1-2. Moovarihana ni Matheyo 5:11, nooneleke sai mixankiho?

YESU aahaaleela atthareli awe wira yamphwanya ohakalala wekeekhai. Nave aahihimya wira atthu otheene yaarowa othanla omutthara yamphwanya mixankiho. (Math. 10:22, 23; Luka 6:20-23) Tthiri hiyo ninnihakalala vanceene mwaha wookhala atthareli a Kristu. Masi, ankhi akhala wira nnoolupatthiwa ni amusi ahu, kuvernu aahiiso ninnikhanyereriwa opaka itthu soohiloka ni ale ninvarana ahu muteko wala ninsoma ahu oxikola? Moohaanyiherya vaavo nnuupuwela ahu itthu iyo sotheene, hiyo pooti oxanka vanceene.

² Atthu anceene khanihakalala vaavo anlupatthiwa aya. Masi Nuulumo na Muluku, Biibiliya, ninnooniherya wira nihaana ohakalala okathi ninlupatthiwa ahu. Mwa ntakiheryo, murummwa Yakobo olempe wira okathi nneehereriwa ahu nihitepeke oxanka, masi nihaana otteeliwa murima. (Yak. 1:2, 12) Nave Yesu aahimmye wira nitteeliweke murima hata nilupatthiwaka. (Mmusome Matheyo 5:11.) Masi ninrowa ohihiya sai ohakalala hata nilupatthiwaka? Othokorerya itthu murummwa Yakobo aalepenle awe maKristau a eseekulu yoopacerya, sinoonikhaliherya ni oniixuttiha itthu sinceene. Wanipacerya, nrowe niwehe mixankiho maKristau a eseekulu yoopacerya yaarina aya.

3. Etthu xeeni yaakhumelenle moohipisa nuumala Yakobo okhala mwiixutti?

³ Moohipisa, nuumala munnawe Yesu iihaniwa Yakobo okhala mwiixutti, maKristau a oYerusalemu yaahipacerya olupatthiwa. (Mit. 1:14; 5:17, 18) Nave nuumala mwiixutti Siteefano wiiviwa, maKristau manceene yaahitthyawela amwareelaka “mittetthe sa oYudeya ni oSamariya”. Nuumala-vo, yaahimwareela mittetthe sa wAntiyokiya ni oKiipero. (Mit. 7:58–8:1; 11:19) Tthiri vannooneya  wira maKristau ale yaahikhalana mixankiho sinceene. Hata vaari siiso, maKristau ale khiyaahiyale olaleya ihapari sooreera mittetthe iye yaatthyawenle aya. Nave yaahikhaliherya opakiwa miloko mittetthe sotheene saalamuleliwa ni aRoma. (1 Ped. 1:1) Muhoolo mwaya, yaahikhalana mixankiho sikina.

4. Mixankiho xeeni sikina maKristau a eseekulu yoopacerya yaarina aya?

⁴ MaKristau a eseekulu yoopacerya yaahikhalana mixankiho sinceene. Mwa ntakiheryo, mwaakha 50 nuumala Kristu orwa, Mukhulupale a oRoma iihaniwa Klaudio, aahiwoomola aYuda otheene oRoma. Nto aYuda ale yaakhanle maKristau yaahihiya ipa saya ni mireerelo saya, anarowa okhala mittetthe sikina. (Mit. 18:1-3) Mwaakha 61, murummwa Paulo aahilepa wira maKristau yaaniruwaniwa, otthukweliwa mukhatteya ni yaahiiyeriwa mireerelo saya. (aHeeb. 10:32-34) Ntoko atthu akina, maKristau ale yaari ohaawa ni yaaniwereyasiwa.—aRom. 15:26; aFil. 2:25-27.

5. Makoho xeeni ninrowa ahu waakhula?

⁵ Okathi murummwa Yakobo aalempe awe epaphelo awe ohinatthi mwaakha 62, Yakobo aanisuwela oratteene mixankiho anna ni arokora yaarina aya. Nto Yehova aahimuruma murummwa Yakobo waalepela epaphelo maKristau ale aavahaka malakiheryo yaarowa waakhaliherya ohihiya ohakalala okathi wa mixankiho. Vano nrowe nithokorerye epaphelo ya Yakobo ni naakhule makoho ala: Enamuna xeeni ya ohakalala murummwa Yakobo aalavula awe? Etthu xeeni ekhanle oomwiiriha muKristau ohiya ohakalala? Moota xeeni ankhili, waamini ni olipa murima onnikhaliherya aya ohihiya ohakalala okathi wa mixankiho?

