1-3. (a) Xeeni Yehova amphenta awe Salomoni? Mareeliho xeeni Salomoni aavahiwa awe? (b) Mwaha ola, makoho xeeni ninrowa ahu waakhula?

SALOMONI, aahikhalihiwa mwene a Isarayeli nlelo ori ene mmiravo. Wanipacerya wa olamulela wawe, Yehova aahimukhumelela moolohani khumuleela wira: “Mukivekele entthunanyu ovahiwa”. Salomoni aahimwaakhula oriki: “Miyo ki mmiravo mwamukhani, ohinsuwela owettiherya atthu. . . . Mukivahe miyo, murumeyi anyu, murima w’ankhili . . . kalamulaka atthu a nloko nanyu”. (1 Mam. 3:5-10) Tthiri mwaha woovekela “murima w’ankhili” eyo yaari etthu yooreera! Eyo ti yaamwiiriha Yehova omphenta Salomoni! (2 Sam. 12:24) Muluku ahu aahisiveliwa ni yooveka ele ya mmiravo Salomoni ni aahinvaha “murima wosuwela ni w’ankhili”.​—1 Mam. 3:12.

² Okathi Salomoni aavikaninhe awe ororomeleya, aahivahiwa mareeliho manceene. Aahikhalana eparakha yooteka etemplo yaavuwiha “nsina n’Apwiya, Muluku a Isarayeli”. (1 Mam. 8:20) Salomoni aahivuwa mwaha wa ankhili aavahiwe awe ni Muluku. Yehova aahimuupuxerya Salomoni olepa iliivuru tthaaru siri mBiibiliyani. Emosa wa iliivuru iyo ti eliivuru ya Miruku.

³ Nuulumo noowi murima ninniphwanyaneya ikwaha sinceene eliivuru ya Miruku. Mwa ntakiheryo, Miruku 4:23 ninsoma so: ‘Nwehererye mukhalelo wa murima anyu’. Nintaphulela exeeni nuulumo noowi ‘murima’ nirumeeliwe eveersu ela? Mwaha ola nnimwaakhula nikoho nno. Nave ninrowa oweha waakhuliwa wa makoho manli ani: Satana oneererya sai ohonona murima ahu? Ninrowa okhapelela sai murima ahu? Wira nivikanihe ororomeleya wa Muluku, nihaana osuwela waakhuliwa wa makoho ala ootepa otthuneya.

4-5. (a) Esalimo 51:8, ennikhaliherya sai osuwela ele nintaphulela aya nuulumo noowi “murima”? (b) Moota xeeni okhalana okumi wooloka onivarihana aya ni omutthu ahu wa muhina?

⁴ Miruku 4:23, nuulumo noowi ‘murima’ nintaphulela omutthu aahiiso ele eri vamurimani va mutthu owo. (Musome Esalimo 51:8.) Mwa enamuna ekina, nuulumo noowi ‘murima’ nintaphulela miyuupuwelo, moonelo, etthu enimwiiriha mutthu opaka etthu ni soophavela sa mutthu owo. Murima ahu onnooniherya omutthu ahu wa muhina ohiya paahi mukhalelo ahu wa ota.

⁵ Nrowe niwehe moota okhalana okumi wooloka onivarihana aya ni omutthu ahu wa muhina. Wanipacerya, wira mutthu okhalane okumi wooloka, ohaana olya yoolya yooloka ni ohaana wiina nikuruta ikwaha sinceene. Moolikanasa, wira nikhalane okumi wooloka womunepani, nihaana omusoma Biibiliya ni iliivuru sinimutthokiherya Biibiliya ikwaha sinceene, ni nihaana omwaamini Yehova. Ninnooniherya wira ninnimwaamini Yehova, vaavo ninvarihela ahu muteko ele ninsoma ahu ni ohimya waamini wahu. (aRom. 10:8-10; Yak. 2:26) Ya nenli, hata makhalelo ahu oota aniirihaka wuupuwela wira naakumi, pooti wira nookhalana oretta muhina. Mwa enamuna emosaru, oweha miteko sahu somunepani paahi, pooti oniiriha wuupuwelaka wira nookhalana waamini woolipa, masi soophavela soohiloka pooti wunnuwa vamurimani vahu. (1 aKor. 10:12; Yak. 1:14, 15) Nave muupuweleke wira Satana oniphavela ohonona muupuwelo ahu. Masi, oneererya sai opaka eyo? Ninrowa wiikhapelela sai?

