Makoho Anikohiwa ni Ale Anisoma Irevista Sahu
Moota xeeni ‘Yerusalemu’ onihimmwa Yesaya 60:1, ‘onivenya’ awe ni “warya ntoko nsuwa”?
Yesaya 60:1, onihimya so: “Nyuwo oYerusalemu, nvenyé! Mwarye ntoko nsuwa; warya onomwalelani wophiya, ovuwa w’ Apwiya ohòrwelani”. Epooma ya oYerusalemu aahiiso oSiyoni, yeeyo yaari ekapitaale ya oYuda okathi ole, yaataphulela nloko nootheene na aIsarayeli. (Yes. 60:14; 62:1, 2) Moolumo a Yesaya, annikumiherya makoho manli. Makoho ene taala: Noopacerya, okathi xeeni ni moota xeeni Yerusalemu” ovenye” awe ni onapacerya waarya ntoko nsuwa? Niireke moolumo a Yesaya annaakhwanela mahiku ahu ala?
Okathi xeeni ni moota xeeni Yerusalemu ‘ovenye’ awe ni onapacerya waarya ntoko nsuwa? Okathi aYuda yaakhalihiwe aya ipottha oBabilonia mwa iyaakha 70, Yerusalemu vamosa ni etemplo, khisaarina makhalelo ooloka. Nuumala Babilonia opacerya olamuleliwa ni aMedo ni aPersia, aisarayeli ootheene yaalamuleliwa ni aBabilonia, yaaheemereriwa otthikela elapo aya ni otthikela omukokhorela Yehova ntoko vaareerela aya. (Eezi. 1:1-4) Wanipacerya wa 537 Ohinatthi Kristu Orwa, atthu ootheene ororomeleya a maloko 12, yaahitthikela okokhorela weekeekhai. (Yes. 60:4) Awo, yahipacerya onvaha mikuttho Yehova, opaka ifesta ni yaahitthikela ooteka etemplo. (Eezi. 3:1-4, 7-11; 6:16-22) Ovuwa wa Muluku waahitthikela-tho omwaleela oYerusalemu, eyo piiyo, waamwaleela arumeyi a Muluku. Atthu a nloko nne nootheene, yanimwaleeliwa ni muthuko ole wa nthoonyeryo waahela muhina ale yahaamusuwela Yehova.
Nnaamwi mpantta mmosa wa eprofesia ya Yesaya wiiraneyale okathi ole oYerusalemu, masi aisarayeli yaahihiya omwiiwelela Muluku. (Neh. 13:27; Mal. 1:6-8; 2:13, 14; Math. 15:7-9) Muhoolo mwaya, awo yaahimukhootta Mesiya, Yesu Kristu. (Math. 27:1, 2) Tivonto, mwaakha wa 70 Nuumala Kristu Orwa, Yerusalemu vamosa ni etemplo saahitthikela-tho onyaanyiwa ekwaha yanenli.
Yehova aahihimya wiira eyo yaamwiiraneya. (Dan. 9:24-27) Masi khahiyo wiira Yehova aaphavela wiira Yerusalemu opwetexiwa wiira yiiraneya moomalela eprofesia ya Yesaya ekapiitulu 60.
Niireke moolumo a Yesaya anniiraneya mahiku ahu ala? Aayo. Masi aniiraneya moovarihana ni “Yerusalemu a wiirimu”. Murummwa Paulo olavulaka sa Yerusalemu a wiirimu, owo ohimmye so: “Owo tori maama ahu”. (aGal. 4:26) Yerusalemu a wiirimu, mpantta mmosa wa wiirimu wa mutthenkeso wa Muluku, wa soopattuxiwa sawe soororomeleya sa omunepani. “Anamwane” a Yerusalemu a wiirimu, anihela muhina Yesu ni Makristau oothanliwa 144.000, ntoko Paulo, arina nlipelelo na orowa wiirimu. Makristau ootheene oothanliwa anrowa okhala “nloko na atthu owarya”, eyo piiyo, “aisarayeli a Muluku”. — 1 Ped. 2:9; aGal. 6:16.
Moota xeeni Yerusalemu a wiirimu “onivenya” awe ni “warya ntoko nsuwa?” Owo onipaka eyo orweela wa Makristau oothanliwa ari valaponi. Mulikanyihe moolumo ala ni ele enihimya aya eprofesia ya Yesaya ekapiitulu 60.
