1. Moovarihana ni Matheyo 24:9, xeeni nihintikinihiwa ahu vaavo ninnyokhiwa ahu?

YEHOVA onipattunxe wira naaphenteke atthu akina ni niphentiweke. Nto akhala wira ookhala mutthu onninyokha ninniriipiwa murima ni ninnoova. Mwa ntakiheryo, murokora oniihaniwa Georgina yoowo onikhala wEuropa ohimmye so: “Okathi kaarina aka iyaakha 14 maama aka, aanikinyokha mwaha wa omurumeela Yehova. Kuupuwela wira khuuvo mutthu aakiphavela. Nave kaaniikoha akhala wira ka mutthu ooloka”. * Munna oniihaniwa Danylo olempe so: “Vaavo mapoliisia yaakikakha aya, yaakiruwana aya ni yaakoopopiha aya wira yaamukiiriha etthu yootakhala mwaha wookhala Namoona a Yehova, kaahoova vanceene ni kuupuwela wira nkirina efaita”. Tthiri vaavo atthu akina anninyokha aya ninniriipiwa murima. Masi khanintikhina vaavo eyo eniiraneya aya, maana Yesu aahihimya vahinatthi wira naarowa onyokhiwaka.—Mmusome Matheyo 24:9.

2-3. Xeeni atthareli a ekeekhai a Yesu aninyokhiwa aya?

² Olumwenku ola, onnaanyokha atthareli eekeekhai a Yesu. Mwaha wa xeeni? Mwaha woowi nimutakihaka Yesu, hiyo khanikhanle ntoko “atthu a olumwenku ola”. (Yoh. 15:17-19) Tthiri nnaamwi naattittimihaka anamalamulela, hiyo ninnikhootta waakokhorela ni okokhorela ilatarato saya. Maana hiyo nimmukokhorela Yehova paahi. Nave ninnikhaliherya ni murima wotheene ehakhi ya Yehova waalamulela apinaatamu otheene. Ehakhi yeeyo enivaanyihiwa ni Satana ni atthu ale animutthara. (Maph. 3:1-5, 15) Hiyo ninnilaleya wira Omwene wa Muluku paahi, tonrowa omaliha mixankiho saapinaatamu. Nave moohipisa Omwene owo, onrowa waapwetexa atthu othene aninvaanyiha  Yehova. (Dan. 2:44; Wis. 19:19-21) Tthiri iyo ihapari sooreera anaxariya anlipelela aya. Masi ihapari sootakhala anlipelela aya atthu ootakhala murima.—Esal. 37:10, 11.

³ Nave ninninyokhiwa mwaha woowi ninniiwelela malamulo a xariya a Muluku. Tthiri ele Muluku onihimya awe wira ti yooloka ni yoohiloka ti yoovirikana ni ele atthu a olumwenku ola anihimya aya okhala yooloka ni yoohiloka. Mwa ntakiheryo, atthu anceene olelo-va, annikhaliherya orupihana woohiloka weiwo waamwiirinhe Yehova opwetexa epooma ya oSodoma ni oGomora! (Yuda 7) Nto okhala wira hiyo ninkhaliherya malamulo a xariya a Muluku ni khaninkhaliherya itthu sootakhala, atthu anceene a olumwenku ola anniniveeha ni annoona okhala alolo!—1 Ped. 4:3, 4.

4. Mikhalelo xeeni sinnilipiha vaavo ninyokhiwa ahu?

⁴ Etthu xeeni enrowa onikhaliherya ovilela vaavo ninnyokhiwa ahu ni oruwaniwa? Nihaana olipiha omwaamini wahu Yehova wira onoonikhaliherya. Ntoko nikula noowiisaakihana, waamini wahu onnittipiha “mattheere a mooro a Mutakhali”. (aEef. 6:16) Masi nihaana opaka itthu sikina ohiya paahi okhalana waamini. Nihaana okhalana ophenta. Mwaha wa xeeni? Mwaha woowi ole oniphenta “khonaakuva opaceya”. Tthiri ophenta onninikhaliherya ovilela itthu sotheene sootakhala. (1 aKor. 13:4-7, 13) Vano nrowe niwehe moota omphenta Yehova, waaphenta anna ni arokora ni waaphenta awanani ahu onnikhaliherya aya ovilela onyokhiwa.

