Nuulumo na emakhuwa noowi “amen” nintaphulela wira “ekeekhai”, aahiiso “ekhale siiso”. Nuulumo nna ninkhuma elavulelo ya eHeeberi nintaphulela “ekhale yoororomeleya” aahiiso “ti yeeyo”. Nave naanirumeeliwa omilattuni. Nuumala mutthu olapha aahiiso ommana natiri, owo aahaana ohimya wira “amen” ophavelaka ohimya wira ele olavunle awe ti yekeekhai ni aaneemererya omukhumelela itthu olaphenle awe. (Moth. 5:22) Vaavo mutthu owo aahimya awe wira “amen” nipuro noowaatta atthu, owo ooniherya wira ammaliherya itthu sotheene aahimmye awe.​—Neh. 5:13.

Nuulumo noowi “amen” ninnirumeeliwa ikwaha sinceene ekapiitulu 27 ya Otumererya. Nuumala aIsarayeli okela Elapo Yooleiheriwa, yaahithukumana eriyari ya Mwaako Garizimi ni Mwaako Ebali wira awiriyane nisommwaka Nlamulo. Awo yaahikhala opuro ole ohiya paahi wira awiriyane masi wira yooniherye akhala wira yaaneemererya ele Nlamulo naahimya aya. Nto okathi naasommwa aya, awo yaanihimya wira “Ayo” aahiiso amen vaavo saasommwa aya ihukhumu sinikhumelela mwaha woohiiwelela. (Otum. 27:15-26) Nkahaya muupuwele imilyau sinceene sa alopwana, athiyana ni anamwane yaakhulaka ni nsu nowiiwanyeya! (Yox. 8:30-35) Tthiri atthu ale khiyaaliyanle moolumo yaalavunle aya nihiku nne. Nave aIsarayeli ale yaahimaliherya moolumo aya, maana Biibiliya onihimya so: “Atthu a Isarayeli yaharumela Apwiya mahiku othene akhanlyawe Yoxuwa vathí-va, ni mahiku othene akhanlyaya mahumu yamuranttenle Yoxuwa, yawo yasuwenle sotikiniha sothene Apwiya sawirenlyaya atthu a Isarayeli”.​—Yox. 24:31.

Nave Yesu aanirumeela nuulumo noowi “amen”, ophavelaka wooniherya wira ele aahimya awe yaari yekeekhai, masi owo aahirumeela nuulumo nlo mwa enamuna ya vameekhaaya. Ohiya ohimya  wira “amen” nuumala mutthu mukina ohimya etthu, Yesu aaniira “amen” ohinatthi ohimya etthu ophavelaka wooniherya wira etthu aarowa awe olavula yaari yekeekhai. Okathi mukina, Yesu aanilavula ikwaha piili nuulumo noowi amen aahiiso wira “kinolèlani ekhweli”. (Math. 5:18; Yoh. 1:51) Yesu aaphavela owooniherya atthu ale yanwiriyana woona wira moolumo awe yaari eekeekhai. Yesu aahikhalana owerya woohimya siiso okhala wira ookhalana owerya wowaamaliherya anatiri ootheene a Muluku.​—2 aKor. 1:20; Wis. 3:14.

Nave aIsarayeli yaanirumeela nuulumo noowi “amen” okathi yaamulompa aya ni onvekela Yehova. (Neh. 8:6; Esal. 41:14) Vaavo yaahimya aya wira amen wanikisa wa nivekelo, eyo yooniherya wira atthu ale yaaneemererya ele yaahimmwale. Nto atthu ale otheene yaaniwerya wiirela mpantta omukokhorela Yehova mwa enamuna eyo. Eyo ti etthu yiiraneyale okathi Mwene Davidi aakunxe awe Nivuku na Yehova oroihaka oYerusalemu. Okathi wa niira naattharelana, Davidi aahipaka nivekelo ni murima wotheene naakhala ntoko nsipo nenno nilempwale 1 Wahala 16:8-36. Vano otheene ale yaari opuro ole haahihimya wira “atthu othene ehimyeke wira: ‘amen. mwattottopele Apwiya!’”. Tthiri atthu ale yaahihakalala vanceene omukokhorela Yehova nihiku nle.

Eseekulu yoopacerya, maKristau yaanirumeela nuulumo noowi “amen” okathi yanvuwiha aya Yehova. Nave anamalepa akina a Biibiliya yaanihela muhina nuulumo nno mpapheloni mwaya. (aRom. 1:25; 16:27; 1 Ped. 4:11) Eliivuru ya Wisupulula, ennihimya wira malaikha a wiirimu anninvuwiha Yehova ahimyaka wira: “Aleluya! Munvuwihe Muluku!” (Wis. 19:1, 4, Biblia Solempwa sa Muluku) MaKristau a eseekulu yoopacerya, yaamakela ohimya wira “amen” nuumala nivekele naapakiwa mmithukumanoni. (1 aKor. 14:16) Masi nuulumo nle naahikhalana yootaphulela aya yuulupale.

Nuumala woona moota arumeyi a Yehova a khalai yaarumeela aya nuulumo noowi “amen”, nrowe niwehe otthuneya waya wira “amen” wanikisa  wa nivekelo. Vaavo nniira ahu amen wanikisa wa nivekelo nahu, ninnooniherya wira ninneemererya ele nihimmye ahu. Nave vaavo nniira ahu amen wanikisa wa nivekelo nimpakiwa opuro ahireere atthu hata okhalaka moohiiwanyeya, nnooniherya wira ninneemererya ele ehimmwale. Vano nrowe niwehe enamuna ekina ohimya wahu amen ori aya wootthuneya.

Ninnivaha ephoole okhala wira oniirela mpantta okokhorela wahu. Okathi wa nivekelo ninnimukokhorela Yehova ohiya paahi ele ninhimya ahu masi-tho mweettelo ahu. Okhala wira nimphavela ohimya wira “amen” ni murima wotheene, eyo enninikhaliherya ovaha ephoole okathi nimpakiwa aya nivekelo.

Ninnilipiha wiiraana wahu ntoko anamakokhorela ekeekhai. Mavekelo anipakiwa mmulokoni anihela muhina sootthuneya sa atthu otheene aniwiriyana. (Mit. 1:14; 12:5) Nto vaavo nnaakhula ahu vamosa ni anna ni arokora, eyo ennilipiha wiiraana wahu. Vaavo nniira ahu “amen” moowiiwanyeya aahiiso moohiiwanyeya ni moowiirana, mavekelo ahu pooti omwiiriha Yehova opaka ele nivekenle ahu.

Onvuwiha Yehova. Yehova onnivaha efaita itthu saamukhaani nimpaka ahu wira nimukokhorele. (Luka 21:2, 3) Yehova onniweha etthu eniirinhe opaka etthu eyo ni ele eri vamurimani vahu. Hata niwiriyanaka mithukumano mutelefonini nri ene owaani, Yehova onnivaha efaita vaavo ninhimya ahu wira “amen”. Eyo ennincererya omuttottopela wahu Yehova.

Hiyo pooti wuupuwelaka wira “amen” ahu khorina efaita, masi ookhalana efaita yinceene. Enciclopédia ya Biibiliya enihimya wira arumeyi a Muluku anoowerya wooniherya “ni moolumo aya wira annimuroromela, anneemereriwa ni nlipelelo naya nri vamurimani”. Tthiri vaavo nniira ahu “amen” ninninvuwiha ni omuttottopela Yehova.​—Esal. 19:15.