MWAHA ONITHOKORERIWA 26
NSIPO 123 Nimwiiweleleke Yehova ni Mutthenkeso Awe
Moowiiyeviha, Mweemereryeke Itthu Muhiniiwexexa Anyu
“Khaninwerya omusuwela saana Muluku Oowerya Sootheene”. — YOOBI 37:23.
ELE NINROWA AHU WIIXUTTA
Mwaha ola, nnooweha wiira hata nihisuwelaka itthu sootheene sinrowa wiiraneya, nnoowerya ovilela mixankiho akhala wiira nnimuupuwelela itthu ninsuwela ahu ni omuroromela Yehova.
1. Yehova onipattunxe mwa enamuna xeeni, ni mwaha wa xeeni?
YEHOVA onipattunxe wiira niweryeke wuupuwela, wiixutta itthu isya ni osuwela moota wooweettela itthu nniixutta ahu. Xeeni ohalaka onipattuxa mwa enamuna eyo? Oonipattuxa mwa enamuna eyo, wiira ‘niixutte moota woomusuwela Muluku’ ni wiira nipakeke soothanla sooloka moovarihana ni itthu ninsuwela ahu okathi nimmurumela ahu. — Mir. 2:1-5; aRom. 12:1.
2. (a) Etthu xeeni nimpirisari ahu osuwela? (Yoobi 37:23, 24) (Nwehe eteseenyu.) (b) Xeeni ninreerela ahu wuupuwela wiira khaninsuwela itthu sootheene?
2 Ekeekhai wiira Yehova onipattunxe wiira nuupuweleke, masi khaninsuwela itthu sootheene. (Mmusome Yoobi 37:23, 24.) Muupuwele ntakiheryo na Yoobi. Yehova aahimukoha itthu sinceene Yoobi, seiyo saamukhalihenrye woona wiira khaasuwela itthu sinceene. Ovaanela iwe waahimukhaliherya Yoobi okhala oowiiyeviha ni oturuka enamuna yuupuwela awe. (Yoobi 42:3-6) Mwa enamuna emosa-ru, vannireerela wiiyeviha ni woona wiira khaninsuwela itthu sinceene. Okathi nnuupuwela ahu wiira khaninsuwela itthu sinceene, eyo enoonikhaliherya okhala oowiiyeviha ni ororomela wiira okathi wootheene Yehova onoonileela etthu nimpirisari ahu osuwela, wiira nipakeke soothanla sooloka. — Mir. 2:6.
Wuupuwela wiira khaninsuwela itthu sootheene, onoonikhaliherya ntoko siisaale yaamukhalihenrye aya Yoobi (Nwehe ettima 2)
3. Mwaha ola, ninrowa othokorerya exeeni?
3 Mwaha ola, nnooweha itthu sikina nihinsuwela ahu ni mixankiho sikhanle ookhumelela mwaha woohisuwela itthu iyo. Nave nnooweha oreera waya ohisuwela itthu sikina. Itthu ninrowa ahu wiixutta mwaha ola, sinoonikhaliherya omuroromela Yehova, yoowo “onisuwela itthu sootheene” ni onnileela itthu ninreerela ahu opaka. — Yoobi 37:16.
KHANINSUWELA OKATHI OLUMWENKU OLA ONROWA AYA OMALA
4. Moovarihana ni Matheyo 24:36, etthu xeeni nihinsuwela ahu?
4 Mmusome Matheyo 24:36. Khaninsuwela okathi makhalelo a olumwenku ola anrowa aya omala. Hata okathi Yesu aari awe valaponi, khaasuwela “nihiku nene ni ewoora ene”. a Muhoolo mwaya, okathi Yesu aari awe ni arummwa awe, aahaaleela wiira Yehova, yoowo ori mwaneene okathi oothanla “okathi itthu sinrowa aya wiiraneya”. (Mit. 1:6, 7) Yehova oothanla okathi onrowa awe omaliha makhalelo ootakhala a olumwenku ola, masi khaninwerya osuwela okathi ni ewoore ene enrowa aya wiiraneya.
