1, 2. (a) Exeeni Yesu aalavunle awe ni awiixutti awe ohiyu ole ohinatthi wiiviwa? (Nwehe elatarato yoopacerya.) (b) Xeeni vari aya vootthuneya wuupuwela nthowa ninniiriha olaleerya? (c) Ninrowa othokorerya exeeni?

OHIYU Yesu ohinatthi wiiviwa, owo aahivaanela ni arummwa awe. Yesu aahaalipiherya wira aanaaphenta vanceenexa. Nave-tho, aahilavula nlikanyiho na evidera, nenne nilavunle ahu mwaha ovinre. Yesu aaphavela waalipiha awiixutti awe wira avikaniheke ‘wima mihokorokho sowatta’, eyo piiyo, avileleke okathi yaarowa aya olaleyaka muhupi wa Omwene.​—Yohani 15:8.

² Yesu aahaaleela awiixutti awe ohiya paahi ele yaatthuneya aya opaka masi-tho, aahaaleela nthowa naya yaatthuneya aya opaka. Nave aahaaleela nthowa naya yaatthuneya aya ovikaniha olaleerya. Tivonto, ti vootthuneya wuupuwela nthowa ninniiriha ovikaniha olaleerya. Wuupuwela eyo, enoonikhaliherya ovilela vaavo ninlaleya ahu ihapari “wira maloko othene esuwele”. (Matheyo 24:13, 14) Mwaha ola, ninrowa othokorerya mathowa maxexe a mBiibiliyani anniiriha  olaleerya. Nave-tho, ninrowa othokorerya soovaha xexe sinikhuma wa Yehova sinnikhaliherya wiima mihokorokho.

3. (a) Moovarihana ni Yohani 15:8, nthowa xeeni nuulupalexa ninniiriha olaleerya? (b) Mihokorokho sa nlikanyiho na Yesu, sinthoonyerya exeeni, ni xeeni nri aya nookhalela?

³ Nthowa nuulupalexa ninniiriha olaleerya, mwaha woowi nimphavela onvuwiha Yehova ni otteeliha nsina nawe. (Mmusome Yohani 15:1, 8.) Vaavo Yesu aalavunle awe nlikanyiho na evidera, aahimulikanyiha Yehova ni mulipa-oolima ematta ya evidera. Yesu aahimmye wira yena tori ematta ya evidera ni atthareli awe ti iritta. (Yohani 15:5) Tivonto, mihokorokho sa uuva sinthoonyerya mihokorokho awiixutti a Yesu anikumiherya aya vaavo anilaleya aya ihapari sa Omwene. Yesu aahaaleela arummwa wira: “Ovuwa w’Atithi aka ti nno: wira mwimeke mihokorokho sowatta”. Vaavo evidera eniima aya mihokorokho sooloka, eyo ennimuhakalaliha mulimi. Vamosaru, vaavo nniimananiha ahu olaleya muhupi wa Omwene, ninnimuttittimiha ni onvuwiha Yehova.​—Matheyo 25:20-23.

4. (a) Nintteeliha sai nsina na Muluku? (b) Munoonela sai eparakha ela ya otteeliha nsina na Muluku?

⁴ Nsina na Muluku ti noowaarya. Nto khiivo etthu ekhanle ahu oopaka wira niirihe otepa waarya. Moota xeeni nintteeliha ahu nsina na Muluku okathi onilaleerya ahu? Nwehe wira profeta Yesaya aahimmye so: “Yahvéh [Yehova] ànakhotto pahi mmòne ntoko òttela”. (Yesaya 8:13, Biblya Exirima) Tthiri ninnitteeliha nsina na Muluku, noowi Yehova, vaavo nnoona ahu okhala nuulupalexa ovikana masina otheene ni vaavo nnaakhaliherya ahu atthu akina woona wira ti noowaarya. (Matheyo 6:9) Mwa ntakiheryo, okathi ninwiixuttiha ahu atthu ekeekhai voohimya sa mikhalelo sooloka sa Yehova ni soolakela sawe wa apinaatamu wira akhaleke mParayiisu valaponi, ninnaakhaliherya woona wira itthu Satana onihimya awe onimootherya Yehova. (Maphattuwelo 3:1-5) Nave-tho, ninnitteeliha nsina na Muluku, vaavo nnaakhaliherya ahu atthu osuwela wira Yehova toniphwanela “wakhela ovuwa ni nttittimiho n’uwerya”. (Wisupulula 4:11) Rune, yoowo onivara muteko wa opioneero iyaakha 16, onihimya wira: “Kinnixukhurela osuwela wira koovahiwa eparakha ya olaleerya voohimya sa Mpattuxa a olumwenku. Nto eyo ennikiiriha ophavela ovikaniha olaleerya”.

