1. Xeeni ninreerela ahu weettihiwaka ni Yehova? Nvahe ntakiheryo.

 MUUPUWELE wiira muroorimeela eriyari ya etakhwa. Etakhwa eyo sookhala itthu soowoopiha ntoko: Axinama oowali, axiitthu anikumiherya iretta, mihokorokho siniiva ni makhuku oowoopiha. Exeeni mwaarowa anyu opaka? Moohaanyiherya, mwaamuhakalala vaakhanle wiira ookhala mutthu onisuwela saana mapuro awo oowoopiha, ni okhanle oowookhaliheryani moota woowiikhapelela! Olumwenku ola, onoolikana ni etakhwa eyo yoowoopiha. Khasireere itthu soowoopiha, sikhanle oohonona waamini wahu ni ompatthani nrina ahu ni Yehova. Masi nookhalana mutthu oosuwelexa oniwerya oneettiha, ori Yehova. Owo onninikhaliherya osyaka itthu soowoopiha, nave onoonikhaliherya weetta mpakha ophiya opuro ninrowa ahu, elapo esya weiwo ninrowa ahu okhalana okumi woohimala.

2. Yehova onneettiha sai?

² Yehova onneettiha sai? Owo onnineettiha otepexa wene orumeelaka Nuulumo nawe, Biibiliya. Nave owo onnineettiha, aarumeelaka apinaatamu. Mwa ntakiheryo, onnimurumeela “murumeyi oororomeleya ni a ankhili” yoowo onnivaha eyoolya, enlipiha waataana wahu ni Yehova ni ennikhaliherya opaka soothanla sooloka. (Math. 24:45) Ohiya-vo, Yehova onnaarumeela alopwana oororomeleya wiira aneettiheke. Mwa ntakiheryo, axitokweene a esirkwiitu ni a mmulokoni, anninlipiha ni anninivaha malakiheryo yaawo annikhaliherya okathi wa mixankiho. Ninnixukhurela inamuna iya Yehova onneettiha awe mahiku ala ookiserya ninkhala ahu! Malakiheryo awo, anninikhaliherya olipiha waataana wahu ni Yehova ni ohihiya weetta ephiro enrowa oniphwanyiha okumi woohimala.

3. Exeeni ninrowa ahu othokorerya mwaha ola?

 ³ Hata nisuwelaka eyo, ikwaha sikina pooti onivila otthara malakiheryo a Yehova, otepexa wene vaavo ninvahiwa ahu ni apinaatamu oottheka. Mwaha wa xeeni? Woonasa wene, malakiheryo annivaha aya khahiyo ti yaawo naaphavela ahu. Aahiiso pooti wuupuwelaka wiira malakiheryo awo, khanivareleya muteko, nto nnoona wiira khakhumme wa Yehova. Akhala wiira eyo enooniiraneela, nihiliyale wiira Yehova toniweettiha arumeyi awe, nave otthara malakiheryo awe anniniphwanyiha mareeliho. Wiira onikhaliherye olipiha omuroromela wahu Yehova, mwaha ola, ninrowa othokorerya iponto tthaaru, (1) moota Yehova aaweettiha awe arumeyi khalai, (2) moota oniweettiha awe arumeyi awe olelo-va ni (3) xeeni ninreerela ahu ororomelaka malakiheryo a Yehova.

MOOTA YEHOVA AAWEETTIHA AWE AISARAYELI

4-5. Yehova ooniherye sai wiira aanimurumeela Moise wiira oweettiheke? (Nwehe eteseenyo ya vakaapani.)

⁴ Yehova aahimuthanla Moise wiira aakumihe aisarayeli wExiitu. Nave Yehova aahaavaha aisarayeli itthu saakhaliherya, woona wiira aahimuthanla Moise wiira oweettiheke. Mwa ntakiheryo, owo aahirumeela etthu yaalikana ni neeku wiira niweettiheke othana, ni etthu yaalikana ni mooro wiira yaamwaleeleke ohiyu. (Okhum. 13:21) Nto Moise ottharaka neeku nno, owo aahiwerya waakuxa aisarayeli aaroihaka Ephareya Yooxeerya. Aisarayeli yaahixanka vanceene nuumala woona wiira ohoolo waya yaari Ephareya yooxeerya, masi ottuli waya yoomoliwa ni anakhotto a wExiitu. Awo yaahipacerya wuupuwela wiira Moise aahipaka etthu yoohiloka mwaha woowaaroiha atthu ale Ephareya Yooxeerya. Ohimya ekeekhai Moise khaapanke etthu yoohiloka. Yehova taalakenle waakuxa atthu ale aaroihaka opuro ole, omurumeelaka Moise. (Okhum. 14:2) Eyo yaahinvaha eparakha Muluku ya owooniherya owerya wawe mwa enamuna yahuupuwela aya. — Okhum. 14:26-28.