6. Moovarihana ni Luka 6:22, 23, xeeni maKristau anihakalala aya hata arina ene mixankiho?

⁶ Atthu anceene anuupuwela wira anoohakalala akhala wira anookhalana okumi wooloka,  musurukhu munceene ni ohakalala vatthokoni vaya. Masi enamuna ya ohakalala murummwa Yakobo aalempe awe eniirela mpantta mikhalelo sinikumiheriwa ni munepa wowaarya wa Muluku. Nto ohakalala iwo khonivarihana ni mukhalelo wa mutthu. (aGal. 5:22) MuKristau onniphwanya ohakalala wekeekhai mwaha woosuwela wira onnimusiveliha Yehova ni onnitthara ntakiheryo na Yesu. (Mmusome Luka 6:22, 23; aKol. 1:10, 11) Ohakalala wahu onlikana ni mooro wa ekhanttiyero, nto wira ohittiphe ohaana okhapeleliwa wira ohiphwanyihe epheyo ni epula. Mwa enamuna emosaru, vanniweryaneya ohihiya ohakalala hata siniphwanyaka mixankiho sinceene. Tthiri khaninrowa ohiya ohakalala hata niwereiwaka aahiiso nihirina musurukhu munceene. Nave vanniweryaneya ohakalala hata niruwaniwaka wala nilupatthiwaka ni amusi ahu wala atthu akina. Tthiri ohakalala wahu onnincerereya ntoko mooro hata atthu akina anilupatthaka. Nto vaavo ninlupatthiwa ahu mwaha wa waamini wahu, eyo enooniherya wira na atthareli eekeekhai a Kristu. (Math. 10:22; 24:9; Yoh. 15:20) Eyo ti etthu yaamwiirinhe murummwa Yakobo olepa so: “Axinnaka, mutteeliweke murima, okathi muneehereriwa anyu mwa inamuna soovirikana”.—Yak. 1:2.

7-8. Mwa enamuna xeeni waamini wahu onlipa aya okathi nneehereriwa ahu?

⁷ Yakobo oohimya etthu ekina eniwiiriha maKristau ovilela mixankiho sinceene. Owo ohimmye so: “Munnisuwela wira waamini wanyu weehereriwaka, onnikumiherya ovilela”. (Yak. 1:3) Mixankiho sinlikana ni mooro atthu anirumeela aya wira ahane iyuuma. Nuumala eyuuma wooxiwa vamooroni evola, eyuuma eyo ennitepa olipa. Mwa enamuna emosaru, vaavo ninvilela ahu mixankiho, waamini wahu onnitepa olipa. Eyo ti etthu yaamwiirinhe Yakobo olepa wira: “Muhiye wira ovilela omaliherye muteko aya, wira mukhale oomalela ni oohittheka mwa inamuna sotheene, ehoothowakani etthu”. (Yak. 1:4) Tthiri vaavo nnoona ahu wira mixankiho sinnilipiha waamini wahu, ninnivilela mixankiho moohakalala.

⁸ Epaphelo Yakobo aalempe awe, owo onnihimya itthu sikhanle oonihiiha ohakalala. Itthu xeeni iyo? Ninrowa owerya sai oxintta?

9. Xeeni vanireerela aya okhalana ankhili?

⁹ Muxankiho: Vaavo nihinsuwela ahu etthu yoopaka. Okathi wa mixankiho nihaana omuroromela Yehova wira onikhaliherye opaka soothanla sinimuhakalaliha, sinrowa waakhaliherya anna ni arokora ni sinrowa onikhaliherya ohihiya ororomeleya wahu. (Yer. 10:23) Nihaana okhalana ankhili wira nisuwele etthu yoopaka ni osuwela owaakhula ale annilupattha. Nto akhala wira hiyo khaninsuwela etthu yoopaka, pooti okhulumuwa ni ohihakalala.

10. Wira nikhalane ankhili Yakobo 1:5, onihimya wira nihaana opaka exeeni?

¹⁰ Etthu ninreerela ahu opaka: Onvekela Yehova ankhili. Okathi wa mixankiho, etthu yoopacerya  ninreerela ahu opaka ori onvekela Yehova ankhili wira onikhaliherye opaka soothanla sooloka. (Mmusome Yakobo 1:5.) Nto nihaana opaka exeeni noonaka wira Yehova khonaakhula mavekelo ahu mowaakuveya? Yakobo ohimmye wira nihaana ‘ohihiya onvekela Muluku’. Musuweleke wira Yehova khonnanariwa okathi nninvekela ahu ankhili. Nave Yehova khonnipwapwela. Maana, Tiithi ihu a wiirimu onninivaha ni “murima wotheene” vaavo nninvekela ahu ankhili wira nivilele mixankiho. (Esal. 25:12, 13) Yehova onnisuwela mixankiho sahu, onninoonela othunku ni oniphavela onikhaliherya. Moohaanyiherya ninnihakalala vanceene osuwela eyo! Moota xeeni Yehova onnivaha awe ankhili?

