1-2. a) Etthu xeeni Yesu aapanke awe ohiyu wookiserya ohinatthi okhwa? b) Makoho xeeni ninrowa ahu waakhula mwaha ola?

 WAARI namaxexe, 14 a Nisani a mwaakha 33 Nuumala Kristu Orwa ni wiira vahalaka wiila. Nave wiira vahalaka vakhaani wiira Yesu ovarihiwe, ophukeliwe, otthukweliwe, ohaaxiwe ni iiviwe. Owo ni awiixutti awe oororomeleya, yiira apanke ene niinaano Yoolya ya Ohiyu ya Apwiya esaala ya osulu. Amalihaka-ru olya, Yesu aahaavaha miruku awiixutti awe seiyo saarowa waalokiherya ni waalipiha. Nave awiixutti awo ahalaka okhuma, Yesu aahipaka nivekelo na vameekha aya. Murummwa Yohani aahilepa nivekelo nlo, nto hiyo nnoowerya ophwanya nivekelo nlo yoolepa ya Yohani ekapiitulu 17.

² Etthu xeeni yaamuxankiha Yesu okathi aapaka awe nivekelo nlo? Moota xeeni nivekelo nlo, ninnikhaliherya aya oweha ele Yesu aavahexa awe efaita okathi aari awe valaponi? Mwaha ola nnimwaakhula makoho ala.

“MIYO KIHAASUWELIHA NSINA NANYU”

3. Etthu xeeni Yesu aahimmye awe sa nsina na Yehova ni aaphavela ohimya exeeni? (Yohani 17:​6, 26)

³ Nivekelo Yesu aapanke awe, owo aahimmye so: “Miyo kihaasuweliha nsina nanyu”. Mwaha woolavula ikwaha piili, Yesu aahooniherya wiira mwaha ole waari wa efaita yuulupale. (Mmusome Yohani 17:​6, 26.) Yesu aaphavela ohimya exeeni? Niireke Yesu awiixuttiha nsina na Muluku? Okhala wiira awiixutti ale yaari ayuda, moohaanyiherya, awo yaanisuwela wiira nsina na Muluku ti Yehova. Soolempwa sa eHeeberi, nsina nlo, ninniphwanyaneya ikwaha sinceene. Nto, Yesu khahiyo aaleela paahi wiira nsina na Muluku ti Yehova. Mwekeekhai, owo aahiwiixuttiha  ele yaataphulela aya nsina nlo. Yesu aahaakhaliherya awiixutti awe omusuwela saana Yehova, ohela muhina yoolakela ya elapo vamosa ni apinaatamu. Nave aahiwiixuttiha etthu Yehova aapanke awe, ele aarowa awe opaka ni mikhalelo sawe. Yesu paahi taarowa wiixuttiha saana sootheene iya, okhala wiira owo onnimusuwela oratteene Yehova waavikana apinaatamu ootheene.

4-5. a) Nvahe ntakiheryo nnooniherya wiira nsina na mutthu pooti okhalana efaita para hiyo. b) Xeeni nsina na Yehova naarina aya efaita para awiixutti a Yesu?

⁴ Muupuwele wiira muloko anyu ookhala mutokweene mmosa oniitthyaniwa Davidi. Owo meetiku ni munnimusuwela mwa iyaakha sinceene. Nto nihiku nimosa ennoophwanyani eretta mootutuxerya, ni munnirowa espitaali munna owo onivara awe, nto owo onnoopola okumi anyu. Vano munnimphenta vanceene munna owo, nave okathi muniiwa anyu niromoliwaka nsina nawe, nyuwo munnuupuwela ele munna ole owiirenlaaweni. Owo mutokweene yoole mmusuwenle anyu mwa iyaakha sinceene, masi owo nlelo meetiku ooponle okumi anyu.

⁵ Mwa enamuna emosa-ru, awiixutti a Yesu yaanisuwela nsina na Yehova. Mwaha wa muteko woolaleerya Yesu aavara awe, nsina nlo naahikhalana efaita yuulupale para awiixutti ale. Mwaha wa xeeni? Mwaha woowi, Yesu aanitakiha mikhalelo sa Tiithi awe ni itthu sootheene aahimya awe ni aapaka awe. Tivonto, okathi arummwa yaaweha aya enamuna Yesu iixuttiha awe ni aathokorerya awe atthu, awo yaaniwerya omusuwela saana Yehova. — Yoh. 14:9; 17:3.