⁵ Mwa iyaakha 40, Moise khaahiyale otthara malakiheryo a Yehova ni oweettiha aisarayeli moothakoni. a Waahikhala okathi, Yehova iirinhe awe wiira neeku nle, neemele vasulu va etenta ya Moise, wiira aisarayeli ootheene yooneke. (Okhum. 33:7, 9, 10) Nto Yehova ori ene vaneekuni aanilavula ni Moise, nave yena aanaaleela aisarayeli malakiheryo aavahiwa awe ni Yehova. (Esal. 99:7) Tthiri aisarayeli yanwerya woona wiira Yehova aanimurumeela Moise wiira oweettiheke.

6. Aisarayeli akina yoonela sai malakiheryo yaavahiwa aya ni Yehova omurumeelaka Moise? (Moothakoni 14:2, 10, 11)

⁶ Mooriipiha murima, aisarayeli khiyaakupali enamuna ela Yehova aalavula awe naawo omurumeelaka Moise. (Mmusome Moothakoni 14:2, 10, 11.) Ikwaha sinceene, awo yaanikhootta weemya wiira Yehova aaniweettiha omurumeelaka Moise. Mwaha waivaavo, Yehova kheemerenrye wiira atthu ale oohiiwelela akele Elapo Yooleiheriwa. — Mooth. 14:30.

7. Muhimye matakiheryo a atthu yaatthanre malakiheryo a Yehova. (Moothakoni 14:24) (Nwehe eteseenyo.)

⁷ Hata vari siiso, aisarayeli akina yaanitthara malakiheryo a Yehova. Mwa ntakiheryo, Yehova aahimmye so: “Kalebi . . . ahitthara mwettelo worera, khukìwelela ahanyiheryaka etthu”. (Mmusome Moothakoni 14:24.) Muluku aahimutthuvela Kalebi ni aahimweemererya othanla opuro aaphavela awe okhala, elapo ele yooleiheriwa. (Yoox. 14:12-14) Nloko naattharelana na aisarayeli naahooniherya ntakiheryo nooloka na otthara malakiheryo a Yehova. Masi nuumala Moise okhwa ni orantteliwa ni Yoxuwa, aisarayeli “yahipajerya omuttittimiha” ntoko saamuttittimiha aya  Moise mahiku ootheene a okumi awe vathi-va. (Yoox. 4:14) Mwaha woopaka eyo, Yehova aahaatthuvela aisarayeli aakhaliheryaka mpakha ophiya elapo yooleiheriwa. — Yoox. 21:43, 44.

8. Mutthokiherye moota Yehova aaweettiha awe atthu awe okathi wa mamwene. (Nwehe eteseenyo.)

⁸ Muhoolo mwaya, Yehova aahaathanla makhulupale wiira aweettiheke atthu awe. Nave okathi wa mamwene, Yehova aahaathanla maprofeta wiira aweettiheke atthu awe. Nto mamwene yaari oororomeleya, yaanitthara miruku yaavahiwa aya ni maprofeta. Mwa ntakiheryo, Mwene Davidi, moowiiyeviha aaheemererya ottaruxiwa ni profeta Natani. (2 Sam. 12:7, 13; 1 Wah. 17:3, 4) Ottharaka malakiheryo aavahiwa awe ni profeta Yahaziyeli, Mwene Yosafati aahaalipiha atthu a oYuda, ohimyaka wiira “mwaakupali maprofeta awe” Muluku. (2 Wah. 20:14, 15, 20) Nave Mwene Ezekiya okathi aaxankale awe, aahimphavelasa profeta Yesaya. (Yes. 37:1-6) Khula okathi mamwene yaatthara aya malakiheryo a Yehova, awo yaanireelihiwa nave nloko nootheene naanikhapeleliwa. (2 Wah. 20:29, 30; 32:22) Vannooneya wiira Yehova aanaarumeela maprofeta wiira oweettiheke atthu awe. Masi hata vari siiso, mamwene ni atthu akina, yaanikhootta wiiwelela miruku sa maprofeta awo. — Yer. 35:12-15.