5. (a) Nthowa xeeni ninniiriha olaleerya nri Yohani 15:9, 10? (b) Yesu aakhalihenrye sai awiixutti awe woona wira yaahaana ovilela?

⁵ Mmusome Yohani 15:9, 10. Nthowa na nenli, ninniiriha olaleya muhupi wa Omwene, mwaha woowi ninnimphenta Yehova ni Yesu. (Marko 12:30; Yohani 14:15) Yesu aahaaleela awiixutti awe wira yaahaana ‘okhala mophentani mwawe’. Exeeni yaamwiirinhe Yesu ohimya siiso? Okhala wira aahisuwela wira atthareli awe yaahaana ovilela  wira avikaniheke okhala maKristau eekeekhai. Tthiri, Yohani 15:4-10, ninnoona wira Yesu aahirumeela ikwaha sinceene nuulumo noowi ‘okhala’, wira aakhaliherye awiixutti awe woona wira yaahaana ovilela.

6. Nnooniherya sai wira ninniphavela okhala moophentani mwa Kristu?

⁶ Ninrowa wooniherya sai wira ninniphavela okhala moophentani mwa Kristu wira oneemererye okhala atthareli awe? Ninnooniherya eyo nimwiiwelelaka. Yesu onnivekela paahi etthu aapaka awe. Yesu aahimmye so: ‘Ntoko miyo kinettelaka soruma s’Atithi, kinnikhala mophentani mwaya’. (Yohani 15:10) Nto Yesu oonivaha ntakiheryo.—Yohani 13:15.

7. Wiiwelela onivarihana sai ni ophenta?

⁷ Yesu aahooniherya wira, wiiwelela onnivarihana ni ophenta, oriki: “Ole onakhela ikano saka, anettela, yowo t’onkiphenta”. (Yohani 14:21) Ikano sa Yesu sinikhuma wa Yehova. Tivonto, vaavo nimmwiiwelela ahu Yesu nlaleeryaka, ninnooniherya wira ninnimphenta Yehova. (Matheyo 17:5; Yohani 8:28) Nave, vaavo nnimphenta ahu Yehova ni Yesu, nnoowerya okhala moophentani mwaya.

8, 9. (a) Nthowa xeeni nikina ninniiriha olaleerya? (b) Xeeni masu a Yehova ari Ezekiyeli 3:18, 19 ni 18:23, anniiriha aya ovikaniha olaleerya?

⁸ Nthowa na neeraru ninniiriha olaleerya mwaha woowi nimphavela waalopola atthu voohimya sa nihiku na Yehova. MBiibiliyani, Nowe onnihimmwa okhala mulipa “alaleya exariya”. (Mmusome 2 Pedru 2:5.) Ehinatthi Epula ya Mutaaseke, muhupi Nowe aalaleerya awe atthu waahela muhina waalopola wira olumwenku ole waarowa opwetexiwa. Exeeni enniiriha ohimyaka siiso? Okhala wira Yesu aahimmye wira: “Tthirí, mahiku awo, ehalaka orupa epula ya Mutáseke, atthu yanilya, yaniwurya, yanithelana, mpakha nihiku Nowé nakenlyawe mukalawani. Awo khiyànyiherya etthu, mpakha ophiya epula ya Mutáseke, khuwivakasa atthu othene. Vanimwiraneya siso-tho okathi onrwawe Mwana a mutthu”. (Matheyo 24:38, 39) Nnaamwi atthu anceene yahaacalela muhupi Nowe aalaleya awe, moororomeleya owo aahilaleya muhupi woolopola Yehova anvanhe awe.

⁹ Olelo-va, ninnilaleya muhupi wa Omwene wira atthu yiixutte yoolakela ya Muluku wa apinaatamu. Ntoko Yehova, hiyo  nimphavela wira atthu awiriyane muhupi “wira akhaleke [akumi]”. (Ezekiyeli 18:23) Okathi onilaleerya ahu empa ni empa ni khula opuro, ninnaalopola atthu anceene wira Omwene wa Muluku onrowa opwetexa olumwenku ola wootakhala.​—Ezekiyeli 3:18, 19; Daniyeli 2:44; Wisupulula 14:6, 7.

10. (a) Nthowa xeeni ninniiriha olaleerya nihimmwale Matheyo 22:39? (b) Paulo ni Sila yaamukhalihenrye sai guarda oFilipi?

¹⁰ Nthowa na neexexe ninniiriha ovikaniha olaleerya mwaha woowi ninnaaphenta atthu. (Matheyo 22:39) Ophenta iwo onninikhaliherya ovikaniha olaleerya, okhala wira atthu anceene pooti oturuka moonelo aya vaavo makhalelo aya anturukeya aya. Mwa ntakiheryo, anamalupattha, yaahimurihela Paulo ni Sila mukhatteya epooma ya oFilipi. Masi ohiyu eriyari, yaahikhumelela etetere yaahononne mikhora sa ekhatteya. Vano guarda aahoova vanceene onaphavela wiixiiva uupuwelaka wira ale yaatthukweliwe yaahitthyawa. Masi Paulo aahimukhuwelela oriki: “Muhìsirihe yotakhala!” Vano guarda owo aahikoha wira: “Kìreke exeni wira kòpowe?” Nto Paulo ni Sila yaahimwaakhula wira: “Mmwaminiki Pwiya Yesu: munimopowa”.​—Miteko 16:25-34.

