MWAHA ONITHOKORERIWA 42
Nvarexexe Ekeekhai ni Murima Wotheene
“Nvareryeke itthu sotheene, musuweleke ele eri yooloka. Nto nvarexexeke yeeyo”.—1 ATES. 5:21.
NSIPO 142 Nivarexexe Nlipelelo Nahu
ELE NINROWA AHU WIIXUTTA *
1. Etthu xeeni enaaxankiha atthu anceene?
OLELO-VA, sookhala itiini sinceene siniihimya okhala makristau ni sinihimya wira sinnimukokhorela Muluku ntoko oniphavela awe. Nto eyo, ennaaxankiha atthu anceene! Atthu akina anniikoha so: “Niireke yookhala etiini yekeekhai, wala itiini sotheene sinnimusiveliha Muluku?” Hiyo ninnikupali ni murima wotheene wira nniixuttiha ekeekhai. Nave enamuna nimmukokhorela ahu Yehova ennimusivela. Niireke vanniweryaneya okupali eyo ni murima wotheene? Nrowe niwehe itthu sinooniherya eyo.
2. Moovarihana ni 1 aTesalonika 1:5, etthu xeeni yaamukupaliha Paulo wira itthu aakupali awe saari seekeekhai?
2 Murummwa Paulo aanikupali ni murima wotheene wira aahiphwanya ekeekhai. (Mmusome 1 aTesalonika 1:5.) Etthu yaamukupaliha Paulo, khahiyo waari okhummwa murima. Maana Paulo aanisiveliwa vanceene osoma Nuulumo na Muluku. Owo aanikupali wira “soolempwa sotheene sinikhuma wa Muluku”. (2 Tim. 3:16) Etthu xeeni Paulo iixuntte awe okathi aasoma awe? Paulo aahoona itthu sooniherya wira Yesu aari Mesiya aaleiheriwe, itthu seiyo ahooleli a etiini ya ayuda yaakhootta aya. Ahooleli ale a itiini soowootha, yaahimya wira yaaniwiixuttiha atthu ekeekhai voohimya sa Muluku. Masi itthu yaapaka aya saanooniherya wira khiyaawiixuttiha atthu ekeekhai voohimya sa Muluku. (Tito 1:16) Moovirikana ni ahooleli ale a etiini ya ayuda, Paulo khaathanla mipantta sa Nuulumo na Muluku aareerela awe okupali ni mipantta ahaareerela awe okupali. Owo aaniphavela owiixuttiha atthu ni weettela “itthu sotheene Muluku oniphavela awe”.—Mit. 20:27.
3. Niireke nihaana osuwela waakhuliwa wa makoho ahu otheene wira nikupali wira noophwanya ekeekhai? (Nwehe ekaaxa eni: “ Miteko ni Miyuupuwelo sa Yehova ti Suulupale—‘Khaninwerya Walikela’”.)
3 Atthu akina anoona wira etiini yekeekhai tiile eniwerya waakhula makoho otheene, hata makoho yaale ahinaakhuliwa mBiibiliyani. Niireke eyo ekeekhai? Nkahaya nwehe ntakiheryo na murummwa Paulo. Owo aahaatumererya makristau wira yaahaana ‘ovarerya itthu sotheene’. Nave Paulo aaheemererya wira khaasuwela itthu sotheene sa mBiibiliyani. (1 aTes. 5:21) Paulo aalempe so: “Osuwela wahu khomalenle . . . Vano ninkhala ntoko ninweha vaxipelyuni ya eyuuma”. (1 aKor. 13:9, 12) Eyo enooniherya wira Paulo khaasuwela itthu sotheene sa mBiibiliyani ni hiyo khaninsuwela itthu sotheene sa mBiibiliyani. Masi hata vaari siiso, Paulo aanisuwela ele Muluku oniphavela. Nave aanisuwela oratteene wira itthu aakupali awe saari seekeekhai!
4. Ninrowa olipiha sai okupali wahu wira noophwanya ekeekhai? Mwaha ola, ninrowa othokorerya exeeni voohimya sa makristau ekeekhai?