5. Exeeni ekhanle ooniiraneela mwaha woohisuwela okathi ni ewoora ene wanikisa oniphiya aya?
5 Moovarihana ni ele Yesu aahimmye awe, hiyo khaninsuwela okathi mikavi onrowa ovira nlipelelaka omala olumwenku ola. Mwaha wa yeeyo, hiyo pooti opacerya ohipixa murima ni okhulumuwa, otepexa wene vakhala wiira nipacenrye khalai olipelela nihiku na Yehova. Nave hiyo pooti okhulumuwa, vakhala wiira amusi ahu aahiiso atthu akina anninitheya mwaha woowi wanikisa khophiyale. (2Ped. 3:3, 4) Woonasa wene, hiyo pooti wuupuwelaka wiira vaamunikhweela opixa murima ni ovilela oveehiwa, vaakhanle wiira ninnisuwela nihiku ni okathi ene wanikisa onirwa aya.
6. Xeeni vari aya vooloka ohisuwela okathi wanikisa onirwa aya?
6 Okhala wiira Yehova khonilenle wanikisa oniphiya aya, owo oonivaha eparakha ya omooniherya wiira ninnimukokhorela mwaha womphenta ni omuroromela. Hiyo nimphavela omurumeela Yehova mahiku ootheene, ohiya paahi mpakha olumwenku ola omala. Maana waamini wahu khorina eparaasu. Ohiya omakelaka wuupuwelela okathi “nihiku na Yehova” ninrwa aya, etthu yooreera ninreerela ahu opaka ori wuupuwelela itthu sooreera sinrowa wiiraneya nihiku nlo naphiya vale. Napaka eyo, nnootepa omwaattamela Yehova, wuncererya omuroromela wahu ni opaka khula etthu wiira nimuhakalalihe. — 2Ped. 3:11, 12.
7. Etthu xeeni ninsuwela ahu?
7 Ti vamiruku wuupuwela etthu ninsuwela ahu. Etthu ene, tiila: Mahiku ookiserya apacenrye mwaakha wa 1914. Yehova oonileela iprofesia sa mbiibiliyani sinooniherya ohiya paahi mwaakha ene, masi-tho, itthu sootheene saarowa wiiraneya moolumwenkuni okhuma mwaakha wa 1914. Hiyo ninnikupali wiira “nihiku nulupale n’Apwiya [Yehova] nri vakhiviru”. (Sof. 1:14) Nave ninnisuwela muteko Yehova oniphavela awe wiira nivareke ori waalaleerya ‘ihapari sooreera sa Omwene’ atthu ootheene. (Math. 24:14) Ihapari iyo, sinnilaleiwa ilapo soowiiraka 240 ni mattaava anivikana 1.000. Hiyo khanimpirisari osuwela “nihiku nene ni ewoora ene” wiira nikhaleleke nthiti olaleerya.
HIYO KHANINSUWELA ITTHU SOOTHEENE YEHOVA OKHANLE AWE OOPAKA
8. Moolumo oowi “miteko sa Muluku”, aniphavela ohimya exeeni? (Musuweli 11:5)
8 Okathi wootheene, ‘khaninwerya osuwela miteko sa Muluku’. (Mmusome Musuweli 11:5.) Moolumo ala anooniherya itthu Yehova onipaka awe aahiiso oneemererya awe wiiraneya, wiira opake ele oniphavela awe. Hiyo khaninsuwela itthu sootheene sinimwiiriha Yehova weemererya wiiraneya etthu aahiiso etthu onrowa awe opaka wiira onikhaliherye. (Esal. 37:5) Ntoko siisaale nihinwerya ahu osuwela oratteene moota oninnuwa awe mwaana ori mmirimani mwa muthiyana orupanle, hiyo ‘khaninwerya osuwela miteko sa Muluku’. Nave masientista khanisuwela moota eyo eniiraneya aya. Mwa enamuna emosa-ru, hiyo khaninwerya osuwela oratteene moota Yehova onipaka awe itthu.