11. Etthu xeeni ekina ninreerela ahu opaka wira nikhalane ankhili?

¹¹ Yehova onnimurumeela Biibiliya wira onivahe ankhili. (Mir. 2:6) Nto wira nikhalane ankhili, nihaana omusoma Biibiliya ni iliivuru sinimutthokiherya Biibiliya. Masi nihaana opaka etthu ekina ohiya paahi okhalana ankhili. Nto nnimooniherya wira nookhalana ankhili vaavo nneettela ahu ele Muluku onniruma awe opaka. Murummwa Yakobo olempe so: “Mukhaleke atthu aneettela masu awo, ohiya alipa-oowiiwa paahi”. (Yak. 1:22) Vaavo ninvarihela ahu muteko malakiheryo ari mBiibiliyani ninnikhalana murettele, ninnaareerela murima atthu akina ni omoriwa ikharari. (Yak. 3:17) Mikhalelo iyo sinoonikhaliherya ovilela mixankiho moohakalala.

12. Xeeni vari aya vooloka omusuwela saana Biibiliya?

¹² Biibiliya ori ntoko espeelyo, yeeyo ennikhaliherya oweha etthu ninreerela ahu olokiherya ni moota woolokiherya. (Yak. 1:23-25) Mwa ntakiheryo, nuumala omusoma Biibiliya, hiyo pooti woona moota nikhanle ahu oowiikasoopa, nto nikhaliheriwaka ni Yehova, hiyo nnimwiixutta moota nikhanle ahu okhala oomaala vaavo atthu akina annipaca aya aahiiso ninkhalana ahu mixankiho. Tthiri omaala onoonikhaliherya ovilela mixankiho mwa enamuna yooloka. Nave ninniwerya wuupuwela saana ni opaka soothanla  sooloka. (Yak. 3:13) Tthiri ti vooloka omusuwela saana Biibiliya!

13. Xeeni vari aya vooloka osoma matakiheryo a mBiibiliyani?

¹³ Okathi mukina ninniixutta opaka itthu sooloka nuumala opaka itthu soohiloka sinikhumelela mixankiho. Masi eyo enamuna yoohiloka ya wiixutta etthu. Masi enamuna yooloka ya okhalana ankhili ori wiixutta ni itthu sooloka ni soovonya sa atthu akina. Nto eyo ti etthu yaamwiirinhe Yakobo onitumererya oweha matakiheryo ari mBiibiliyani ntoko na Abrahamu, Rahabi, Yobi ni Eliya. (Yak. 2:21-26; 5:10, 11, 17, 18) Arumeyi awo oororomeleya a Yehova yaahiwerya ovilela mixankiho moohakalala hata saakhanle itthu saarowa owiiriha ohihakalala. Nto matakiheryo a ovilela waya annooniherya wira nikhaliheriwaka ni Yehova nnoowerya ovilela mixankiho.

14-15. Xeeni vanireerela aya ocalela itthu nnaanyiherya ahu?

¹⁴ Muxankiho: Vaavo nnaanyiherya ahu sookupali sahu. Okathi mukina hiyo pooti ohiiwexexa itthu sikina sa mBiibiliyani aahiiso Yehova pooti ohaakhula mavekelo ahu ntoko naalipelela ahu. Nto eyo pooti oniiriha waanyiherya sookupali sahu. Nto akhala wira khanincalela itthu iyo nnaanyiherya ahu, pooti otteettheiha waamini ahu ni ohonona waataana wahu ni Yehova. (Yak. 1:7, 8) Nave waanyiherya iwo pooti oniiriha oyeleela nlipelelo nahu na muhoolo.

¹⁵ Murummwa Paulo aahilikanyiha nlipelelo nahu na muhoolo ni nankura. (aHeeb. 6:19) Nankura onnikhaliherya ekalawa okathi wa epheyo yuulupale wira ehimane maluku. Masi, nankura onoovara saana muteko awe akhala wira ikwirinti sootthukweleliwa saana vakalawani wira ehinyaanyeye. Ntoko siisaale mukwitha wala murawa onihonona awe ekwirinti sa nankura, itthu nnaanyiherya ahu pooti ohonona waamini wahu. Vaavo mutthu onaanyiherya awe okathi onilupatthiwa awe, pooti opacerya wiikoha akhala Yehova onoomukhaliherya wala nnaari. Nto nayeleela waamini wahu, nnooyelela nlipelelo nahu na muhoolo. Tthiri ntoko Yakobo ohimmye awe, waanyiherya olikana ni “mawimpi a mphareya anipuruliwa ni epheyo, ekelihiwaka khula mpantta”. (Yak. 1:6) Nto mutthu siiso, woonasa wene pooti ohihakalala!