“NSINA NANYU, NENNO MUKIVANHE ANYU”

6. Yesu aaphavela ohimya exeeni okathi aalavunle awe wiira aahivahiwa nsina na Yehova? (Yohani 17:​11, 12)

⁶ Nivekelo Yesu aapanke awe, owo aahaavekelela awiixutti awe oriki: “Mwaakhapelele mwaha wa nsina nanyu, nenno mukivanhe anyu”. (Mmusome Yohani 17:​11, 12.) Niireke eyo enitaphulela wiira nsina na Yesu naarowa okhala Yehova? Nnaari. Okathi Yesu aalavula awe voohimya sa nsina na Yehova, owo aahimya ‘nsina nawe Muluku’. Vannooneya oratteene wiira Yesu, khahiyo aixiitthanela nsina na Yehova. Nto, xeeni Yesu ohalaka ohimya wiira aahivahiwa nsina na Muluku? Yoopacerya, Yesu aari representanti aahiiso namitthaka aarummwale ni Yehova. Owo aarwiiye mwa nsina na Tiithi awe, ni aahipaka miteko suulupale mwa nsina na Yehova. (Yoh. 5:43; 10:25) Ohiya-vo, mwa nttaava na eheeberi, nsina noowi Yesu nintaphulela “Yehova ti woopowa”. Tivonto, nsina na Yehova ninnivarihana vanceene ni nsina na Yesu.

7. Nvahe ntakiheryo nnooniherya moota Yesu aalavunle awe mwa nsina na Yehova.

⁷ Wiira niiwexexe nthowa naya Yesu aalavunle awe mwa nsina na Yehova, nrowe nuupuwele ntakiheryo nla. Namalamulela a elapo emosa, pooti omuruma mutthu mukina wiira alavule ni atthu akina mwa nsina nawe. Nto, okathi mutthu owo onilavula awe ni atthu awo, owo onihimya itthu orummwale awe ni namalamulela ole. Mwa enamuna emosa-ru, Yesu aarummwale ni Muluku ni aalavula mwa nsina na Yehova. — Math. 21:9; Luka 13:35.

8. Mwa enamuna xeeni nsina na Yehova naari aya ni Yesu hata ohinatthi orwa valaponi? (Okhuma 23:​20, 21)

⁸ Biibiliya, onnimuhimya Yesu okhala “Nsu”, okhala wiira Yehova aahimuruma wiira osuwelihe malaikha ni apinaatamu, ele Yehova aaphavela awe wiira asuwele ni apakeke. (Yoh. 1:​1-3) Woonasa wene, Yehova aahimuruma Yesu ntoko nlaikha wiira aakhapelele aisarayeli okathi yaari aya moothakoni. Okathi Yehova aavekenle awe aisarayeli wiiwelela nlaikha nle, owo aahihimya nthowa naya ohalaka olavula eyo, oriki: “Mana ti miyo kirumme wa  nyuwo”. a (Mmusome Okhuma 23:​20, 21.) Yehova aahihimya eyo, okhala wiira owo aahimuruma Yesu. Nave-tho Yesu, Murumeyi Muulupale onaakiherya ni onitteeliha nsina na Tiithi awe.

“TIITHI, NVUWIHE NSINA NANYU”

9. Yesu aavaha sai efaita nsina na Yehova? Mutthokiherye.

⁹ Ntoko niwenhe ahu, Yesu aanivaha efaita yinceene nsina na Yehova hata ohinatthi orwa valaponi. Nave hata okathi aari awe valaponi, itthu sootheene Yesu aapaka awe, saanooniherya wiira aanittittimiha nsina na Yehova! Wanikisa wa muteko awe woolaleerya, Yesu aahinvekela Yehova oriki: “Tiithi, nvuwihe nsina nanyu”. Okathi ene yoowo, Tiithi awe aahimwaakhula ni nsu noorunya naalikana ni etari. Yehova aahimmye so: “Miyo koovuwiha, nave kinrowa ovuwiha-tho”. — Yoh. 12:28.

10-11. a) Yesu aatteelinhe sai nsina na Yehova? (Nwehe eteseenyu.) b) Xeeni nsina na Yehova nimpirisari aya otteelihiwa ni ovuwihiwa?

¹⁰ Nave Yesu aahivuwiha nsina na Tiithi awe. Mwa enamuna xeeni? Enamuna emosa, waari olaleya mikhalelo sa Tiithi awe ni itthu sootikiniha opanke awe. Masi eyo, kaahiyo ti etthu Yesu apanka awe paahi. Nsina na Yehova naanipirisari otteelihiwa ni ovuwihiwa.  b Yesu aahooniherya  efaita erina aya nsina na Tiithi awe, okathi aawiixuttiha awe atthareli awe nivekelo na ntakiheryo. Owo aahimmye so: “Tiithi ihu muri wiirimu, nsina nanyu nitteelihiwe”. — Math. 6:9.

