1. Muhupi xeeni profeta Yesaya aalenle awe aisarayeli?

 PROFETA Yesaya aahimmye wiira Yehova “Muluku èkekhai”. Nuulumo noowi “èkekhai” nintaphulela wiira “amen”. (Yes. 65:16) Nuulumo noowi “amen” nintaphulela wiira “ekhale siiso” aahiiso “ekeekhai”. Okathi Biibiliya oniromola awe nuulumo noowi “amen” omuhimyaka Yehova aahiiso Yesu, onilipiherya wiira itthu anihimya aya ti sa ekeekhai. Muhupi Yesaya aaroihenle awe aisarayeli aalenle wiira, khula okathi Yehova onileiherya awe opaka etthu, khiivo enimukhoottiherya. Ninnisuwela eyo okhala wiira Yehova onnimaleliha itthu sootheene onileiherya awe.

2. a) Xeeni ninreerela ahu okupali itthu Yehova oleihenrye awe? b) Mwaha ola, ninrowa waakhula makoho xeeni?

² Niireke nihaana ororomela wiira itthu Yehova oleiherya awe sinimwiiraneya muhoolo? Mwa iyaakha 800, nuuvira okathi wa aisarayeli, murummwa Paulo aahitthokiherya xeeni ninreerela ahu okupaliki, wiira itthu sootheene Yehova onileiherya awe sinniiraneya. Owo ahimmye so: “Muluku khonikhala-khala oothaka”. (aHeeb. 6:18) Mwa ntakiheryo, khivaniweryaneya ehime okhuma maasi oosiva ni a maakha okathi omosa-ru. Moolikanasa, okhala wiira Yehova maphattuwelo a ekeekhai, khivaniweryaneya okhala nawoothe. Tthiri nikupaliki wiira itthu sootheene Yehova oleiherya awe ti sa ekeekhai, ohela muhina sooleiherya sa muhoolo. Mwaha ola, ninrowa waakhula makoho manli. Nikoho noopacerya, itthu xeeni Yehova oleihenrye awe onivaha muhoolo? Na nenli, nroromelo xeeni Yehova onivanhe awe ninnikupaliha wiira itthu oleihenrye awe sinimwiiraneya tthiri?

3. a) Yooleiherya xeeni yootepa oreera wa arumeyi a Muluku? (Wiisuupulula 21:3, 4) b) Atthu akina anoonela sai vaavo nnaaleela ahu sooleiherya iyo?

³ Nrowe nithokorerye etthu erina efaita yuulupale, Yehova aaleihenrye  awe arumeyi awe ootheene. (Mmusome Wiisuupulula 21:3, 4.) Owo ooleiherya wiira nihiku nno “khunrowa-tho okhala okhwa, nnakhala oriipiwa murima, wala wunla, hata woona owereya”. Anamunceene a hiyo, ninnirumeela yoolepa ela ya mbiibiliyani, wiira naamaalihe atthu akina ni owooniherya moota elapo enrowa aya okhala eparayiisu muhoolo. Masi atthu akina anoonela sai okathi nnaalaleerya ahu? Woonasa wene, awo pooti ohimyaka wiira “itthu iya ti sootepexa oreera, masi kinoona wiira khasinrowa wiiraneya”.

4. a) Okathi Yehova aaleihenrye awe sa eparayiisu, etthu xeeni aasuwela awe? b) Ohiya paahi yooleiherya ela, etthu xeeni-tho Yehova opanke awe?

⁴ Okathi Yehova aamuupuxenrye awe murummwa Yohani olepa sa yooleiherya ya eparayiisu, owo aanisuwela wiira hiyo olelo-va, naamurumeela iversiikulu iya nilaleyaka ihapari sa Omwene. Nave Yehova aanisuwela wiira atthu anceene khiyaarowa okupaliki wiira ‘itthu sinooloka’ muhoolo. (Yes. 42:9; 60:2; 2 aKor. 4:3, 4) Ninrowa waakhaliherya sai atthu akina okupali wiira sooleiherya siri Wiisuupulula 21:3, 4 sinimwiiraneya? Nave hiyo ninrowa olipiha sai omuroromela wahu Yehova ni sooleiherya sawe? Ohiya paahi yooleiherya ela, Yehova oonivaha itthu sinceene sinnikupaliha wiira onoomaliha sooleiherya sawe. Itthu xeeni iyo?

