1. Xeeni Yehova oniilikanyiha awe ni maama onimwaamwiha mwanawe?

OKATHI WA profeta Yesaya, Yehova aahikoha wira: “Muthiyana ommwamwiha mwan’awe onowerya omuliyala?” Nuumala-vo, Yehova aahaaleela atthu awe wira: “Onamwi uwo amuliyalaka mwan’awe, miyo nkinoliyalani”. (Yes. 49:15) Ela ekwaha emosa paahi Yehova oniilikanyiha awe ni maama. Maana owo khonimakela wiilikanyiha ni maama. Yehova onniilikanyiha ni maama ophavelaka wooniherya wira onnaaphenta vanceene arumeyi awe ntoko maama onaaphenta awe anaawe, mwaha woowi, oniphavela wira arumeyi awe yooneke wira onnaaphenta vanceene. Aximaama anceene arina moonelo mmosaru ntoko wa murokora oniihaniwa Jasmin. Owo onihimya so: “Vaavo munimwaamwiha anyu mwaninyu, waataana wanyu ni mwaninyu ti wa mahiku otheene”.

2. Yehova onoonela sai vaavo oninweha awe murumeyi awe ohiyaka olaleerya ni orowela mithukumano?

² Yehova onnisuwela vaavo murumeyi awe onihiya awe olaleerya ni orowela mithukumano. Tthiri owo onniriipiwa murima vaavo onaaweha awe khula mwaakha arumeyi awe anceene ahiyaka olaleerya *.

3. Exeeni Yehova oniphavela awe?

³ Hiyo ninnihakalala vanceene vaavo anna ni arokora yaahiyale olaleerya antthikela aya mmulokoni! Nave Yehova oniphavela wira ahokolowele wa yena ni onnaakhaliherya opaka eyo. (1 Ped. 2:25) Ankhi hiyo, ninrowa waakhaliherya sai otthikela mmulokoni? Nihinatthi waakhula nikoho nno, wanipacerya nihaana osuwela itthu siniwiiriha anna ni arokora awo ohiya orowela mithukumano ni olaleerya.

4. Exeeni yaakhumelenle atthu akina mwaha wa muteko aya wa mulaponi?

⁴ Atthu akina annihiya olaleerya ni orowela mithukumano, mwaha woowi annihela nipuro noopacerya muteko aya. Munna onikhala oSul wÁsia, oniihaniwa Hung * onihimya so: “Kaaniviriha okathi munceene kivaraka muteko aka wa mulaponi, nto kaanikhulumuwa vanceene. Kinoona wira kaari mulolo, maana kuupuwela wira kaahaana okhalana musurukhu munceene wira kimurumeeleke Yehova oratteene. Nto kaaniviriha okathi munceene kivaraka muteko. Vakhaani-vakhaani kaahipacerya ocompa mithukumano, nto nuuvira okathi kaahihiya. Satana onnirumeela itthu sa mulaponi wira owiirihe atthu ohiya omukokhorela Muluku”.

5. Mixankiho sa murokora Anne saamwiirinhe opaka exeeni?

⁵ Anna ni arokora akina annihiya olaleerya ni orowela mithukumano mwaha wa mixankiho. Murokora oniihaniwa Anne onikhala oGrã-Bretanha ookhalana anamwane 5. Owo onihimya so: “Mwanaka mmosa mwaamulopwana kaamuyanre orina ene iretta sinceene. Nto nuuvira okathi, mwanaka mwaamuthiyana aahikumihiwa mmulokoni, nave mwanaka mukina mwaamulopwana aahikhalana iretta sa mmuupuweloni. Nto itthu iyo saahikikhulumula mpakha okiiriha ohiya orowela mithukumano ni muteko woolaleerya”. Tthiri vaavo nniiwa ahu eyo, ninnimmorela ikharari Anne ni emusi awe ni anna akina aniwanana mixankiho simosaru!

6. Moota xeeni ohivarihela muteko malakiheryo ari aKolosi 3:13, okhanle aya oomwiiriha mutthu ohiya orowela mithukumano ni olaleerya?

