1. Itthu xeeni sikhanle oomwiiriha mulopwana ohimuthokorerya saana mwaarawe ni anaawe?

ETTHU xeeni munuupuwela anyu vaavo muniiwa anyu nuulumo noowi “muhooleli?” Alopwana akina annaathokorerya axaaraya ni anaaya moovarihana ni soolema sa muttetthe aya, makhalelo aya ni moota ahuuwale aya. Nwehe ele enihimya awe Yanita, yoowo onikhala wEuropa. Owo onihimya so: “Muttetthe kinkhala aka atthu aakhalana moonelo woohiloka voohimya sa athiyana, awo anuupuwela wira athiyana kharina efaita ni anamuteko a vatthokoni paahi”. Munna oniitthaniwa Luke yoowo onikhala wEstados Unidos ohimmye so: “Alopwana akina anniwiixuttiha anaaya axilopwana wira athiyana khanireerela owiriyaniwa, nave moonelo aya khorina efaita”. Masi Yehova khoniphavela wira athiyana athokoreriweke mwa enamuna eyo. (Mulikanyihe ni Marko 7:13.) Nto alopwana anrowa wiixutta sai okhala ahooleli a itthoko ooloka?

2. Itthu xeeni muhooleli a etthoko onireerela awe osuwela ni nthowa xeeni?

² Wira mulopwana okhale muhooleli ooloka a etthoko, wanipacerya owo ohaana osuwela oratteene ele Yehova oniphavela awe wira opakeke. Nave, owo ohaana osuwela nthowa naya Yehova opanke awe malamulo awo a ohoolela ni moota okhanle awe ootthara ntakiheryo na Yehova ni Yesu. Xeeni vari aya vooloka mulopwana osuwela itthu iyo sotheene? Mwaha woowi, Yehova ohaavaha alopwana okhulupale vatthokoni vaya ni oniphavela wira arumeeleke saana okhulupale aya.—Luka 12:48b.

3. 1 aKorinto 11:3, onniixuttiha exeeni voohimya sa okhulupale?

³ Mmusome 1 aKorinto 11:3. Eversiikulu ela, ennooniherya moota Yehova otthokinhe awe emusi awe ya wiirimu ni valaponi. Okhulupale onihela muhina itthu piili: Ohoolela ni okohiwa ni Yehova. Musuweleke wira Yehova tori muhooleli muulupalexa, maana okhulupale awe ori vasuluxa. Nave oopaka mareheryo a okhulupale ni ohaavaha atthu akina okhulupale. Hata vari siiso, owo oniphavela  wira atthu awo aavanhe awe okhulupale arumeeleke mwa enamuna yooloka. (aRom. 14:10; aEef. 3:14, 15) Yehova oomuthanla Yesu wira okhale mukhulupale a muloko, masi Yesu onookohiwa ni Yehova voohimya sa moota onithokorerya awe. (1 aKor. 15:27) Nave Yehova ohaavaha alopwana oothela wira akhale ahooleli a axaaraya ni anaaya, masi mulopwana onoorowa okohiwa ni Yehova vamosa ni Yesu voohimya sa moota onaathokorerya awe atthu otheene a vatthokoni vawe.—1 Ped. 3:7.

4. Okhulupale xeeni Yehova ni Yesu arina aya?

⁴ Okhala wira Muhooleli a emusi awe ya wiirimu ni valaponi, Yehova oopaka malamulo voohimya sa mweettelo anaawe anireerela aya okhalana. Nave oniphavela wira awo yiiweleleke malamulo awo. (Yes. 33:22) Nto okhala wira Yesu muhooleli a muloko wa eKristau, owo ookhalana ehakhi ya opaka malamulo wira neetteleke.—aGal. 6:2; aKol. 1:18-20.

