1. Exeeni enooniherya wiira Yesu aanivaha efaita soolempwa?

 NKUUPUWELANI murina ene eparakha ya onwiriyana Yesu iixuttihaka! Yesu aanisuwela saana soolempwa nto khula okathi iixuttiha awe owo aaniromola. Ninnisuwela eyo maana nuumala opatisiwa, Yesu aahiromola soolempwa nave ohalaka okhwa aahiromola-tho soolempwa. b (Otum. 8:3; Esal. 31:6; Luka 4:4; 23:46) Iyaakha tthaaru nnimeya Yesu aalaleerya awe, ikwaha sinceene owo aanisoma ni oromola soolempwa okathi aawiixuttiha awe atthu. — Math. 5:17, 18, 21, 22, 27, 28; Luka 4:16-20.

2. Exeeni yaamukhalihenrye Yesu osuwela saana soolempwa? (Nwehe edeseenyu eri vakaapani.)

² Ohinatthi opacerya muteko awe woolaleerya valaponi, Yesu aanisoma ni owiriyana Nuulumo na Muluku. Woonasa wene, owo aanimwiiwa ikwaha sinceene Yosefe oromolaka soolepa iyo okathi yaavaanela aya owaani. c (Otum. 6:6, 7) Nave khula esaabadu, Yesu ni emusi awe yaanirowa osinagoga. Okathi saasommwa aya soolempwa, owo aaniwiriyana ni ephoole. (Luka 4:16) Nto okathi owo, aahiixutta moota woophwanya soolepa. Masi ohiya paahi Yesu osuwela soolempwa, nave owo aaniphenta ni aanivarihela muteko itthu sootheene iixutta awe. Mwa ntakiheryo, niireke munnuupuwelela etthu yaamwiiranenle orina ene iyaakha 12? Alipa-oowiixuttiha mutemplo, yaanisuwela saana nlamulo na Moise, masi “yaanitikinihiwa vanceene ni osuwela wawe ni waakhula wawe”. — Luka 2:46, 47, 52.

3. Exeeni ninrowa ahu othokorerya mwaha ola?

 ³ Vakhala wiira nnoosomaka Nuulumo na Muluku khula nihiku, nnoosuwelaka saana ni ovahaka efaita. Masi ninrowa ottottela sai mureerelo ele ninsoma ahu? Nnoowerya ottottela mureerelo ele ninsoma ahu, nuupuwelelaka ele Yesu aalenle awe alipa-oowiixuttiha nlamulo, afarisi ni asaduki. Ahooleli a etiini awo yaanisoma ikwaha sinceene soolempwa, masi khiyaattottenle mureerelo ele yaasoma aya. Yesu aahihimya itthu tthaaru alopwana awo yaareerela aya opaka wiira attotteleke mureerelo ele yaasoma aya. Etthu Yesu aaleelale awe ahooleli a itiini enoonikhaliherya. Yoopacerya, wiiwexexa ele ninsoma ahu, ya nenli, musomeke mphavelaka wiixutta itthu isya ni yookiserya weemererya wiira nuulumo na Muluku niturukeke mweettelo ahu.

4. Luka 10:25-29 onniixuttiha exeeni sa moota woosoma saana Nuulumo na Muluku?

⁴ Yoolakela ahu ori wiiwexexa ele elempwale mbiibiliyani. Naahiire siiso, khaninrowa ottottela mureerelo ele ninsoma ahu. Mwa ntakiheryo, nwehe ovaanela aarina awe Yesu “ni mulopwana mmosa aasuwela saana nlamulo”. (Mmusome Luka 10:25-29.) Nuumala mulopwana owo omukoha Yesu etthu aareerela awe opaka wiira ophwanye okumi woohimala, Yesu aamwaakhunle so: “Exeeni elempwale munlamuloni? Nyuwo muniiwa sai?” Mulopwana ole aahaakhula oromolaka soolepa sinihimya wiira mumphenteke Muluku ni mukhwiinyu. (Moth. 19:18; Otum. 6:5) Masi nkawehani etthu mulopwana ole aahimmye awe moottharelana: “Mukhwaaka ti pani?” Eyo enooniherya wiira mulopwana ole khaiwexexa ele yaataphulela aya etthu aasoma awe. Ti maana aya ahaasuwela awe ovarihela muteko saana Soolepa.