9. Mwaha woohisuwela oratteene moota Yehova onrowa awe onikhaliherya, etthu xeeni ekhanle ooniraneela?
9 Mwaha woohisuwela moota Yehova onrowa awe onikhaliherya, pooti oniiriha opacerya woovelela opaka soothanla. Woonasa wene, hiyo pooti opacerya woovelela opaka marukunuxo mookumini mwahu, wiira nincererye muteko oninvarela ahu Yehova. Itthu iyo sinihela muhina okhweeherya okumi ahu wiira nakhaliheryeke mapuro oothowa anamalaleerya. Hiyo pooti opacerya wuupuwelaka wiira Yehova khonnireeliha mwaha woowi khaninwerya ophwanya soolukama sahu. Nave pooti okhalana muupuwelo owo, akhala wiira muteko ahu woolaleerya khonikhumela saana, aahiiso ninnikhalana mixankiho okathi ninvara ahu miteko sikina sa mutthenkeso wa Yehova.
10. Mikhalelo xeeni ninreerela ahu okhalana mwaha woohisuwela moota Yehova onrowa awe onikhaliherya?
10 Mwaha woohisuwela moota Yehova onrowa awe onikhaliherya, onninikhaliherya okhalana mikhalelo sa faita yinceene ntoko wiiyeviha. Ninniwerya woona wiira Yehova onnisuwela etthu eri yooloka para hiyo. (Yes. 55:8, 9) Nave ninnincererya omuroromela wahu Yehova ni wiixutta khula okathi omulipana yoowo wiira nikhumele saana. Vaavo ninkhumela ahu saana muteko woolaleerya aahiiso muteko mukina mmutthenkesoni mwa Yehova, ovuwa wootheene nihaana onvaha Yehova. (Esal. 127:1; 1aKor. 3:7) Nave okathi itthu sihineetta aya ntoko naaphavela ahu, nihaana wuupuwela wiira Yehova onnisuwela itthu sootheene. (Yes. 26:12) Hiyo nihaana opaka mpantta ahu, nilipelelaka wiira Yehova onoopaka mpantta awe. Ninnikupali wiira Yehova onoonivaha malakiheryo, hata ohipakaka eyo mwa mwiiriirya, ntoko aapaka awe khalai. — Mit. 16:6-10.
11. Itthu xeeni sa faita ninsuwela ahu voohimya sa Yehova?
11 Hiyo ninnisuwela wiira okhala wene Yehova toophenta, ta xariya ni ta miruku. Nave ninnisuwela wiira Yehova onnivaha efaita itthu nnimpakela ahu ni nnapakela ahu anna ni arokora. Nave ninnikupali wiira Yehova onnaareeliha ale animuroromela. — aHep. 11:6.
KHANINSUWELA ITTHU SINROWA WIIRANEYA MUHOOLO
12. Yakobo 4:13, 14, onniixuttiha exeeni?
12 Mmusome Yakobo 4:13, 14. Etthu ninkupali ahu okhala wiira khaninsuwela itthu sootheene sinrowa oniiraneela meelo. Olumwenku ninkhala ahu olelo-va, “oreriwa ni otakhaliwa khunimuthanla mutthu”. (Mus. 9:11) Mwaha waivaavo, khaninwerya osuwela vakhala wiira apalano ahu animweetta saana, nnakhala osuwela vakhala wiira meelo nnookhala akumi wiira nipake ele nimphavela ahu.
13. Etthu xeeni ekhanle ookhumelela vakhala wiira khaninsuwela etthu enrowa oniiraneela muhoolo?
13 Vannixankiha okathi nihinsuwela ahu itthu sinrowa oniiraneela. Moota xeeni? Woonasa wene, vakhala wiira ninnixanka ni etthu enrowa oniiraneela meelo, eyo pooti oniiriha operteri ohakalala. Okumi ahu pooti oturukeya mootutuxerya, nto eyo pooti onikumiherya mixankiho ntoko oriipiwa murima. Okathi itthu sihiniiraneya aya ntoko naalipelela ahu, pooti onikhulumula ni onyoonyiheya. — Mir. 13:12.