6. Tiivi eri yoolakela ya Satana, ni oneererya sai opaka eyo?

⁶ Satana oniphavela wira nikhale ntoko yena nihiiwelelaka malamulo a Yehova. Masi owo khoniwerya onikhanyererya wuupuwela ni opaka itthu ntoko onipaka awe. Masi onneererya onihapuxa orumeelaka inamuna sikina. Mwa ntakiheryo, ninkhala olumwenku atthu anceene ahononiwe aya ni Satana. (1 Yoh. 5:19) Owo oniphavela wira niviriheke okathi nri ene ni atthu awo, hata nisuwelaka wira weetta ni alavilavi onoohonona  muupuwelo ahu. (1 aKor. 15:33) Olavilavi owo wa Satana, waahimuhapuxa Mwene Salomoni. Owo ahaathela athiyana mapakau, nto nuuvira okathi awo yaahimuhapuxa ni “yahihonona murim’awe” khuhiya omurumeela Yehova.​—1 Mam. 11:3.

7. Etthu xeeni ekina Satana onrumeela awe wira omwara-mwarye muupuwelo awe? Xeeni nintthuneya ahu okhalana ephoole?

⁷ Satana onnirumeela iviidiyu ni iprograma sa televisau wira omwara-mwarye muupuwelo awe. Maana oosuwela wira itthu sinilavuliwa pooti opahula muupuwelo ahu, moonelo ahu ni moota nimpaka ahu itthu. Yesu aahilavula malikanyiho wira iixuttihe saana. Mwa ntakiheryo, Yesu aahilavula nlikanyiho na muSamariya ooreera murima ni na mwaana oomwareya aahononne soohiyeriwa sawe. (Math. 13:34; Luka 10:29-37; 15:11-32) Nave atthu yaale ahononiwe ni muupuwelo wa Satana pooti ohimya itthu wira ahonone muupuwelo ahu. Nintthuneya okhalana moonelo wooloka. Iviidiyu ni iprograma sa TV sinnooniherya itthu sikhanle oohonona muupuwelo ahu. Nto nihaana okhalana ephoole naawehaka itthu iyo. Vaavo ninthanla ahu matthekulelo, nihaana wiikoha so: ‘Kiireke eviidiyu ela aahiiso eprograma ela ya TV enkitumererya ohela nipuro noopacerya itthu sa weerutthuni?’ (aGal. 5:19-21; aÉf. 2:1-3) Munrowa opaka exeeni mwasuwela wira eprograma eyo enooniherya muupuwelo wa Satana? Niireke munnisyaka ntoko munsyaka anyu orava iretta?

8. Anamuyari anrowa waakhaliherya sai anaaya okhapelela murima aya?

⁸ Nyuwo anamuyari, mookhalana muritti muulupale wowaakhapelela aniinyu wira murima aya ohihononiwe ni Satana. Tthiri munnipaka itthu sotheene muniwerya anyu wira aniinyu ahiphwanye iretta. Munnipaka eyo, murattelaka empa anyu ni murihaka khula etthu yaarowa woophwanyihani iretta nyuwo ni aniinyu. Moolikanasa, muhaana osuwela iviidiyu aniinyu aniweha aya, iprograma sa  TV, axooku eletroniko, ni awebsaite anaarumeela aya wira Satana ohihonone muupuwelo aya. Musuweleke wira, Yehova ohoovahani muritti wowaakhaliherya aniinyu momunepani. (Mir. 1:8; aÉf. 6:1, 4) Nto muhooveleleke waavaha malamulo anikhuma mBiibiliyani. Mwaaleeleke etthu ekhanle aya ooweha ni ohiweha, nave mwaakhaliheryeke osuwela mathowa aniwiirihani opaka eyo. (Math. 5:37) Nto vaavo aninnuwa aya, mwaakhaliheryeke osuwela etthu yooloka ni yoohiloka moovarihana ni malamulo a Yehova. (aHéb. 5:14) Musuweleke wira aniinyu anrowa ottharaka ohiya paahi ele munhimya anyu, masi ele munipaka anyu.​—Otum. 6:6, 7; aRom. 2:21.