5. Xeeni ninhimya ahu wira okhulupale wa muhooleli a etthoko wookhalana mikano?

⁵ Attharaka ntakiheryo na Yehova ni Yesu, ahooleli a imusi aakhalana ehakhi ya opaka malamulo vatthokoni vaya. (aRom. 7:2; aEef. 6:4) Masi hata vari siiso, okhulupale aya wookhalana mukano. Mwa ntakiheryo, malamulo aya ahaana ovarihana ni malakiheryo aniphwanyaneya Nuulumo na Muluku, Biibiliya. (Mir. 3:5, 6) Nave ahooleli a itthoko, khaneemereriwa waapakela malamulo atthu ale ahinikhala etthoko aya. (aRom. 14:4) Ohiya-vo, vaavo anaaya axilopwana ni axithiyana aninnuwa aya anakhuma vatthokoni vaya, awo ahaana waattittimiha anamuyari aya. Masi nnaamwi yaattittimihaka awo khahiyo muhooleli wala xeefi, nto eyo enooniherya wira khanireerela waapakela malamulo wira yeetteleke.—Math. 19:5.

6. Xeeni Yehova opanke awe marehereryo a okhala muhooleli?

⁶ Yehova oopaka malamulo a ohoolela mwaha woowi onniniphenta vanceene. Tthiri eyo yoovaha yuulupale enikhuma wa Yehova. Mareheryo a okhala muhooleli anniiriha emusi ya Yehova weetta saana, okhala ya murettele ni yootthokiheya. (1 aKor. 14:33, 40) Vaakhanle wira khakhanle malamulo a okhala muhooleli, emusi ya Yehova yaarowa okhala yoohitthokiheya ni khiyaarowa ohakalalaka. Mwa ntakiheryo, khuuvo mutthu aarowa osuwela tani okhanle oopaka soothanla sookiserya ni tani anrowa ohoolelaka okathi sinrowa aya ovariheliwaka muteko soothanla iyo.

7. Moovarihana ni aEefeso 5:25, 28, Yehova oniphavela wira alopwana yaathokoreryeke sai axaaraya?

⁷ Akhala wira mareheryo a Yehova a okhala muhooleli etthu yooloka, nto xeeni athiyana anceene olelo-va anoona aya wira anoopuheriwa ni axiiyeya? Eyo enniiraneya, mwaha woowi alopwana akina khanitthara malamulo a Yehova voohimya sa emusi, masi anitthara soolema sa muttetthe aya. Nave alopwana akina annaahasula axaaraya wira aphwanye ele aniphavela aya. Mwa ntakiheryo, alopwana akina annaahasula axaaraya wira yincererye ottittimihiwa waya aahiiso wira awooniherye atthu akina wira awo tari “aneene etthoko”. Owo pooti wuupuwelaka wira miyo nkimphavela omukhanyererya mwaaraka okiphenta, masi owo ohaana okoova. Nto mulopwana owo pooti orumeela wooviwa iwo, wira onweha-weheke mootepana mwaarawe. * Muupuwelo owo onnimwiiriha muthiyana ohikhala oolemeliheya ni oottittimiheya. Nave eyo ennivirikana ni ele Yehova oniphavela awe.—Mmusome aEefeso 5:25, 28.

8. Mulopwana oothela onrowa wiixutta sai okhala muhooleli a etthoko ooloka?

⁸ Mulopwana oothela, onimwiixutta okhala muhooleli a etthoko ooloka, ottharaka ntakiheryo na Yehova ni Yesu voohimya sa moota anirumeela aya okhulupale aya. Nrowe niwehe mikhalelo miili  Yehova ni Yesu anooniherya aya, nuumala-vo ninrowa woona moota ahooleli a itthoko akhanle aya oowooniherya mikhalelo simosaru okathi anaathokorerya aya axaaraya ni anaaya.

9. Yehova onooniherya sai wira toowiiyeviha?

⁹ Wiiyeviha. Yehova ookhalana ankhili waavikana atthu otheene akhanle. Masi hata vari siiso, owo toowiiyeviha ni onniwiriyana miruku sa arumeyi awe. (Maph. 18:23, 24, 32) Nave onniweemererya onvaha malakiheryo. (1 Mam. 22:19-22) Yehova toomalela. Masi hata vari siiso, owo khonlipelela wira hiyo nikhale atthu oomalela. Ohiya-vo, owo onnaakhaliherya apinaatamu oohimalela wira amurumeeleke oratteene. (Esal. 113:6, 7) Nto Biibiliya onnimuhimya Yehova okhala ‘namakhaliherya’. (Esal. 27:9; aHeeb. 13:6) Mwene Davidi ohimmye wira aaniwerya opaka itthu sinceene, mwaha woowi Yehova toowiiyeviha ni animukhaliherya.—2 Sam. 22:36.