5. Ovekela ni osoma muhaakuveyaka, onrowa wookhaliheryani sai wiiwexexa ele munsoma anyu?

⁵ Wiira niwerye wiiwexexa saana Nuulumo na Muluku, nihaana wiilimaleliha osoma. Nrowe niwehe itthu sikina sikhanle oonikhaliherya opaka eyo. Muhinatthi opacerya yoosoma anyu, munvekeleke Yehova. Maana wiira niwerye omwiiwexexa Biibiliya, nihaana okhaliheriwa ni Yehova. Nto munvekeleke Yehova munepa awe woowaarya wiira nweryeke ovaha ephoole ele munsoma anyu. Nuumala-vo, musomeke muhaakuveyaka. Opaka eyo enimookhaliheryani wiiwexexa ele munisoma anyu. Nave nyuwo pooti othanla osoma moowiiwanyeya aahiiso onwiriyana audiyu ookaravariwa a mbiibiliyani. Nto eyo enimookhaliheryani ohiya paahi oweha ele enisoma anyu masi owiriyana moolumo ene. Nave-tho enimookhaliheryani wiiwexexa, wuupuwela ni wiixutta itthu sinceene mbiibiliyani. (Yox. 1:8) Mwamaliha yoosoma anyu, munvekeleke-tho Yehova wiira ookhaliheryeni ovarihela muteko mookumini mwanyu ele musomme anyu.

6. Wiipakela makoho ni olepa itthu vakhaani okathi munimusoma anyu Biibiliya onrowa wookhaliheryani sai? (Nwehe efootu.)

⁶ Nrowe niwehe-tho itthu sikina piili sinrowa wookhaliheryani omwiiwexexa saana Biibiliya. Yoopacerya, mwiipakeleke makoho okathi yoole munisoma anyu. Okathi munimusoma anyu Biibiliya mwiikoheke so: ‘Atthu xeeni aniromoliwa yoowiiraneya ela? Tani anilavula? Onlavula naani, mwaha wa xeeni? Okathi xeeni ni opuro xeeni yiiraneya aya ela?’ Makoho ala animookhaliheryani wuupuwelela ele munisoma anyu ni wiiwexexa iponto suulupale. Ya nenli, mulepeke itthu vakhaani sa ele munisoma anyu. Okathi munlepa anyu ele munisoma anyu, onlikana ni olepa miyuupuwelo sanyu. Nto opaka eyo, enimookhaliheryani wiiwexexa saana mwaha munisoma nyu. Ohiya-vo, olepa ele munisoma anyu enimookhaliheryani ohaakuva oliyala ele musomme anyu. Masi itthu xeeni ninreerela ahu olepaka? Nyuwo  pooti olepa makoho, itthu munrowa anyu otokosa, iponto suulupale, moota woovarihela muteko ele munisoma anyu aahiiso moonelo anyu okathi mwaasoma anyu. Mwapaka itthu iyo, enimookhaliheryani woona wiira ele munisoma nyu mbiibiliyani mulepeliwe nyuwo.

7. Mukhalelo xeeni ninreerela ahu okhalana wiira niwerye omwiiwexexa Biibiliya? (Matheyo 24:15.)

⁷ Yesu aahihimya mukhalelo mmosa ninreerela ahu okhalana naaphavelaka omwiiwexexa Biibiliya, eyo piiyo, ankhili. (Mmusome Matheyo 24:15.) Ankhili exeeni? Ankhili, mukhalelo onnikhaliherya osuwela ovirikana aahiiso ovarihana wa etthu wala wa muupuwelo. Nave ankhili, onihela muhina wiiwexexa mwaha ohitthokiheriwe saana. Yesu aahimmye wiira nihaana okhalana ankhili wiira niiwexexe iprofesia sa mbiibiliyani. Nave wiira niwerye ottottela mureerelo ele ninsoma ahu mBiibiliyani nihaana okhalana mukhalelo owo.

8. Osoma naarumeelaka ankhili ontaphulela exeeni?

⁸ Yehova onnaavaha ankhili arumeyi awe. Nto, munvekeleke wiira ookhaliheryeni okhalana ankhili awo. (Mir. 2:6) Nuumala onvekela Yehova, sookhala itthu sikina munireerela anyu opaka. Itthu xeeni? Musomeke ni ephoole ni mwiimananiheke wiiwexexa ele munisoma anyu moota enivarihana aya ni itthu munisuwela anyu. Etthu enrowa wookhaliheryani ori otokosa murumeelaka iliivuru sahu sinimutthokiherya Biibiliya. Mwa ntakiheryo, nyuwo pooti orumeela Eliivuru Enaakhaliherya Anamoona a Yehova Otokosa Myaha Sikumiheriwe. Iliivuru iyo sinimookhaliheryani osuwela etthu entaphulela aya ele munisoma anyu mbiibiliyani ni moota woovarihela muteko mookumini mwanyu. (aHeeb. 5:14) Vakhala wiira munoomusomaka Biibiliya ni ankhili, munoowerya wiiwexexa ele munisoma anyu.