9. Olelo-va, muupuwelo xeeni Satana omwara-mwanrye awe? Xeeni muupuwelo owo ori aya wootakhala?

⁹ Nave, Satana onneererya ohonona murima ahu oniirihaka ororomela osuwela wa apinaatamu ohiya ororomela osuwela wa Yehova. (aKol. 2:8) Olelo-va, Satana oomwara-mwarya muupuwelo woowi ophavela muhakhu ohaana okhala nipuro noopacerya mookumini mwahu. Atthu arina muupuwelo owo pooti othaaciri aahiiso nnaari. Masi pooti waakhumelela etthu yoohiloka. Moota xeeni? Mwaha woowi, awo anniimananiha okhala athaaciri hata arowaka opweteiwa okumi aya, waataana ni emusi aya aahiiso waataana waya ni Muluku wira aphwanye ele aniphavela aya. (1 Tim. 6:10) Ninnimuxukhurela Tiithi ihu a wiirimu yoowo onnikhaliherya okhalana moonelo wooloka voohimya sa mihakhu.​—Mus. 7:12; Luka 12:15.

10-11. (a) Nihaana opaka exeeni wira niikhapelele? (b) Khalai, etthu xeeni aapaka awe mulipa-oolipelela? Moota xeeni yowuupuxerya ya murima ahu enlikana aya ni mulipa-oolipelela?

¹⁰ Naaphavelaka okhapelela saana murima ahu, nihaana oweha itthu sikhanle oohonona ni opaka khula etthu wira niikhapelele. Miruku 4:23 nuulumo noowi mukhapelele, ninnuupuxerya muteko wa mulipa-oolipelela. Mahiku a Mwene Salomoni, mulipa-oolipelela eemela vasulu va makokoro a epooma wira yaarwaaka awanani aaleeleke atthu ari muhina mwa epooma. Eyo enninikhaliherya osuwela etthu nikhanle ahu oopaka wira Satana ohihonone muupuwelo ahu.

¹¹ Khalai, alipa-oolipelela yaavara vamosa ni alipa-oohula mikhora. (2 Sam. 18:24-26) Otheene aya yaanikhaliherya okhapelela epooma ni asuwelexaka akhala wira mikhora saahiwaliwa saana hata awanani aya ari ene vakhiviru. (Neh. 7:1-3) Yowuupuxerya ya murima ahu * yiixuttihiwe ni Biibiliya, eri ntoko mulipa-oolipelela ahu ni enninleela akhala wira Satana onneererya ohonona murima ahu, niire so, vaavo oneererya awe opahula muupuwelo ahu, moonelo ahu, etthu enniiriha opaka etthu eyo aahiiso soophavela sahu. Nto vaavo yowuupuxerya ya murima ahu ennileela aya etthu, nihaana owala mikhora sahu sa mmuupuweloni wira niikhapelele.

12-13. Etthu xeeni mukhanle anyu ooweehereriwa opaka, ni munrowa opaka exeeni?

¹² Nrowe niwehe ntakiheryo ninrowa onikhaliherya wiikhapelela wira muupuwelo ahu ohihononiwe ni Satana. Yehova onihimya wira nihilavuleke “itthu s’òseje [orupihana  woohiloka] ni sonanara sikina”. (aÉf. 5:3) Nto ninrowa opaka exeeni akhala wira amiravo akina omutekoni aahiiso oxikola annilavula itthu sa orupihana woohiloka? Noosuwela wira nihaana “okhotta makhalelo ahu òtakhala n’uhiya itthu sintthunexiwa vathí-va”. (Tito 2:12) Okathi owo, yowuupuxerya ya murima ahu enoonileela etthu. (aRom. 2:15) Nto niireke nnoowiriyana ele enihimya aya? Muhikuxeye murima mphavelaka owiriyana ele amiravo akhwiinyu anihimya aya aahiiso oweha ifootu aniwooniheryaayani. Nyuwo muhaana owala mikhora sanyu mulavulaka mwaha mukina.

¹³ Onitthuneya olipa murima wira mukhootte sookhanyererya sa amiravo akhwiinyu. Musuweleke wira Yehova onniweha wiimananiha wanyu ni onimoovahani ikuru ni ankhili anrowa wookhaliheryani okhootta muupuwelo wa Satana. (2 Wah. 16:9; Yes. 40:29; Yak. 1:5) Etthu xeeni ekina nintthuneya ahu opaka wira nikhapelele murima ahu?

14-15. (a) Xeeni nintthuneya ahu ohula murima ahu, ni ninrowa opaka sai eyo? (b) Miruku 4:20-22, onnikhaliherya sai ottottela mureerelo okathi nimmusoma ahu Biibiliya? (Nwehe ekaaxa eni: “Moota Wowuupuwelela”.)

