NTAKIHERYO NA ANAMUYARI AKA

Waattamela mwaakha wa 1960, anamuyari aka yaahithaama akhumaka wItália arowaka oSaskatchewan, oCanada. Moohipisa, naahiixutta ekeekhai. Miyo, apaapa, amaama, muulupale aka ni axirokoraka anli, naanivaha efaita ekeekhai. Kiri ene mwaana, kaaniviriha mahiku manceene kilaleeryaka ni emusi aka. Tivo, ikwaha sikina, kaanithweela kihimyaka so: “Kapioneero ookhaliherya”, nnaamwi kaarina iyaakha 8!

Anamuyari aka, khiyaarina musurukhu munceene. Masi hata vari siiso, awo yaaniimananiha ovara miteko sa Yehova. Mwa ntakiheryo, mwaakha wa 1963 awo yaahitumiha mireerelo saya, wiira akhalane musurukhu waarowa onikhaliherya omurowela konkresu internasionali aapakiwe oPasadena, oCalifórnia, wEstados Unidos. Mwaakha wa 1972, naaheetta ni komboi ikiloomo soowiiraka 1.000, nikhumaka epooma ya oTrail, oColúmbia Britânica, wiira nakhaliherye muttetthe naalavuliwa nttaava na wItália. Paapa aka, aavara muteko wa onxinyero. Owo aahikhootta eparakha ya okhalana musurukhu munceene, masi aahipaka eyo wiira incererye muteko anvarela awe Yehova.

Kinnixukhurela ntakiheryo anamuyari aka akivahale aya, miyo, muulupale aka ni axirokoraka anli. Ntakiheryo akivahale aya, nookiixuttiha ovara muteko wa Yehova. Awo aakiixuttiha etthu yuulupale kihinliyalaka mookumi mwaka. Etthu ene, tiila: Vakhala wiira nnoohela Omwene wa Muluku nipuro noopacerya, Yehova onrowa onikhapelelaka. — Math. 6:33.

OPACERYA OVARA MUTEKO WA OKATHI WOOTHEENE

Mwaakha wa 1980, kaahimuthela murokora ooreera, oniitthaniwa Debbie, yoowo onihela nipuro noopacerya muteko wa Yehova. Okhala wiira naaniphavela okela muteko wa Muluku wa okathi wootheene, Debbie aahipacerya okhala pioneera nuuvira miyeeri  miraru nithelanne ene. Nuuvira mwaakha mmosa nithelanne ene, hiyo naahithaamela muloko mmosa woothowa anamalaleerya, nto miyo kaahipacerya orumeela ntoko pioneero.

Nuuvira okathi, naahikhulumuwa, tivonto naaphavela othaama. Nihinatthi opaka eyo, naahirowa olavula ni mutokweene a esirkwiitu. Moophenta, owo aanilenle so: “Mixankiho iya, muniikumiherya aneene, maana muniwehexexa mixankiho paahi sinoophwanyani. Masi akhala wiira munoophavelasa itthu sooreera, munoophwanya”. Tthiri iye, saari miruku naareerela ahu ovahiwa. (Esal. 141:5) Moohipisa, naahiimananiha weettela miruku iye naavahiwe ahu. Tthiri saahikhala itthu sinceene sooloka. Atthu anceene mmulokoni, yaaniphavela wuncererya muteko yanvarela aya Yehova, waahela muhina amiravo ni ale yaathelanne ni mutthu ahaakhanle Namoona a Yehova. Nto naahiixutta etthu ya faita yinceene. Kihiixutta wiira kihaana wiimananiha owehexexa itthu sooloka, kimulipelelaka Yehova wiira onoophukha mixankiho sinkiphwanya. (Mik. 7:7) Moohipisa, naahitthikela ohakalala, nave itthu saanineettela saana.

Mapurusoore ahu a eskola ya mapioneero, yaahirumeela ilapo sikina. Awo yaahinooniherya ifootu ni yaahinileela mixankiho ni mareeliho yaaphwannye aya mwaha woorumeela ilapo iye. Nto naahikhalana yoolukama ya okhala mamisionaario.

Wiira niwerye ophwanya yoolukama eyo, mwaakha wa 1984 naahithaamela muttetthe waalavuliwa nttaava na eFrançes, oQuebec, weiwo waarakamelanne ikiloomo 4.000 ni oColúmbia Britânica. Nto naahaana wiixutta makhalelo masya ni nttaava nsya. Muxankiho mukina naarina ahu, waari ohikhalana musurukhu munceene. Ikwaha sikina, naahaana omulya patata reeno, yoowo naamuttotta ahu mmatta mwa atthu akina. Debbie aanisuwela omulokiherya oratteene patata mwa inamuna soovirikana! Hata naarina mixankiho iyo, naaniimananiha ovilela wiira nihakalaleke. Hiyo naanoona wiira okathi wootheene Yehova aaninikhapelela. — Esal. 64:10.

