MWAHA ONITHOKORERIWA 30
Muhihiye Weettela Ekeekhai
“Kaiwaka wira an’aka annettela ekekhai, kinnitteliwa murima vanjene: khivo etthu ekina enkitteliha murima siso”.—3 YOH. 4.
NSIPO 54 “Ephiro” Yookumi
ELE NINROWA AHU WIIXUTTA *
1. Etthu xeeni enniiriha ohakalala eri 3 Yohani 3, 4?
MURUMMWA Yohani aahaakhaliherya atthu anceene wiixutta ekeekhai. Tthiri Yohani aanaathokorerya maKristau ale ntoko anaawe. Hata yaarina mixankiho sinceene, awo khiyaahiyale weettela ekeekhai. Niireke munniwerya woona moota eyo yaamuhakalaliha aya Yohani? Olelo-va, hiyo ninnihakalala vaavo nnaaweha ahu aniihu akhale ale naayanre ahu wala oomunepani, yiivahereryaka wa Yehova ni ahihiyaka omurumeela moororomeleya.—Mmusome 3 Yohani 3, 4.
2. Tiivi yaari yoolakela yuulupale ya iwarakha sa Yohani?
2 Mwaakha 98 nuumala Kristu orwa, woonasa wene Yohani aakhala wEefeso aahiiso waattamela epooma ele. Pooti wira aaronwe wEefeso nuumala otthukweliwa esisiro ya oPatmo. Okathi ole, ikuru sowaarya sa Yehova saahimukhaliherya Yohani olepa iwarakha tthaaru. Yoolakela yuulupale ya iwarakha iye, waari waakhaliherya maKristau oororomeleya ohihiya omwaamini waya Yesu ni ohihiya weettela ekeekhai.
3. Makoho xeeni ninrowa ahu waakhula?
3 Yohani aari murummwa ookiserya aari mukumi, nto aanixanka vanceene voohimya sa awiixuttihi owootha yaakenle mmilokoni. * (1 Yoh. 2:18, 19, 26) Anammwareya ale yaahimya wira yaanimusuwela Muluku, masi khiyaiwelela malamulo awe. Vano nrowe niwehe miruku Yehova aamurumme awe Yohani olepa. Vaavo ninthokorerya ahu, nnimoona waakhuliwa wa makoho mararu: Onitaphulela exeeni weettela ekeekhai? Mixankiho xeeni sikhanle oonihiiha weettela ekeekhai? Ninrowa okhaliheryana sai wira nihihiye weettela ekeekhai?
ONTAPHULELA EXEENI WEETTELA EKEEKHAI?
4. Moovarihana ni 1 Yohani 2:3-6 ni 2 Yohani 4, 6, nihaana opaka exeeni wira neettele ekeekhai?
4 Naaphavelaka weettela ekeekhai, nihaana osuwela ekeekhai eri Nuulumo na Muluku, Biibiliya. Nave, nihaana wiiwelela malamulo a Yehova. (Mmusome 1 Yohani 2:3-6; 2 Yohani 4, 6.) Yesu oovaha ntakiheryo noomalela na omwiiwelela Yehova. Nto enamuna yuulupale ya omwiiwelela Yehova ori ootthara oratteene ntakiheryo na Yesu.—Yoh. 8:29; 1 Ped. 2:21.
