1. Yehova aamurumenle sai Pedru ohinatthi okhwa?

 MURUMMWA Pedru aanisuwela wiira aamookhwa moohipisa. Mwa iyaakha sootheene aamurumeela awe Yehova moororomeleya, owo aanimuhoola Yesu muteko woolaleerya, aahipaceriha muteko woolaleerya mittetthe soovirikana ni aahirumeela ntoko munna a nikhuuru noolamulela. Masi muteko wa Pedru nlelo khiwaamanle. Mwa iyaakha sa 62-64 Nuumala Kristu Orwa, Yehova aahimurumeela wiira olepe ikarta piili sa mbiibiliyani, Pedru oopacerya ni a nenli. Owo aanilipelela wiira ikarta iye piili, saamwakhaliherya makristau hata nuumala yena okhwa. — 2 Ped. 1:12-15.

2. Moota xeeni ikarta sa Pedru saalempwale aya okathi wooreerela?

² Pedru aahilepa ikarta sawe piili aarummwale awe, okathi anna ni arokora yeehereriwa aya ni “itthu soovirikana”. (1 Ped. 1:6) Atthu yaarina soophavela soohiloka, yaaheererya ohonona muloko wa ekristau arumeelaka soowiixuttiha ni mweettelo woohiloka. (2 Ped. 2:1, 2, 14) Makristau yaakhala oYerusalemu yaahoona wiira waari vakhiviru “omala wa itthu sotheene”, eyo piiyo, anakhotto a aroma yaarowa opwetexa epooma ele ohela muhina etemplo. (1 Ped. 4:7) Moohaanyiherya, ikarta iye piili Pedru aalempe awe, saahaakhaliherya makristau oxintta mixankiho iye ni wiilokiherya wiira axintte sikina muhoolo. b

3. Xeeni ninreerela ahu ovaha ephoole ikarta sa Pedru?

³ Ekeekhai wiira ikarta iye Pedru aalepenle makristau a eseekulu yoopacerya, masi Yehova oheemererya wiira silempwe mbiibiliyani. Nave hiyo pooti ottottela mureerelo ikarta iyo. (aRom. 15:4) Ntoko makristau oopacerya, ninkhala olumwenku  atthu anceene arina aya mweettelo woohiloka. Mwaha waivaavo, sinniniphwanya mixankiho sinceene ni ikwaha sikina pooti ovilaka omurumeela Yehova. Ohiya-vo, moohipisa anooniphwanya maxakha maalupale ovikana ale yaaphwannye ayuda, okathi waapwetexiwa aya oYerusalemu vamosa ni etemplo. Ti maana aya malakiheryo ari ikarta iyo piili sa Pedru aakhalana efaita yuulupale wa hiyo. Malakiheryo awo anninikhaliherya ohihiya olipelela nihiku na Yehova, ohiwoova atthu ni waaphenta atthu akina. Axitokweene aarumeelaka malakiheryo awo, pooti waakhaliherya anna ni arokora sinaaphwanya mixankiho, wiira alipihe waamini waya.

4. Moovarihana ni 2 Pedru 3:3, 4, exeeni ekhanle oovukula waamini wahu?

⁴ Hiyo ninkhala eriyari ya atthu ahinikupali iprofesia sa mbiibiliyani. Atthu akina anninramusa mwaha woowi ninnilaleya mwa iyaakha sinceene wiira wanikisa ori vakhiviru. Nave akina annivaanyiha ahimyaka wiira khonikhala-khala ophiyaka wanikisa. (Mmusome 2 Pedru 3:3, 4.) Okathi ninwiriyana ahu soohimmwa iyo ni atthu nnaalaleerya ahu, ale nnivarana ahu muteko aahiiso amusi ahu waamini wahu pooti ovukuwa. Pedru onnitthokiherya etthu enrowa onikhaliherya.

5. Exeeni enrowa onikhaliherya olipelela moopixa murima omala wa makhalelo ootakhala? (2 Pedru 3:8, 9)

⁵ Atthu akina, pooti woonaka wiira Yehova onnipisa omaliha itthu sootakhala sa olumwenku ola. Moolumo a Pedru pooti onikhaliherya okhalana moonelo wooloka ni onuupuxerya wiira, moota Yehova onoona awe ovira okathi ti woovirikana ni apinaatamu. (Mmusome 2 Pedru 3:8, 9.) Yehova iyaakha 1.000 onoona ntoko nihiku nimosa. Owo toopixa murima, khoniphavela wiira nnakhala mutthu mmosa opwetexiwe. Masi waphiya okathi wooreerela Yehova onoomaliha otakhala wootheene. Nto nookhalana eparakha yoorumeela okathi ohanle, wiira naalaleerye atthu a olumwenku wootheene.