14. Ohakalala wahu onlipa ni exeeni? (Nwehe ifootu.)
14 Okathi sinniphwanya aya mixankiho, ninnikhalana eparakha yoowooniherya wiira moohicikha itthu sinrowa oniiraneela, hiyo nimmurumeela Yehova mwaha womphenta, ohiya mwaha wa itthu onnivaha awe. Biibiliya onninooniherya wiira nihilipeleleke wiira Yehova onoonikhapelela mixankiho sootheene sinniphwanya, nave owo khonnilepela itthu sinniiraneela mookumini mwahu. Yehova onnisuwela wiira ohakalala wahu, khonilipa ni itthu sinrowa wiiraneya muhoolo. Mweekeekhai, ohakalala wahu onilipa ni osuwela malakiheryo a Yehova ni weettela. (Yer. 10:23) Okathi ninroromela ahu wiira Yehova onoonikhaliherya opaka soothanla sooloka, khaninrowa oxankiheya ni etthu enrowa oniiraneela. Vanrowa okhalaka ntoko ninhimya wiira: “Yehova aphavela vale, nnookhala akumi ni nnoovara elexe ni elexe”. — Yak. 4:15.
Okathi nimmwiiwelela ahu Yehova ni weettela malakiheryo awe, ninnikhala oovarereleya (Nwehe ittima 14-15) b
15. Itthu xeeni ninsuwela ahu sinrowa wiiraneya muhoolo?
15 Ekeekhai wiira khaninsuwela itthu sootheene sinrowa wiiraneya muhoolo, masi ninnisuwela wiira Yehova oonilaiherya okumi woohimala. Atthu akina anrowa okhalaka wiirimu, vano atthu akina anrowa okhalaka valaponi vaava. Nave ninnisuwela wiira Yehova khonootha, ni khiivo etthu ekhanle oomukhoottiherya omaleliha itthu olaihenrya awe. (Tito 1:2) Yehova paahi tokhanle oolaleya ‘sinrowa wiraneya: Okhuma khalayi, onnilaleya itthu sihinatthi okhumelela’. Itthu sootheene Yehova aahimmye awe khalai wiira saamwiiraneya, tthiri iyo saahiiraneya. Nave itthu sootheene olaihenrya awe wiira onoopaka muhoolo, iyo sinimwiiraneya. (Yes. 46:10) Ninnikupali wiira khiivo etthu ekhanle oomukhoottiherya Yehova oniphenta. (aRom. 8:35-39) Moohicikha itthu sinrowa oniiraneela mookumini mwahu, owo onoonivaha ankhili, onoonimaaliha ni onoonivaha ikuru nimpirisari ahu wiira niwerye ovilela. Khanintikhina wiira Yehova onoonikhaliheryaka ni onireeliha. — Yer. 17:7, 8.
KHANINWERYA WIIWEXEXA ORATTEENE MOOTA YEHOVA ONNISUWELA AWE
16. Itthu xeeni Yehova onisuwela awe sa hiyo, nto munoonela sai osuwela eyo? (Esaalimu 139:1-6)
16 Musome Esaalimu 139:1-6. Mpattuxa ahu onninisuwela oratteene. Owo onnisuwela etthu enuupuwela ahu ni moonelo ahu. Nave onnisuwela itthu sinihimya ahu, siri vamurimani vahu, nimpaka ahu ni etthu eniirihale opaka. Mwene Davidi aahihimya wiira Yehova ori oolikana ene wiira onikhaliherye khula muxankiho onniphwanya. Munoonela sai osuwela wiira Mukhulupale a olumwenku, eyo piiyo, Mpattuxa a elapo onnookhapelelani nyuwo ni ootheene ahu? Niireke khamunoona wiira eyo etthu yoovara murima? Mwene Davidi ohimmye so: “Nyuwo munnikisuwela oratteene. Eyo etthu yootikiniha, kihiniwerya aka osuwela saana”. — Esal. 139:6.