5. Exeeni ninreerela ahu okupali ni murima wotheene?
5 Wira nihihiye weettela ekeekhai, nihaana okupali ni murima wotheene wira Yehova, Muluku eekeekhai ni itthu sotheene onihimya awe muNuulumoni mwawe ori Biibiliya, ti sekeekhai. Nave nihaana okupali ni murima wotheene wira Yesu tori Mesiya aaleiheriwe. Atthu anceene olelo-va, annaanyiherya wira Yesu tothanliwe wira okhale Mwene a Omwene wa Muluku. Yohani aahaalopola wira yaamukhumelela “atthu anjene òwòtha”, yaawo aniphavela waahapuxa atthu yaale ahiilokihenrye oratteene wira yaakiherye ekeekhai voohimya sa Yehova ni Yesu. (2 Yoh. 7-11) Yohani aalempe so: “Nto vano, nawothe t’ani? T’ule onihimya wira Yesu khahiyó Mòpoli”. (1 Yohani 2:22) Enamuna emosa enrowa onikhaliherya ohiwokiwa ori osoma oratteene Nuulumo na Muluku. Niira siiso, nnoomusuwela oratteene Yehova ni Yesu. (Yoh. 17:3) Nave, nnookupali ni murima wotheene wira nookhalana ekeekhai.
MIXANKIHO XEENI SIKHANLE OONIHIIHA WEETTELA EKEEKHAI?
6. Mixankiho xeeni amiravo arina aya?
6 MaKristau otheene ahaana okhalana ephoole wira ahiwokiwe ni osuwela wa apinaatamu. (1 Yoh. 2:26) Otepexa wene amiravo ahaana okhalana ephoole wira ahimorele ntapha nno. Alexia *, murokora a oFrança orina iyaakha 25 onihimya so: “Okathi kaasoma aka, kaanixanka ni itthu kiixuttihiwa aka, ntoko yowiixuttiha yoowi itthu siroothatuwa ni filosofia wala osuwela wa apinaatamu. Okathi mukina soowiixuttiha iyo saanikisivela ni saanikivara murima. Nto kaahoona wira vaari voohiloka okhootta itthu sotheene Biibiliya oniixuttiha awe, kineemererya itthu sotheene maprusoore aka yaakiixuttiha aya”. Vano Alexia aahisoma oratteene eliivuru A Vida — Qual a Sua Origem? A Evolução ou a Criação? Isumana vakhaani muhoolo mwaya, itthu sotheene ahaasuwela awe oratteene aahisuwela ni aahiiwexexa. Alexia onihimya so: “Kaahoona mmensaka wira Biibiliya ookhalana ekeekhai. Nave kaahoona wira okhala moovarihana ni ele Biibiliya oniixuttiha awe onniphwanyiha ohakalala ni murettele”.
7. MaKristau otheene aahaana osyaka exeeni ni nthowa xeeni?
7 MaKristau otheene, akhale amiravo ni oowunnuwa ahaana osyaka okhalana mirima miili, niire so, omurumeela Yehova okathi omosaru apakaka itthu soohiloka. Murummwa Yohani ohimmye wira khivaniweryaneya weettela ekeekhai okathi omosaru nipakaka itthu soohiloka ntoko orupihana woohiloka. (1 Yoh. 1:6) Akhala wira ninniphavela weemereriwa ni Yehova niinaano-va ni muhoolo, nihaana osuwela wira Yehova onniweha itthu sotheene nimpaka ahu. Musuweleke wira khiivo etampi envitheya vamaithoni va Yehova. Hata atthu akina ahiwehaka itthu nimpaka ahu wiiphiini, Yehova onniweha itthu iyo.—aHéb. 4:13.
8. Otheene ahu nihaana osyaka exeeni?
8 Otheene ahu nihaana osyaka moonelo wa atthu a mulaponi voohimya sa etampi. Murummwa Yohani olempe so: “Nahimyaka wira: ‘Hiyo khanrina etampi’, nnisòtotha mmansihu”. (1 Yoh. 1:8) Mahiku a Yohani, anammwareya yaahimya wira mutthu pooti opaka etampi moolakela okathi omosaru onakhala mpatthani a Muluku. Olelo-va, ninkhala eriyari ya atthu arina moonelo owo. Atthu anceene anihimya wira annimukupali Muluku, masi khaneemererya moonelo wa Muluku voohimya sa etampi, otepexa wene etampi enivarihana ni orupihana woohiloka. Yehova onihimya wira orupihana woohiloka etampi, masi atthu awo anihimya wira akhala wira mutthu onniphavela pooti opaka.