5. Iversiikulu xeeni sinnikhaliherya ororomela sooleiherya sa Yehova, nave iyo sinihimya exeeni?

⁵ Wiisuupulula 21:5, 6, ninniphwanya itthu sinnikupaliha wiira Yehova onoomaleliha sooleiherya sawe voohimya sa eparayiisu. Ninsoma so: “Ole aakilanthi veehiceni aahihimya wira: ‘Moone! Miyo kinnipaka itthu sotheene isya’. Aahihimya-tho wira: ‘Mulepe, okhala wira moolumo ala toororomeleya ni teekeekhai’. . . . ‘Ala ahiiraneya! Miyo ka Oopacerya ni Ookiserya’”.

6. Wiisuupulula 21:5, 6 onilipiherya sai wiira Yehova onoomaleliha sooleiherya sawe?

⁶ Iversiikulu iya sa mbiibiliyani, sinlipiha sai ororomela wahu sooleiherya sa Muluku? Moolumo a iversiikulu iya anooniherya wiira itthu Yehova onipaka awe, sinilikana ni waasinari edukumento, onlipiheryaka wiira yena onoomaleliha sooleiherya sawe. b Wiisuupulula 21:3, 4, onnihimya itthu Yehova oleihenrye awe. Masi iversiikulu 5 ni 6 ninniphwanya moolumo a Yehova nikhanle ahu oolikanyiha ni asinatuura, annilipiherya wiira onoomaleliha sooleiherya sawe. Nrowe nithokorerye itthu sinooniherya wiira Yehova onoomaleliha sooleiherya sawe.

7. Tani alavunle moolumo ari eversiikulu 5, ni xeeni ari aya a faita?

⁷ Wanipacerya wa eversiikulu 5 enihimya so: “Ole aakilanthi veehiceni aahihimya wira”. (Wiis. 21:5) Moolumo ala aakhalana efaita yuulupale, maana Yehova onniromola ikwaha tthaaru eliivuru ela ya Wiisuupulula. Khiyaalavuliwe ni Yesu aahiiso malaikha, masi yaalavuliwe ni mwaneene Yehova! Nto eyo enooniherya wiira nihaana okupali itthu sikina siri eversiikulu eyo. Mwaha wa xeeni? Mwaha woowi Yehova ‘khonootha’. (Tito 1:2) Tthiri nikupaliki wiira moolumo ari Wiisuupulula 21:5, 6, animwiiraneya.

8. Moolumo xeeni a Yehova anooniherya wiira itthu sootheene oleihenrye awe sinimwiiraneya? (Yesaya 46:10)

⁸ Nrowe nthokorerye nuulumo noowi “Moone!” (Wiis. 21:5) Nuulumo na eKereku noowi “moone!” ninnirumeeliwa ikwaha sinceene eliivuru ya Wiisuupulula. Ereferensia emosa, enihimya wiira nuulumo nla vamosa  ni pontu eskalamaatu, “ninnimukhaliherya mulipa-oosoma ovaha ephoole moolumo anittharelana”. Etthu xeeni Muluku aahimmye awe moottharelana? Owo aahimmye so: “Miyo kinnipaka itthu sotheene isya”. Yehova onoopaka marukunuxo awo muhoolo. Hata olavulaka ntoko wiira marukunuxo awo onnipaka nenna-va, onnileiherya aahiiso onilipiherya wiira marukunuxo awo onoomaleliha muhoolo. — Mmusome Yesaya 46:10.

9. a) Anitaphulela exeeni moolumo oowi “kinnipaka itthu sotheene isya”? b) Exeeni enrowa wiiraneya ni “erimu” ni “elapo” ninweha ahu?