5. Omphenta Yehova waamukhalihenrye sai Yesu?

⁵ Ohiyu aarowa awe wiiviwa ni awanani awe, Yesu aahaaleela atthareli awe oororomeleya wira: “Miyo kinnaaphenta Atiithi, kinniira siisaale Atiithi akirumme aya”. (Yoh. 14:31) Okhala wira Yesu aanimphenta Yehova, eyo yaahimukhaliherya ovilela mixankiho sinceene saamukhumelenle. Tthiri omphenta wahu Yehova onoonikhaliherya ovilela mixankiho.

6. Moovarihana ni aRoma 5:3-5, arumeyi a Yehova anoonela sai vaavo anyokhiwa aya?

⁶ Okathi wotheene, omphenta Muluku onnakhaliheya arumeyi a Yehova ovilela olupatthiwa. Mwa ntakiheryo okathi arummwa yaakhoottiheriwe aya ni makhulupale a aYuda olaleerya, omphenta waya Muluku, waahiwiiriha ohimya wira: “Hiyo nihaana omwiiwelela Muluku, ohiya atthu”. (Mit. 5:29; 1 Yoh. 5:3) Nave omphenta Muluku onnaakhaliherya anna ni arokora ohihiya ororomeleya hata alupatthiwaka ni ikuvernu soowerya ni sootakhala. Okathi ninyokhiwa ahu, ohiya okhulumuwa, ninnikhalana eparakha ya ovilela.—Mit. 5:41; mmusome aRoma 5:3-5.

7. Nooneleke sai vaavo amusi ahu anninyokha aya?

⁷ Vaavo amusi ahu annilupattha aya vannitepa ovila ovilela. Nto okathi naapacenrye ahu wiixutta ekeekhai amusi ahu akina yuupuwela wira nanwokiwa. Akina yuupuwela wira naalolo. (Mulikanyihe ni Marko 3:21.) Nto awo pooti oniiriha itthu sootakhala. Tthiri itthu iyo soohiloka khasinnittikiniha. Mwaha wa xeeni? Mwaha woowi Yesu ahimye wira: “Awanani a mutthu, anrowa okhala atthu a vatthokoni vawe”. (Math. 10:36) Hata vari siiso, moohicikha enamuna amusi ahu annithokorerya aya, hiyo khaninkhala-khala naanyokhaka. Ohiya-vo vaavo omphenta wahu Yehova onincerereya aya ninnitepa waaphenta atthu akina. (Math. 22:37-39) Masi khaninkhala-khala nihiyaka wiiwelela malamulo ni malakiheryo a mBiibiliyani wira naasiveliheke apinaatamu.

8-9. Etthu xeeni yaamukhalihenrye murokora mmosa ohihiya ororomeleya okathi aalupatthiwa awe?

⁸ Georgina yoowo nimulanvunle ahu wanipacerya aahiwerya ohihiya omukokhorela Yehova nnaamwi aalupatthiwa ni maama awe. Georgina onitthokoherya so: “Miyo ni maama aka naahipacerya omusoma Biibiliya ni  Anamoona a Yehova. Nuumala ovira miyeeri 6 kaahipacerya orowela mithukumano nto muupuwelo a maama aka waahiturukeya moowaakuveya ni aahipacerya okilupattha. Kaahoona wira owo aalavula ni anammwareya nto aanilavula itthu iyo sowoothiwa okathi aavaanela awe ni miyo. Vano aahipacerya okiveeha, ottuttha maihi aka, okimana, okiphinyaka ni aahiriha iliivuru saka. Nto kirina ene iyaakha 15, kaahipatisiwa. Maama aka aahiimananiha okihiiha omurumeela Yehova, mwaha woowi aahikiroiha mapuro anikhaliheriwa atthu oohiiwelela wira kakhaleke ni aximwali akina yaawo yaalya mirette soohapala ni yaari anakirime. Vannitepa owereya olupatthiwa ni mutthu aarowa oniphenta aka ni onikhapelela”.