Nihiku nimosa, naalihikareliwa. Naalattuliwa orowa orumeelaka eBeteli ya oCanada. Naahihakalala olattuliwa orowa orumeela oBeteli, masi naahiriipiwa murima, okhala wiira niira nilempe ene epetisau ya orowa Eskola ya oGileyaadi. Hata vari siiso, naaheemererya orowa oBeteli. Okathi naaphiyale ahu oBeteli, naahimukoha munna Kenneth Littlen, yoowo aari a Ekomisau ya Efiliyaali wiira: “Ninrowa opaka exeeni vakhala wiira nnoolattuliwa orowa Eskola ya oGileyaadi?” Owo aahinaakhula wiira: “Nnoowehaka etthu nikhanle ahu oopaka vakhala wiira munoolattuliwa”.

 Nuumala esumana emosa niri ene oBeteli, miyo ni Debbie naahilattuliwa orowela Eskola ya oGileyaadi. Nto naahaana opaka yoothanla. Munna Littlen aahimmye so: “Khula etthu munrowa anyu othanla, muhiliyale wiira khalai mootoko opaka yoothanla. Moohicikha etthu enrowa anyu othanla, Yehova onimooreelihani”. Naaheemererya orowela Eskola ele ya oGileyaadi. Nave iyaakha saattharelana, naahoona wiira ele munna Littlen aahimmye awe yaari ekeekhai. Naanirumeela moolumo a munna Littlen, wiira naalipihe ale yaavahiwa soothanleliwa piili okathi omosa-ru.

ORUMEELA NTOKO MAMISIONAARIO

Naahihakalala okhala eriyari ya anaskola 24 a eturma 83 ya Eskola ya oGileyaadi. Eskola eyo, yaapacenrye Abril a 1987 oBrooklyn, oNova York. Munna Ulysses Glass ni munna Jack Redford ti yaari mapurusoore ahu prinsipaale. Nto miyeeri 5 sa eskola ele, saahaakuva ovira. Tivo, naahikaratuwari nihiku 6 na Setembro a 1987. Naahithanleliwa orowa elapo ya oHaiti vamosa ni John ni Marie Goode.

OHaiti, khiyaarohiwa mamisionaario okhuma mwaakha wa 1962, mwaakha yoowo yoomoliwe aya mamisionaario yaari elapo ele. Nuuvira isumana tthaaru nuumala okaratuwari, naahipacerya orumeela oHaiti muloko mwaamukhaani waarina anamalaleerya 35, yoowo waari eriyari ya miyaako ni waarakamenle ositati. Hiyo naari amiravo ni khinaasuwela itthu sinceene, nave naakhala empa ya mamisionaario. Atthu a muttetthe ole, yaari oohaawa ni khiyaasuwela oleeri. Mahiku oopacerya naarumeela ahu ntoko mamisionaario, saahiiraneya itthu iya: owana-wana wa anapoliitika, atthu yeererya omuhiiha kuvernu olamulela, manifestasau ni asikolooni.

 Naahiixutta itthu sinceene ni anna ni arokora a oHaiti, yaawo yaari oolipa murima ni oohakalala. Hata yaari oohaawa, yaanimphenta Yehova ni yaaniimananiha olaleerya. Murokora mmosa oowuuluvala ahaasuwela oleeri, owo aahihela mmuru soolepa 150. Mixankiho saakhanle muttetthe ole, saahiniiriha olaleya Omwene wa Muluku, yoowo onrowa omaliha mixankiho sa apinaatamu. Naahihakalala vanceene waaweha anaskola ahu a Biibiliya akina akhalaka mapioneero ookilaatheya, mapioneero a vameekhaaya ni axitokweene.

Nlelo nri ene oHaiti, kaahimusuwela mmiravo Trevor, yoowo aari misionaario a ekerexa Mormon. Nto ikwaha sinceene, naanivaanela myaha sa mbiibiliyani. Nuuvira iyaakha, kaahaakhela ekarta aakilepenle awe. Owo aalempe so: “Asembeleya onittharelana kinoopatisiwa! Kaaniphavela otthikela oHaiti wiira karumeeleke ntoko pioneero a vameekhaaya muttetthe mmosa-ru kaarumeelaka, ntoko misionaario a ekerexa Mormon”. Mwa iyaakha sinceene, owo aahikhala pioneero a vameekhaaya vamosa ni mwaarawe muttetthe ole.