⁹ Nrowe niwehe etthu ekina onihimya awe Wiisuupulula 21:5, owo ohimmye so: “Miyo kinnipaka itthu sotheene isya”. Moolumo ala anitaphulela exeeni? Moolumo ari ekapiitulu ela, anitaphulela itthu piili Yehova onrowa awe opaka muhoolo. Yoopacerya, onrowa opwetexa olumwenku ola wootakhala. Ya nenli, owo onooruuha elapo esya. Wiisuupulula 21:1, onihimya so: “Erimu ya khalai ni elapo ya khalai saahivira”. Vano “erimu ya khalai” sinihimmwa ikuvernu sa apinaatamu sinilamuleliwa ni Satana vamosa ni malaikha ootakhala. (Math. 4:8, 9; 1 Yoh. 5:19) Nuulumo noowi “elapo” Biibiliya onnirumeela ophavelaka waahimya apinaatamu anikhala valaponi. (Maph. 11:1; Esal. 96:1) Vano “elapo ya khalai” anihimmwa atthu ootakhala murima. Ohiya paahi olokiherya “erimu” ikhanle ikuvernu sa apinaatamu ni “elapo”, eyo piiyo, atthu ootakhala nnaaweha ahu olelo-va, Yehova onrowa waapwetexa moomalela. Nuumala-vo, onooruuha erimu esya ni elapo esya, eyo piiyo, ekuvernu enrowa waalamulelaka apinaatamu ootheene a xariya.

10. Yehova onrowa opaka sai itthu sootheene isya?

¹⁰ Enamuna xeeni ekina Yehova onrowa awe ‘opaka itthu sootheene isya’? Wiisuupulula 21:5, Yehova onihimya wiira onimwiiriha elapo okhala esya ni onimwaakhaliherya apinaatamu okhala oohittheka. Sintoko enihimya aya eprofesia ya Yesaya, Yehova onimwiiriha elapo okhala yooloka siisale ejardim ya wEedeni. Nave nnookhalihiwa atthu asya niire so, atthu ahirina etampi. Yehova onnileiherya wiira alipa oorakala, ale ahinoona ni ahiniiwa anoopenuxiwa, nave ale akhwiiye anootthikela okhala akumi. — Yes. 25:8; 35:1-7.

11. Exeeni Yehova aamulenle awe murummwa Yohani, ni nthowa xeeni naamwiirinhe opaka eyo?

¹¹ Etthu xeeni-tho Yehova ohimmye awe enniiriha okupali sooleiherya sawe? Yehova aahimuleela murummwa Yohani ohimyaka so: “Mulepe, okhala wira moolumo ala toororomeleya ni teekeekhai”. (Wiis. 21:5) Ohiya paahi Yehova omuruma ‘olepa’ owo aahimuhimeerya nthowa naya aareerela awe opaka eyo. Owo aahincererya oriki: “Toororomeleya ni teekeekhai”, nto eyo enitaphulela wiira moolumo ootheene a Muluku toororomeleya. Ninnixukhurela mwaha wa Yohani weemererya ‘olepa’. Mwaha waivaavo, ninniwerya osoma yooleiherya ya Muluku ya eparayiisu nave ninnuupuwelela mareeliho ninrowa ahu waakhela.

12. Xeeni Yehova ohimmye awe wiira “ala ahiiraneya!”

¹² Etthu xeeni-tho Yehova ohimmye awe? Owo ohimmye so: “Ala ahiiraneya!” (Wiis. 21:6) Eversiikulu ela Yehova onilavula ntoko wiira yooleiherya awe ya eparayiisu ehiiraneya. Owo onnilavula mwa enamuna ela, okhala wiira khiivo enrowa omukhoottiherya omaleliha yooleiherya awe. Moottharelana Yehova aahihimya etthu ekina ennikupaliha wiira sooleiherya sawe sinimwiiraneya. Exeeni iyo?

13. Xeeni Yehova ohimmye awe wiira “miyo ka Oopacerya ni Ookiserya”?

¹³ Sintoko nihimmye ahu woopaceryani, Yehova  aahilavula ni murummwa Yohani ikwaha tthaaru. (Wiis. 1:8; 21:5, 6; 22:13) Khula ekwaha Yehova aanilavula ohimyaka so: “Miyo ka Oopacerya ni Ookiserya”. Moolumo ala toopacerya ni tookiserya a alfapeetu ekereku. Mwaha woohimya wiira “Miyo ka Oopacerya ni Ookiserya”, Yehova onnooniherya wiira apacerya etthu onnimaliherya ni khiivo enimooceeliha.