10. Yesu oonihenrye sai wira toowiiyeviha?

¹⁰ Nwehe ntakiheryo na Yesu. Nnaamwi aari Pwiya ni Mwiixuttihi, owo aahirapiha inawu sa awiixutti awe. Xeeni Yehova ohalaka weemererya wira yowiiraneya ele elempwe mBiibiliyani? Moohaaniherya, Yehova aaphavela waavaha ahooleli a etthoko ni atthu akina ntakiheryo nooloka ninreerela aya otthara. Yesu aahimmye so: “Miyo kihoovahani nthoonyeryo, wira nyuwo-tho mwiireke siisaale kiwiirenlyaakani”. (Yoh. 13:12-17) Nnaamwi Yesu aari mukhulupale, owo khaalipelela orumeeliwa. Ohiya-vo anaarumeela atthu akina.—Math. 20:28.

11. Wiiyeviha wa Yehova ni Yesu, oniwiixuttiha exeeni ahooleli a itthoko?

¹¹ Itthu nniixutta ahu. Ahooleli a itthoko anoowerya wooniherya wira toowiiyeviha mwa inamuna soovirikana. Mwa ntakiheryo, awo ahilipeleleke wira mwaaraya ni anaaya okathi wotheene anrowa opakaka itthu sooloka wala toomalela. Nave ahaana owiriyana muupuwelo wa khula mutthu a vatthokoni vaya hata aheemereryaka moonelo owo. Marley yoowo onikhala wEstados Unidos ohimmye so: “Okathi mukina miyo ni iyaka ninnikhalana moonelo woovirikana. Masi kinnoona wira onnittittimiha ni onnivaha efaita moonelo aka vaavo onithokorerya awe oratteene ohinatthi opaka yoothanla”. Ohiya-vo, mulopwana oowiiyeviha onnivara ni murima wotheene miteko sa vate, hata atthu a muttetthe awe yuupuwelaka wira miteko iyo sihaana ovariwa paahi ni athiyana. Opaka eyo pooti okhala muxankiho muulupale. Mwaha wa xeeni? Murokora oniihaniwa Rachel onihimya so: “Muttetthe kiyariwe aka, akhala wira mulopwana  onnimukhaliherya mwaarawe orapiha iparatho ni orattela empa, anamwaattamanani awe ni amusi awe anihimya wira ‘ala arootheliwa’ ni awo anuupuwela wira mulopwana owo oroottottiwa”. Akhala wira moonelo owo ohuulaana muttetthe munkhala anyu, xontte muupuweleleke wira Yesu aahirapiha inawu sa awiixutti awe nnaamwi muteko owo waavariwa ni ipottha. Muhooleli a etthoko ooloka, khoniphavela waasiveliha atthu akina, masi oniphavela omusiveliha mwaarawe ni anaawe. Ohiya-vo owo oniphavela wira mwaarawe ni anaawe ahakalaleke vanceene. Ohiya paahi wiiyeviha, mukhalelo xeeni mukina onrowa omukhaliherya mulopwana okhala muhooleli a etthoko ooloka?

12. Yehova ni Yesu anooniherya sai wira anniniphenta?

¹² Ophenta. Itthu sotheene Yehova onipaka awe, onipaka moophenta. (1 Yoh. 4:7, 8) Yehova onnooniherya wira onniniphenta vanceene mwaha woowi onninikhapelela mwa enamuna ya omunepani orumeelaka nuulumo nawe Biibiliya ni mutthenkeso awe. Nave, owo onninikhapelela mmuupuweloni onooniheryaka wira onniniphenta vanceene. Ankhi itthu sinnithowa sa weerutthuni? Yehova onninivaha “itthu sotheene sinnihakalaliha”. (1 Tim. 6:17) Okathi hiyo ninvonya ahu, owo onninittaruxa. Hata vari siiso, khonihiya oniphenta. Moophenta Yehova oonivaha mukuttho wowoopola wa Yesu Kristu. Nave Yesu ooniphenta vanceene mpakha ovaha okumi awe wira noopoliwe. (Yoh. 3:16; 15:13) Tthiri khiivo etthu ekhanle oomwiiriha Yehova ni Yesu ohiya waaphenta atthu otheene aniroromeleya.—Yoh. 13:1; aRom. 8:35, 38, 39.

