1-2. (a) Yehova onlavula sai ni apinaatamu? (b) Mwaha ola ninrowa othokorerya exeeni?

YEHOVA onnisiveliwa olavula ni hiyo. Khalai, owo aanaarumeela maprofeta, malaikha ni Mwanawe, Yesu Kristu wira aasuwelihe atthu muupuwelo awe. (Am. 3:7; aGal. 3:19; Wis. 1:1) Olelo-va, Yehova onnilavula ni hiyo orumeelaka Nuulumo nawe Biibiliya. Owo oonivaha wira niixutte muupuwelo awe ni osuwela ikano sawe.

² Okathi Yesu aari awe valaponi, ori ene wiirimu Yehova aahilavula ikwaha tthaaru. Nrowe nthokorerye ele Yehova aahimmye awe, wira noone ele nniixutta ahu ni moota nikhanle ahu oottottela mureerelo.

3. Ntoko ninsoma ahu Marko 1:9-11, Yehova aahimmye exeeni okathi Yesu aabatiziwa awe? Ikeekhai xeeni moolumo a Yehova anooniherya aya?

³ Ekwaha yoopacerya Yehova onlavula awe ori ene wiirimu, eniphwanyaneya eliivuru ya Marko 1:9-11. (Mmusome.) Owo aahimmye so: “Nyuwo mwá mwan’aka onimphentexaka: miyo kosiveliwa ni nyuwo”. Tthiri Yesu aahilipa vanceene nuumala omwiiwa Tiithi awe ohimyaka wira aanimphenta ni omuroromela! Moolumo a Yehova annooniherya ikeekhai tthaaru voohimya sa Yesu. Yoopacerya, Yesu Mwaana a Muluku. Ya nenli, Yehova onnimphenta Mwanawe. Ya neeraru, Yehova onnisiveliwa aahiiso onnimweemererya Mwanawe. Nrowe nthokorerye oratteene ikeekhai iyo tthaaru.

4. Waataana xeeni musya Muluku aapanke awe, okathi Yesu aabatiziwe awe?

⁴ “Nyuwo mwá Mwan’aka”. Ni moolumo ala, Yehova aahooniherya wira Yesu, Mwanawe onimphentexa awe, aahikhalana  waataana musya ni Yena. Okathi Yesu aari awe wiirimu, owo aari mwaana oomunepani a Muluku. Masi vaavo Yesu aabatiziwe awe, owo aahithanliwa ni munepa wootteela. Nto okathi owo, Muluku aahooniherya wira Yesu aari Mwaana awe oowoottihiwa ni aahikhalana nlipelelo nootthikela wiirimu ntoko Mukhulupale a Anamukuttho othanliwe ni Muluku. (Luka 1:31-33; aHéb. 1:8, 9; 2:17) Nto ninnoona nthowa naamwiirinhe Yehova ohimya wira: “Nyuwo mwá Mwan’aka” okathi Yesu aabatiziwe awe.​—Luka 3:22.

5. Ninrowa otthara sai ntakiheryo na ophenta wa Yehova?

⁵ “Nyuwo mwá mwan’aka onimphentexaka”. Ophenta ni othokorerya wa Yehova onninikhaliherya woona inamuna nikhanle ahu oowaalipiha atthu akina. (Yoh. 5:20) Hiyo ninnihakalala vaavo nimphentiwa ahu ni ottottopeliwa mwaha wa itthu sooloka nimmwiirela ahu mutthu nimmuthokorerya ahu saana. Moolikanasa, nihaana waaphenta ni waalipiha anna ni arokora vamosa ni atthu a etthoko ahu. Nto vaavo nnaattottopela ahu, ninnilipiha waamini waya ni ninnaakhaliherya omurumeela Yehova moororomeleya. Nave, nyuwo anamuyari muhaana waalipiha aniinyu. Vaavo anamuyari anaattottopela aya ni waaphenta anaaya, eyo ennaakhaliherya anaaya wunnuwa momunepani.