Nyuwo amiravo, mulipihe omwaamini wanyu Biibiliya ni muhihiye otthara malamulo a xariya a Yehova voohimya sa ele eri yooloka ni yoohiloka. Mwiira siiso, munoowerya waakiherya ele munikupali anyu (Nwehe ettima 9) *
9. Mireerelo xeeni amiravo aniphwanya aya vaavo anivarexexa aya ele ansuwela ya wira ti yooloka?
9 Otepexa wene amiravo, pooti waavila okhalana moonelo wooloka voohimya sa orupihana woohiloka akhala wira ale anisomana aya wala anivarana aya muteko khaneemererya moonelo wa Biibiliya voohimya sa orupihana. Eyo ti etthu yaamwiiranenle Aleksandar. Owo onihimya so: “Aximwali akina oxikola yaaphavela wira kaarupihe. Awo yaahimya wira okhala wira nkaarina namorata, nto kaarupihana ni alopwana akhwaaka”. Niireke mootoko weehereriwa mwa enamuna eyo? Akhala wira ti siiso, musuweleke wira ovarexexa ele munisuwela anyu wira ti yooloka onimoophwanyihani mireerelo sinceene. Maana opaka ele Biibiliya onihimya awe wira ti yooloka onimookhaliheryani okhala oottittimiheya, okumi wooloka, ohitepa oxanka ni munookhalana waataana wooloka ni Yehova. Khula okathi munxintta anyu soweeha, munnitepa wiilokiherya wira muxintte sooweha sa muhoolo. Muhiliyale wira moonelo woohiloka atthu a mulaponi arina aya voohimya sa orupihana onikumiheriwa ni Satana. Nto, okathi wotheene munisyaka anyu okhalana moonelo wa mulaponi, nyuwo ‘munninwerya mutakhali’.—1 Yoh. 2:14.
10. Yoolepa ya 1 Yohani 1:9, ennikhaliherya sai omurumeela Yehova ni murima wooloka?
10 Hiyo noosuwela wira Yehova paahi tokhanle oohimya etthu eri etampi ni ehikhanle etampi. Nave nihaana wiimananiha wira nihipakeke etampi. Masi, vaavo nimpaka ahu etampi, nihaana omuleela Yehova. (Mmusome 1 Yohani 1:9.) Akhala wira noopaka etampi yuulupale, nihaana waavekela axitokweene wira anikhaliherye. Awo athanliwe ni Yehova wira anikhapeleleke. (Yak. 5:14-16) Masi, nihaana osyaka omakela wiivaha nthowa mwaha wa itampi nipanke ahu khalai nileveleliwa. Mwaha wa xeeni? Mwaha woowi, Tiithi ahu oophenta oonivaha mukuttho wowoopola wa Mwanawe wira nleveleliwe soottheka sahu. Vaavo Yehova onihimya awe wira oomulevelela natampi ottharunwe, owo oomulevelela tthiri ni murima wotheene. Nto nihaana omurumeela Yehova ni murima wooloka.—1 Yoh. 2:1, 2, 12; 3:19, 20.
11. Ninrowa okhapelela sai muupuwelo ahu wira ohihononiwe ni itthu sinivukula waamini wahu?
11 Nihaana osyaka soowiixuttiha sa anammwareya. Okhuma okathi waapakiwe aya muloko wa eKristau, Diabo onniimananiha vanceene wira ohonone waamini wa arumeyi oororomeleya a Muluku. Nto nihaana osuwela itthu sekeekhai ni itthu sowoothiwa. * Awanani ahu pooti orumeela interneti wala redes sociais wira ahonone omwaamini wahu Yehova ni waaphenta wahu anna ni arokora. Muhiliyale wira Satana tonikumiherya itthu iyo sotheene, nto muhaana okhootta!—1 Yoh. 4:1, 6; Wis. 12:9.