¹¹ Xeeni nsina na Yehova nimpirisari aya otteelihiwa ni ovuwihiwa? Mwaha woowi, oxardim wa wEdeni, Satana khaamuttittiminhe Yehova Muluku ni aahimootherya itthu sinceene. Satana aahimmye wiira Yehova aari nawoothe ni aanaakhoottiherya Adamu ni Eva opuha. (Maph. 3:​1-5) Satana aahihimya-tho wiira enamuna Yehova onipaka awe itthu khahiyo yooloka. Mwaha wa itthu soowoothiwa Satana aahimmya awe, soowiiriha atthu okhalana moonelo woohiloka voohimya sa Yehova Muluku. Okathi wa Yoobi, Satana aahiwootherya arumeyi a Yehova wiira animurumeela mwaha woophavela etthu. Nave-tho, owo aahiwootherya apinaatamu wiira khanimphenta Yehova ni murima wootheene, nto okathi sinrowa aya waaphwanyaka mixankiho, awo anoohiya omurumeela. (Yoob. 1:​9-11; 2:4) Nuuvira okathi, aamusuweliwa ti pani aari nawoothe, Yehova aahiiso Satana.

‘KOOLEVA OKUMI AKA’

12. Etthu xeeni Yesu aalakenle awe opaka mwaha woophenta nsina na Yehova?

¹² Mwaha womphenta Yehova, Yesu aaniphavela opaka sootheene aawerya awe wiira otteelihe ni ovuwihe nsina na Yehova. Owo aaheemererya okhwa ophavelaka wooniherya wiira Yehova toowaarya ni enamuna onipaka awe itthu, ti yootepa oloka. c Ti maana aya aahimmye awe so: ‘Kooleva okumi aka’. (Yoh. 10:​17, 18) Adamu ni Eva, apinaatamu yaawo yaari oohittheka, khiyaamwiiwelenle Yehova ni yaahithanla okhala mpantta wa Satana. Moovirikana naawo, Yesu aaheemererya orwa valaponi wiira ooniherye moota amphenta awe Tiithi awe. Owo aahipaka eyo omwiiwelelaka Yehova okumi awe wootheene. (aHeeb. 4:15; 5:​7-10) Yesu khaahiyale ororomeleya okumi awe wootheene, hata okathi aakhwa awe vamwirini va nihaaxeryo. (aHeeb. 12:2) Mwaha woopaka eyo, Yesu aahooniherya wiira aanimphenta Yehova ni nsina nawe.

13. Xeeni Yesu aari awe mutthu aaphwanelela wooniherya wiira Satana nawoothe? (Nwehe eteseenyu.)

¹³ Itthu sootheene Yesu aapanke awe, saahooniherya wiira Satana tori nawoothe, ohiya Yehova! (Yoh. 8:44) Yesu onnimusuwela oratteene Yehova waavikana atthu ootheene yaatonko okhala. Nto, vaakhanle wiira itthu sootheene Satana aamootherya awe Yehova  saari seekeekhai, Yesu aamusuwela. Masi itthu sootheene aahimmye awe, khahiyo seekeekhai. Tivonto, Yesu khaahiyale okhala oororomeleya wiira aakiherye nsina na Yehova. Hata okathi yoole vaakhala aya wiira Yehova oroomunyanyala, Yesu aaheemererya okhwa ohiya ohimwiiwelela Tiithi awe oophenta. — Math. 27:46. d

“KOOMALIHA MUTEKO WAAKIRUMME ANYU OVARA”

14. Yehova omureelinhe sai Yesu mwaha woororomeleya?

¹⁴ Nivekelo Yesu aapanke awe ohiyu ohinatthi okhwa, owo aahimmye so: “Koomaliha muteko waakirumme anyu ovara”. Yesu aniroromela wiira Yehova ammutthuvela akhala wiira aamuroromeleya. (Yoh. 17:4) Tthiri eyo yaari ekeekhai. Yehova aahimutaphula Yesu mookhwaani. (Mit. 2:​23, 24) Yehova oomuhihimuxa Yesu ni onvaha okhulupale wiirimu. (aFil. 2:​8, 9) Nuuvira okathi, Yesu ookhalihiwa Mwene a Omwene wa Muluku. Omwene owo orowa opaka xeeni? Yesu aahihimya etthu Omwene owo onrowa aya opaka, mpantta wa nenli wa nivekelo na ntakiheryo. Owo aahimmye so: “Omwene anyu orwe. Ele eniphavela anyu yiireye vathi-va, ntoko wiirimu”. — Math. 6:10.