OKHUMA WEUROPA NIROWAKA WÁFRICA

Hiyo naathanleliwe orowa mpantta mmosa wa wEuropa, opuro yoowo yahaareere aya othowa anamalaleerya. Mwaakha wa 1992, naahiphiya oLiubliana, wEslovênia, waattamela muttetthe naakhala ahu ni anamuyari aka, nihinatthi othaamela wItália. Khalai, elapo eyo yiihaniwa Iugoslávia, nave yaaniwaniwa ekhotto. Efiliyaali ya oViena, wÁustria vamosa ni iskritoorio sa oZagreb, oCroácia ni oBelgrado, oSérvia, ti saaweherya muteko woolaleerya muttetthe ole. Nuumala khula elapo okhala yootaphuwa, yaahikhalana eBeteli aya.

Hiyo naahaana wiixutta nttaava nsya ni ekultuura esya. Axineene mapuro awo, yaahimya so: “Jezik je težek”, moolumo yaawo anitaphulela wiira: “Nttaava nla ti noovila”. Nave ohimya ekeekhai, mattaava ale yaari oovila! Vaari voohakalaliha waaweha anna ni arokora oororomeleya, yeemereryaka marukunuxo anipakiwa mmutthekesoni ni awehaka moota Yehova onaareeliha awe. Ela yaari ekwaha ekina naawehale ahu moota Yehova onilokiherya awe itthu okathi wooreerela. Naahiixutta itthu sinceene okathi naari ahu wEslovênia. Nave itthu sikina naixuntte ahu khalai, saahinikhaliherya ovilela mixankiho saaniphwannye opuro ole.

 Masi yaahinikhumelela marukunuxo makina. Mwaakha wa 2000, naahithanleliwa orowa orumeela oCosta do Marfim, wÁfrica Ocidental. Mwaha wa ekhotto yaakhumelenle elapo ele, Novembro a 2002, naahitthyawela oSerra Leoa. Yiira emanle ene niinaano ekhotto yaavirihale iyaakha 11 ewaniwaka oSerra Leoa. Vaari vooxankiha okhuma oCosta do Marfim, moowaakuveya. Masi itthu naixuntte ahu, saahinikhaliherya ohihiya okhala oohakalala.

Naaniimananiha waalaleerya atthu, yaawo yaaphavela ekeekhai ni waakhaliherya anna ni arokora, yaawo mwa iyaakha sinceene yaavilenle ekhotto. Awo yaari atthu oohaawa, masi hata vari siiso, yaanaavaha atthu akina itthu yaarina aya. Murokora mmosa aahinvaha Debbie ikuwo vakhaani. Okathi ahaaphavela awe weemererya, murokora ole aahimukhanyererya, ohimyaka so: “Okathi wa ekhotto, anna ni arokora a ilapo sikina, yaahinikhaliherya. Vano ola okathi woowookhaliheryani nyuwo”. Nto naahilakela otthara ntakiheryo naya.

Nuuvira okathi, naahitthikela oCosta do Marfim, masi owana-wana iwe wa anapoliitika waahiiriha wuncerereya otakhala. Mweeri wa Novembro a 2004, naahaana okumihiwa ni elikoopeturu nitthyawaka ni epasta emosa paahi. Ohiyu ole, naarumpe vatthayani opaasi wa anakhotto a oFrança, nave nihiku naattharelana naahirowa oSuíça. Okathi naaphiyale ahu oBeteli ohiyu eriyari, anna a Ekomisau ya Efiliyaali ni mapurusoore yiixuttiha Escola de Treinamento Ministerial, vamosa ni axaaraya, yaahirwa onikupaarela, onivaha eyoolya yooviha ni onivaha xokolaati a oSuíça. Tthiri naahoona wiira naaniphentiwa vanceene.

Naahithanleliwa orowa orumeela mwa okathi vakhaani oGana. Nuumala-vo, naahitthikela orowa orumeela oCosta do Marfim mwa okathi vakhaani. Oreera murima wa anna ni arokora, woonikhaliherya ovilela okathi ole wooxankiha ni vaavo naavahiwa ahu soothanleliwa sa okathi vakhaani. Debbie ni miyo, naanuupuwela wiira nnaamwi anna ni arokora ari ene oophenta, masi okathi mukina eyo pooti ohiiraneya. Tthiri mahiku ale ooxankiha yaaniphwanya, yiirela mpantta wiixuttihiwa wahu.

ORUMEELA WORIENTE MÉDIO

Mwaakha wa 2006, naahaakhela ekarta yaakhuma Oseedi wa Olumwenku wootheene yaahimya wiira naahaana orowa orumeelaka wOriente Médio. Nto eyo yaataphulela wiira naahaana wiixutta nttaava ni ekultuura esya. Muttetthe ole, saahikhala mixankiho sinceene mwaha wa ipoliitika ni etiini. Waaninsivela waaweha anna ni arokora anceene alavulaka mattaava oovirikana, ni wiiraana onikhumelela mwaha wootthara malakiheryo, ninvahiwa ahu mmutthenkesoni mwa Yehova. Vaari voohakalaliha waaweha anna ni arokora, yaawo moolipa murima yaavilela olupatthiwa ni amusi aya, ale yaasomana aya oskola, yaavarana aya muteko ni mavisiinyu aya.