11, 12. (a) Yowiiraneya ya guarda ookhatteya, enniixuttiha exeeni voohimya sa muteko woolaleerya? (b) Xeeni nimphavela ahu ovikaniha olaleerya?

¹¹ Yowiiraneya ya guarda ole, enniixuttiha exeeni voohimya sa muteko woolaleerya? Moone wira nuumala okhumelela etetere, guarda ole aahituruka moonelo awe onavekela nikhaliheryo. Moolikanasa, atthu yaale ahimphavela wiiwa muhupi wa Biibiliya, pooti oturuka moonelo aya ni ovekela nikhaliheryo vaavo enaakhumelela aya ehasara. Mwa ntakiheryo, atthu akina pooti oxanka mwaha wowoomoliwa omutekoni aahiiso omwalana. Akina pooti oriipiwa murima vanceene okathi ansuwela aya wira aakhalana eretta yuulupale aahiiso okhweliwa mmusi aya. Vaavo itthu iyo sinikhumelela aya, atthu pooti opacerya wiikoha voohimya sa okumi aya, etthu yeeyo khalai yahuupuwela aya. Nave awo pooti wiikoha so: ‘Kipakeke exeeni wira koopowe?’ Nto pooti ophavelaka wiiwa muhupi wa nlipelelo onilaleya ahu.

¹² Tivonto, akhala wira moororomeleya ninnivikaniha olaleerya, nnimwaakhaliherya atthu awo aniphavela wiiwa. (Yesaya 61:1) Charlotte, yoowo ovirinhe iyaakha 38 ori ene pioneera, onihimya so: “Atthu anceene aarimeela. Nto ahaana ovahiwa eparakha ya wiiwa ihapari sooreera”. Ejvor yoowo ovirinhe iyaakha 34 ori ene pioneero onihimya so: “Olelo-va, atthu anootepa oxanka. Nto kimphavela waakhaliherya. Eyo ennikiiriha waalaleerya”. Tthiri, waaphenta wahu atthu ti etthu enniiriha ovikaniha olaleerya!

13, 14. (a) Yoovaha xeeni enilavuliwa Yohani 15:11? (b) Ninrowa ophwanya sai otteeliwa murima Yesu aarina awe? (c) Moota xeeni otteeliwa murima onnikhaliherya aya olaleerya?

¹³ Ohiyu ole Yesu ohinatthi wiiviwa, aahilavula soovaha saarowa waakhaliherya arummwa awe ovikaniha wiima mihokorokho. Soovaha xeeni, ni sinrowa onikhaliherya sai olelo-va?

¹⁴ Otteeliwa murima. Niireke muteko woolaleerya ti woolemela? Nnakhala vakhaani. Nuumala olavula nlikanyiho na evidera,  Yesu aahimmye wira vaavo ninlaleerya ahu nnoophwanya otteeliwa murima wa Kristu. (Mmusome Yohani 15:11.) Moota xeeni? Muupuweleke wira nlikanyiho nawe, Yesu aahiilikanyiha ni evidera, nto awiixutti awe ni iritta. Okhala wene, iritta sinnikhalana maasi ni yoolya mwaha woowi siri vamwirini vaya. Moolikanasa, nnoowerya otteeliwa murima akhala wira nihaataana ni ninnitthara mavalo a Yesu. Eyo enooniphwanyiha otteeliwa murima aarina awe ni ohakalala mwaha woopaka yootthuna ya Muluku. (Yohani 4:34; 17:13; 1 Pedru 2:21) Hanne, yoowo ovirinhe iyaakha sinivikana 40 ori ene pioneero onihimya so: “Ohakalala oniphwanya aka nuumala olaleerya, onnikiiriha ovikaniha ovara muteko wa Yehova”. Otteeliwa murima onoonikhaliherya ovikaniha olaleerya hata atthu anceene ahiphavelaka oniwiriyana.​—Matheyo 5:10-12.

15. (a) Yoovaha xeeni enilavuliwa Yohani 14:27? (b) Moota xeeni murettele onnikhaliherya aya ovikaniha wiima mihokorokho?