14. a) Okathi xeeni Yehova aalavunle awe “Oopacerya” ni onrowa awe olavula “Ookiserya”? b) Etthu xeeni eri Maphattuwelo 2:1-3?

¹⁴ Nuumala Yehova ompattuxa Adamu ni Eva, owo aahihimya yoolakela awe wa apinaatamu ni elapo. Biibiliya onihimya so: “Muluku aharèriha, àhimeryaka wira: Mwayareke an’inyu, munjerereyeke: musareyeke mulaponi mothene. Mwettiheke elapo yothene”. (Maph. 1:28) Nuumala Yehova ohimya yoolakela awe, vaakhala ntoko wiira aalavula so: ka “Oopacerya”. Yoolakela ya Yehova enimwiiraneya okathi osuulu wootheene wa Adamu ni Eva, niire so, okathi apinaatamu ootheene axariya, anrowa aya osareya mulaponi ni wiiriha elapo okhala eparayiisu. Okathi Yehova onrowa awe omaleliha yoolakela awe, vanrowa okhala ntoko onihimya wiira miyo ka “Ookiserya”. Nuumala Yehova omaliha opattuxa “erimu n’elapo n’itthu sothene sinikhala memmo”, aahihimya etthu enooniherya wiira onoomaleliha yoolakela awe. Etthu ene eri Maphattuwelo 2:1-3. (Musome.) Yehova aahihimya wiira nihiku na neethanu nenli naari nihiku noowaarya. Eyo enitaphulela exeeni? Enitaphulela wiira Yehova onoomaleliha sooleiherya sawe sootheene wa apinaatamu ni elapo muhina mwa mahiku 7.

15. Etthu xeeni woonasa wene Satana uupuwela awe wiira anwerya omukhoottiherya Yehova?

¹⁵ Nuumala Adamu ni Eva ohimwiiwelela Yehova, awo aattheka nto etampi eyo ahaaraviha anaaya. (aRom. 5:12) Vaakhala ntoko wiira Satana aahimukhoottiherya Muluku, omaleliha  yoolakela awe ya wiiriha elapo osareya atthu oohittheka ni oowiiwelela. Niireke Satana aahiwerya omukhoottiherya Yehova omaleliha yoolakela awe? Pooti wiira Satana anuupuwela wiira Yehova khonwerya-tho omaleliha. Woonasa wene, Satana uupuwela wiira Yehova aamwaapwetexa Adamu ni Eva ni waapattuxa anamathelana akina oohittheka wiira omalelihe yoolakela awe. Vakhanle wiira Muluku aahipaka eyo, Satana aamunvaha nthowa Yehova ohimyaka wiira nawoothe. Mwaha wa xeeni? Mwaha woowi, moovarihana ni Maphattuwelo 1:28, Yehova aahaaleela Adamu ni Eva wiira anaaya yaamusareya mulaponi.

16. Exeeni yaamwiiriha Satana wuupuwelaka wiira ammootherya Yehova okhala oowoolowa?

¹⁶ Etthu xeeni ekina woonasa wene Satana uupuwela awe wiira Yehova ampaka? Waanyiheryasa Satana uupuwela wiira Yehova aamwaavaha eparakha ele Adamu ni Eva ya waayara anamwane, masi awo khiyaakhala-khala akhalaka oohittheka. (Mus. 7:20; aRom. 3:23) Mwa enamuna eyo, Satana ammootherya Yehova okhala oowoolowa. Mwaha wa xeeni? Mwaha woowi, Muluku khaarowa omaleliha Yoolakela awe ya wiiriha elapo okhala eparayiisu ni osareya atthu oowiiwelela ni oohittheka.