MOOTA YEHOVA AAWEETTIHA AWE MAKRISTAU OOPACERYA

9. Yehova aaweettiha sai makristau oopacerya? (Nwehe eteseenyo.)

⁹ Yehova aahikumiherya muloko woopacerya wa ekristau, okathi wa Pentekoositi mwaakha wa 33 Nuumala Kristu Orwa. Masi aaweettiha sai makristau ale oopacerya? Yehova aahimuthanla Yesu wiira okhale muru wa muloko wa ekristau. (aEef. 5:23) Masi Yesu khaawerya olavulana khula mmosa wiira omuleele etthu aareerela awe opakaka. Nto owo aanaarumeela arummwa ni axitokweene a oYerusalemu wiira yaavaheke malakiheryo makristau oopacerya. (Mit. 15:1, 2) Ohiya-vo, yaahikhala-tho axitokweene akina yaathanliwe wiira yeettiheke miloko. — 1 aTes. 5:12; Tito 1:5.

10. a) Makristau oopacerya yoonela sai malakiheryo yaavahiwa aya? (Miteko 15:30, 31) b) Xeeni makristau makina a okathi woopacerya, yahaaroromela aya ale yaathanliwe ni Yehova? (Nwehe ekaaxa eni: “ Xeeni Atthu Akina Yahaakupali Aya Soowoonihiwa?”)

¹⁰ Niireke makristau oopacerya yaanikupali moota yeettihiwa aya ni Yehova? Aayo, okhala wiira akina a yaawo, yaanihakalala okathi yaatthara aya malakiheryo yaavahiwa aya. Nave awo “yaahitteeliwa murima mwaha wa moolumo oolipiha” yaavahiwa aya. (Musome Miteko 15:30,  31.) Ankhi olelo-va, Yehova oniweettiha sai arumeyi awe?

MOOTA YEHOVA ONNEETTIHA AWE OLELO-VA

11. Nvahe ntakiheryo nnooniherya moota Yehova oniweettiha awe arumeyi awe olelo-va.

¹¹ Mpakha olelo-va, Yehova khonihiya oweettiha arumeyi awe. Owo onnipaka eyo orumeelaka Nuulumo nawe Biibiliya vamosa ni Yesu, yoowo ori muru wa muloko. Niireke sookhala itthu sinnikupaliha wiira nlelo, Muluku onnaarumeela apinaatamu wiira oweettiheke arumeyi awe? Aayo. Mwa ntakiheryo, Nwehe etthu yiiraneyale nuuvira mwaakha wa 1800. Charles Taze Russell ni axipatthani awe akina yaamusoma Biibiliya, yaanikupali wiira mwaakha wa 1914, waarowa okhala mwaakha wa vameekhaaya, waarowa aya okumiheriwa Omwene wa Muluku. (Dan. 4:25, 26) Etthu yaawiiriha okupali, okhala wiira awo yaahisoma iprofesia sinceene sa mbiibiliyani. Niireke Yehova aanaakhaliherya okathi yaatokosa aya myaha iye sa mbiibiliyani? Aayo aanaakhaliherya. Etthu yiiraneyale mwaakha wa 1914 olumwenku wootheene, yaahooniherya wiira wookumiheriwa Omwene wa Muluku. Mwaakha yoole, yaapacenrye aya Ekhotto Yoopacerya ya Olumwenku Wootheene, ni okhuma vaavale sinnincerereya mixankiho ntoko itetere, iretta ni etala. (Luka 21:10, 11) Tthiri Yehova aahaarumeela alipa-oomusoma Biibiliya oororomeleya, wiira yaakhaliheryeke arumeyi awe.

12-13. Anna a oseedi ya olumwenku wootheene, yaapanke exeeni okathi wa Ekhotto ya Nenli ya Olumwenku Wootheene, wiira yincererye muteko woolaleerya?