6. Exeeni ninreerela ahu opaka wiira “nuupuweleleke” nihiku na Yehova? (2 Pedru 3:11, 12)

⁶ Pedru onnintumererya wiira ‘nihiliyaleke’ nihiku na Yehova. (Mmusome 2 Pedru 3:11, 12.) Ninrowa owerya sai opaka eyo? Nnoowerya akhala wiira nnimuupuwelelaka, vaaweryaneya khula nihiku mareeliho ninrowa ahu waakhela elapo esya. Niireke mootoko wuupuwelela muri ene opuro wooreera nviraka epheyo, mulyaaka eyoolya yoosiva ni nwaakhelaka amusi ni apatthani anrowa ohihimuxiwa? Niireke mootoko wuupuwela mwaalaleeryaka ni owiixuttiha atthu ale akhwiiye khalai, moota iprofesia sa mbiibiliyani siiraneyale aya? Wuupuwelela itthu iyo onimookhaliheryani ohihiya olipelela ni okupali wiira wanikisa ori vakhiviru. Osuwela “itthu iya sihinatthi wiiraneya”, onoonikhaliherya ‘ohihapuxiwa’ ni soowiixuttiha soowoothiwa. — 2 Ped. 3:17.

7. Exeeni ekhanle ookhumelela mwaha wa owoova atthu?

⁷ Hiyo noosuwela wiira nihiku na Yehova niri vakhiviru. Nihaana wiimananiha opaka ele eniwerya ahu, wiira naalaleerye ihapari sooreera atthu akina. Masi ikwaha sikina, hiyo pooti ohiweryaka wooniherya olipa murima. Mwaha wa xeeni? Mwaha woowi hiyo pooti owoovaka atthu ntoko Pedru. Ohiyu Yesu aaphukeliwe awe, Pedru aahikhootta waakhulela wiira ari mutthareli a Yesu. Nave ikwaha sinceene aahihimya wiira khaamusuwela! (Math. 26:69-75) Nuuvira okathi, Pedru  aahixintta woova wawe. Owo aahimmye so: “Muhooveke etthu anoova aya, nnakhala oxanka”. (1 Ped. 3:14) Moolumo a Pedru anninikupaliha wiira nnoowerya oxintta owoova atthu.

8. Exeeni enrowa onikhaliherya wiira nixintte owoova atthu? (1 Pedru 3:15)

⁸ Exeeni enrowa onikhaliherya oxintta owoova atthu? Pedru onihimya so: “Vamurimani vanyu, mmuttittimiheke Kristu, ntoko Pwiya anyu”. (Mmusome 1 Pedru 3:15.) Eyo enihela muhina wuupuwelela okhulupale ni owerya orina awe Pwiya ahu mwene, Yesu Kristu. Mwakhalana eparakha yoowaalaleerya atthu akina, niireke munnixanka aahiiso woova? Okathi owo mmuupuweleke mwene ahu Yesu olamulelaka wiirimu orukureriwe ene ni malaikha manceene. Muhiliyale wiira Yesu “ookhalana okhulupale wotheene, wiirimu ni vathiva”. Nave onnileiherya wiira onrowa okhala ni nyuwo “mahiku otheene mpakha olumwenku ola omala”. (Math. 28:18-20) Pedru onnintumererya wiira ‘nihihiye’ waaleela atthu akina itthu ninkupali ahu. Niireke mwaaniphavela waalaleerya atthu akina omutekoni, oskola aahiiso mapuro makina? Muhinatthi, muupuweleke moota mukhanle anyu oopaka eyo ni mwiilokiheryeke moota woolavula. Munvekeleke Yehova wiira oovaheeni olipa murima ni mmuroromeleke wiira onimookhaliheryani oxintta owoova atthu. — Mit. 4:29.

9. Pedru aahiyale sai owooniherya niphento atthu akina? (Nwehe eteseenyo.)

⁹ Pedru aahiixutta moota aakhanle awe owooniherya niphento. Owo aari vamosa ni Yesu okathi aahimmye awe so: “Miyo kinnoovahani yooruma esya: Mphentaneke mukina ni mukhwaawe. Siisaale koophentalyaakani, ni nyuwo-tho mphentaneke mukina ni mukhwaawe”. (Yoh. 13:34) Hata vari siiso, nuuvira okathi Pedru aahitthikela owoova atthu ni aahikhootta olya vamosa ni anna ni arokora yahaakhanle ayuda. Paulo aahimpwapwela Pedru ohimyaka wiira “etthu aapanke awe” yaari yoohiloka. (aGal. 2:11-14) Pedru aaheemererya opwapweliwa iwe nave aahiixutta etthu. Nto ikarta sawe iye piili, owo aahittittimiherya wiira khivaniphiyerya ohimya wiira nookhalana niphento. Masi nihaana wooniherya ni miteko sahu wiira ninnaaphenta anna ni arokora.