4 Enamuna emosa nikhanle ahu ookupali wira noophwanya ekeekhai ori olikanyiha enamuna ya okokhorela yaakumiheriwe ni Yesu ni enamuna Anamoona a Yehova olelo-va animukokhorela aya Muluku. Mwaha ola, ninrowa oweha wira makristau ekeekhai (1) annikhootta waakokhorela amuluku eethiru, (2) annittittimiha nsina na Yehova, (3) annisiveliwa ekeekhai ni (4) anniphentana vanceene mukina ni mukhwaawe.
OKHOOTTA WAAKOKHORELA AMULUKU EETHIRU
5. Enamuna Yesu aamukokhorela awe Muluku enniixuttiha exeeni? Ninrowa weettela sai itthu Yesu iixuttinhe awe?
5 Okhala wira aanimphenta vanceene Muluku, okathi aari awe wiirimu ni aarwiiye awe valaponi, Yesu aamukokhorela Yehova paahi. (Luka 4:8) Nave aahiwiixuttiha atthareli awe wira yaahaana omukokhorela Yehova paahi. Yesu ni awiixutti awe khiyaarumeela ilatarato wira amukokhorele Muluku. Okhala wira Muluku ti munepa, khuuvo mutthu oniwerya opaka elatarato enaattamela ovuwa wa Yehova! (Yes. 46:5) Ankhi opaka elatarato ya masanto ni waavekela masanto awo? Yooruma ya nenli sa Sooruma Muloko, Yehova aahimmye so: “Muhìpakelá itthu sowùpiwa nnákhala ilatarato sa itthu s’osulu, walá sa vathí-va . . . Muhikokhorelé ohoolo waya”. (Okhum. 20:4, 5) Vannooneya oratteene wira ale aniphavela omusiveliha Muluku ahirumeeleke ilatarato okathi animukokhorela aya.
6. Olelo-va, enamuna xeeni ya okokhorela Anamoona a Yehova anitthara aya?
6 Alipa-oolepa sowiiraneya sa mulaponi, annisuwela wira makristau a okathi wa arummwa yaamukokhorela Muluku paahi. Mwa ntakiheryo, eliivuru A História da Igreja Cristã ehimmye wira makristau a okathi wa arummwa “khiyaaphavela orumeela ilatarato” opuro yaamukokhorela aya Muluku. Olelo-va, Anamoona a Yehova annitthara enamuna ya okokhorela yaatthariwa ni makristau a okathi wa arummwa. Hiyo khaninkokhorela ilatarato ni khannaavekela masanto, malaikha, nnakhala khaninvekela Yesu. Ohiya-vo, hiyo khaninkokhorela ipantera, nnakhala opaka etthu enooniherya wira nnaakokhorela makhulupale a mulaponi. Maana hiyo ninnitthara ni wiiwelela moolumo a Yesu ani: “Mmukokhoreleke Yehova Muluku anyu, ni mmurumeeleke yoowo paah”.—Math. 4:10.
7. Ovirikana xeeni okhanle eriyari ya Anamoona a Yehova ni itiini sikina?
7 Olelo-va, atthu anceene anaatthara ahooleli a itiini. Nto eyo, enniwiiriha waakokhorela amuluku eethiru. Atthu anceene annirowa ikerexa sa ahooleli awo a itiini, annithuma iliivuru saya ni annaavaha musurukhu wira akhaliherye itthu sinipakiwa ni ahooleli awo a itiini. Nave atthu akina annikupali itthu sotheene anihimya aya ahooleli awo a itiini. Nto atthu awo annihakalala vanceene okathi anikhala aya ni ahooleli aya a itiini vanakhala ntoko wira anwenhe mwaneene ene Yesu. Moovirikana ni atthu awo, ale animukokhorela Yehova ntoko oniphavela awe, khanaatthara apinaatamu. Nnaamwi yaattittimihaka vanceene ale anaahoolela, awo annikupali ni murima wotheene ele Yesu aahimmye awe oriki: “Nyuwo otheene mwa axinna”. (Math. 23:8-10) Hiyo khannaakokhorela apinaatamu akhale ahooleli a itiini wala anamalamulela a mulaponi. Nave khaninkhaliherya itthu soohiloka sinipakiwa ni ahooleli a itiini ni a epoliitika. Maana hiyo nimmukokhorela Muluku paahi ni khanniirela mpantta olumwenku. Vannooneya oratteene wira noovirikana ni itiini sikina siniihimya okhala makristau.—Yoh. 18:36.