¹² Nkuupuwelani etthu yiiraneyale okathi wa Ekhotto ya Nenli ya Olumwenku Wootheene. Nuumala osommwa ni ovareriwa saana yoolepa ya Wiisuupulula 17:8, anna a oseedi ya olumwenku wootheene, yaahoona wiira ekhotto ele khiyaarowa owaniwa mpakha ophiya Armagedoni. Nave yaahoona wiira yammala ekhotto ele ni okhale murettele, waarowa oweemererya Anamoona a Yehova wuncererya muteko aya woolaleerya. Nto awo yaahipaka yoothanla yaakhala wiira khenivareleya muteko, ya okumiherya (eskola) ya oGileadi, wiira ewiixuttiheke mamisionaario moota woolaleerya ni wiixuttiha olumwenku wootheene. Mamisionaario manceene yaahithanleliwa mapuro yaarowa aya orumeelaka, nlelo ekhotto ele ehimanle. Nave yaahikumiherya Exikola ya Orummwa wa Muluku b wiira yaakhaliheryeke anamalaleerya ootheene, osuwela olaleerya ni wiixuttiha. Akhaliheriwaka mwa enamuna ela, arumeyi a Muluku  yaanikhala oolikana ene wiira avare muteko muulupale, waarowa okhumelela muhoolo.

¹³ Nuupuwelela itthu siiraneyale khalai, vannooneya wiira Yehova aaniweettiha atthu awe hata okathi wooxankiha. Okhuma okathi wa Ekhotto ya Nenli ya Olumwenku Wootheene, arumeyi a ilapo soovirikana annivara muteko woolaleerya, akina anivara ni murettele ni mootaphuwa. Atthu anceene olelo-va, annimusuwela Yehova nave arumeyi awe annilaleerya olumwenku wootheene.

14. Xeeni ninreerela ahu ororomelaka malakiheryo ninvahiwa ahu ni mutthenkeso wa Yehova, aarumeelaka axitokweene? (Wiisuupulula 2:1) (Nwehe efootu.)

¹⁴ Olelo-va, anna a Nikhuuru Noolamulela, annitthara malakiheryo a Kristu. Awo annipaka eyo avareryaka vakhala wiira soothanla saya, sinnivarihana ni ele Yesu oniphavela awe. Nave annaarumeela axitokweene a esirkwiitu ni a muloko wiira yaavaheke malakiheryo anna ni arokora a mmulokoni. c Axitokweene awo oothanliwa, ari ‘ntata noolopwana’ na Kristu. (Mmusome Wiisuupulula 2:1.) Ekeekhai wiira axitokweene awo atthu oottheka nave ikwaha sikina annifalyari. Ikwaha sikina Moise ni Yoxuwa, yaanipaka itthu soohiloka, nave-tho arummwa yaanipaka etthu emosa-ru. (Mooth. 20:12; Yoox. 9:14, 15; aRom. 3:23) Hata vari siiso, Yesu khonihiya omurumeela murumeyi oororomeleya ni ankhili vamosa ni axitokweene. Nave owo khonrowa ohiya waarumeela alopwana awo oororomeleya, “mahiku otheene mpakha olumwenku ola omala”. (Math. 28:20) Tthiri nookhalana mathowa ooloka anniiriha otthara malakiheryo Yesu onnivaha awe, aarumeelaka alopwana awo oororomeleya.

MAREELIHO NIMPHWANYA AHU MWAHA WOOTTHARA MALAKIHERYO A YEHOVA

15-16. Exeeni mwiixuntte anyu ni soowiiraneya iya sa anna ni arokora aneemererya weettihiwa ni malakiheryo a Yehova?