10. Exeeni enrowa onikhaliherya wooniherya ‘ophenta woohoothereriwa’? Mutthokiherye. (1 Pedru 1:22)

¹⁰ Pedru aahimmye wiira nihaana waaphenta anna ni arokora mwa ekeekhai ohiya ophenta ‘woowothereriwa’. (Mmusome 1 Pedru 1:22.) Wiira niphentane mukina ni mukhwawe nihaana ‘wiiwelela ekeekhai’. Eyo enihela muhina okupali wiira “Muluku khonaathanya atthu”. (Mit. 10:34, 35) Hiyo khinaarowa wooniherya wiira ninniiwelela yooruma ya Yesu naathanlaka anna ni arokora nikhanle ahu oowaaphenta. Ekeekhai wiira hiyo pooti okhalanaka waataana woolipa ni anna ni arokora akina masi akina nnaari, ntoko Yesu iirale awe ni awiixutti awe. (Yoh. 13:23; 20:2) Pedru onnintumererya wiira “naaphenteke anna a olumwenku wotheene”, ntoko amusi ahu. — 1 Ped. 2:17.

11. Exeeni enihela muhina waaphenta anna “vanceene ni murima wootheene”?

¹¹ Pedru onnintumererya waaphenta anna ni arokora “Vanceene ni murima wotheene”. Nuulumo nna ophenta “vanceene” nintaphulela wiimananiha wooniherya ophenta hata vavilaka opaka eyo. Mwa ntakiheryo, mwaarowa opaka exeeni vaakhanle wiira munna mmosa ohooveehani aahiiso opaka etthu yoowereyaleni? Woonasa wene etthu yoopacerya mwaakhanle ayu oowuupuwela waari oomuttikiherya etthu oopakenle aweni ohiya omphenta. Masi Pedru aahiixuttihiwa ni Yesu, wiira opaka eyo khenimusivela Muluku. (Yoh. 18:10, 11) Pedru olempe so: “Muhiliveryeke yootakhala ni yootakhala ekhwaaya, aahiiso mwaaruwaniwaka, muhiruwaneke. Masi, nwiireleke sooreera akina, okhala wira mwiihaneliwe yeeyo ni Muluku, nto owo onrowa woovahani itthu sooreera”. (1 Ped. 3:9) Akhala wiira munimwaaphentaka vanceene anna ni arokora, munimwaarerelaka murima hata awo awiirelakani etthu yoohiloka.

12. a) Waaphenta anna ni arokora oniiriheke opaka exeeni? b) Moovarihana ni eviidiyu eni: Nilipiheke Wiiraana Wahu, exeeni nikhanle ahu oopaka?

¹² Ekarta awe yoopacerya, Pedru aahirumeela nuulumo noowi “mphentaneke vanceenexa”. Owo aahilavula eyo ophavelaka onisuweliha wiira ophentana “onnikhuneela itampi sinceene”. (1 Ped. 4:8) Woonasa wene, Pedru aanuupuwela itthu iixuntte awe ni Yesu iyaakha saavinre voohimya sa olevelela. Okathi ole, Pedru oona wiira anaareerela murima atthu akina aalevelelaka “ikwaha 7”. Masi Yesu aahimwiixuttiha Pedru, nave onniniixuttiha hiyo wiira nihaana waalevelela atthu akina “ikwaha 77”, aahiiso okathi wootheene vaareerelaka. (Math. 18:21, 22) Vakhala wiira vannoovilani weettela miruku iya, muhikhulumuwe! Ootheene ahu, okathi mukina vanninivila waalevelela atthu akina. Etthu eri ya efaita yuulupale, ori wiimananiha  waalevelela atthu akina ni okhaliha murettele. c

13. Muxankiho xeeni okhanle oowiiriha axitokweene ohikhalana okathi wowaalipiha anna ni arokora?

¹³ Moohaanyiherya, Pedru aanuupuwelela okathi wootheene masu Yesu aamulenle awe nuumala ohihimuxiwa ani: “Mukukhuleke ipwittipwitthi saka”. (Yoh. 21:16) Akhala wiira mwa mutokweene, musuweleke wiira moolumo ala anoohimyani nyuwo. Ekeekhai wiira pooti wooxankihakani ophwanya okathi wiira mukhapelele ipwittipwitthi sa Yesu. Okhala wiira mutokweene, ohaana ovaha eyoolya emusi awe, okhapelela mmuupuweleloni ni okhaliherya okhalana waataana wooloka ni Yehova. Ohiya-vo, awo ahaana ovaha ntakiheryo nooloka muteko woolaleerya, olokiherya ipantte sa mmulokoni, asembeleya ni akonkresu. Nave akina aakhalana muritti wookhaliherya ikomisau sinilavula ni ispitaali nave akina aniirela mpantta etepartamento ya muteko wooteka. Moohaanyiherya, axitokweene aakhalana muteko munceene!