¹⁵ Murettele. (Mmusome Yohani 14:27.) Ohiyu ole Yesu aarowa awe wiiviwa, aahaaleela arummwa awe wira: “Kinovahani murettele aka”. Moota xeeni murettele wa Yesu onnikhaliherya aya ovikaniha olaleerya? Vaavo ninvikaniha ahu olaleerya, ninnikhalana murettele mwaha woosuwela wira ninnimuhakalaliha Yehova ni Yesu. (Esalimo 149:4; aRoma 5:3, 4; aKolosi 3:15) Ulf, yoowo ovirinhe iyaakha 45 ori ene pioneero, onihimya wira: “Nnaamwi okathi mukina muteko woolaleerya okikhulumulaka, masi onnikiphwanyiha ohakalala ni okumi wooloka”. Ninnixukhurela mwaha woowi noophwanya murettele wekeekhai!

16. (a) Yoovaha xeeni enilavuliwa Yohani 15:15? (b) Arummwa yaarowa ovikaniha sai okhala apatthani a Yesu?

¹⁶ Ompatthani. Nuumala Yesu waaleela arummwa awe wira aaphavela wira atteeliweke murima, aahaatthokiherya otthuneya waya wooniherya ophenta wekeekhai. (Yohani 15:11-13) Nuumala-vo, Yesu aahimmye wira: “Kiniwirelani apatthani aka”. Tthiri eparakha yuulupale okhala mpatthani a Yesu! Masi, arummwa yaarowa ovikaniha sai okhala apatthani a Yesu? Yesu aatthokihenrye so: “Murowé mwireke sorera”, niire so, wiima mihokorokho. (Mmusome Yohani 15:14-16.) Mwa enamuna ekina, awo yaahaana ovikaniha olaleerya. Iyaakha  piili saavinre Yesu ohinatthi olavula siiso, owo aahaaleela arummwa awe wira: “Virani mwettaka, mulaleyaka wira: ‘Omwene wa wirimu ori vakhiviru!’” (Matheyo 10:7) Ti nthowa naya ohiyu ole Yesu ohinatthi wiiviwa, aalipinhe awe awiixutti awe wira avileleke vaavo yaarowa aya olaleeryaka. (Matheyo 24:13; Marko 3:14) Tthiri Yesu aanisuwela wira khivaarowa okhweyaka olaleerya. Masi awo yaahaana opaka eyo ni ovikaniha okhala apatthani awe. Moota xeeni? Akhaliheriwaka ni yoovaha ekina.

17, 18. (a) Yoovaha xeeni enilavuliwa Yohani 15:7? (b) Moota xeeni yoovaha eyo enaakhaliherya aya awiixutti a Yesu? (c) Soovaha xeeni sinnikhaliherya olelo-va?

¹⁷ Waakhuliwa wa mavekelo ahu. Yesu aahimmye wira: “Nvekeleke etthu p’itthu entthunanyu: munovahiwaka”. (Yohani 15:7, 16) Mwekeekhai, yooleiherya ya Yesu yaahaalipiha arummwa! * (Nwehe enoota.) Arummwa khiyaasuwela saana wira moohipisa Yesu aarowa wiiviwa. Masi okhwa wawe khiwaataphulela wira khiyaarowa okhalana nikhaliheryo. Maana Yehova aarowa waakhulaka mavekelo aya ni waakhaliherya muteko woolaleerya. Nto eyo ti etthu Yehova aapanke awe. Moohipisa, nuumala Yesu wiiviwa, arummwa yaahimuxonttela Yehova wira aavahe olipa murima, nto Yehova aahiwaakhula.​—Miteko 4:29, 31.

¹⁸ Eyo ti etthu eniiraneya olelo-va. Vaavo ninvilela ahu muteko woolaleerya, ninnivikaniha okhala apatthani a Yesu. Nave nikupaliki wira, okathi ninkumana ahu mixankiho naalaleeryaka, Yehova onimwaakhula mavekelo ahu. (aFilipi 4:13) Ninnixukhurela vanceene, osuwela wira Yehova onnaakhula mavekelo ahu ni okhala apatthani a Yesu. Soovaha iya sa Yehova sinninikhaliherya ovikaniha wiima mihokorokho.​—Yakobo 1:17.

19. (a) Xeeni ninvikaniha ahu olaleerya? (b) Exeeni ennikhaliherya omaleliha muteko nivahiwa ahu ni Muluku?

¹⁹ Mwaha ola, nihiixutta mathowa maxexe anniiriha ovikaniha olaleerya. Mathowa ene taala: ninninvuwiha Yehova ni otteeliha nsina nawe, omphenta Yehova ni Yesu, waalopola ni waaphenta atthu. Nave nihiixutta soovaha xexe: otteeliwa murima, murettele, ompatthani ni waakhuliwa wa mavekelo ahu. Soovaha iya, sinninikhaliherya omaleliha muteko nivahiwa ahu ni Muluku. Tthiri, Yehova onnihakalala vanceene vaavo onniweha awe niimananihaka wira ‘nimeke mihokorokho sowatta’!