Makristau oothanliwa, “avenya” okhala wiira nuumala arummwa ootheene okhwa, awo yaari mweepiphini maana yaanilupatthiwa ni anamavirikanya Nuumala Kristu Orwa. (Math. 13:37-43) Okathi owo, awo yaalamuleliwa ni Babiloonia Muulupale, yoowo ori mutthenkeso wa olumwenku wootheene wa itiini sowootta. Anna awo othanliwa yaari ipottha mpakha “omala wa olumwenku”, eyo piiyo, wanipacerya wa mwaakha wa 1914. (Math. 13:39, 40) Nto wanipacerya wa mwaakha wa 1919, awo yaahitaphuwa vaakhalihiwa aya ipottha ni moowakuveya muthuko wa nthoonyeryo waahipacerya waarya, eyo piiyo, yaanilaleya ihapari sooreera sa Omwene. a Mwa iyaakha sinceene, atthu ootheene a nloko nne yaahitthukweliwa, waahela muhina aisarayeli a Muluku, eyo piiyo, “mamwene” aniromoliwa Yesaya 60:3. — Wiis. 5:9, 10.
Muhoolo, Makristau oothanliwa anoomwarya-mwarya muthuko wa Yehova mwa enamuna ekina yootepa oreera. Moota xeeni? Nuumala Makristau oothanliwa okhwa aahiiso ohiya erutthu ya opinaatamu, awo anrowa wiirelaka mpantta “Yerusalemu a niinano”, aahiiso noivu awe Kristu, Makristau 144.000 waahela muhina mamwene ni anamukuttho. — Wiis. 14:1; 21:1, 2, 24; 22:3-5.
Yerusalemu a niinano, mpantta wootepa okhalana efaita wa wiiraneya wa eprofesia ya Yesaya 60:1. (Mulikanyihe ni Yesaya 60:1, 3, 5, 11, 19, 20 ni Wiisuupulula 21:2, 9-11, 22-26.) Ntoko siisale Yerusalemu a valaponi aari awe olamulelo wa aisarayeli, nave-tho Yerusalemu a niinano, vamosa ni Kristu onrowa okhala olamulelo musya wa olumwenku orina makhalelo a niinano. Moota xeeni Yerusalemu a Niinano, ‘onikhuruwa awe wiirimu okhumaka wa Muluku’? Okhala wiira, onrowa waalamulelaka apinaatamu a valaponi ori ene wiirimu. Nto atthu a maloko ootheene animuttittimiha Muluku, “anrowa weettaka emwaleeliwaka ni muthuko”. Awo khanrowa-tho okhala atthu oottheka ni khanrowa okhwaaka. (Wiis. 21:3, 4, 24) Nto enimwiiraneya moomalela ele ehimmye awe profeta Yesaya ni maprofeta makina, maana “itthu sotheene sinoolokiheriwa”. (Mit. 3:21) Olokiheriwa wa itthu iwo, opacenrye nuumala Kristu okhalihiwa Mwene ni onrowa omala wanikisa wa Olamulelo Awe wa Iyaakha Ekonto Emosa.
a Ottikiheriwa wa okokhorela weekeekhai, opacenrye mwaakha wa 1919, nave eliivuru ya Ezekiyeli 37:1-14 ni Wiisuupulula 11:7-12 sinnilavula sa ottikiheriwa wa okokhorela iwo. Ezekiyeli aahilavula sa ottikiheriwa wa okokhorela weekeekhai wa Makristau ootheene othanliwa, nuumala ovira iyaakha sinceene ekhalihiwe ene ipottha. Eprofesia eri Wiisupulula, yaahilavula sa ottikiheriwa wa ekeekhai wa nthoonyeryo wa ekurupu yaamukhaani ya makristau oothanliwa. Awo yaahiviriha iyaakha vakhaani ekhalihiwe ene ipottha, okhala wiira khiyaawerya ovara miteko sa Yehova mootaphuwa. Nto awo yaahithanliwa mwaakha wa 1919, khukhala “murumeyi ororomeleya ni ankhili”. — Math. 24:45; nwehe eliivuru eni: A Adoração Pura de Jeová É Restaurada! epaax. 118.