6. Xeeni nimmukupali ahu Yesu Kristu?

⁶ “Miyo kosiveliwa ni nyuwo”. Moolumo ala, annooniherya wira Yehova aanikupali wira Yesu ammaleliha moororomeleya yootthuna ya Tiithi awe. Okhala wira Yehova aanimukupali Mwanawe, hiyo-tho nihaana okupali wira Yesu onrowa omaliherya moororomeleya sooleiherya sa Yehova. (2 aKor.  1:20) Vaavo nnuupuwela ahu ntakiheryo na Yesu, nnoolipiha yoolakela ahu ya wiixutta ni ootthara mavalo awe. Nave okhala wira Yehova aanimukupali Yesu, owo onnikupali wira arumeyi awe anoovikaniha wiixutta voohimya sa Mwanawe.​—1 Ped. 2:21.

7. Moovarihana ni Matheyo 17:1-5, okathi xeeni Yehova aalavunle awe ori ene wiirimu, ni aahimmye exeeni?

⁷ Mmusome Matheyo 17:1-5. Ekwaha ya nenli Yehova aalavunle awe, waari okathi yoole Yesu ‘athatunwe awe’. Ohinatthi, Yesu aahimukuxa Pedru, Yakobo ni Yohani arowasa mwaako woorakama. Ari ene opuro ole, awo yaahoonihiwa etthu yootikiniha. Wanipacerya, owiitho ni ikuwo sa Yesu saanaarya vanceene. Moottharelana, yaahaaweha atthu anli, yaawo yaakhala ntoko Moise ni Eliya. Atthu awo yaahipacerya olavula voohimya sa okhwa ni ohihimuxiwa wa Yesu. Nnaamwi ‘ikhove savelinhe’ arummwa ale araru yaahivenya nuumala okhumelela yowoonihiwa ele yootikiniha. (Luka 9:29-32) Moottharelana, yaahikhuneeliwa ni neeku noowaarya. Nuumala-vo, yaahiiwa nsu na Muluku! Moolikanasa ni okathi ole Yesu aabatiziwa awe, Yehova aahooniherya-tho wira aanimphenta Mwanawe ohimyaka wira: “Ola ti Mwan’aka onimphentexaka: yola t’osiveliwa waka”. Masi okathi ola, Yehova aahincererya oriki: “Mmwiweleleke yola!”

8. Yowoonihiwa yaakhalihenrye sai awiixutti a Yesu?

⁸ Yowoonihiwa ele, yaanooniherya ovuwa ni owerya wa Yesu ntoko Mwene a Omwene wa Muluku. Tthiri, eyo yaahimulipiha Kristu wira ovilele mixankiho saarowa omukhumelela ntoko ohasuliwa ni wiiviwa. Ohiya-vo, yowoonihiwa ele yaahilipiha waamini wa awiixutti. Nave yaahaakhaliherya ovilela mixankiho saarowa waakhumelela ni muteko yaarowa aya ovaraka muhoolo. Mwa iyaakha 30 muhoolo mwaya, murummwa Pedru aahihimya wira aanuupuwela vanceene yowoonihiwa ele.​—2 Ped. 1:16-18.

9. Malakiheryo xeeni Yesu aavanhe awe atthareli awe?

⁹ “Mmwiweleleke yola”. Ni moolumo ala, Yehova aahooniherya wira oniphavela wira niwiriyaneke ni wiiwelela moolumo a Mwanawe. Yesu aahimmye exeeni okathi aari awe valaponi? Owo aahihimya itthu sinceene ninreerela ahu owiriyana! Mwa ntakiheryo, moophenta, Yesu aahiwiixuttiha atthareli awe moota woolaleya ihapari sooreera, ni ikwaha sinceene aamakela owuupuxerya wira avikaniheke okhala oowehaweha. (Math. 24:42; 28:19, 20) Nave-tho, aahaatumererya wira yiimananiheke ni ahooceyeke. (Luka 13:24) Yesu aahaalipiherya atthareli awe wira yahaana ophentana, okhala oowiiraana ni wiiwelela malamulo awe. (Yoh. 15:10, 12, 13) Tthiri Yesu aahaavaha atthareli awe malakiheryo oovareleya muteko! Olelo-va, malakiheryo awo tootepa otthuneya ntoko okathi ole Yesu aavanhe awe.

10-11. Ninrowa wooniherya sai wira ninninwiriyana Yesu?