13. Xeeni vari aya vooloka ahooleli a imusi wooniherya wira annaaphenta atthu otheene a vatthokoni vaya? (Nwehe ekaaxa eni: “ Mulopwana Othenle Niinaano Onrowa Owerya Sai Ottittimihiwa ni Mwaarawe?”)

¹³ Itthu nniixutta ahu. Itthu sotheene muhooleli a etthoko onipaka awe, sihaana weettihiwa ni ophenta. Xeeni vari aya vootthuneya opaka eyo? Murummwa Yohani onnaakhula so: “Tthiri ole ohinimphenta munnawe, [wala mutthu a etthoko awe] onimoona awe, khoniwerya omphenta Muluku, ohinimoona awe”. (1 Yoh. 4:11, 20) Mulopwana onaaphenta atthu a etthoko awe, ni oniphavela oomutakiha Yehova ni Yesu, onnaakhaliherya atthu otheene a vatthokoni vawe mukhalelo  womunepani, waaphenta ni onnaavaha itthu sa werutthuni. (1 Tim. 5:8) Owo onniwiixuttiha ni waattaruxa anaawe. Nave onnipaka soothanla sininvuwiha Yehova ni sinaaphwanyiha mureerelo atthu otheene a etthoko awe. Vano nrowe nthokorerye itthu iyo ni niwehe moota ahooleli a etthoko akhanle aya oomutakiha Yehova ni Yesu.

14. Ahooleli a etthoko anrowa waakhaliherya sai atthu a etthoko aya okhalana waataana wooloka ni Yehova?

¹⁴ Waakhaliherya momunepani atthu otheene a etthoko aya. Yesu ahooniherya wira animutakiha Tiithi awe, mwaha woowi anaakhaliherya atthareli awe olipiha waamini waya. (Math. 5:3, 6; Mar. 6:34) Mwa enamuna emosaru, etthu yootepexa otthuneya muhooleli a etthoko okhanle awe oopaka, ori waakhaliherya atthu otheene a vatthokoni vawe okhalana waataana wooloka ni Yehova. (Otum. 6:6-9) Owo onnipaka eyo iimananihaka omusoma Biibiliya ni emusi awe, orowela mithukumano, olaleya ihapari sooreera ni okhalana ni olipiha waataana wawe ni Yehova.

15. Muhooleli a etthoko onrowa wooniherya sai wira onnaaphenta atthu a vatthokoni vawe?

¹⁵ Nwooniheryeke atthu otheene a vatthokoni vanyu wira munnaaphenta. Yehova aahooniherya wira aanimphenta vanceene Yesu. (Math. 3:17) Nave Yesu aahooniherya wira anaaphenta vanceene atthareli awe ni itthu aahimya awe ni aapaka awe. Nave-tho, awiixutti a Yesu yaanimphenta vanceene. (Yoh. 15:9, 12, 13; 21:16) Ahooleli a itthoko animooniherya wira annaaphenta axaaraya ni anaaya ni itthu anipaka aya ntoko omusoma Biibiliya vamosa. Nave, owo ohaana waaleela wira onnaaphenta vanceene ni waaxukhurela, vaareerelaka owo pooti opaka eyo ohoolo wa atthu akina.—Mir. 31:28, 29.

16. Etthu xeeni ahooleli a etthoko anireerela aya opaka? Nto ephoole xeeni ahooleli a itthoko anireerela aya okhalana?

¹⁶ Waavaha atthu a vatthokoni vawe itthu sa weerutthuni. Yehova aanaavaha itthu sa weerutthuni aIsarayeli hata okathi yoole aahukhumu awe mwaha woohimwiiwelela. (Otum. 2:7; 29:4) Nave olelo-va, Yehova onninivaha itthu sa weerutthuni sinnithowa. (Math. 6:31-33; 7:11) Omutakihaka Tiithi awe, Yesu aahaavaha yoolya atthu anceene. (Math. 14:17-20) Ohiya waavaha yoolya paahi, Yesu aanaapenuxa ale yaawereiwa. (Math. 4:24) Wira amuhakalaliheke Yehova, ahooleli a etthoko ahaana waavaha atthu otheene a vatthokoni vaya itthu sa weerutthuni. Masi awo ahaana okhalana ephoole. Vaarowa okhala voohiloka muhooleli a etthoko oviriha okathi munceene ovaraka muteko ohiya waakhaliherya atthu a vatthokoni vawe okhalana waataana wooloka ni Yehova ni waaphenta.