⁶ Mmusome aKolosi 3:13. Anna ni arokora akina aahiya omukokhorela Yehova mwaha woowi aroonyoonyihana ni munna wala murokora mukina a mmulokoni. Murummwa Paulo aahihimya wira okathi mukina anna ni arokora pooti opaka etthu enniwereya. Woonasa wene, awo pooti onithokorerya moohixariya. Nto naahiivahe ephoole, pooti ohihakalalaka ni munna wala murokora owo. Tthiri vaavo mutthu onivikaniha awe onanariwa, owo pooti ohiya orowela mithukumano ni olaleerya. Nwehe yowiiraneya ya munna Pablo onikhala wAmérica do Sul. Owo aahootheriwa wira aahipaka etthu yoohiloka. Masi Pablo khaapanke etthu. Vano axitokweene khiyaamukupali Pablo, nto owo aahiyeleela iparakha sawe mmulokoni mwaha woowi aahipwapweliwa. Pablo aapanke exeeni? Owo onihimya so: “Kaahinyoonyiwa vanceene, nto vakhaani-vakhaani kaahihiya orowela mithukumano”.

7. Exeeni ekhanle omwiiraneela mutthu oniivaha nthowa?

⁷ Mutthu opanke etampi yuulupale khalai, pooti oviriha okathi munceene iivahaka nthowa mwaha wa etthu aapanke awe. Eyo pooti omwiiriha mutthu owo wuupuwelaka wira khoniphentiwa ni Muluku. Hata mutthu owo ottharunwe ene ni omoreliwa ikharari, owo pooti wuupuwelaka wira khoniphwanela okhala murumeyi ooloka a Yehova. Munna oniihaniwa Francisco uupuwela siiso. Owo onihimya so: “Kaahipwapweliwa mwaha woowi kaahimurupiha muthiyana kahaamuthenle aka. Nnaamwi wanipacerya kaarowela mithukumano, kaahipacerya oriipiwa murima vanceene kuupuwelaka wira nkimphwanela okhala Namoona a Yehova. Maana yowuupuxerya ya murima aka yaanikiphukela, nto koona wira Yehova nlelo khokilevelenle. Nto muhoolo mwaya, kaahihiya orowela mithukumano ni olaleerya”. Nyuwo muniwoonela sai anna ni arokora arina mixankiho nilavunle ahu ettima 4 mpakha 7? Niireke munniwoonela othunku? Ankhi Yehova oniwoonela sai?

8. Niireke Yehova onnaaliyala atthu ale yaamurumeela? Mutthokiherye.

⁸ Yehova khonaaliyala atthu ale yaamurumeela ahiya omurumeela mwa okathi vakhaani. Nave  Yehova khonliyala muteko wotheene avanre aya mmutthenkesoni mwawe. (aHéb. 6:10) Profeta Yesaya, aahipaka nlikanyiho noovara murima nnooniherya moota Yehova onaathokorerya awe arumeyi awe. Owo aahimmye so: “Owo onniwettiha atthu awe, ntoko makampusi onlyihawe ipwittipwitthi sawe . . . onnakuxa axinama mmatatani mwawe, onnettiha vorera”. (Yes. 40:11) Yehova yoowo ori Makampusi Muulupale, onoonela sai vaavo oniwoona awe arumeyi awe akina ahiyaka omukokhorela? Yesu aahooniherya moonelo wa Yehova vaavo aakonhe awe atthareli awe wira: “Nyu munòna sai? Mutthu akhalana ipwittipwitthi miloko mulokó [100], yathwelela emosá, khino khanihiya iye sikina miloko mithanu na mixexe ni thanu na xexe [99] mmathalani, khíyarowa ophavela ethwelenle? Aphwanyá vale, kinohimeryani ekhweli wira, onotteliwa murima mwaha w’emosá yeyo ovikana iye sikina sothene [99] sahathwelenle”.—Math. 18:12, 13.

9. Okathi wa Biibiliya, makampusi ooloka aathokorerya sai ipwittipwitthi sawe? (Nwehe elatarato ya ekaapa.)

⁹ Xeeni ohimyaka wira Yehova ori ntoko makampusi? Okhala wira, okathi wa Biibiliya amakampusi yaanithokorerya oratteene ipwittipwitthi saya. Mwa ntakiheryo, Davidi aahiwana ni kharamu wira aakiherye ipwittipwitthi sawe. (1 Sam. 17:34, 35) Makampusi ooloka, onnisuwela vaavo epwittipwitthi enihala aya vakhaani orimeela. (Yoh. 10:3, 14) Makampusi ntoko owo onoovoleiha ipwittipwitthi 99 munsisini noovareleleya wala onvekela makampusi mukina wira okhapeleleke ipwittipwitthi sawe wira aavye epwittipwitthi emosa erimenle. Yesu aahipaka nlikanyiho nla na epwittipwitthi yaarimenle ophavelaka oniixuttiha ekeekhai ela yuulupale: “Atith’inyu ari wirimu khantthuna wira arimele nnákhala mmosá àxikhani ala”.—Math. 18:14.