¹⁰ Yesu aahimmye so: “Othene ale anettela ekekhai, annìwelela molumo aka”. (Yoh. 18:37) Ninnooniherya wira ninniwiriyana moolumo a Yesu vaavo ninvikaniha ahu ‘olevelelana, imara sothene nintthekelanahu’. (aKol. 3:13; Luka 17:3, 4) Nave-tho, ninnooniherya wira ninniiwelela moolumo a Yesu, vaavo ninluttuweliwa ahu olaleya ihapari sooreera okhale “okathi worera, hatá okathi wohiphwanelela”.​—2 Tim. 4:2.

¹¹ Eliivuru ya Yohani 10:27 Yesu aahimmye so: “Ipwittipwitthi saka sinnìwa nsu naka”. Atthareli a Yesu annooniherya wira anniwiriyana  nsu nawe, ohiya paahi avahaka ephoole moolumo awe, masi okathi aneettela aya moolumo awe. Awo khanitepa oxanka mwaha wa “sovelaveliha s’ekumi”. (Luka 21:34) Annihela nipuro noopacerya wiiwelela malamulo a Yesu hata avirihaka mixankiho sinceene mookumini. Anna ni arokora anceene annivilela mixankiho ntoko olupatthiwa, ohaawa ni ihasara sa ephattu. Hata avirihaka mixankiho iyo, awo annivikaniha ororomeleya wa Yehova nnaamwi ahaawaka vanceene. Nto Yesu onnaalipiha oriki: “Ole onakhela ikano saka, anettela, yowo t’onkiphenta. Vano ole onkiphenta onophentiwa n’Atithi: nave miyo kinomphenta, kinimwìsuweliha wa yowo”.​—Yoh. 14:21.

12. Enamuna xeeni ekina nnooniherya ahu wira ninnimwiiwelela Yesu?

¹² Enamuna ekina nnooniherya ahu omwiiwelela Yesu ori wiiwelela ni otthara malakiheryo a atthu athanliwe wira anihooleleke. (aHéb. 13:7, 17) Mahiku ala, mutthenkeso wa Muluku onnipaka marukunuxo manceene ohela muhina ikaruma ni inamuna isya sa olaleerya, moota woopaka mithukumano sa eriyari ya esumana, enamuna yooteka, olokiherya ni okhapelela Ipa sa Omwene. Tthiri ninnixukhurela malakiheryo awo oophenta ni ookhapelela a mutthenkeso wa Muluku. Nikupaliki wira Yehova onooreeliha wiimananiha wahu otthara malakiheryo otheene ninvahiwa ahu ni mutthenkeso awe olelo-va.

13. Mareeliho xeeni nimphwanya ahu mwaha wonwiriyana Yesu?

¹³ Ninnittottela mureerelo vaavo ninwiriyana ahu itthu sotheene Yesu onniixuttiha awe. Yesu aahaaleela atthareli awe wira soowiixuttiha sawe saamwaakurunuxa murima. Owo aahimmye so: “Munophwanya murettele murohoni mwayu. Tthirí, muritti onoreyakani ti woveya: olemela onotexihakani ti wokhweya”. (Math. 11:28-30) Nuulumo na Muluku, nenno ninhela muhina Ivangelyo xexe sinlavula okumi ni muteko woolaleerya wa Yesu, sinninikurunuxa murima, onlipiha momunepani ni sinninivaha ankhili. (Esal. 19:8; 23:3) Yesu aahimmya so: “Òreriwa toko t’ale anìwa molumo a Muluku, enettela”.​—Luka 11:28.

14-15. (a) Ntoko onihimya awe Yohani 12:27, 28, okathi xeeni wa neeraru Yehova aalavunle awe ori ene wiirimu? (b) Moolumo a Yehova yaamulipinhe sai Yesu?

¹⁴ Mmusome Yohani 12:27, 28. Evangelyo ya Yohani ennihimya ekwaha ya neeraru  Yehova aalavunle awe ori ene wiirimu. Mahiku vakhaani Yesu ohinatthi wiiviwa, owo aari oYerusalemu niira na Paasikha. Okathi owo Yesu aahimmye wira “murim’aka wokìna”. Moottharelana aahivekela oriki: “Tithi, nvuwihe nsina ninyu!” Vano Yesu aahiiwa nsu na Tiithi awe nikhumaka wiirimu, nriki: “Kovuwiha, nave kinovuwiha-tho”.