9. Mwaha xeeni asaduki yahiiwexexa aya?

⁹ Asaduki yaanisuwela saana iliivuru 5 soopacerya sa soolempwa sa eHeeberi, masi  awo khiyeemererya ikeekhai saari muliivuruni mmo. Mwa ntakiheryo, okathi asaduki yaamukonhe aya Yesu voohimya sa ohihimuwa, owo awaakhunle so: “Khamusomme muliivuruni mwa Moise ele Muluku aamuhimenrye awe vamwiiwani waapatta mooro, iiraka: ‘Miyo ka Muluku Abrahamu, Muluku a Isaakhi ni Muluku a Yakobe’?” (Mar. 12:18, 26) Vannooneya wiira asaduki yaanisoma iliivuru iye ikwaha sinceene. Masi awo khiyaiwexexa mwaha ola wa ohihimuxiwa. — Mar. 12:27; Luka 20:38. d

10. Itthu xeeni ninreerela ahu ovaha ephoole okathi nimmusoma ahu Biibiliya?

¹⁰ Exeeni nniixutta ahu? Okathi nimmusoma ahu Biibiliya, nimphavela ovaha ephoole itthu sootheene yoowiiraneya eyo enniixuttiha aya. Ohiya paahi osuwela ikeekhai soopacerya sa mbiibiliyani, masi-tho nihaana wuncererya osuwela wahu nisomaka malakiheryo ari mbiibiliyani. Nto wiira niwerye opaka eyo vanireerela wiimananiha vanceene.

11. Moovarihana ni 2 Timootheyo 3:16, 17, munrowa owerya sai wiixutta itthu isya okathi munimusoma anyu Biibiliya?

¹¹ Munrowa owerya sai wiixutta itthu isya okathi munimusoma anyu Biibiliya? Nrowe niwehe ele onihimya awe 2 Timootheyo 3:16, 17. (Mmusome.) Yoolepa eyo enihimya wiira: “Soolempwa sootheene . . . . Sinnivareleya muteko” wiira (1) siwiixuttiheke atthu, (2) saattaruxeke atthu, (3) sooniheryeke itthu soohiloka, ni (4) saalakiheryeke atthu ephiro ya xariya. Iponto iya xexe sinnivareleya muteko hata ni iliivuru seiye sa mbiibiliyani muhimmakela anyu osoma. Musomeke ni ephoole iliivuru iyo, mmananiheke oweha malakiheryo anikhuma eliivuru eyo ni etthu muniixutta anyu voohimya sa Yehova ni yoolakela awe. Nave okathi munisoma anyu, mmananiheke oweha moota iliivuru iyo sinoottaruxaayani. Masi eyo enrowa oweryaneya sai? Eyo enoweryaneya okhala wiira Biibiliya pooti onikhaliherya osuwela soophavela ni mikhalelo soohiloka nirina ahu, ni onikhaliherya ohiya mikhalelo iyo wiira nikhale oororomeleya wa Yehova. Nave mmananiheke orumeela yoolepa ela wiira nwooniheryeke itthu soohiloka atthu anipaka aya okathi munilaleerya anyu. Okathi munimusoma anyu Biibiliya muhaavyeke iponto sinrowa woolakiheryani ephiro ya xariya ni okhalana moonelo mmosaru wa Yehova. Nto vakhala wiira munoomusomaka Biibiliya muupuwelelaka itthu iya 4 niixuntte ahu, eyo enimookhaliheryani wiixutta itthu isya, ni osiveliwaka ni yoosoma anyu ya Biibiliya.

12. Exeeni yaamwiirinhe Yesu waakoha afarisi wiira: “Khamusomme?”

¹² Ekwaha emosa, afarisi yaahiwootherya awiixutti a Yesu wiira khiyaiwelela nlamulo na esaabadu. Nto Yesu aahiwaakhula afarisi oriki: “Khamusomme?” Yesu aahipaka nikoho nlo ophavelaka  owooniherya afarisi wiira yaahikhalana moonelo woohiloka okathi yaasoma aya soolempwa. (Math. 12:1-7) e Moottharelana, Yesu aahilavula matakiheryo manli ohela muhina yoolepa ya profeta Hoseya. Yesu aahipaka eyo wiira aakhaliherye afarisi ale woona wiira khiyaiwexexa nlamulo nle na esaabadu ni wiira owooniherya wiira khiyaamorela ikharari atthu akina. Ekeekhai wiira afarisi ale yaanisoma Nuulumo na Muluku, masi khiyeemererya wiira yeettihiweke ni itthu yaasoma aya. Mwaha wa xeeni? Mwaha woowi awo yaasoma soolempwa aphavelaka wiixinnuwiha ni waaphukela atthu akina. Nto eyo yaaniwiiriha ohiiwexexaka ele yaasoma aya. — Math. 23:23; Yoh. 5:39, 40.