NINNITTITTIMIHA NSINA NA YEHOVA
Makristau eekeekhai annaalaleerya atthu akina voohimya sa Yehova (Nwehe ittima 8-10) *
8. Ninsuwela sai wira Yehova oniphavela wira nivuwiheke nsina awe ni waasuweliha atthu akina?
8 Okathi omosa, Yesu aahinvekela Yehova oriki: “Tiithi, nvuwihe nsina nanyu”. Yehova aahaakhula nivekelo na Yesu olavulaka wiirimu ni nsu noowiiwanyeya, ohimyaka wira anvuwiha nsina nawe. (Yoh. 12:28) Okathi aalaleerya awe valaponi, Yesu aahivuwiha nsina na Tiithi awe. (Yoh. 17:26) Vannooneya oratteene wira makristau eekeekhai ahaana orumeela nsina na Muluku ni waasuweliha atthu akina.
9. Makristau a okathi wa arummwa yoonihenrye sai wira yaanittittimiha nsina na Muluku?
9 Moohipisa nuumala opakiwa muloko wa Ekristau okathi wa arummwa, Yehova aahitthikela wira ‘aathanle eriyari ya ale ahikhanle ayuda, atthu yaarowa wiihaneliwaka nsina nawe’. (Mit. 15:14) Arummwa ni awiixutti akina yaanirumeela nsina na Yehova okathi yaalaleerya aya ni yaalepa aya iliivuru sa mBiibiliyani. * Mwaha woopaka eyo, yaahooniherya wira yaari atthu yiihaneliwa nsina na Muluku.—Mit. 2:14, 21.
10. Itthu xeeni sinooniherya wira Anamoona a Yehova paahi taniihaneliwa nsina na Muluku?
10 Niireke Anamoona a Yehova paahi taniihaneliwa nsina na Muluku? Nkahaya nwehe itthu sinooniherya eyo. Olelo-va, ahooleli a itiini annipaka sotheene aniwerya aya wira avithe wala ahaasuwelihe atthu akina nsina na Muluku. Awo aakumiha nsina na Muluku aBiibiliya anaataphulela aya. Nave annaakhoottiha atthu orumeela nsina na Muluku mukerexa mwaya. * Vannooneya oratteene wira Anamoona a Yehova paahi tanittittimiha nsina na Muluku. Hiyo ninnaasuweliha nsina na Muluku atthu a olumwenku wotheene ovikana itiini sikina. Nave ninniimananiha okhala moovarihana ni nsina nahu, Anamoona a Yehova! (Yes. 43:10-12) Hiyo noomwimpirimiri Biibiliya a Elapo Esya ikoopiya sinivikana imilyau 240, yoowo onirumeela nsina na Yehova mapuro otheene naakumihiwe aya ni anamataphulela a Biibiliya. Nave hiyo ninnipaka iliivuru sinimutthokiherya Biibiliya, seiyo sinirumeela nsina na Muluku mattaava anivikana 1.000!