Mwaakha wa 2012, naahirowa onweha konkresu a vameekhaaya aapakiwe oTel-Aviv, wIsrael. Konkresu ole, yaari ekwaha yoopacerya yaathukumanne aya arumeyi a Yehova anceene, okhuma Pentekoositi a 33 Nuumala Kristu Orwa. Tthiri ole waari okathi woohiliyaleya!

Iyaakha iyo sootheene, naahirummwa orowa oxukurya ilapo seiyo muteko wa Anamoona a Yehova waakhoottihiwa aya ni kuvernu. Okathi naakhuma ahu, naanikuxa iliivuru wiira naavaheke atthu naalaleerya ahu ni naanaapaka asembeleya, yaawo yahaatta atthu. Khula opuro, yaanikhala atoropa akunxe  ene ikapwitthi ni yaanaawehaweha atthu, masi hata vari siiso, naanikhala oowehaweha ni naaneetta hoothe ni anamalaleerya vakhaani.

OTTHIKELA ORUMEELA WÁFRICA

Mwaakha wa 2013, naahithanleliwa orowa orumeelaka oBeteli ya oKinshasa, oCongo. Elapo ya oCongo, okhala wene, ti yooreera. Masi atthu anikhala elapo eyo, toohaawa ni sinniwaniwa ikhotto. Okathi naaleeliwe ahu wiira naarowa orumeelaka wÁfrica, naahuupuwela so: “Ninnisuwela wÁfrica, maana khalai nootoko okhala. Nto khaninrowa okhalana mixankiho sinceene oCongo”. Hata vari siiso, naahaana olimalela itthu sikina ntoko weetta mukwaha nirumeelaka ikalawa aahiiso ikaaro soohiloka. Mapuro ale naarowa ahu orumeelaka, saahikhala itthu sinceene saakhanle onlipiha. Eyo yaahela muhina ovilela ni ohakalala anna ni arokora yaarina aya, nnaamwi yahaarina itthu sinceene. Nave anna awo yaaniimananiha wiira alaleerye ni wiirela mpantta mithukumano sa mmulokoni ni asembeleya. Naahoona mmensihu wiira yaahikhala atthu anceene yaaphavela wiixutta ekeekhai. Ovara muteko wa Muluku wa okathi wootheene oCongo, wooniixuttiha itthu sa faita yinceene ni woonivaha apatthani, yaawo ari ntoko amusi ahu.

Wanikisa wa mwaakha wa 2017, naahithanleliwa orowa orumeelaka muttetthe mukina, wÁfrica do Sul. Hiyo naahithanleliwa orowa ovara muteko oBeteli, muteko yoowo nahaatonko ahu ovara. Nave-tho, mukwaha ola, naahaana wiixutta itthu sinceene. Masi itthu naixuntte ahu khalai, saahinikhaliherya ovara saana muteko ole. Hiyo ninnaaphenta vanceene anna ni arokora, yaawo avirihale iyaakha sinceene amuroromelaka Yehova. Ti voohakalaliha oweha emusi ya oBeteli, evaraka muteko moowiiraana, nnaamwi ari ene a ekultuura ni ilapo soovirikana. Vanniweryaneya oweha moota Yehova onaareeliha awe atthu awe, mwaha wa owara omutthu musya ni weettela malakiheryo a mbiibiliyani.

Mwa iyaakha sinceene, miyo ni Debbie naahikhalana soothanleliwa soohakalaliha, seiyo saanirihale olimalela ekultuura esya ni wiixutta mattaava masya. Ekeekhai wiira naanikhalana mixankiho, masi hata vari siiso, Yehova aanirumeela mutthenkeso awe ni aanaarumeela anna ni arokora wiira anooniherye ophenta wawe. (Esal. 144:2) Ovara muteko wa Muluku wa okathi wootheene, wooniixuttiha itthu sinceene ni woonikhaliherya olipiha waataana wahu ni Yehova.

Kinnaaxukhurela vanceene anamuyari aka ni itthu akiixuttihale aya. Nave, kinnixukhurela nikhaliheryo na mwaaraka Debbie ni matakiheryo ooloka kiixuntte aka a anna ni arokora a olumwenku wootheene. Miyo ni mwaaraka, ninnuupuwela itthu sinrowa oniiraneela muhoolo. Masi hata vari siiso, noolakela ohihiya osuwela itthu seiyo Mwiixuttihi ahu Muulupale, onnivaha awe.