1. Nooneleke sai eparakha nrina ahu ya onvekela Yehova?

 YEHOVA, yoowo opattunxe erimu ni elapo, oonivaha eparakha ya efaita yinceene, eyo piiyo, onvekela. Nkahaya muupuwele ela: Hiyo nnoowerya omuleela Yehova ele eri vamurimani vahu khula okathi, khula opuro ni nrumeelaka khula nttaava woohipirisari othanla okathi. Nikupaliki ni murima wootheene wira Yehova onoowiriyana mavekelo ahu, hata naapaxanri ene ospitaali, nri ene mukhatteya aahiiso nihiweryaka okhuma owaani. Ninnixukhurela vanceene eparakha ela nirina ahu ya ovekela.

2. Davidi oonihenrye sai wira aanivaha efaita eparakha ya ovekela?

² Mwene Davidi aanivaha efaita eparakha arina awe ya ovekela. Owo aahimwiipela Yehova ohimyaka wira: “Ovekela waka olikane n’irupani entthuwa oholo wanyu”. (Esal. 141:1, 2) Okathi wa Davidi, erupani anamukuttho yaarumeela aya okokhorela weekeekhai, yaanilokiheriwa oratteene. (Okhum. 30:34, 35) Ntoko siisaale erupani yaalokiheriwa aya oratteene, Davidi anniphavela wuupuwelela oratteene ni othanlela saana moolumo aarowa awe orumeela okathi aarowa awe onvekelaka Yehova. Hiyo nimphavela omutakihaka Davidi. Nave nimphavela wira mavekelo ahu amusiveleke Yehova.

3. Okathi nninvekela ahu Yehova, nikhaleke sai ni mwaha wa xeeni?

³ Okathi nnivekela ahu Yehova, nihaana omuttittimiha vanceene. Nkahaya muupuwele itthu ooniheriwe awe profeta Yesaya, Ezekiyeli, Daniyeli ni Yohani. Itthu iyo yooniheriwe aya, saahivirikana vanceene, masi yaahikhala etthu emosa saalikana aya. Sowoonihiwa iyo sootheene sinimooniherya Yehova ntoko Mwene muulupalexa. Profeta Yesaya aahinweha Yehova ‘okilathalene vehijeni vorakama ni vottittimiheya’. (Yes. 6:1-3) Ezekiyeli aahinweha Yehova okilaathale ene ekaaro awe ya wiirimu  ni orukureriwe ene ni waarya ‘walikana n’ikhweyi enkhumelela mmekuni’. (Ezek. 1:26-28) Daniyeli aahinweha “humu mulupale” owanreene ikuwo sootteela ehice awe yaari ntoko malumi a mooro. (Dan. 7:9, 10) Yohani aahinweha Yehova okilaathale ene veehiceni vawe orukureriwe ene ni ekhweyi, yaalikana ni esmeralta. (Wiis. 4:2-4) Sowoonihiwa iyo sinninuupuxerya wira Yehova toovuwa ni tooweryexa, nto nihaana ovaha efaita yinceene eparakha nrina ahu ya onvekela Yehova. Masi itthu xeeni nikhanle ahu ovekela?

4. Moolumo oopacerya a nivekelo na ntakiheryo niri Matheyo 6:9, 10, anniixuttiha exeeni?

⁴ Mmusome Matheyo 6:9, 10. Mwaha aalavunle awe vamwaako, Yesu aahiwiixuttiha atthareli awe moota woovekela mwa enamuna enimusivela Muluku. Nuumala oohimya wira “nto nvekeleke so”, Yesu aahipacerya ohimya itthu sa faita yinceene awiixutti awe yaareerela aya ovekela, seiyo sinivarihana ni ele Yehova oniphavela awe, ntoko otteelihiwa nsina na Muluku, orwa wa Omwene yoowo onrowa waapwetexa awanani ootheene a Muluku ni itthu sooreera Muluku onrowa awe waavaha muhoolo apinaatamu oowiiwelela. Okathi ninvekela ahu itthu iyo, ninnooniherya wira ninnivaha efaita ele Muluku oniphavela awe.

5. Niireke ti vooloka onvekela Yehova itthu nimphavela ahu?

⁵ Mpantta onittharelana wa nivekelo na ntakiheryo, Yesu aahooniherya wira ti vooloka onvekela Yehova itthu nimphavela ahu. Hiyo pooti onvekela Yehova wira onivahe eyoolya ya nihiku, onilevelele soottheka sahu, oohinihiya nimooraka okathi nneehereriwa ahu ni onaakiherye mutakhali. (Math. 6:11-13) Okathi nninvekela ahu itthu iyo, ninnooniherya wira ninlipa ni okhaliheriwa ni Yehova ni ninniphavela omusiveliha.

