NIIREKE mootoko okhalana muxankiho muhinamoona mutthu oowookhaliheryani? Hiyo ninkhala mahiku “ooxankiha ni oowoopiha” nave pooti okhulumuwa ni opacerya wuupuwela wiira niri mekhihu. (2 Tim. 3:1) Nakhalana muxankiho, aakhala atthu akhanle oonikhaliherya. Biibiliya onihimya wiira apatthani ekeekhai anoowerya onikhaliherya “okathi wa mixankiho”. — Mir. 17:17.

Murummwa Paulo aaheetta mikwaha sa omisionaario ni apatthani awe, nto awo yaahimukhaliherya mwa inamuna sinceene. (aKol. 4:7-11) Okathi murummwa Paulo aatthukweliwe awe oRoma, apatthani awe yaahivara miteko sinceene owo ahaarowa awe owerya. Mwa ntakiheryo, Epafrodito, aahimuroihela murummwa Paulo itthu anna ni arokora a oFilipi, yanvanhe aya. (aFil. 4:18) Tiikhiko aahiroiha ikarta sa Paulo miloko soovirikana. (aKol. 4:7) Okhaliheriwaka ni apatthani awe, Paulo aahiwerya olipiha miloko hata aari mukhatteya. Olelo-va, munrowa owerya sai okhala mpatthani ekeekhai?

Olelo-va, aakhala anna ni arokora yaawo aanooniherya moota apatthani ekeekhai, anaakhaliherya aya akhwaaya. Elisabet, Murokora onirumeela ntoko pioneera ookilaatheya wEspanha, onnitthokiherya moota murokora mmosa aamukhalihenrye awe okathi wa mixankiho. Okathi maama awe aaphwanyaniwe awe eretta ya kanser, murokora ole aanimwinviyarela mensaxi, oromolaka soolepa sa mbiibiliyani soolipiha. Elisabet ohimmye so: “Mensaxi awo, yaanikilipiha khula nihiku, nto nkaixoona wiira kiri mekhaka”. — Mir. 18:24.

Nnoowerya olipiha ompatthani ahu ni anna ni arokora, akhala wiira nnimwaakhaliherya orowa muteko woolaleerya ni mithukumano. Mwa ntakiheryo, niireke munoowerya onvaha puleya munna aahiiso murokora oowuuluvala, wiira orowele mithukumano aahiiso olaleerya? Mwiira siiso, munoolipihana mukina ni mukhwaawe. (aRom. 1:12) Masi anna ni arokora akina, khaniwerya okhuma owaani. Nto ninrowa okhala sai apatthani eekeekhai para anna awo?

Mwaha wa oretta, anna ni arokora akina, khaniwerya orowela mithukumano Empa ya Omwene. Eyo ti etthu emwiiranenle munna oniitthaniwa David, yoowo orina eretta ya kanser. Owo ooviriha miyeeri sinivikana 6 olooliwaka eretta ya kanser. Okathi aalooliwa awe eretta awe, David ni mwaarawe Lidia, yaaweha mithukumano arumeelaka internet.

Anna ni arokora a mmulokoni, yaakhalihenrye sai? Nuumala muthukumano, anna ni arokora akina, yaaniimananiha olavula ni David ni Lidia amurumeelaka videoconferência. Nave-tho, okathi David ni Lidia yaakomentari aya, anna ni arokora yaaniwinviyarela mensaxi yaaleelaka wiira yaahisiveliwa ni ekomentaario aya. David ni Lidia, yoonela  sai? Awo yaanoona wiira yaaniphentiwa ni anna ni arokora.

Hiyo pooti ompaka palano wiira nilaleeryeke ni anna ni arokora ahiniwerya okhuma owaani. Hiyo pooti ovarerya eprokrama ahu, wiira noone moota nikhanle ahu oowaakhaliherya anna awo. Niira siiso, nnimooniherya wiira khinaaliyanle. (Mir. 3:27) Munoonela sai wiivaha okathi wiira mulaleeryeke ni anna awo, mulepaka ikarta aahiiso mmurumeelaka telefooni? Anna awo ahiniwerya okhuma owaani, pooti owerya wiirela mpantta muthukumano wa olaleerya, amurumeelaka videoconferência. David ni Lidia, yaahixukhurela okhala wiira muloko aya aahipaka mareheryo ala. David onitthokiherya so: “Naanilipa vanceene okathi naawiriyana ahu muthukumano wa olaleerya ni nivekelo, vamosa ni anna ni arokora a ekurupu ahu”. Akhala wiira khivaniweryaneya ompaka videoconferência, niireke munoowerya omukuxa naxikola anyu ikwaha sikina, wiira murowe hoothe owannyawe munna owo aahiiso murokora owo wiira mwamusomihe Biibiliya?

Vaavo ninviriha ahu okathi niri ene ni anna ni arokora ahiniwerya okhuma owaani, hiyo ninnaasuwela saana ni ninnisuwela mikhalelo saya sooreera, nto ompatthani ahu, onootepa olipa. Mwa ntakiheryo, akhala wiira munoolaleerya ni anna awo, munaweha moota animurumeela aya Biibiliya wiira amukhaliherye mutthu omusuwela Yehova, munrowa otepaka waataana naawo. Nyuwo munoowerya waapaka apatthani asya, okathi yoole munaakhaliherya anyu anna ni arokora awo orowa olaleerya ni orowela mithukumano. — 2 aKor. 6:13.

Okathi Paulo aarina awe mixankiho, mpatthani awe Tito aahirowa onweha ni omukhaliherya. (2 aKor. 7:​5-7) Ti vooreera waalipiha anna ni arokora ni moolumo ahu. Masi ntakiheryo na Tito, ninniixuttiha wiira ohiya paahi waalipiha ni moolumo ahu, nihaana oviriha okathi niri ene naawo, wiira naakhaliherye itthu anipirisari aya. — 1 Yoh. 3:18.

Anna ni arokora a oRússia, aavaha ntakiheryo nooloka na moota wookhaliheryana mukina ni mukhwaawe. Nrowe niwehe yoowiiraneya ya Sergey ni mwaarawe Tatyana. Nuumala empa aya ovaskulyariwa ni mapoliisia, awo yaahiroihiwa okumantu wiira yakohakohiwe. Tatyana, taapacenrye otaphuliwa onatthikela owaani. Sergey onihimya so: “Okathi Tatyana aaphiyale awe owaani, moolipa murima, murokora mmosa aahirwa omuxukurya. Apatthani akina, yaahirwa onikhaliherya waarumari mireerelo sahu”.

Sergey onincererya ohimyaka so: “Annikisivela vanceene moolumo ari Miruku 17:17, yaawo anihimya so: ‘Mpatthani eekeekhai onniphenta okathi wootheene, nave mpatthani eekeekhai onnikhala munna okathi wa mixankiho’. Okathi ninlupatthiwa ahu, hiyo ninnipirisari vanceene okhaliheriwa ni apatthani. Kinnoona wiira moolumo ari Miruku 17:17, teekeekhai. Yehova ookivaha apatthani ahinoova, yaawo anikikhaliherya okathi kinipirisari aka”. a

Ninnaapirisari apatthani wiira anikhaliheryeke, okathi itthu sintepa aya oxankiha. Okathi wa maxakha maalupale, ninrowa otepaka waapirisari apatthani. Tivonto, nrowe nipake sootheene siniwerya ahu wiira nikhale mpatthani ekeekhai okhuma nenna-va! — 1 Ped. 4:7, 8.