15. Etthu xeeni-tho ekina Yesu onrowa awe opaka?

¹⁵ Moohipisa, okathi wa ekhotto ya Harmagedoni, Yesu onoowana ni onimwaapwetexa awanani a Muluku ni atthu ootakhala. (Wiis. 16:​14, 16; 19:​11-16) Muhoolo mwaya, Yesu onrowa omutthukwa ni omurihela Satana “mulittini moowiixa” wiira ohaahapuxeke atthu. Okathi owo, vanrowa okhalaka ntoko wiira Satana orimookhwa. (Wiis. 20:​1-3) Yesu onoottikiherya murettele valaponi ni onimwaakhaliherya apinaatamu okhala oohittheka mwa Iyaakha Ekonto Emosa sa Olamulelo awe. Nave owo onimwaahihimuxa atthu akhwiiye ni onimwiiriha elapo yootheene okhala eparayiisu. Nuumala-vo, yoolakela ya Yehova enimwiiraneya! — Wiis. 21:​1-4.

16. Okumi onrowa okhala sai nuumala Olamulelo wa Iyaakha Ekonto Emosa?

 ¹⁶ Okumi onrowa okhala sai nuumala Olamulelo wa Iyaakha Ekonto Emosa? Etampi khenrowa-tho okhala. Apinaatamu khanrowa-tho opirisariki ovekela oleveleliwa mwaha wa itampi saya. Nave awo khanrowa opirisariki mukuttho woowoopola nnakhala namukuttho wiira akhalane ompatthani wooloka ni Yehova. Ohiya-vo, “okhwa, ti nwanani ookiserya onrowa opwetexiwa”. Ale akhwiiye anrowa ohihimuxiwa. Atthu ootheene valaponi, anrowa okhala oohittheka. — 1 aKor. 15:​25, 26.

17-18. a) Etthu xeeni enrowa wiiraneya wanikisa wa Iyaakha Ekonto Emosa sa Olamulelo wa Yesu? b) Etthu xeeni Yesu onrowa awe opaka wanikisa wa Olamulelo awe? (1 aKorinto 15:​24, 28) (Nwehe eteseenyu.)

¹⁷ Yookhala etthu emosa yootepa oreera enrowa wiiraneya nuumala Iyaakha Ekonto Emosa. Exeeni eyo? Khuuvo-tho onkela waanyiherya wiira Yehova, Muluku oowaarya ni axariya. Moota xeeni? Muhiliyale wiira, oxardim wa wEdeni, Satana aahimootherya Yehova okhala namalamulela oohiphenta ni oowootha. Okhuma okathi ole, nsina na Yehova nootteelihiwa ikwaha sinceene ni atthu yaale animphenta ni omuttittimiha. Nto wanikisa wa Iyaakha Ekonto Emosa sa Olamulelo wa Yesu, nsina nawe, nnoovuwihiwa moomalela. Nto khuuvo mutthu onrowa waaniheryaka wiira Yehova Tiithi oophenta vanceene.

¹⁸ Wookiseryani waya, vanimooneya wiira itthu sootheene Satana onimootherya awe Yehova ni apinaatamu, khahiyo seekeekhai. Exeeni Yesu onrowa awe opaka nuumala olamulelo awe ophiya waanikisa? Niireke owo onrowa otthara ntakiheryo na Satana ni ohiya omwiiwelela Yehova? Nnakhala vakhaani! (Mmusome 1 aKorinto 15:​24, 28.) Yesu onrowa omuttikiherya Omwene Tiithi awe ni onrowa omwiiwelelaka. Moovirikana ni Satana, Yesu onoopaka eyo okhala wiira onnimphenta Yehova.

19. Nsina na Yehova nintaphulela exeeni para Yesu?

¹⁹ Yehova aahikhalana mathowa ooloka, yaamwiirihale onvaha Yesu nsina ninlikana ni naawawe! Nave Yesu tori Murumeyi Muulupale a Yehova. Vano, nsina na Yehova nintaphulela exeeni para Yesu? Nintaphulela wiira, owo onnivaha efaita nsina na Yehova, ovikana itthu sootheene. Mwaha wa nsina nlo, Yesu ooleva okumi awe. Nto wanikisa wa Olamulelo wa Iyaakha Ekonto Emosa, owo ononvahererya itthu sootheene Tiithi awe. Ninrowa owerya sai otthara ntakiheryo na Yesu? Mwaha onittharelana onimwaakhula nikoho nna.