¹⁴ Wira nikhapelele murima ahu, khivanitthuneya paahi okhootta sookhanyererya soohiloka masi nihaana weemererya itthu sooloka. Nkahaya muupuwele nlikanyiho na epooma erina makokoro. Mulipa-oohula mukhora ahaana owala mikhora wira awanani ahikele, masi okathi mukina, owo aahaana ohula mikhora wira sivoloihiwe soolya ni mireerelo sikina. Akhala wira khaarowa ohula mikhora, atthu a epooma eyo yaamookhwa etala. Moolikanasa, okathi wotheene nihaana ohula murima ahu wira nivoloihe muupuwelo wa Muluku.

¹⁵ Biibiliya ookhalana muupuwelo wa Yehova, nto vaavo nimmusoma ahu khula nihiku ninneemererya muupuwelo wa Yehova weettiha moonelo ahu, muupuwelo ni itthu nimpaka ahu. Ninrowa ottottela sai mureerelo omusoma Biibiliya? Wanipacerya nihaana ovekela. Murokora mmosa ohimmye wira: “Kihinatthi opacerya omusoma Biibiliya, kinninvekela Yehova wira okikhaliherye ‘wòna orattene ikano’ sawe siri mBiibiliyani”. (Esal. 119:18) Nave nihaana wuupuwelela ele ninsoma ahu. Vaavo ninvekela ahu, osoma ni wuupuwelela Nuulumo na Muluku, ninniphenta muupuwelo wa Yehova.​—Musome Miruku 4:20-22; Esal. 119:97.

16. Oweha eprograma ya TV JW, enaakhaliherya sai anna anceene?

¹⁶ Enamuna ekina ennikhaliherya weemererya muupuwelo wa Yehova ti oweha myaha siri va JW Broadcasting^®. Anamathelana amosa ahimmye so: “Eprograma ya khula mweeri ya TV JW, ennooniherya wira Yehova onnaakhula mavekelo ahu! Eyo enninlipiha vanceene okathi ninkhulumuwa ahu aahiiso onniphwanya aya omeekha. Nave ikwaha sinceene ninniweha iviidiyu sa isipo sinikumiheriwa. Ninnirumiha okathi nnaapeya ahu, orattela empa ahu ni okathi ninwurya ahu exa”. Iprograma iyo sa khula mweeri sinninikhaliherya okhapelela murima ahu. Nave sinninikhaliherya wuupuwela ntoko Yehova onuupuwela awe ni okhootta muupuwelo wa Satana.

17-18. (a) Ntoko enooniherya aya yoolepa ya 1 Mamwene 8:61, exeeni enrowa okhumelela vaavo ninvarihela ahu muteko ele nniixutta ahu? (b) Ntakiheryo na Mwene Ezekiya, ninniixuttiha exeeni? (c) Moovarihana ni nivekelo na Davidi nri Esalimo 139:23, 24, etthu xeeni ekhanle ahu oovekela?

¹⁷ Khula okathi nimphwanya ahu mireerelo mwaha woopaka itthu sooloka, waamini wahu onnilipa. (Yak. 1:2, 3) Nave ninnihakalala okhala wira Yehova onninthokorerya ntoko  anaawe, nto ophavela wahu omuhakalaliha onnilipa. (Mir. 27:11) Vaavo ninkumana ahu soweeha nihaana wooniherya wira khanihiyo namanriya, masi ninnivikaniha omurumeela moororomeleya Tiithi ihu a wiirimu. (Esal. 119:113) Niira siiso, nnimooniherya wira ninnimphenta ni murima wotheene. Nave nnimwiiwelelaka malamulo awe ni opaka yootthuna awe.​—Mmusome 1 Mamwene 8:61.

¹⁸ Okhala wira na atthu oohimalela, okathi mukina ninnivonya. Nto akhala wira munoopaka etthu yoohiloka, muupuweleke ntakiheryo na Mwene Ezekiya. Owo aahivonya, masi nuumala ottharuwa moomalela, aahitthikela omurumeela Yehova ni “murima woloka”. (Yes. 38:3-6; 2 Wah. 29:1, 2; 32:25, 26) Tivonto, mmukhootteke Satana wira ohihonone muupuwelo anyu. Nave nihaana onvekela Yehova wira onivahe “murima w’ankhili” aahiiso murima wowiiwelela. (1 Mam. 3:9; musome Esalimo 139:23, 24.) Niira siiso nnoowerya ovikaniha ororomeleya wa Yehova ni okhapelela murima ahu.