10. Moovarihana ni Ezekiyeli 34:11-16, exeeni Yehova aaleihenrye awe opaka?

¹⁰ Yehova onniniphenta otheene ahu, waahela muhina “àxikhani” ale arimenle. Omurumeelaka profeta Ezekiyeli, Muluku aahileiherya wira aarowa waavya ipwittipwitthi sawe sirimenle. Nuumala ophwanya, aarowa okhaliherya wira sitthikele okhalana waataana wooloka ni yena. Nave aahihimya etthu aarowa awe opaka wira sitthikele wa yena. Etthu aarowa awe opaka enoolikana  ni ele yaapaka aya amakampusi a wIsarayeli yarimeela epwittipwitthi aya. (Mmusome Ezekiyeli 34:11-16.) Awo yaapaka exeeni? Wanipacerya, makampusi aanirowa ophavelasa epwittipwitthi erimenle. Opaka eyo, waatthuneya okathi ni wiimananiha vanceene. Nuumala ophwanya, owo aanittikiherya nipuro saari aya ipwittipwitthi sikina. Nave akhala wira epwittipwitthi eyo yaahikhulumuwa aahiiso yaahivulalihiwa, makampusi aanikhaliherya wira ekhalane ikuru, orapiha makhwatta, okapatta ni olyiha oratteene. Olelo-va, axitokweene yaawo ari amakampusi a ‘ipwittipwitthi sa Muluku’, ahaana opaka etthu emosaru yaapaka aya amakampusi ale. Awo ahaana omukhaliherya khula mutthu orimenle. (1 Ped. 5:2, 3) Axitokweene ahaana owaavya ni waakhaliherya otthikela mmulokoni ni moophenta owooniherya wira anoowerya otthikela okhala apatthani a Yehova. *

11. Exeeni makampusi ooloka onsuwela awe?

¹¹ Makampusi ooloka onnisuwela akhala wira epwittipwitthi ehanle orimeela. Nave akhala wira epwittipwitthi ennikhuma nipuro siri aya ipwittipwitthi sikina, makampusi khoniwaxula aahiiso othokorerya voohiloka. Nrowe niwehe ntakiheryo Muluku onivanhe awe vaavo aakhaliherya awe arumeyi awe akina, yaawo yaahiyale mwa okathi vakhaani opaka ele Yehova aavekenle awe.

12. Yehova aamuthokorenrye sai Yona?

¹² Profeta Yona aahitthyawa vaavo aarummwale awe ni Muluku orowa oNiinive. Hata vaari siiso, Yehova khaakuvenle omunyanyala Yona. Okhala wira makampusi ooloka, Yehova aahimukhaliherya onvahaka ikuru saarowa omukhaliherya ovara muteko aamurumme awe. (Yona 2:8; 3:1, 2) Muhoolo mwaya, orumeelaka muraapela Yehova aahimukhaliherya Yona woona wira ekumi ya khula mutthu yookhalana efaita yinceene. (Yona 4:10, 11) Ankhi hiyo, etthu xeeni nniixutta ahu? Axitokweene ahaakuveleke ohiya waakhaliherya ale ahiyale orowela mithukumano ni olaleerya. Ohiya-vo, axitokweene ahaana wiimananiha osuwela etthu emwiirinhe mutthu owo ohiya orowela mithukumano ni olaleerya. Nto okathi atthu awo anihokolowela aya wa Yehova, axitokweene ahaana owooniherya wira annaaphenta ni anniwaakhela ni matata manli.

