1-2. Sadoki aari aani? (1 Wahala 12:22, 26-28)

 NROWE nithokorerye yoowiiraneya ya Davidi. Muttitthi wa atthu oowiiraka 340.000 yaahiiraana wiira amukhalihe Davidi Mwene a wIsarayeli wootheene. Atthu ale, yaahikhala mahiku mararu omiyaakoni waattamela oHebroni. Awo yaari oohakalala, avaanelaka, yiipaka isipo sa omuttottopela Yehova ni atthekulaka. (1 Wah. 12:39) Eriyari ya muttitthi ole aahikhala mmiravo mmosa aitthaniwa Sadoki. Atthu anceene khiyaanwenhe, masi Yehova aahinweha ni oniphavela wiira nisuwele wiira Sadoki aari vaavale. (Mmusome 1 Wahala 12:22, 26-28.) Sadoki aari aani?

² Sadoki aari namukuttho ni aavara vamosa ni Namukuttho Muulupale Abiyatari. Yehova aahinvaha Sadoki owerya ni ankhili wiira osuweleke oratteene itthu Yena aaphavela awe. (2 Sam. 15:27) Okathi atthu anceene yaaphavela aya ovahiwa miruku yanvekela Sadoki. Owo aari mulopwana oolipa murima. Mwaha ola, nnoothokorerya vanceene mukhalelo ola wootepa oreera aarina awe Sadoki, olipa murima.

3. a) Xeeni nimpirisari ahu okhala oolipa murima? b) Exeeni ninrowa ahu wiixutta yoosoma ela?

³ Mahiku ala ookiserya ninkhala ahu, Satana onniimananiha vanceene wiira omala-malihe omwaamini wahu Yehova. (1 Ped. 5:8) Nto nihaana olipa murima, nimulipelelaka Yehova wiira ompwetexe Satana ni olumwenku ola wootakhala. (Esal. 31:24) Yoosoma ela, nnimwiixutta inamuna tthaaru nikhanle ahu ootakiha olipa murima wa Sadoki.

NIKHALIHERYEKE OMWENE WA MULUKU

4. Xeeni atthu a Muluku anipirisari aya okhala oolipa murima wiira ekhaliherye Omwene wa Muluku? (Nwehe efootu.)

⁴ Ntoko arumeyi a Muluku, nihaana okhaliherya Omwene wa Muluku. Masi ikwaha sikina wiira nipake eyo nimpirisari olipa murima. (Math. 6:33) Mwa ntakiheryo, olumwenku ola wootakhala  ninkhala ahu, nimpirisari okhala oolipa murima wiira niiwelele malakiheryo a Yehova ni olaleya ihapari sooreera sa Omwene. (1 aTes. 2:2) Nave, nihaana okhala oolipa murima wiira nihiirele mpantta olumwenku ola, khula ookathi onootepa okawanyeya myaha sa epoliitika. (Yoh. 18:36) Arumeyi anceene a Yehova, annipweteiwa mireerelo saya, olupatthiwa, nave akina annitthukweliwa mukhatteya mwaha wa ohiirela mpantta myaha sa epoliitika ni ohirowa owana ekhotto.

5. Xeeni Sadoki aapirisari awe okhala oolipa murima wiira omukhaliherye Davidi?

⁵ Okathi Davidi aakhalihiwa awe Mwene, Sadoki khaaronwe oHebroni wiira iirele mpantta efesta ele paahi. Owo aaronwe iilokihenrye ene para owana ekhotto. (1 Wah. 12:38) Sadoki aaniphavela ni murima awe wootheene omukhaliherya Davidi ni owaakiha aisarayeli mmatatani mwa awanani aya. Aanipirisari okhala oolipa murima, okhala wiira khahiyo aari nakhotto aasuwela owana oratta ene ikhotto.

6. Moota xeeni Sadoki aixuntte awe okhala oolipa murima? (Esalimo 138:3)

⁶ Moota xeeni namukuttho Sadoki aixuntte awe okhala oolipa murima? Owo aakhala ni alopwana ootupa ni oolipa murima, moohaanyiherya owo aixuntte ottharaka matakiheryo a alopwana awo. Mwa ntakiheryo, mwaha wa Davidi okhala oolipa murima eyo yaahiwiiriha aisarayeli omuthanla wiira okhale Mwene aya ahimyaka wiira: “Ti nyuwo munrowa oweettihaka . . . aisarayeli”. (1 Wah. 11:1, 2) Okathi wootheene Davidi aarowa awe owana ni awanani awe, owo aanimuroromela Yehova. (Esal. 28:7; musome Esalimo 138:3.) Nave Sadoki aahiixutta okhala oolipa murima ottharaka matakiheryo a alopwana akina, ntoko Yehoyada, mwanawe aari nakhotto yoowo iitthaniwa Benaya ni maxeefi makina 22 yaamukhalihenrye Davidi. (1 Wah. 11:22-25; 12:26-28) Awo yaahithanla omukhaliha Davidi Mwene aya ni yaahiimananiha omukhapelela.