17. Xeeni ikwaha sikina vanixankiha aya okupali wiira Yehova onninsuwela oratteene?
17 Pooti onixankihaka okupali wiira Yehova Tiitthi oophenta ni onnikhapelela, mwaha wa mahuweliwo ahu, ekultuura ahu ni itthu naakupali ahu nihinatthi wiixutta ekeekhai. Aahiiso mwaha wa soovonya nipanke ahu khalai, pooti wuupuwelaka wiira Yehova khoniphavela okhala mpatthani ahu ni ootepa onirakamela. Nave Davidi okathi mukina aanikhalana moonelo owo. (Esal. 38:18, 21) Nto mutthu yoole oniimananiha omwiiwelela Yehova, pooti wiikohaka so: ‘Vakhala wiira Muluku onnikisuwela, xeeni onikitumererya awe ohiya mweettelo aka kinoonaaka okhala wooloka?’
18. Xeeni vari aya vooloka wuupuwela wiira Yehova onninsuwela oratteene? (Nwehe ifootu.)
18 Ti vooloka weemererya wiira Yehova onninsuwela oratteene ni onniweha itthu sooloka nrina ahu, seiyo nihinwerya ahu oweha. Ohiya paahi Yehova oweha soovonya sahu, owo onniweha wiimananiha wahu wiira nimusivelihe, nave onniniphenta vanceene. (aRom. 7:15) Vaavo ninsuwela ahu wiira Yehova onniweha wiimananiha wahu, onninikhaliherya omurumeela moororomeleya ni moohakalala.
Okathi sinniphwanya aya mixankiho, Yehova onninikhaliherya ovilela olipihaka waamini wahu soolaiherya sa muhoolo (Nwehe ittima 18-19) c
19. Exeeni ninsuwela ahu voohimya sa Yehova?
19 Hiyo ninnikupali wiira Yehova ti ophenta. (1Yoh. 4:8) Ninnisuwela wiira itthu sootheene onnivekela awe, oniirela mureerelo ahu okhala wiira owo onniniphenta vanceene. Nave-tho, ninnisuwela wiira Yehova oniphavela wiira niphwanye okumi woohimala. Nto wiira eyo eweryaneye owo oonivaha yoowoopola. Mwaha wa Yesu okhwa para mureerelo ahu, ninnikupali wiira vanniweryaneya omusiveliha Yehova, hata ikwaha sikina nivonyaka. (aRom. 7:24, 25) Nave ninnisuwela wiira “Muluku ti muulupalexa ovikana mirima sahu, ni onnisuwela itthu sotheene”. (1Yoh. 3:19, 20) Okhala wiira Yehova onnisuwela oratteene, owo onnikupali wiira itthu onniruma awe nnoowerya opaka.
20. Xeeni nihinreerela ahu oxankiheya ni itthu nihiniiwexexa ahu?
20 Yehova onninileela itthu sootheene ninreerela ahu osuwela. Vaavo moowiiyeviha nneemererya ahu eyo, khanintepa oxankiheya ni itthu nihinsuwela ahu. Ohiya-vo, ninrowa owehexexaka paahi itthu seiye sirina efaita. Napaka eyo, nnimooniherya wiira ninniiyeviha ni ninnimuroromela Yehova yoowo “onisuwela itthu sootheene”. (Yoobi 36:4) Ekeekhai wiira nenna-va khaninwerya osuwela itthu sootheene, masi Yehova khonihiya oniixuttiha mahiku ootheene. Tthiri eyo etthu yooloka, okhala wiira khaninrowa ohiya wiixutta itthu isya voohimya sa Muluku ahu Yehova. — Mus. 3:11.
NSIPO 104 Munepa Wootteela ti Yoovaha ya Muluku
a Yesu tonrowa ohoolela ekhotto ya Armagedoni, yeeyo enrowa opwetexa olumwenku ola wa Satana. Tivonto, ti vookhalela ohimya wiira nenna-va Yesu onnisuwela nihiku ni ewoora ene enrowa aya opacerya ekhotto ya Armagedoni ni okathi onrowa awe ‘omaleliha oxintta wawe’. — Wis. 6:2, 19:11-16.