⁹ Etthu xeeni yaamukhalihenrye Georgiana ovilela? Owo onihimya so: “Nihiku maama aka aapacenrye awe okilupattha naari nihiku kammalinhe aka omusoma Biibiliya otheene. Tthiri kaanikupali ni murima wotheene wira kaahiphwanya eekeekhai ni kaahikhalana waataana wooloka ni Yehova. Miyo kaamakela onvekela Yehova nto aanaakhula mavekelo aka. Okathi kaakhala aka opuro ole karohiwe aka ni maama aka, murokora mmosa aanikilattula owannyawe wira nimusomeke Biibiliya hoothe. Okathi ole wotheene kaahilipihiwa ni anna ni arokora Empa ya Omwene. Nto kaanoona wira kinniirela mpantta emusi aya. Nave kaahoona wira Yehova ookhalana ikuru waavikana ale annilupattha”.

10. Exeeni ennikupaliha wira Yehova onoonikhaliherya?

¹⁰ Murummwa Paulo ohimmye wira khiivo etthu ekhanle “onivalaanya ni ophenta wa Muluku, weiwo onooniheriwa mwa Kristu Yesu”. (aRom. 8:38, 39) Hata mixankiho sivirihaka okathi munceene, okathi wotheene Yehova onrowa okhala ni hiyo wira onimaalihe ni onivaha ikuru. Ntoko enooniherya aya yowiiraneya ya Georgina, Yehova onoonikhaliherya aarumeelaka anna ni arokora.

11. Ophenta Yesu aalavunle awe yoolepa ya Yohani 15:12, 13 waakhalihenrye sai awiixutti awe? Nvahe ntakiheryo.

¹¹ Ohiyu aarowa awe wiiviwa, Yesu aahiwuupuxerya awiixutti awe wira yaahaana ophentanaka mukina ni mukhwaawe. (Mmusome Yohani 15:12, 13.) Tthiri Yesu aanisuwela wira ophentana waamwaakhaliherya okhala owiiraana ni ovilela onyokhiwa. Nkahaya nwehe ntakiheryo na muloko wa oTesalonika. Okhuma okathi muloko ole waapakiwe aya, anna a muloko ole yaanilupatthiwa. Tthiri anna ni arokora a muloko ole, yaahivaha ntakiheryo nooloka na ororomeleya ni ophenta. (1 aTes. 1:3, 6, 7) Paulo  aahaatumererya anna ale wira ahihiye ophentana. (1 aTes. 4:9, 10) Ophenta waamwaakhaliherya waamaaliha ale ariipiwe murima ni waalipiha ale ahilimpe. (1 aTes. 5:14) Tthiri anna ale yaahitthara malakiheryo yaavahiwe aya epaphelo ya nenli ya Paulo, yeeyo aalepenle awe iyaakha vakhaani muhoolo mwaya. Paulo aahaaleela wira: “Otheene anyu ophentana wanyu, onnitepa wuncerereya”. (2 aTes. 1:3-5) Tthiri ophentana waya waahaakhaliherya ovilela onyokhiwa ni olupatthiwa.