7. a) Matakiheryo xeeni olelo-va anrowa onikhaliherya okhala oolipa murima? b) Moovarihana ni eviidiyu, exeeni mwiixuntte anyu ni ntakiheryo na munna Nsilu?

⁷ Hiyo nave, nnoowerya okhala oolipa murima, niixuttaka ni matakiheryo arumeyi a Yehova yaarina mukhalelo owo ni yaamukhaliherya Yehova ni Omwene awe moororomeleya.  Mwene ahu Yesu Kristu, moolipa murima aahikhootta wiirela mpantta myaha sa epoliitika sa olumwenku ola wa Satana. (Math. 4:8-11; Yoh. 6:14, 15) Khula okathi Yehova aanimukhaliherya Yesu okhala oolipa murima, ni aaninvaha ikuru aapirisari awe wiira opakeke itthu sooloka. Nave olelo-va, nookhalana matakiheryo a amiravo anceene yaawo anikhootta owana ekhotto ni ahiniirela mpantta myaha sa epoliitika. Munoonela sai osoma matakiheryo a amiravo awo musaitini jw.org? a

NAAKHALIHERYEKE ANNA NI AROKORA

8. Okathi xeeni axitokweene anipirisari aya okhala oolipa murima?

⁸ Hiyo arumeyi a Yehova onisivela okhaliheryana mukina ni mukhwaawe. (2 aKor. 8:4) Masi ikwaha sikina nihaana olipa murima wiira naakhaliherye anna ni arokora. Mwa ntakiheryo, okathi wa ekhotto, axitokweene ahaana olipiha waamini wa anna ni arokora ni waakhaliherya yaavahaka itthu anipirisari aya. Axitokweene annaaphenta vanceene anna ni arokora, tivonto annipaka sootheene aniwerya aya wiira yaakhaliherye hata vaxankihaka opaka eyo. (Yoh. 15:12, 13) Vaavo axitokweene anipaka aya eyo, hiyo pooti ohimya wiira awo anitthara ntakiheryo na olipa murima wa Sadoki.

9. Moovarihana ni 2 Samuweli 15:27-29, exeeni Davidi anvekenle awe Sadoki opaka? (Nwehe efootu.)

⁹ Okumi wa Davidi waari mmaxakhani, maana mwanawe iitthaniwa Absalomi aaphavela omwiiva. (2 Sam. 15:12, 13) Davidi ahaana okhuma oYerusalemu moowakuveya! Nto owo ahaahimeerya arumeyi awe wiira: “Nrowe nitthyawe, okhala wiira khuuvo onrowa woopowa mmatatani mwa Absalomi!” (2 Sam. 15:14, Biibiliya a Elapo Esya.) Okathi arumeyi awo yaatthyawa aya, yaahuupuwela wiira ahaana ohala mutthu oYerusalemu wiira oweheke itthu Absalomi aapaka awe ni aasuweliheke. Tivonto Davidi aahimuruma Sadoki ni anamukuttho akina otthikela oYerusalemu. (Mmusome 2 Samuweli 15:27-29.) Masi, awo yahaana okhalana ephoole maana etthu Davidi aavekenle  awe opaka yaari yoowoopiha. Absalomi aari mulopwana ootakhala, oowiisoona ni aaphavela mureerelo awe paahi. Nkuupuwelani etthu aarowa awe omwiiriha Sadoki ni anamukuttho akina nuumala osuwela wiira yaari anamahottela ni yaaphavela omukhapelela Davidi!

10. Moota xeeni Sadoki ni atthu akina yaamukhapelenle aya Davidi?

¹⁰ Davidi aahikhalana palano, masi wiira oweryaneye aahinvekela Sadoki ni mpatthani awe oororomeleya iitthaniwa Huxayi. (2 Sam. 15:32-37) Ophavelaka omwaakhwaniherya palano a Davidi, Huxayi ahoothererya wiira aamukhaliherya Absalomi ni aahinvaha miruku sa moota womphwanya Davidi. Masi mweekeekhai eyo yaamukhaliherya Davidi wiilokiherya wiira omuxintte Absalomi. Vaavo Absalomi aaphavela awe otthara miruku sa Huxayi, moottharelana Huxayi aahimuhimeerya Sadoki ni Abiyatari voohimya sa etthu Absalomi aaphavela awe opaka. (2 Sam. 17:8-16) Nuumala-vo, awo yaahimuleela Davidi etthu Absalomi aaphavela awe opaka. (2 Sam. 17:17) Okhaliheriwaka ni Yehova, Sadoki ni anamukuttho akina, yaahiwerya omukhapelela Davidi. — 2 Sam. 17:21, 22.