12. Xeeni vari aya vooloka olipiha waamini wahu?
12 Naaphavelaka oxintta soweeha sa Satana, nihaana olipiha omwaamini wahu Yesu ni okupali enamuna Yehova onimurumeela awe Yesu wira opake yootthuna awe. Nave nihaana okupali enamuna onirumeela awe olelo-va wira eettihe mutthenkeso awe. (Math. 24:45-47) Nnoolipiha waamini wahu nisomaka Nuulumo na Muluku khula nihiku. Niira siiso, waamini wahu onrowa okhalaka ntoko mwiri woolipa, yoowo orina mitathaari soowiixerya. Murummwa Paulo aahaaleela maKristau a muloko wa oKolosi etthu yaalikana ntoko eyo. Owo aalenle so: “Okhala wira momwakhelela Pwiya Yesu Kristu, nanso mwetteke mwa yowo, mwixerihaka mitathari sanyu ni muthipeleliwaka mwa yowo, mwilipiheryaka mowaminini”. (aKol. 2:6, 7) Akhala wira muKristau onniimananiha olipiha waamini wawe, Satana ni atthu onaarumeela awe khanrowa omukhoottiherya weettela ekeekhai.—2 Yoh. 8, 9.
13. Nihaana osuwela exeeni ni nthowa xeeni?
13 Nihaana osuwela wira olumwenku onrowa oninyokhaka. (1 Yoh. 3:13) Murummwa Yohani oonuupuxerya wira “elapo yothene enniweriwa ni Mutakhali”. (1 Yoh. 5:19) Vaavo olumwenku ola ontepa aya waattamela wanikisa, Satana onootepa onanariwa. (Wis. 12:12) Owo khonnituphela paahi mwa enamuna ya olavilavi, ntoko orumeela ehelelo ya orupihana woohiloka wala anammwareya. Ohiya-vo owo onnituphela mwa enamuna yooluluwanya, orumeelaka olupatthiwa wootakhala. Satana onnisuwela wira ohalanne okathi vakhaani paahi wira onihiihe ovara muteko ahu woolaleerya ni ohonona waamini wahu. Nto khanintikhina vaavo nnoona ahu muteko ahu woolaleerya okhoottihiwaka ilapo sikina. Hata vari siiso, anna ni arokora anikhala ilapo iyo annivilela vanceene. Awo annooniherya wira moohicikha etthu Satana onipaka awe, hiyo khaninrowa ohiya ororomeleya wahu!
NIKHALIHERYANEKE WIRA NIHIHIYE WEETTELA EKEEKHAI
14. Muhimye inamuna nikhanle ahu oowaakhaliherya anna ni arokora ohihiya weettela ekeekhai.
14 Wira naakhaliherye anna ni arokora ohihiya weettela ekeekhai, nihaana owoonela othunku. (1 Yoh. 3:10, 11, 16-18) Nihaana ophentana mukina ni mukhwaawe ohiya paahi okathi itthu sineetta aya saana, masi-tho okathi wooxankiha. Mwa ntakiheryo, niireke munnimusuwela munna wala murokora okhweliwe onireerela omaalihiwa ni okhaliheriwa? Niireke munnaasuwela anna aphwanyiwe ni ehasara ya ephattu anireerela okhaliheriwa oteka Ipa sa Omwene ni ipa saya? Nihaana owooniherya anna ni arokora wira ninnaaphenta ohiya paahi ni moolumo, masi-tho ni itthu nimpaka ahu.