12. Okathi wa ekhotto anna ni arokora a elapo emosa yoonihenrye sai wira anniphentana?

¹² Vano nwehe yowiiraneya ya Danylo ni mwaarawe nimulavunle ahu wanipacerya. Okathi epooma yaakhala aya yaawaniwa aya ekhotto, awo khiyaahiyale orowela mithukumano, olaleerya ni okawana eyoolya yaarina aya ni anna ni arokora akina. Nihiku nimosa anakhotto yaahiphiya owannyawe Danylo akunxeene ikapwitthi. Danylo onihimya so: “Awo yaahikikhanyererya wira kaahaana ohiya okhala Namoona a Yehova. Nuumala okhootta ele yaakivekela aya, awo yaaphavela okiiva akiphinyakaka exiko ni yaaphavela okoopela muru. Ahinatthi okhuma, awo yaahikoopopiha wira yammurupiha mwaaraka masi moohipisa anna yaahiniweliwa ekaaro aniroohaka epooma ekina. Nkinkhala-khala kiliyalaka moota anna ale yaakiphentale aya. Nuumala ophiya epooma ele, anna a epooma ele yaahinivaha eyoolya, yaahikikhaliherya ophwanya muteko ni empa! Nto eyo yaahinikhaliherya owaakhela anna akina yaatthyawa muttetthe ole yaawaniwa ekhotto”. Yowiiraneya ela, ennooniherya wira waaphenta anna ni arokora onninikhaliherya ovilela onyokhiwa.

13. Munepa wowaarya onnikhaliherya sai ovilela vaavo ninlupatthiwa ahu?

¹³ Yesu aahaaleela atthareli awe wira yahaana waaphenta awanani aya. (Math. 5:44, 45) Niireke vannikhweya opaka eyo? Nnaari! Masi vanniweryaneya waaphenta awanani ahu nikhaliheriwaka ni munepa wowaarya wa Muluku. Tthiri mikhalelo sinikumiheriwa ni munepa wowaarya, sinihela muhina ophenta, opixa murima, oreera murima, omaala ni wiihiiha. (aGal. 5:22, 23) Mikhalelo iyo, sinninikhaliherya ovilela onyokhiwa. Atthu anceene yaanilupattha, aahiya onilupattha mwaha woowi, axiiyeya, axaaraya, mwanaya aahiiso ale yaattamanne aya yaahiwooniherya mikhalelo iyo. Nave, anamunceene a atthu awo yaanilupattha, olelo-va anna ni  arokora. Nto vakhala wira vannoovilani waaphenta ale anoolupatthani mwaha woowi mwa Namoona a Yehova, munvekeleke Yehova wira oovaheeni munepa wowaarya. (Luka 11:13) Nave, okathi wotheene mukupaliki wira omuroromela Yehova etthu yootepexa oloka.—Mir. 3:5-7.

14-15. ARoma 12:17-21, aamukhalihenrye sai Yasmeen omphenta vanceene iyawe nnaamwi aamuhasula?

¹⁴ Nkahaya nwehe ntakiheryo na Yasmeen yoowo onikhala oMédio Oriente. Nuumala okhala Namoona a Yehova, iyawe aahimuleela wira anwokiwa ni aahimananiha omuhiiha omukokhorela Yehova. Iyawe aanimuruwana, ahaatumererya amusi, mukhulupale a okerexa ni atthu akina wira amoothereryeke wira oohonona etthoko awe. Nave, aanimuruwana murokora ole ohoolo wa anna ni arokora okathi wa mithukumano. Okathi wotheene, Yasmeen aamakela wunla mwaha woowi aathokoreriwa moohixariya.

¹⁵ Okathi wa mithukumano Empa ya Omwene, anna ni arokora yaanimulipiha ni yaanimmaaliha Yasmeen. Nave axitokweene yaahimutumererya ovarihela muteko malakiheryo ari aRoma 12:17-21. (Mmusome.) Yasmeen onihimya so: “Yaari etthu yooxankiha. Masi onvekela Yehova wookikhaliherya vanceene nave kinniimananiha ovarihela muteko malakiheryo a mBiibiliyani. Nto okathi iyaka aananariha awe ekosinya miyo kaanilimpari. Nave okathi aakiruwana awe, kaanimwaakhula mooreerela murima. Okathi aawereiwa awe kaanimukhapelela oratteene”.

16-17. Yowiiraneya ya Yasmeen ewiixuttinheni exeeni?