ONISIVELA EKEEKHAI
11. Makristau a okathi wa arummwa yoonihenrye sai wira yaanisiveliwa vanceene ekeekhai?
11 Yesu aanisiveliwa vanceene ekeekhai, niire so, ekeekhai ya Muluku ni ele oniphavela awe. Yesu aaneettela ekeekhai ni aanaasuweliha atthu akina. (Yoh. 18:37) Atthareli ekeekhai a Yesu annisiveliwa vanceene ekeekhai. (Yoh. 4:23, 24) Tthiri murummwa Paulo aahimmye wira waamini wa makristau “ephiro ya ekeekhai”. (2 Ped. 2:2, enoota.) Okhala wira yaanisiveliwa vanceene ekeekhai, makristau a okathi wa arummwa yaanikhootta soolema soohiloka ni miyuupuwelo soohiloka sihinivarihana ni ekeekhai. (aKol. 2:8) Mwa enamuna emosaru, olelo-va makristau eekeekhai anniimananiha weettela ekeekhai vaavo sookupali saya ni mweettelo aya onivarihana aya ni Nuulumo na Yehova.—3 Yoh. 3, 4.
12. Etthu xeeni anipaka aya vaavo ale annihoolela anoona aya wira wiiwexexa wahu ekeekhai ohaana olokiheriwa? Etthu xeeni eniwiiriha opaka eyo?
12 Anamoona a Yehova khanihimya wira okathi wotheene anniiwexexa oratteene itthu Biibiliya oniixuttiha awe. Okathi mukina, awo annivonya vaavo anitthokiherya aya ele Biibiliya oniixuttiha awe ni anivaha aya malakiheryo miloko. Eyo khennixankiha. Maana Biibiliya onnooniherya oratteene wira naarowa wiiwexexaka oratteene ekeekhai, vaavo okathi waarowa aya oviraka. (aKol. 1:9, 10) Nave Yehova onninikhaliherya wiiwexexa ekeekhai vakhaani-vakhaani, nto nihaana opixa murima nilipelelaka okathi ekeekhai enrowa aya otepaka waarya. (Mir. 4:18) Vaavo ale annihoolela anoona aya wira wiiwexexa wahu ekeekhai ohaana olokiheriwa, awo khanoovelela opaka marukunuxo. Ahooleli anceene a itiini sowootha annipaka marukunuxo wira yaasiveliheke atthu aneetta etiini aya wala avarihaneke ni muupuwelo wa atthu a mulaponi. Masi marukunuxo anipakiwa mmutthenkesoni mwa Yehova, anipakiwa wira anikhaliheryeke omwaattamela Muluku ni avarihaneke ni enamuna ya okokhorela yaakumiheriwe ni Yesu. (Yak. 4:4) Hiyo ninnipaka marukunuxo ohiya mwaha wa oturukeya muupuwelo wa atthu, masi mwaha woowi ninnimwiiwexexa Biibiliya. Tthiri hiyo ninnisiveliwa vanceene ekeekhai!—1 aTes. 2:3, 4.
NINNIPHENTANA VANCEENE
13. Mukhalelo xeeni muulupale makristau a okathi wa arummwa yooniherya aya? Etthu xeeni enooniherya wira Anamoona a Yehova anniphentana?
13 Makristau a okathi wa arummwa yaahikhalana mikhalelo sinceene, masi mukhalelo muulupale yooniherya aya ti ophenta. Yesu aahimmye so: “Atthu otheene anoosuwela wira mwa awiixutti aka, mwaaphentanaka mukina ni mukhwaawe”. (Yoh. 13:34, 35) Olelo-va, Anamoona a Yehova anniphentana ni toowiiraana olumwenku wotheene. Moovirikana ni itiini sikina, hiyo naatthu oowiiraana ntoko emusi emosaru hata niri ene a ilapo soovirikana, makhalelo oovirikana ni makhuli oovirikana. Ophentana wahu onnooneya oratteene okathi wa mithukumano, asembeleya ni akonkresu. Nto eyo enninikhaliherya woona wira enamuna ya okokhorela wahu ennimusivela Yehova.
14. Moovarihana ni aKolosi 3:12-14, enamuna xeeni yuulupale nikhanle ahu oowooniherya wira ninniphentana mukina ni mukhwaawe?
