Alevi akina yahaakhanle anamukuttho, yaahikhalana miteko sikina. Awo yaarumeela ntoko mapoliisia. Alevi awo yaanirummwa ni mukhulupale a mutemplo. Mulipa-oolepa sowiiraneya sa aYuda onnitthokiherya miteko sa mapoliisia awo. Owo olempe so: “Tthiri [Alevi] akina yaalipelela mikhora sa mutemplo wira ohikele mutthu aheemereriwa. Vano akina yeemela [mutemplo], ohoolo wa nipuro noowaarya wira ohikele nnakhala mutthu mmosa aarina mwiikho wala aheemereriwa aahiiso aaphavela okela moohilakela. Akina yaaneetteetta arukureryaka etemplo wira awehawehe. Awo yaaniranttelana ni yaavara othana ni ohiyu alipelelaka”.

Mapoliisia awo yaanaavarela muteko makhulupale a oSineedrio. Atthu yeemereriwa okuxa ikapwitthi ni aRoma yaari egrupu eyo paahi ya mapoliisia.

Moovarihana ni musomi oniihaniwa Joachim Jeremias “moolumo Yesu aahimmye awe nihiku aarowa awe ovariwa wira nihiku ti nihiku miyo kaanikilaathi mutemplo kiwiixuttihaka atthu, khuhikivara (Math. 26:55) annooniherya wira aaleela mapoliisia a oTemplo yaawo yaaronwe onvara”. Musomi mmosaru, onnikupali wira mapoliisia yaatonko orowa onvara Yesu yaari-tho mapoliisia a otemplo. (Yoh. 7:32, 45, 46) Muhoolo mwaya, esineedrio yaahimuruma mukhulupale a anakhotto a otemplo ni mapoliisia makina wira yaavare awiixutti a Yesu. Vanikhala ntoko wira mapoliisia a otemplo ti yanvanre murummwa Paulo khumukumiherya ota wa etemplo.—Mit. 4:1-3; 5:17-27; 21:27-30.