¹⁵ Yesu aahiiniwa murima, mwaha wa muritti aarina awe wa ovikaniha ororomeleya wa Yehova. Yesu aanisuwela wira aamuhasuliwa vanceene, owaxuliwa ni wiiviwa vootakhala. (Math. 26:38) Etthu yootepa otthuneya Yesu aaphavela awe, waari ovuwiha nsina na Tiithi awe. Owo aahootheriwa onveeha Muluku ni aahiiniwa murima okhala wira okhwa wawe waamunyoholiha nsina na Muluku. Tthiri wiiwa masu ale a Muluku, yaahimulipiha vanceene! Maana aanikupali wira nsina na Tiithi awe nanvuwihiwa tthiri. Moolumo a Tiithi awe, yaahimmaaliha ni omulipiha Yesu mwaha wa itthu aarowa awe ohaawa. Nnaamwi woonasa wene aari Yesu mekhawe iiwale moolumo ale a Tiithi awe, Yehova ooruma olempwa mBiibiliyani wira nittottele mureerelo.​—Yoh. 12:29, 30.

16. Xeeni okathi mukina ninxanka ahu wira nihinyoholihe nsina na Muluku?

¹⁶ Nimutakihaka Yesu, nihaana wiimananiha ohinyoholiha nsina na Yehova. Woonasa wene, ntoko Yesu, hiyo pooti othokoreriwa moohixariya. Nave hiyo pooti oxanka mwaha  wa itthu nnootheriwa ahu ni ale annilupattha. Nto nnapacerya wuupuwela moota wootheriwa iyo onrowa aya onyoholiha nsina na Yehova ni mutthenkeso awe. Okathi owo, moolumo a Yehova ari Yohani 12: 27, 28 pooti onimaaliha vanceene. Nto nihitepeke oxanka mwaha wa itthu iyo nnootheriwa ahu. Mwiira siiso, mukupaliki wira “murettele wa Muluku, onvikana osuwela wa mutthu, onosuka mirima sanyu n’iroho sanyu mwa Yesu Kristu”. (aFil. 4:6, 7) Musuweleke wira okathi wotheene Yehova onoovuwiha nsina nawe. Nto, orumeelaka Omwene, onrowa omaliha itthu sotheene soohiloka Satana onaakumiherya awe arumeyi oororomeleya a Muluku.​—Esal. 94:22, 23; Yes. 65:17.

17. Moovarihana ni Yesaya 30:21, olelo-va Yehova onlavula sai ni hiyo?

¹⁷ Olelo-va, Yehova onnivikaniha olavula ni hiyo. (Mmusome Yesaya 30:21.) Ekeekhai wira khanimmwiiwa Muluku olavulaka wiirimu. Owo oonivaha Nuulumo nawe Biibiliya wira oniixuttiheke. Nave-tho, Yehova onnimukhaliherya “murumeyi òroromeleya” wira aavaheke yoolya ya omunepani arumeyi awe otheene. (Luka 12:42) Tthiri ninnaakhela eyoolya yinceene yomunepani, ntoko iliivuru soowimpirimiriwa, iye siri onlaine, sinwiriyaniwa ni iviidiyu!

18. Moolumo a Yehova anlipiha sai waamini wanyu ni woovahani olipa murima?

¹⁸ Otheene ahu nihaana ovikaniha wuupuwela moolumo Yehova aalavunle awe okathi Mwanawe aari awe valaponi! Tthiri moolumo a mwaneene Muluku alempwale mBiibiliyani, anninikupaliha wira Yehova onnisuwela itthu sotheene ni onoomaliha mixankiho sikumiheriwe ni Satana ni olumwenku awe wootakhala. Nto nlipiherye owiriyana nsu na Yehova. Akhala wira nnoopaka eyo, nnookhumela saana okathi sinnikhumelela aya mixankiho. Biibiliya onninuupuxerya wira : “Enophwanelani t’uvilela, wira nweryé wettela otthuna wa Muluku, n’uphwanya etthu yohimenryaweni”.​—aHéb. 10:36.