15. Moovarihana ni 1 Yohani 4:7, 8, nihaana opaka exeeni?
15 Vaavo nnaaphenta ahu anna ni arokora ninnimutakiha Tiithi ihu a wiirimu, Yehova. (Mmusome 1 Yohani 4:7, 8.) Enamuna yuulupale nnooniherya ahu ophentana ori olevelelana mukina ni mukhwaawe. Mwa ntakiheryo, mutthu mukina pooti oniirela etthu enniiwereya, nto onarwa onivekela musammaha. Nnoomooniherya omphenta wahu mutthu owo akhala wira nnoomulevelela ni oliyala etthu oniirenle awe. (aKol. 3:13) Munna oniihaniwa Aldo aahikhalana muxankiho owo okathi munna aamuttittimiha awe vanceene aalavunle awe itthu soohiloka voohimya sa atthu a nloko nawe. Aldo onihimya so: “Kaahinvekela Yehova ikwaha sinceene wira okikhaliherye ohikhalana moonelo woohiloka voohimya sa munna ole”. Masi Aldo aahipaka etthu ekina. Owo aahinvekela munna ole wira yalaleerye vamosa. Vaavo yaalaleerya aya, Aldo aahimuleela munna ole moota aariipiwe awe murima mwaha wa etthu munna ole aahimmye awe. Aldo onihimya so: “Okathi munna ole aasuwenle awe moota kaariipiwe aka murima mwaha wa itthu aahimmye awe, owo aahikivekela musammaha. Moota aalavula awe kaahoona wira aahittharuwa mwaha wa etthu aahimmye awe. Otheene ahu naahipaka murettele ni naahiliyala etthu yiiraneyale”.
16-17. Nihaana olakela opaka exeeni?
16 Murummwa Yohani aanaaphenta vanceene axinnawe oowaamini ni aaphavela wira akhaleke saana momunepani. Eyo ennooneya ni miruku aavanhe awe iwarakha tthaaru uupuxeriwe awe olepa ni Muluku. Ti voohakalaliha osuwela wira aathanliwa alopwana ni athiyana wira yalamuleleke ni Yesu wiirimu!—1 Yoh. 2:27.
17 Ti vooloka ovarihela muteko ni murima wotheene miruku nithokorenrye ahu mwaha ola. Xontte, muhihiye weettela ekeekhai mmwiiwelelaka Yehova mwa itthu sotheene munipaka anyu. Musomeke ni muroromeleke Nuulumo na Muluku, Biibiliya. Mulipihe omwaamini wanyu Yesu. Mukhootteke sowiixuttiha sa apinaatamu ni sa anammwareya. Muhimorele muraakho wa okhalana mirima miili ni omakela opaka etampi. Mukhaleke moovarihana ni malamulo a xariya a Yehova. Nave mwaakhaliherye anna ni arokora ohihiya weettela ekeekhai, mwaaleveleleka ale aniwiirelani itthu soohiloka ni waakhaliherya vaareerelaka. Niira siiso, hata nrina ene mixankiho, nnoowerya ohihiya weettela ekeekhai.
NSIPO 49 Nimuhakalalihe Yehova
^ etti. 5 Ninkhala olumwenku onilamuleliwa ni tiithi a wootha, Satana. Nto vannivila khula nihiku weettela ekeekhai. MaKristau a eseekulu yoopacerya yaahikhalana mixankiho iyo. Wira aakhaliherye, Yehova aahimuruma murummwa Yohani olepa iwarakha tthaaru. Iwarakha iyo sinnooniherya mixankiho sikhanle oomwiiriha mutthu ohiya weettela ekeekhai ni etthu okhanle awe oopaka wira oxintte mixankiho iyo.
^ etti. 3 Nwehe ekaaxa eni: “ Mikhalelo sa Iwarakha sa Yohani.”
^ etti. 6 Masina makina aaturukiwa.
^ etti. 11 Nwehe mwaha oni: “Niireke Munnisuwela Itthu Sotheene sa Mwaha Owo?”, erevista Owehaweha ya Agosto 2018.
^ etti. 59 OTTHOKIHERIWA WA IFOOTU: Murokora mwali ori ene oxikola onniwiriyana ikwaha sinceene atthu ahimyaka myaha sa orupihana athiyanaru wala alopwanaru. (Ilapo sikina, ikoore soovirikana sa ekhweyi sinitaphulela orupihana alopwanaru wala athiyanaru.) Muhoolo mwaya, murokora ole onnitokosa wira olipihe waamini wawe ele Yehova onihimya awe okhala yooloka ni yoohiloka. Eyo enoomukhaliherya mwali ole oxintta mixankiho.