16. Nihaana opaka exeeni akhala wira sookhala itthu nnaanyiherya ahu?

¹⁶ Etthu ninreerela ahu opaka: Nihaana omala-maliha itthu nnaanyiherya ahu ni olipiha waamini wahu. Muhikhaleke mutthu a mirima miili. Mahiku a profeta Eliya, atthu a Yehova yaahipacerya okhalana mirima miili. Masi Eliya aahaaleela wira: “Mpakha lini muniphavelanyu ovara itthu pili? Apwiya yakhalá Muluku, weso mwatthare: masí Bayali akhalá muluku, mmutthareke yowo!” (1 Mam. 18:21) Etthu emosaru enniiraneya olelo-va. Nto nihaana otokosa oratteene wira nisuwele ni okupali wira Yehova tori Muluku eekeekhai, Biibiliya Nuulumo nawe ni Anamoona a Yehova atthu awe. (1 aTes. 5:21) Niira siiso, itthu nnaanyiherya ahu sinoomala-mala ni nnoolipiha waamini wahu. Nave akhala wira khaninwerya omala-maliha itthu nnaanyiherya ahu, nihaana waavekela axitokweene wira anikhaliherye. Nihaana opaka eyo mowaakuveya wira nihihiye ohakalala vaavo nimmurumeela ahu Yehova!

17. Exeeni ekhanle ookhumelela akhala wira nnoohiya olipa murima?

¹⁷ Muxankiho: Okhulumuwa. Biibiliya onihimya so: “Mojeyá movelavelani, ikuru sanyu ti sivukunwe”. (Mir. 24:10) Nuulumo na eHeeberi nitaphuleliwe eversiikulu ela noowi “mojeyá” wala mwakhulumuwa, nintaphulela “ohiya okhala oolipa murima”. Akhala wira munoohiya olipa murima, moohipisa ohakalala wanyu onoomala.

18. Ovilela ontaphulela exeeni?

¹⁸ Etthu ninreerela ahu opaka: Mmuroromeleke Yehova wira onimoovahani olipa murima wira nvilele. Tthiri wira niwerye ovilela mixankiho, nihaana  olipa murima. (Yak. 5:11) Nuulumo Yakobo orumenle awe noowi “ovilela” onihimmwa mutthu oowiithipela, yoowo onhinttikinyeya. Nave ninnuupuxerya nakhotto oolipa murima, yoowo oneemela nipuro nawe ni ohintthyawa hata awanani awe arwaaka omutuphela.

19. Ntakiheryo na murummwa Paulo ninniixuttiha exeeni?

¹⁹ Murummwa Paulo oonivaha ntakiheryo nooloka na olipa murima ni ovilela. Okathi mukina, Paulo uupuwela wira aari oohilipa. Masi aaniwerya ovilela mwaha woowi aanikupali wira Yehova aamunvaha ikuru saarowa omukhaliherya okhala oovilela. (2 aKor. 12:8-10; aFil. 4:13) Nto hiyo nnoowerya okhalana ikuru ni olipa murima akhala wira mowiiyeviha nnookupali wira Yehova onoonikhaliherya.—Yak. 4:10.

20-21. Etthu xeeni ninreerela ahu okupali ni murima wotheene?

²⁰ Mukupaliki wira mixankiho sinniphwanya khahiyo ehukhumu ya Yehova. Murummwa Yakobo onninlipiha oriki: “Okathi muneehereriwa anyu, muhihimye wira: ‘Muluku tonikeehererya’. Tthiri Muluku khoneehereriwa ni itthu sootakhala, nave owo khonimweehererya mutthu ni itthu sootakhala”. (Yak. 1:13) Nto akhala wira nnookupali eyo nnoomwaattamelaka Tiithi ahu oophenta a wiirimu.—Yak. 4:8.

²¹ Yehova ‘khoniturukeya ntoko muuttutthi’. (Yak. 1:17) Owo aahaakhaliherya maKristau a eseekulu yoopacerya ovilela mixankiho, nto ninnikupali ni murima wotheene wira onoonikhaliherya olelo-va. Nto mmuxontteleke Yehova wira oovaheeni ankhili, waamini ni olipa murima. Tthiri owo onimwaakhula mavekelo anyu. Nto mukupaliki ni murima wotheene wira onimookhaliheryani ohihiya ohakalala hata okathi wa mixankiho!