17. Yehova olokihenrye sai ohiiwelela wa Satana, Adamu ni Eva, nave exeeni enrowa wiiraneya? (Nwehe eteseenyo.)

¹⁷ Yehova oopaka itthu wiira omalelihe yoolakela awe mwa enamuna yoolokexa Satana ahuupuwela awe. (Esal. 92:6) Yehova aaheemererya wiira Adamu ni Eva yaayareke anamwane, nto mwaha woopaka eyo aahooniherya wiira owo khahiyo nawoothe. Masi Yehova aahiiriha “osùlu” wa Adamu ni Eva okhumelela mutthu aarowa owoopola anamwane ootheene oowiiwelela. (Maph. 3:15; 22:18) Mwa enamuna ela, Yehova khaarowa ohimmwa okhala oowoolowa! Okhala wiira mutthu owo Yehova aamuleihenrye awe, anvaha okumi awe ntoko mukuttho waarowa owoopole atthu ootheene. Satana khaatonko wuupuwela eyo. Mwaha wa xeeni? Mwaha woowi yowoopola enivarihana ni ophenta wa Yehova. (Math. 20:28; Yoh. 3:16) Satana khorina mukhalelo owo woophenta. Mwaha woowi yena nanrima muulupale. Vano, exeeni enrowa wiiraneya mwaha wa mukuttho wowoopola? Wanikisa wa Iyaakha Ekonto Emosa wa Olamulelo wa Kristu, osuulu wowiiwelela ni woohittheka wa Adamu ni Eva, onoosareya mulaponi ni onimwiiriha elapo okhala eparayiisu. Okathi owo, vanrowa  olikanaka ntoko Yehova aahimya awe wiira ka “Ookiserya”.

18. Itthu xeeni tthaaru sinnikupaliha wiira Yehova onoomaleliha sooleiherya sawe? (Nwehe ekaaxa eni: “ Itthu Tthaaru Sinniiriha Okupali Sooleiherya sa Yehova”.)

¹⁸ Mwaha ola, noothokorerya itthu sinceene sinnikupaliha wiira elapo enookhala eparayiisu. Akhala wiira ookhala mutthu ohinikupali wiira eyo enimwiiraneya, exeeni nikhanle ahu oohimya? Yoopacerya, nihaana omuleela wiira Yehova mwaneene tonileiherya. Eliivuru ya Wiisuupulula enihimya so: “Moone! Miyo kinnipaka itthu sotheene isya”. Yehova ookhalana ankhili, owerya ni onniphavela omaleliha yoolakela awe. Ya nenli, mwa moonelo wa Yehova, itthu oleihenrye awe vanikhala ntoko wiira sihiiraneya. Ti maana aya ahimmye awe so: “Moolumo ala toororomeleya ni teekeekhai. . . . Ala ahiiraneya!” Ya neeraru, khiivo enrowa omukhoottiherya Yehova omaleliha ele oleihenrye awe, ti etthu yaamwiirinhe ohimya so: “Miyo ka Oopacerya ni Ookiserya”. Muhoolo atthu ootheene anoosuwela wiira Satana tori nawoothe ni oowoolowa ohiya Yehova.

19. Exeeni mukhanle anyu oohimya vakhala wiira atthu akina vannaavila okupali sooleiherya sa Yehova voohimya sa eparayiisu?

¹⁹ Muhiliyale wiira khula okathi munimukhaliherya anyu mutthu okupali sooleiherya sa Yehova, nave nyuwo munnilipiha ororomela wanyu sooleiherya sawe. Nto ikwaha sikina munrowa anyu osomaka yooleiherya yootepa oreera voohimya sa elapo okhala eparayiisu, eri Wiisuupulula 21:4, ni khimphwanya mutthu onihimya wiira “itthu iyo ti sootepa oreera masi kinoona wiira khasinrowa wiiraneya”, exeeni mukhanle anyu oopaka? Nyuwo pooti osoma ni otthokiherya iversiikulu 5 ni 6. Nave pooti omutthokiherya ni wuupuwelela ni mutthu owo, ntoko Yehova aasinanri ene epaphelo ya omaleliha yoolakela awe ya wiiriha elapo okhala eparayiisu. — Yes. 65:16.