11. Ninrowa otakiha sai olipa murima wa Sadoki okathi nnaakhaliherya ahu anna ni arokora?

¹¹ Vakhala wiira anna ni arokora a mmulokoni sinnaaphwanya mixankiho anipirisari aya okhaliheriwa, ninrowa wooniherya sai okhala oolipa murima ntoko Sadoki? Nnoowerya nittharaka iponto iya sinittharelana: (1) Otthara malakiheryo. Okathi sinikhumela aya itthu soowoopiha, nihaana okhala atthu oowiiraana ni otthara malakiheryo anikhuma oBeteli. (aHeeb. 13:17) Axitokweene ahaana owuupuxerya anna ni arokora malakiheryo a mutthenkeso wa Yehova, anooniherya moota woowiilokiherya ni etthu akhanle aya oopaka sakhumelela ihasara. (1 aKor. 14:33, 40) (2) Mulipeke murima masi ni ephoole. (Mir. 22:3) Muupuweleke muhinatthi opaka etthu. Muhiikumiheryeke ehasara mahala ene. (3) Mmuroromeleke Yehova. Muhiliyale wiira Yehova onnovahani efaita nyuwo ni  anna ni arokora. Nto owo onimookhaliheryani wiira nwerye waakhaliherya anna ni arokora moovareleleya.

12-13. Yoowiiraneya ya Viktor ni Vitalii ewiixuttinheni exeeni? (Nwehe efootu.)

¹² Nrowe nithokorerye yoowiiraneya ya Viktor ni Vitalii, yaawo yiivaherenrye waavaha eyoolya ni maasi anna ni arokora a wUcrânia. Viktor onihimya so: “Naanivira mapuro ootheene naavyaka eyolya. Khula opuro naavira ahu naaiwa onyakula wa ipaala paahi. Munna mmosa yoowo aarina elooxa awe aahiivahererya wiira okhaliherye onivahaka yoolya. Tthiri nikhaliheryo na munna ole, naahaakhaliherya vanceene anna okathi ole wooxankiha. Okathi naateexa ahu eyoolya mukaaroni, epompa emosa yaahiphuwa imeeturu 20 waattamela opuro naari ahu. Nihiku nle nootheene kaanimuxonttela Yehova wiira kihihiye waakhaliherya anna ni arokora”.

¹³ Vitalii onihimya so: “Naapirisari okhala oolipa murima. Mukwaha aka woopacerya waavirinhe iwoora 12. Kaaninvekela Yehova wiira okikhaliherye”. Vitalii aari oolipa murima masi aanikhalana ephoole. Owo onnincererya: “Kaahinvekela Yehova wiira okivahe ankhili ni wiira kihiiroromeleke. Keettiha paahi ekaaro ele, istaraata seemereriwe ni kuvernu. Waamini waka waahitepa olipa, vaavo kaawehaka anna ni arokora avaraka hoothe. Anna awo yaahikhaliherya akumihaka itthu saattiyale estaraata, othukumanya eyoolya ni ikuwo ni onikhaliherya ohela mukaaroni wiira nikuxe nirowaka mukwaha ole. Nave yaaninivaha etthu yoolya ni opuro woophumurya”.

MUHIHIYE OMUROROMELA YEHOVA

14. Nnoonela sai vaavo mutthu namphenta ahu onihiya awe omurumeela Yehova?

¹⁴ Ti vooriipiha murima ni ti vooxankiha ovilela, vaavo mmusi ahu aahiiso mpatthani ahu onihiya awe omurumeela Yehova. (Esal. 78:40; Mir. 24:10) Vakhala wiira ninnimphenta vanceene mutthu owo, vannixankiha ovilela. Masi ntakiheryo na ororomeleya wa Sadoki pooti woolipihani.