¹⁶ Yasmeen ootthuveliwa vanceene mwaha womphenta iyawe. Owo onihimya so: “Iyaka oopacerya okiroromela vanceene mwaha woowi okathi wotheene kinimuleela ekeekhai. Owo onnikiwiriyana vaavo kinimutthokiherya aka mwa nttittimiho myaha sa mBiibiliyani nave nookhalana murettele. Vano onnikitumererya orowela mithukumano sa mmulokoni nave makhalelo a emusi ahu aaturukeya vanceene. Maana nookhalana murettele ni nihiiraana. Kinnikupali wira iyaka onimweemererya ekeekhai ni nnoomurumeela Yehova hoothe”.

¹⁷ Ntakiheryo na Yasmeen ninnooniherya wira ole oniphenta “onnivilela itthu sotheene, onnikupali itthu sotheene, onnilipelela itthu sotheene”. (1 aKor. 13:4, 7) Ekeekhai wira onyokhiwa owereya, masi ophenta wookhalana owerya ovikana onyokhiwa. Vaavo nnaaphenta ahu ale anninyokha awo annipaka marukunuxo mookumini mwaya. Nto eyo ennimuhakalaliha vanceene Yehova. Hata ale annilupattha ahihiyaka  onilupattha hiyo khaninrowa ohiya ohakalala. Moota xeeni?

18. Xeeni ninhakalala ahu vaavo ninnyokhiwa ahu?

¹⁸ Yesu aahimmye so: “Muhakalaleke khula okathi muninyokhiwa anyu”. (Luka 6:22) Tthiri, khuuvo mutthu oniphavela onyokhiwa. Nave khaninsiveliwa vaavo atthu akina anninyokha aya mwaha woomurumeela Yehova. Nto xeeni ohimyaka wira nihakalaleke vaavo ninnyokhiwa ahu? Nwehe itthu tthaaru sinniiriha ohakalala. Yoopacerya, vaavo ninvilela ahu onyokhiwa, hiyo ninneemereriwa ni Muluku. (1 Ped. 4:13, 14) Ya nenli, waamini wahu onnitepa olipa. (1 Ped. 1:7) Ya neeraru, hiyo nnimwaakhela etthuvo ya ekumi yoohimala.—aRom. 2:6, 7.

19. Xeeni arummwa yaahakalala aya nuumala omaniwa?

¹⁹ Moohipisa nuumala Yesu ohihimuxiwa, arummwa yaahiphwanya ohakalala wekeekhai Yesu aalavunle awe. Nave nuumala owaxuliwa ni ohihiwa olaleerya awo yaanitthapa. Mwaha wa xeeni? “Okhala wira yaahoona okhala eparakha ohaawa, mwaha wa nsina na Yesu”. (Mit. 5:40-42) Tthiri omphenta waya Yesu waari wuulupale ovikana owoova awanani aya. Nto, awo yaahooniherya ophenta iwo alaleyaka ihapari sooreera “voohihiyererya”. Olelo-va, anna ni arokora anceene khanihiya omurumeela Yehova nnaamwi arina ene mixankiho. Awo annisuwela wira Yehova khonikhala-khala oliyalaka muteko anivara aya ni ophenta nsina nawe.—aHeeb. 6:10.

20. Mwaha onittharelana, ninrowa oweha exeeni?

²⁰ Ohikhanle wira olumwenku ola oroomala, atthu khanrowa ohiya oninyokha. (Yoh. 15:19) Masi khivanitthuneya woova. Ntoko ninrowa ahu oweha mwaha onittharelana, Yehova ‘onnaalipiha ni onnakhaliherya’ arumeyi awe oororomeleya. (2 aTes. 3:3) Nto nihihiye omphenta Yehova, waaphenta anna ni arokora ni waaphenta awanani ahu. Akhala wira nnootthara miruku iyo nnoovikanihaka wiiraana ni oolipa momunepani. Nave nnoovuwiha Yehova ni nnimooniherya wira ophenta wookhalana owerya ovikana onyokhiwa.