¹⁵ Akhala wiira ninnitthara malakiheryo a Yehova, ninniwerya oweha mmansihu mareeliho nimphwanya ahu. Mwa ntakiheryo, Andy ni Robyn yaahitthara malakiheryo a Yehova voohimya sa okhweiherya okumi aya. (Nwehe enoota eri Matheyo 6:22.) Mwaha woopaka eyo, awo yaahikhalana eparakha ya okhaliherya muteko wooteka, moowiivahererya. Robyn Onihimya so: “Ikwaha sikina naakhala empa yaamukhaani ni yahaakhanle ekosinya. Nto kaahitumiha ipeesa sikina sa maakina yaawo kaatirarana aka ifootu yaakisivela vanceene. Nkaareere wunla okathi kaatuminhe aka ipeesa iyo. Kimutakihaka Sara, mwaarawe Abrahamu, miyo kaahilakela ohitthikela ottuli”. (aHeeb. 11:15) Exeeni Andy ni Robyn anuupuwela  aya ni yoowiiraneya aya? Robyn onihimya-tho so: “Ninnihakalala vanceene osuwela wiira ninninvaha Yehova itthu sootheene nirina ahu. Okathi nninvarela ahu muteko Yehova, ninniwerya woonihereya vakhaani, moota okumi onrowa aya okhala elapo esya”. Nave iyawe, Andy, onnikupali eyo. Owo onihimya so: “Ninnihakalala vanceene osuwela wiira ninnirumeela okathi ahu ni ikuru sahu wiira nikhaliherye Omwene”.

¹⁶ Nrowe nthokorerye ntakiheryo nikina, nnooniherya mareeliho nimphwanya ahu mwaha wootthara malakiheryo a Yehova. Nuumala omaliha osoma oskola, Marcia aahitthara malakiheryo aavahiwa awe a okhala pioneera. (Math. 6:33; aRom. 12:11) Owo onihimya so: “Kaahivahiwa eparakha ni kuvernu ya orowa osoma iskola suulupale mwa iyaakha 4. Masi miyo kaaphavela wuncererya muteko kanvarela aka Yehova. Nto kaahithanla omwiira kursu a ovara muteko waarowa okikhaliherya ophwanya musurukhu ni ohihiya okhala pioneera. Ele yaari yoothanla yooloka kaapanke aka mookumini mwaka. Nenna-va, kinirumeela ntoko pioneera ookhaliherya, nave efoolka kinivahiwa aka omutekoni, ennikikhaliherya orowa okhaliherya oBeteli ni ovara miteko sikina soohakalaliha sa Yehova”.

17. Mareeliho xeeni nimphwanya ahu okathi nintthara ahu malakiheryo a Yehova? (Yesaya 48:17, 18)

¹⁷ Ikwaha sikina, hiyo ninnaakhela malakiheryo a mutthenkeso wa Yehova, annikhapelela. Mwa ntakiheryo, ninnivahiwa malakiheryo a osyaka wiithukumanyerya mihakhu, itthu saarowa onikumiherya mixankiho, ni saarowa oniiriha ohiiwelela malamulo a Muluku. Okathi nintthara ahu miruku iyo, ninnihakalala mwaha woowiiwelela malakiheryo a Yehova. Nave hiyo pooti okhalana muupuwelo wooloka ni osyaka wiikumiherya mixankiho. (1 Tim. 6:9, 10) Niira siiso, nnoowerya omurumeelaka Yehova ni murima woohakalala, maana molumwenkuni-mu khekhanle etthu ekhanle onniphwanyiha murettele ni ohakalala. — Mmusome Yesaya 48:17, 18.

18. Exeeni eniwiirihani ohihiya otthara malakiheryo a Yehova?

¹⁸ Moohaanyiherya, Yehova khonrowa ohiya waarumeela apinaatamu wiira anivaheke malakiheryo, okathi wa maxakha maalupale ni okathi wa Olamulelo wa Iyaakha Ekonto Emosa wa Kristu. (Esal. 45:16) Niireke nnaamwiiwelela malakiheryo awo hata nirina ene moonelo woovirikana? Vanookhweya wiiwelela malakiheryo awo a Yehova, naiwelelaka miruku ninvahiwa ahu okhuma nenna-va. Nto nihihiye otthara malakiheryo a Yehova, yaawo anihela muhina miruku ninvahiwa ahu ni apinaatamu aathanlale awe. (Yes. 32:1, 2; aHeeb. 13:17) Vaavo nimmutthara ahu ole oolokexa, Yehova, nihaana okupaliki wiira onoonikhaliherya oxintta khula muxankiho onniphwanya, nave nnookhala apatthani awe, okumi ahu wootheene mpakha elapo esya.