14. Exeeni enrowa waakhaliherya axitokweene okhapelela saana ipwittipwitthi? (1 Pedru 5:1-4)

¹⁴ Pedru onnaaleela axitokweene wiira “mukhapeleleke nikoto na Muluku muhiyeriwe anyu”. (Mmusome 1 Pedru 5:1-4.) Akhala wiira mwa mutokweene moosuwela wiira munnaaphenta anna ni arokora ni munniphavela waakhapelela. Nave ikwaha sikina, pooti waatteliwaka miteko aahiiso okhulumuwa nto vahinaweryaneya omaleliha yoothanleliwa anyu. Akhala wiira eyo enoowiiranelani, munrowa opaka exeeni? Mmuleeleke Yehova muxankiho anyu. Pedru olempe so: “Akhala mutthu onirumeela, opakeke eyo olipanaka ikuru sinikhuma wa Muluku”. (1 Ped. 4:11) Woonasa wene anna ni arokora sinnaaphwanya mixankiho sihinrowa omala olumwenku ola wootakhala. Masi muhiliyale wiira “makampusi muulupale”, Yesu Kristu ookhalana owerya woonikhaliherya. Owo pooti opaka eyo okhuma nenna-va mpakha elapo esya. Yehova oniphavela wiira axitokweene yaaphenteke anna ni arokora, yaakhapeleleke ni yaavaheke “ntakiheryo nooloka”.

15. Mutokweene onaakhaliherya sai anna ni arokora? (Nwehe efootu.)

¹⁵ William, yoowo okhumme khalai orumeela  ntoko mutokweene, onnisuwela efaita erina aya waakhapelela anna. Nuumala opacerya oretta wa koronaviiru, khula esumana yena ni axitokweene akina yaanaalikarela anna a ekurupu aya. William onihimya so: “Anna anceene yaahikhalana miyuupuwelo soohiloka, okhala wiira yaari mekhaya owaani”. Okathi munna aahiiso murokora sinimphwanya aya mixankiho, William onninwiriyana ni ephoole wiira osuwele etthu enimuxankiha ni omukhaliherya. Nave onniphavelasa iliivuru ni iviidiyu musaitini mwahu, wiira omulipihe munna aahiiso murokora owo. Owo ohimmye so: “Tthiri ola okathi wooreerela nikhanle ahu oowaalipiha anna ni arokora. Okhala wiira ninniimananiha waakhaliherya atthu omusuwela Yehova, nave nihaana wiimananiha waakhaliherya anna ni arokora wiira ahihiye olipiha ompatthani aya ni Yehova”.

16. Ninrowa ovarihela sai muteko itthu niixuntte ahu ni ikarta sa Pedru?

¹⁶ Mpakha-va, nooweha itthu nniixutta ahu ni ikarta piili Pedru aalempe awe. Woonasa wene nyuwo mooweha etthu enireerela anyu olokiherya. Mwa ntakiheryo, niireke munniphavela wuupuwelela itthu sooloka ninrowa ahu okhalana elapo esya? Niireke mwaaniphavela waalaleerya atthu munivarana anyu muteko, ale munisomana anyu aahiiso a opuro mukina? Niireke munnuupuwela moota mukhanle anyu oowaaphenta vanceene anna ni arokora? Ankhi nyuwo axitokweene, niireke moolakela ohihiya waakhapelela anna ni arokora? Pooti wiira yookhala etthu munreerela anyu olokiherya, masi muheemererye eyo yookhulumulakani. Tthiri “Apwiya tooreera murima” nto awo animookhaliheryani opaka marukunuxo anireerela. (1 Ped. 2:3) Pedru onninlipiherya wiira: “Muluku . . . onoomaliherya wiixutta wanyu. Owo onimoolipihani, onimoovahani ikuru, ni onooweemexani”. — 1 Ped. 5:10.

17. Exeeni enrowa okhumelela akhala wiira khannihiya ovilela ni omweemererya Yehova oniixuttiha?

¹⁷ Woopaceryani Pedru uupuwela wiira khaaphwanela weetta ni Yesu. (Luka 5:8) Masi mwaha wa oreera murima wa Yehova ni Yesu, owo aahiwerya ovilela ni okhala mutthareli a Kristu. Yookhumelela aya Pedru aaheemereriwa “moomweneni ohinimala wa Pwiya ahu, ni Moopoli ahu Yesu Kristu”. (2 Ped. 1:11) Tthiri ala mareeliho oovara murima! Vakhala wiira munoomutakiha Pedru nvilelaka ni mmweemereryaka Yehova owiixuttihani, munimwaakhela etthuvo ya okumi woohimala. Mwiira siiso, “waamini wanyu onoowiirihani woopoliwa”. — 1 Ped. 1:9.