13. Mukhalelo xeeni ninreerela ahu okhalana okathi nimmusoma ahu Biibiliya, ni mwaha wa xeeni?

¹³ Moolumo a Yesu anniniixuttiha wiira nihaana osoma Nuulumo na Muluku ni moonelo wooloka, eyo piiyo, ophavela wiiwexexa ele ninsoma ahu. Moovirikana ni afarisi yaawo yaari oowiixinnuwiha, hiyo nimphavela okhala oowiiyeviha ni waakuva wiixutta. Ntoko onihimya awe Biibiliya, nimphavela ʻmoowiiyeviha weemererya wiira masu a Muluku yaawo aniwerya onoopola, akhale mwa hiyoʼ. (Yak. 1:21) Nto vakhala wiira nnoopaka eyo, nnimweemererya wiira Nuulumo na Muluku nikhale vamurimani vahu ni niturukeke mweettelo ahu. Masi naahikhale atthu oowiixinnuwiha ni naahaaphukeleke atthu akina, nnimweemererya wiira mikhalelo nniixutta ahu mbiibiliyani ntoko omoriwa ikharari, othunku ni ophenta sineettiheke.

14. Exeeni enrowa onikhaliherya osuwela vakhala wiira ninneemererya wiira Biibiliya oneettiheke? (Nwehe ifootu.)

¹⁴ Enamuna nnaathokorerya ahu atthu akina, ennooniherya akhala wiira nneettihiwa ni Nuulumo na Muluku. Okhala wiira afarisi khiyeemererya wiira Nuulumo na Muluku niweettiheke,  eyo yaaniwiiriha ʻwaaphukela ale yahaatthenkeʼ. (Math. 12:7) Nto moota nnuupuwela ahu ni moota nnaathokorerya ahu atthu akina, nnimooniherya akhala wiira nneettihiwa ni Nuulumo na Muluku. Mwa ntakiheryo, niireke ninnaattottopela atthu akina mwaha wa mikhalelo sooloka arina aya aahiiso ninwehexexa soovonya saya paahi? Niireke ninnaamorela ikharari atthu akina ni waalevelela aahiiso nnimwaaphukela ni opweha mathowa vamurimani? Waakhula wahu makoho ala, onimooniherya vakhala wiira muupuwelo ahu, moonelo ahu ni itthu nimpaka ahu nneettihiwa ni ele ninsoma ahu. — 1 Tim. 4:12, 15; aHeeb. 4:12.

15. Yesu oonela sai Nuulumo na Muluku?

¹⁵ Yesu aaniphenta Nuulumo na Muluku. Esalimo 40:9, ninniphwanya eprofesia yaalavula sa moota Yesu aarowa awe woonelaka Nuulumo na Muluku. Eyo enihimya so: “Muluku aka! Wira otthuna wanyu t’unkisivela. Kinnettela ikano sanyu ni murim’aka wothene”. Mwaha woophenta Nuulumo na Muluku, eyo ti yaamwiiriha Yesu omurumeela Yehova moohakalala. Mwa enamuna emosaru, vakhala wiira nnoophentaka Nuulumo na Muluku ni osoma, nnoohakalalaka. — Esal. 1:1-3.

16. Exeeni nikhanle ahu oopaka wiira nittottele mureerelo yoosoma ahu ya Biibiliya? (Nwehe ekaaxa eni: “ Moolumo a Yesu Animookhaliheryani Wiiwexexa Ele Munisoma Anyu”.)

¹⁶ Akhala wiira nnootthara moolumo ni ntakiheryo na Yesu, nnoowerya ottottela mureerelo yoosoma ahu ya Biibiliya. Nnoowerya wiiwexexa ele ninsoma ahu mbiibiliyani, vakhala wiira nnoovekela, osoma moohaakuveya, wiipaka makoho, ni olepa itthu vakhaani. Nave nnookhalana ankhili okathi nimmusoma ahu Biibiliya, vakhala wiira nnootokosa nirumeelaka iliivuru sahu sinimutthokiherya Biibiliya. Nave-tho, nnoowerya omwiiwexexa saana Biibiliya, akhala wiira nnoosoma soowiiraneya ni soolepa nihiniiwexexa ahu saana. Vakhala wiira nnoomusomaka Biibiliya ni moonelo wooloka enooniiriha weemererya wiira Biibiliya oneettiheke. Nto niimananiha ovarihela muteko iponto iyo, nnoowerya ottottela mureerelo yoosoma ahu ya Biibiliya nave waataana wahu ni Yehova onookhala woolipa. — Esal. 119:17, 18; Yak. 4:8.