17. Mwa enamuna xeeni Yehova ni Yesu anniixuttiha aya ni onittaruxa?

¹⁷ Owiixuttiha. Yehova onniniixuttiha ni onninittaruxa wira niphwanyeke mireerelo. (aHeeb. 12:7-9) Omutakihaka Tiithi awe, Yesu aniwiixuttiha moophenta atthu otheene aakhapelela awe. (Yoh. 15:14, 15) Owo aanilavula itthu mooluluwanya masi mooreerela murima. (Math. 20:24- 28) Yesu aanisuwela wira apinaatamu toohimalela nave annivonya ikwaha sinceene.—Math. 26:41.

18. Etthu xeeni muhooleli a etthoko ooloka ohinliyala awe?

¹⁸ Muhooleli a etthoko onimutakiha Yehova ni Yesu onniwoonela othunku atthu a vatthokoni vawe ni onnisuwela wira mwaarawe ni anaawe annivonya. Nto owo khoninviruwela mwaarawe aahiiso anaawe. (aKol. 3:19) Ohiya opaka eyo, owo onnitthara malakiheryo ari aGalasia 6:1 ni onnaakhaliherya atthu otheene a etthoko awe mooreerela murima ohiliyalaka wira owo nave toohimalela. Nave omutakihaka Yesu, owo onnisuwela wira enamuna yooloka ya owiixuttiha atthu akina ori waavaha ntakiheryo nooloka.—1 Ped. 2:21.

19-20. Okathi onipaka awe yoothanla, muhooleli a etthoko onrowa omutakiha sai Yehova ni Yesu?

¹⁹ Opaka soothanla sinaaphwanyiha mureerelo atthu otheene. Yehova onnipaka soothanla ophavelaka waaphwanyiha mireerelo atthu akina. Mwa ntakiheryo, owo oopattuxa okumi ohiya wira iiphwanyihe mireerelo, masi wira aaphwanyihe mireerelo ni ohakalala atthu akina. Khuuvo mutthu aamukhanyerenrye Yehova onivaha Mwanawe wira ottipihe itampi sahu. Masi oopaka eyo, mwaha woowi oniphavela onikhaliherya. Nave Yesu onnipaka soothanla wira aaphwanyihe mireerelo atthu akina. (aRom. 15:3) Mwa ntakiheryo, ekwaha emosa Yesu khaareere okhulumuwa, masi hata vaari siiso, owo ahiimananiha owiixuttiha atthu ohiya orowa omumula.—Mar. 6:31-34.

²⁰ Muhooleli a etthoko ooloka, onnisuwela wira ti vooxankiha opaka soothanla sinrowa waaphwanyiha mureerelo atthu otheene a etthoko awe. Nto owo onnivaha efaita yinceene muritti owo ovahiwe awe. Nave eyo ennimwiiriha osyaka opaka soothanla ohinatthi wuupuwela oratteene aahiiso opaka soothanla moovarihana ni makhalelo awe okathi owo. Ohiya-vo owo onnimweemererya Yehova omwiixuttiha moota woopaka soothanla sooloka. * (Mir. 2:6, 7) Nto opaka eyo, owo onnuupuwela etthu enrowa waaphwanyiha mireerelo atthu akina ohiya mmensawe.—aFil. 2:4.

21. Mwaha onittharelana, ninrowa waakhula makoho xeeni?

²¹ Yehova ohaavaha muritti muulupale ahooleli a itthoko ni oniphavela wira avareke saana muteko owo. Masi akhala wira mulopwana oothela onniimananiha otthara oratteene ntakiheryo na Yehova ni Yesu, owo onookhala muhooleli ooloka a emusi. Nave, akhala wira mwaarawe onoovaraka saana muteko awe, eyo enookhaliherya vanceene ohakalala wa ekasamento aya. Athiyana ootheliwa, yooneleke sai ohoolela wa axiiyaya vatthokoni? Mixankiho xeeni anikumanana aya? Mwaha onittharelana, ninrowa waakhula makoho awo.