwa. Olelo-va, enniiraneya etthu emosaru, mmukhalelo wa omunepani, ntoko Yehova aahimyale awe vahinatthi. (Am. 8:11) Yehova aahihimya wira maKristau oowoottihiwa yaarowa okhala ntoko “okame wimihiwe n’Apwiya”, vaavo yaarowa aya olaleyaka ihapari sa Omwene, akhaliheriwaka ni apatthani aya a “ipwittipwitthi sikina”. (Mik. 5:6; Yoh. 10:16) Niireke ninnithokorerya ihapari sooreera sa Omwene okhala ntoko okame wa omunepani onilipiha okumi, yoowo onivahiwa ni Yehova?

Okame ori mareeliho anikhuma wa Yehova. (Otum. 33:13) Olaleerya wahu pooti waakumiherya mareeliho ale anaakhulela. Gavin aahiphwanya mareeliho awo. Biibiliya aahaakhula makoho awe otheene. Aahiimananiha vanceene, moohipisa aahibatiziwa. Nto vano, owo ni mwaarawe, Joyce, annihakalala olaleerya ihapari sooreera sa Omwene.

Wuupuwelela okame, onoonilipiha wira nivaheke efaita muteko ahu woolaleerya. Moota xeeni? Nttoi-ttoi nimosa na okame, khaninwerya onaaniha nipuro nuulupale, masi mattoi-ttoi manceene anniwerya onaaniha etthaya. Vamosaru, hiyo mekhihu, pooti ohiwerya okumiherya mireerelo sinceene mmuteko woolaleerya. Masi orowa otakaaherya wiimananiha wa arumeyi otheene a Yehova aniluttuweliwa ni muteko woolaleerya, hiyo nnoowerya waalaleerya atthu a “mulaponi mothene”. (Math. 24:14) Niireke olaleerya wanyu onookhala ntoko mareeliho anikhuma wa Yehova? Aayo, akhala wira onlikana ni okame, yoowo ori wooveya, wookurunuxa murima, ni onilipiha okumi!