6. Niireke nihaana ovekela paahi itthu siri nivekelo na ntakiheryo? Mutthokiherye.

⁶ Yesu khaaphavela wira atthareli awe alavuleke moolumo ene yaaleenexa a nivekelo na ntakiheryo okathi aninvekela aya Yehova. Okathi mukina, Yesu aavekela awe, owo aahilavula myaha sikina saarina efaita okathi ene yoole. (Math. 26:39, 42; Yoh. 17:1-26) Nimutakihaka Yesu, hiyo nihaana onvekela Yehova khula etthu enixankiha. Okathi nimphavela ahu  opaka yoothanla ya faita yinceene, nihaana onvekela Yehova wira onivahe ankhili. (Esal. 119:33, 34) Nave okathi ninvahiwa ahu muritti musya, nihaana onvekela Yehova wira onivahe malakiheryo anrowa onikhaliherya ovara saana muritti owo. (Mir. 2:6) Anamuyari ahaana waavekelela anaaya, anamwane ahaana waavekelela anamuyari aya, nto ootheene ahu nihaana waavekelela anaxikola ahu a Biibiliya ni atthu nnaaphwanya ahu naalaleeryaka. Ekeekhai wira mavekelo ahu nihaana omuroihela Yehova paahi.

7. Xeeni vari aya vooloka omuttottopela ni onvuwiha Yehova okathi nnivekela ahu?

⁷ Okathi oninvekela ahu Yehova nihiliyaleke omuttottopela. Khuuvo mutthu mukina oniphwanelela ottottopeliwa ni ovuwiha onvikana Muluku ahu Yehova. Maana owo ‘tòrera murima ni òlevelela’. Nave Yehova, “Muluku òrera murima ni òlevelela, òpisa oviruwa, òsareya othunku ni òroromeleya”. (Esal. 86:5, 15) Nookhalana mathowa ooloka anniiriha onvuwiha ni omuttottopela Yehova, mwaha wa mikhalelo sawe sooreera ni itthu sooloka onipaka awe.

8. Itthu xeeni ninreerela ahu omuxukhurela Yehova? (Esalimo 104:12-15, 24)

⁸ Ohiya paahi omuttottopela ni onvuwiha Yehova okathi ninvekela ahu, nihaana omuxukhurela mwaha wa itthu sooloka onnivaha awe. Mwa ntakiheryo, hiyo pooti omuxukhurela Yehova mwaha wa ikoore soovirikana sa ifilori ninweha ahu, yoolya yoosiva ni apatthani anniphenta onivanhe awe. Tiithi ahu ophenta onninivaha itthu iyo sootheene, mwaha woowi oniphavela wira nihakalaleke. (Musome Esalimo 104:12-15, 24.) Nave etthu ya efaita yinceene, nihaana omuxukhurela Yehova mwaha wa malakiheryo onnivaha awe, yaawo annikhaliherya olipiha waamini wahu ni nlipelelo noovara murima na muhoolo.

9. Etthu xeeni enrowa onikhaliherya ohiliyala omuxukhurela Yehova? (1 aTesaloonika 5:17, 18)

⁹ Okathi mukina pooti oliyala omuxukhurela Yehova mwaha wa itthu sooloka onivaha awe. Etthu xeeni mukhanle anyu opaka wira muhiliyale omuxukhurela Yehova? Nyuwo pooti olepa elista ya itthu soovirikana munvekele anyu Yehova, nuuvira okathi pooti oweha moota Yehova aakhunle awe mavekelo anyu. Nuumala-vo,  nyuwo pooti onvekela Yehova mmuxukhurelaka mwaha woowookhaliheryani. (Musome 1 aTesaloonika 5:17, 18.) Nkahaya muupuwele ela: Hiyo ninnihakalala vanceene vaavo mutthu mukina onnixukhurela awe mwaha wa etthu yooloka nipanke ahu. Mwa enamuna emosaru, Yehova onnihakalala okathi nimmuxukhurela ahu, mwaha wa waakhula mavekelo ahu. (aKol. 3:15) Yookhala etthu ekina ya faita yinceene enniiriha omuxukhurela Muluku.