14 Biibiliya onnintumererya wira nihaana ‘ophentana vanceenexa’. (1 Ped. 4:8) Enamuna emosa nikhanle ahu oowooniherya wira ninniphentana ori olevelelana mukina ni mukhwaawe ni ohiwehexexa soovonya sa atthu akina. Hiyo ninniimananiha waavaha ni owaakhela atthu otheene a mmulokoni hata atthu yaale anninyoonyiha. (Mmusome aKolosi 3:12-14.) Vaavo nnooniherya ahu enamuna eyo ya ophentana, ninnooniherya wira na makristau eekeekhai.
“WAAMINI ORI OMOSA-RU”
15. Mwa inamuna xeeni sikina nintthara ahu enamuna ya okokhorela yaatthariwa ni makristau a okathi wa arummwa?
15 Sookhala inamuna sikina nintthara ahu voohimya sa enamuna ya okokhorela yaatthariwa ni makristau a okathi wa arummwa. Mwa ntakiheryo, mutthenkeso ahu otthokihiwe ntoko waatthokihiwe aya muloko wa makristau a okathi wa arummwa. Hiyo nookhalana axitokweene a esirkwiitu, axitokweene a mmulokoni ni arumeyi ookhaliherya. (aFil. 1:1; Tito 1:5) Nave naatakihaka makristau a okathi wa arummwa, hiyo ninnittittimiha malamulo a Yehova voohimya sa orupihana, ekasamento, ephome ni ninnikhapelela muloko wira ohihapuxiwe ni atthu ale anipaka itampi ahinattharuwa—Mit. 15:28, 29; 1 aKor. 5:11-13; 6:9, 10; aHeeb. 13:4.
16. Moolumo ari aEefeso 4:4-6, anniixuttiha exeeni?
16 Yesu aahimmye wira atthu anceene yaarowa ohimyaka wira atthareli awe, masi khiyaarowa okhala atthareli awe eekeekhai. (Math. 7:21-23) Nave Biibiliya aahihimya vahinatthi wira atthu anceene yaarowa “okhalaka ntoko annimurumeela Muluku”. (2 Tim. 3:1, 5) Ohiya-vo, Biibiliya onihimya wira ori “waamini . . . omosa-ru” paahi Muluku oneemererya awe.—Mmusome aEefeso 4:4-6.
17. Olelo-va, tani ari atthareli eekeekhai a Yesu ni aneettela waamini wekeekhai?
17 Olelo-va, tani aneettela waamini wekeekhai? Ti Anamoona a Yehova. Etthu xeeni ennikupaliha eyo? Mwaha ola, nooweha itthu sinceene sinnikupaliha, maana nooweha wira annitthara enamuna ya okokhorela yaakumiheriwe ni Yesu, yeeyo yaatthariwa ni makristau a okathi wa arummwa. Tthiri eparakha yuulupale okhala atthu a Yehova, osuwela ekeekhai ni ele Yehova oniphavela awe! Nto nihihiye ovarexexa ekeekhai ni murima wotheene.
NSIPO 3 Yehova Onninivaha Ikuru, Nlipelelo, ni Nroromelo
^ etti. 5 Mwaha ola, ninrowa oweha enamuna ya okokhorela yaakumiheriwe ni Yesu. Nave nnooweha moota awiixutti oopacerya a Yesu yaatthara aya enamuna eyo. Ohiya-vo, nnooweha itthu sinooniherya wira olelo-va, Anamoona a Yehova annitthara okokhorela wekeekhai.
^ etti. 9 Nwehe ekaaxa eni: “Os primeiros cristãos usavam o nome de Deus?”, erevista A Sentinela 1 a Julyo, 2010 epaaxina 6.
^ etti. 10 Mwa ntakiheryo, mwaakha wa 2008, Paapa Benedict XVI aahimmye wira okathi wa isipo ni mavekelo a Ekerexa Katoolika “nihirumeeliweke nnakhala nihiromoliweke nsina” na Muluku.
^ etti. 63 OTTHOKIHERIWA WA EFOOTU: Mutthenkeso wa Yehova woomukumiherya Biibiliya a Elapo Esya mattaava anivikana 200 wira atthu amusomeke Biibiliya ni nttaava naya orina nsina na Muluku.