13. Enamuna Yehova aamuthokorenrye awe mulipa-oolepa Esalimo 73, enniixuttiha exeeni?

 ¹³ Mulipa-oolepa Esalimo 73 aahipacerya waakhalela nrima atakhali vaavo aaweha awe akhalaka saana. Nto aaniikoha akhala wira omurumeela Muluku yaari etthu yooloka. (Esal. 73:12, 13, 16) Yehova aapanke exeeni? Owo khampwapwenle mulopwana ole. Nave aaheemererya wira moolumo a nasalimo ole alempwe mBiibiliyani. Nuuvira okathi, nasalimo ole ahoona wira khiivo etthu yooloka envikana okhala mpatthani a Yehova. (Esal. 73:23, 24, 26, 28) Etthu xeeni nniixutta ahu? Axitokweene ahaakuveleke ohiwoona saana ale aniikoha akhala wira ninniphwanya mireerelo mwaha wa omurumeela Yehova. Ohiya waakuvela waapwapwela, axitokweene ahaana wiimananiha osuwela etthu emmwiiriha olavula aahiiso opaka itthu mwa enamuna eyo. Nuumala osuwela ahaana omurumeela Biibiliya wira yaakhaliherye ni waalipiha.

14. Xeeni Eliya aatthuneya awe okhaliheriwa, ni Yehova aamukhalihenrye sai?

¹⁴ Waahikhala okathi Eliya aamutthyawa awe Pwiyamwene Yezabeli. (1 Mam. 19:1-3) Eliya aahimmye wira khuuvo mutthu aamurumeela Yehova, ni wiimananiha wawe omurumeela Yehova khiwaarina efaita. Nto Eliya aahixanka vanceene mpakha onaphavela okhwa. (1 Mam. 19:4, 10) Ohiya ompwapwela, Yehova aahimuleiherya Eliya wira khakhanle mekhawe ni ahaana ororomela okhaliheriwa ni ikuru sa Muluku, ni waahikhala muteko munceene Eliya aarowa awe ovara. Nave Yehova aahinwiriyana Eliya moopixa murima ni aahinvaha muteko mukina. (1 Mam. 19:11-16, 18) Etthu xeeni nniixutta ahu? Otheene ahu, otepexa wene axitokweene ahaana othokorerya oratteene  ipwittipwitthi sa Yehova. Hata mutthu owo olavulaka itthu soohiloka aahiiso uupuwelaka wira Yehova khonrowa omulevelela, axitokweene ahaana onwiriyana oratteene mutthu owo. Nuumala-vo, ahaana wiimananiha omooniherya wira Yehova onnimphenta mutthu owo.

15. Moovarihana ni Yohani 6:39, Yesu oonela sai ipwittipwitthi sa Tiithi awe?

¹⁵ Yehova oniphavela wira niwooneleke sai ale arimenle? Yesu oonivaha ntakiheryo ninreerela ahu otthara. Owo aanisuwela wira khula mutthu ookhalana efaita vamaithoni va Yehova, nto Yesu aahilakela waakhaliherya “atthu a Isarayeli, ari ntoko ipwittipwitthi sirimenle”. (Math. 15:24; Luka 19:9, 10) Okhala wira makampusi ooloka, Yesu aahipaka itthu sotheene aawerya awe wira ehirimeele nnakhala epwittipwitthi emosa ya Yehova.—Mmusome Yohani 6:39.

16-17. Axitokweene yaathokoreryeke sai ale ahiyale orowela mithukumano ni olaleerya? (Nwehe ekaaxa eni: “ Epwittipwitthi Erimenle Enoonela Sai?”)

¹⁶ Murummwa Paulo aahaatumererya axitokweene a muloko a wEefeso omutakiha Yesu. Owo aalenle so: “Mwa sothene kowoniheryani wira nivaraka sisa, ti nrina ahu wakhaliherya atthu òthoiwa, nùpuwelaka molumo Pwiya Yesu ohimyalyawe wira: ‘Mulipaòvaha onoreriwa onvikana mulipa-òvahiwa’”. (Mit. 20:17, 35) Tthiri, olelo-va axitokweene aakhalana muritti muulupale wowaakhapelela atthu a Yehova. Mutokweene oniihaniwa Salvador onikhala wEspanha onihimya so: “Vaavo kinuupuwela aka moota Yehova onaakhapelela awe atthu awe, eyo ennikiiriha opaka itthu sotheene kiniwerya aka wira kaakhapelele atthu awe. Koosuwela wira Yehova oniphavela wira kaakhapeleleke oratteene”.

¹⁷ Atthu otheene naathokorenrye ahu mwaha ola, yaawo yaarimenle, aakhaliheriwa otthikela wa Yehova. Mpakha-va, aakhala atthu anceene ahiyale omurumeela Yehova, yaawo anireerela otthikela wa Yehova. Mwaha onittharelana, ninrowa othokorerya itthu sikina nikhanle ahu oopaka wira naakhaliherye ale arimenle otthikela wa Yehova.