10. Moovarihana ni 1 Pedru 2:21, xeeni vanireerela aya omuxukhurela Yehova mwaha woomuruma Yesu orwa valaponi?

¹⁰ Musome 1 Pedru 2:21. Ninnimuxukhurela vanceene Yehova mwaha woomuruma mwanawe wira oniixuttihe ekeekhai. Tthiri okathi ninsoma ahu voohimya sa Yesu, ninniixutta itthu sinceene voohimya sa Yehova ni moota nikhanle ahu oomusiveliha. Akhala wira nnimwaamini mukuttho wowoopola wa Kristu, nnookhalana ompatthani wooloka ni Yehova Muluku ni nnookhalana murettele ni yena. — aRom. 5:1.

11. Xeeni ninvekela ahu mwa nsina na Yesu?

¹¹ Ninnimuxukhurela vanceene Yehova mwaha wooneemererya onvekela orweela mwa nsina na Yesu. Yehova onnimurumeela Yesu wira onivahe itthu nnivekela ahu. Owo onniwiriyana ni onnaakhula mavekelo anipakiwa mwa nsina na Yesu. Eyo ti etthu yaamwiirinhe Yesu ohimya so: “Khula etthu muniveka anyu mwa nsina naka, miyo kinoopaka, wira Atiithi avuwihiwe mwaha wa miteko Mwaana onivara awe”. — Yoh. 14:13, 14.

12. Etthu xeeni ekina enniiriha omuxukhurela Yehova mwaha woomuruma mwanawe?

¹² Yehova onninlevelela itampi sahu orumeelaka mukuttho wa Yesu Kristu. Biibiliya onnimuhimya Yesu okhala ‘namukuttho ahu muulupale nave okilanthi moono woolopwana wa Muluku wiirimu’. (aHeeb. 8:1) Yesu Kristu namakhaliherya ahu “yoowo ori ni Tiithi”. (1 Yoh. 2:1) Ninnimuxukhurela vanceene Yehova onivaha mukhulupale a namukuttho ‘onisuwela sootteettheya sahu ni onnivekelela’. (aRom. 8:34; aHeeb. 4:15) Okhala wira na anatampi, khinaarowa oweryaka onvekela Yehova waahaakhanle mukuttho wowoopola wa Yesu. Tthiri etthu yuulupale Yehova onivanha awe, mukuttho wowoopola wa Yesu Kristu. Hiyo ninnimuxukhurela vanceene Yehova mwaha woonivaha mwanawe!

13. Ohiyu aarowa awe wiiviwa, Yesu oonihenrye sai wira aanaaphenta vanceene awiixutti awe?

¹³ Ohiyu aarowa awe wiiviwa, Yesu aahiviriha okathi munceene onvekelaka Tiithi awe wira ‘akhapeleleke aawiixutti awe mwaha wa Satana’. (Yoh. 17:15) Mwaha woopaka eyo, Yesu aahooniherya wira aanaaphenta vanceene. Yesu aanisuwela wira aamweehereriwa ni anviriha mixankiho suulupale. Hata vari siiso, owo aahaakhapelela awiixutti awe.

14. Ninrowa wooniherya sai wira ninnaaphenta anna ni arokora?

¹⁴ Nimutakihaka Yesu, okathi ninvekela ahu hiyo khanniisuupuwela mmensihu paahi. Ohiya-vo, khula okathi ninnaavekelela anna ni arokora. Okathi nimpaka ahu eyo, ninniiwelela yooruma ya Yesu ya ophentana mukina ni mukhwaawe ni ninnimooniherya Yehova wira ninnaaphenta vanceene anna ni arokora. (Yoh. 13:34) Waavekelela anna ni arokora khahiyo ninkastari okathi ahu mahala. Biibiliya onihimya wira: “Mavekelo ooxonttela a naxariya, aakhalana owerya wuulupale”. — Yak. 5:16.

15. Xeeni vaanireerela aya waavekelela anna ni arokora?

¹⁵ Nihaana waavekelela anna ni arokora mwaha woowi sinnaaphwanya mixankiho sinceene . Nihaana onvekela Yehova wira aakhaliherye  ovilela oretta, ihasara sa ephattu, ikhotto, olupatthiwa ni mixankiho sikina. Nave nihaana waavekelela anna ni arokora aniimananiha waakhaliherya ale aarina mixankiho. Woonasa wene, nyuwo munnimusuwela munna aahiiso murokora orina muxankiho muulupale. Nto munoonela sai onvekelela muromolaka nsina nawe? Ninnooniherya wira ninnaaphenta vanceene anna ni arokora okathi nninvekela ahu Yehova wira akhaliherye ovilela.