15. Xeeni Sadoki aapirisari awe okhala oolipa murima, wiira ohihiye okhala oororomeleya? (1 Mamwene 1:5-8)

¹⁵ Sadoki khaahiyale omuroromela Yehova hata okathi mpatthani awe, Abiyatari, aahiyale awe ororomeleya. Eyo yiiraneyale wookiseryani wa olamulelo wa Davidi. Ohalaka vakhaani okhwa, mwanawe iitthaniwa Adoniya aaphavela wiikhaliha mwene nnaamwi Yehova aamuthanlale Salomoni. (1 Wah. 22:9, 10) Abiyatari aahithanla omukhaliherya Adoniya. (Mmusome 1 Mamwene 1:5-8.) Ohiya paahi ohiroromeleya wa Davidi, owo khaaroromeleyale wa Yehova! Niireke munniwerya wuupuwela moota Sadoki aariipiwe awe murima nuumala osuwela etthu yiiraneyale? Sadoki ni Abiyatari yaahivara hoothe ntoko anamukuttho mwa iyaakha 40. (2 Sam. 8:17) Sadoki ni Abiyatari “yaahikuxa nivuku na nivarihano na Muluku eekeekhai”. (2 Sam. 15:29) Wuupaceryani, awo yaahimukhaliherya Davidi ntoko Mwene aya ni yaahipaka itthu sinceene mmutekoni mwa Yehova. — 2 Sam. 19:11-14.

16. Woonasa wene exeeni yaamukhalihenrye Sadoki ohihiya okhala oororomeleya?

¹⁶ Sadoki khaahiyale ororomeleya wa Yehova nnaamwi Abiyatari aahiyale omuroromela Davidi hoothe ni Yehova. Mwaha waivaavo, Davidi aanimuroromela Sadoki. Okathi Mwene Davidi aasuwenle awe wiira aahirukunuweliwa ni Adoniya aahimwiitthana Sadoki, Natani ni Benaya wiira yamukhalihe Salomoni Mwene. (1 Mam. 1:32-34) Sadoki aahilipa vanceene mwaha wa oweha ntakiheryo na Natani ni arumeyi akina a Yehova yaamukhaliherya Davidi. (1 Mam. 1:38, 39) Nuumala Salomoni okhalihiwa Mwene, owo “aahimuthanla namukuttho Sadoki wiira omuranttele Abiyatari”. — 1 Mam. 2:35.

17. Munrowa omutakiha sai Sadoki, vakhala wiira mutthu mwamphenta anyu onnihiya omurumeela Yehova?

 ¹⁷ Munrowa otthara sai ntakiheryo na Sadoki? Akhala wiira mutthu munimphenta anyu onnihiya omurumeela Yehova, mooniheryeke wiira moolakela okhala oororomeleya. (Yoox. 24:15) Yehova onimoovahani ikuru ni olipa murima wiira muhihiye omurumeela. Munvekeleke Yehova ni mukhaleke apatthani a arumeyi awe. Owo onnivaha efaita ororomeleya wanyu, nave onimootthuvelani. — 2 Sam. 22:26.

18. Exeeni mwiixuntte anyu ni yoowiiraneya ya Marco ni Sidse?

¹⁸ Nrowe nithokorerye etthu yaamwiiranenle Marco ni mwaarawe oniitthaniwa Sidse. Awo yaahikhalana anamwane anli masi nuumala wunnuwa, anamwane awo yaahithanla ohiya omurumeela Yehova. Marco onihimya so: “Okhuma nihiku mutthu onimuyara awe mwaana, onniimananiha omphenta vanceene. Nave mutthu onniimananiha vanceene omukhapelela wiira ehimukhumelele etthu yootakhala. Nto ti voowereya waaweha awo ahiyaka omurumeela Yehova. Masi okathi wootheene Yehova oonikhaliherya ovilela. Okathi kinikhulumuwa aka mwaha wa itthu iyo sikhumuleenle, mwaaraka onnikimaaliha ni onnikilipiha. Nave okathi yena onikhulumuwa awe miyo kinnipaka etthu emosa-ru”. Sidse onihimya so: “Khinaarowa owerya ovilela muxankiho ole Yehova ahaanikhaliherya. Kaaniripiwa murima vanceene mwaha wa aniihu ohiya omurumeela Yehova. Nuumala-vo, kaahimuleela Yehova itthu iye saakixankiha kirumeelaka nivekelo. Nuuvira okathi vakhaani, murokora kaakisenrye aka onweha khalai, aahirwa vaarya aka okikhupaarela onahimya wiira: ‘Sidse muhiliyale wiira nyuwo khamurina nthowa mwaha wa aniinyu ohiya omurumeela Yehova!’ kiikhaliheriwaka ni Yehova nkinihiya onvarela miteko sawe moohakalala”.

19. Exeeni mulakenle anyu opaka?

¹⁹ Yehova oniphavela wiira arumeyi awe ootheene akhaleke oolipa murima sintoko Sadoki. (2 Tim. 1:7) Masi Yehova khoniphavela wiira niroromeleke ikuru sahu. Owo oniphavela wiira niroromeleke ikuru onnivaha awe. Nto soophwanyani mixankiho munireerela anyu okhala oolipa murima, munvekeleke Yehova wiira ookhaliheryeni. Mukupaliki wiira Yehova onimookhaliheryani okhala oolipa murima, ntoko Sadoki! — 1 Ped. 5:10.