16. Xeeni vanireerela aya waavekelela anna anikhapelela muloko?

¹⁶ Axitokweene ni arumeyi ookhaliherya anihakalala vanceene okathi nnaavekelela ahu, maana mavekelo ahu annaakhaliherya vanceene. Murummwa Paulo aahaavekela anna wira anvekeleleke. Owo alempe so: “Nave-tho, mukivekeleleke wira Muluku okivahe moolumo awe, wira okathi onlavula aka, kilavuleke kihoovaka etthu, siiso kinoowerya osuweliha esiiri ya Muluku ya ihapari sooreera”. (aEef. 6:19) Amutakihaka Paulo, olelo-va, akhala anna anceene aniimananiha ovara muteko wira akhapelele muloko. Onvekela Yehova wira akhaliherye anna awo, ninnooniherya wira ninnaaphenta vanceene.

17-18. Okathi xeeni nikhanle ahu ovekeliwa opaka nivekelo, ni etthu xeeni ninreerela ahu wuupuwela okathi owo?

¹⁷ Okathi mukina, pooti ovekeliwaka opaka nivekelo ohoolo wa atthu akina. Mwa ntakiheryo, murokora oniiriha yoosoma ya Biibiliya pooti onvekela murokora orina awe wira opake nivekelo. Woonasa wene, murokora owo khonimusuwela oratteene naxikola owo a Biibiliya, nto vaamureerela owo opaka nivekelo nookiserya. Opaka eyo, enoomukhaliherya murokora owo oweha itthu sinimuxankiha naxikola owo ni ohela muhina mixankiho iyo okathi onivekela awe.

¹⁸ Okathi munna onivekeliwa awe opaka nivekelo, mithukumano sa mmulokoni aahiiso muthukumano wa muteko woolaleerya, ohaana osuwela yoolakela ya muthukumano owo. Okathi onipaka awe nivekelo, kaahiyo para ovaha miruku muloko aahiiso opaka soohimmwa. Mithukumano sahu sinceene, minutu 5 soopacerya sinnirumeeliwa para wiipa nsipo ni opaka nivekelo. Nto munna onipaka nivekelo noopacerya khonreerela orumeela “moolumo  manceene” otepexa wene wanipacerya wa mithukumano. — Math. 6:7.

19. Etthu xeeni enrowa onikhaliherya wiilokiherya para nihiku na ophukela wa Yehova?

¹⁹ Nihaana ovekela ikwaha sinceene mwaha woowi nihiku na ophukela wa Yehova ninnaattamela. Tivonto Yesu ahimmye awe so: “Muthipeleleke owehaweha. Okathi wotheene muxontteleke wira muhiphwanyiwe ni itthu sotheene sinrowa wiiraneya”. (Luka 21:36) Akhala wira nnoovekela ikwaha sinceene, eyo enoonikhaliherya olipiha waamini wahu ni enoonikhaliherya wiilokiherya okathi ninrowa aya ophiya nihiku na ophukela wa Yehova.

20. Mavekelo ahu anrowa okhala sai ntoko erupani yoowunkhela?

²⁰ Mpakha-va, etthu xeeni niixuntte ahu? Nihiixutta wira nihaana ovaha efaita yinceene eparakha nrina ahu ya ovekela. Nave nihiixutta wira etthu yuulupale ninreerela ahu ovekela sihaana okhala myaha sinivarihana ni ele Yehova oniphavela awe. Nooweha efaita erina aya omuxukhurela Yehova mwaha woomuruma Mwanawe ni omuthanla wira okhale Mwene ahu. Nave nooweha efaita erina aya waavekelela anna ni arokora. Nooweha-tho wira nihaana onvekela Yehova wira onivahe itthu nimphavela ahu ni onikhaliherya olipiha waamini wahu. Akhala wira nnimuupuwelela saana moolumo ninrowa ahu orumeela okathi nninvekela ahu Yehova, nnimooniherya wira ninnivaha efaita eparakha nrina ahu ya ovekela. Niira siiso, moolumo ahu anrowa okhalaka ntoko erupani yoowunkhela ni mavekelo ahu anoomusivelaka Yehova. — Mir. 15:8.