Niireke moosoma oratteene irevista sootheene sa Owehaweha sa mwaakha ola? Akhala wiira ti siiso, nwehe akhala wiira munniwerya waakhula makoho anittharelana:

Yehova onaathokorerya sai athiyana?

Yehova khonaathanla atthu, nto owo khoniwoona alopwana okhalana efaita waavikana athiyana. Owo onnaawiriyana athiyana, waathokorerya ni onniweha itthu sinaaxankiha. Nave onnaaroromela athiyana makristau wiira avareke muteko awe. — Owehaweha 01/2024, ipaax. 15-16.

Ninrowa ovarihela sai muteko miruku siri aEefeso 5:7, seiyo sini: “Muhiireke itthu siniira aya”?

Murummwa Paulo, aanilopola wiira nihaataaneke ni atthu yaarowa oniiriha ohiya wiiwelela malamulo a Muluku. Atthu awo ninreerela ahu waasyaka, anihela muhina ale nniviriha ahu okathi niri ene naawo aahiiso ale ninlavulana ahu nimurumeelaka redes sociais. — Owehaweha 03/2024, ipaax. 22-23.

Etthu xeeni mukhanle anyu oopaka mwaiwa itthu soowoothiwa?

Nihaana okhalana ephoole ni soohimmwa soowoothiwa nninviyareliwa ahu, ni apatthani aahiiso ni atthu nihinaasuwela ahu, yaawo anikhala ntoko aniphavela osuwela ekeekhai masi ari ene anamavirikanya. — Owehaweha 04/2024, epaax. 12.

Etthu xeeni ninsuwela ahu ni nihinsuwela ahu voohimya sa moota Yehova onrowa awe omphukela Salomoni, atthu akhwiiye oSodoma ni oGomora ni okathi wa Mutaaseke?

Khaninsuwela vakhala wiira Yehova ohaapwetexa moomalela. Masi hata vari siiso, ninnisuwela wiira owo onnisuwela itthu sootheene ni toomoriwa ikharari. — Owehaweha 05/2024, ipaax. 3-4.

Mwa enamuna xeeni Yehova ori awe ntoko “mwala”? (Otum. 32:4)

Nihaana ompaka Yehova okhala ntthyawelo nahu. Owo toororomeleya ni onnimaliherya itthu sootheene onileiherya awe. Nave khoniturukeya, maana mikhalelo sawe ni soolakela sawe, khasiniturukeya. — Owehaweha 06/2024, ipaax. 26-28.

Exeeni enrowa onikhaliherya olimalela muloko musya?

Mmuroromeleke Yehova maana onimookhaliheryani ntoko aakhalihenrye awe arumeyi awe a khalai. Musyakeke olikanyiha muloko anyu wa niinano ni wa khalai. Mwiilimaleliheke ni makhalelo a muloko owo ni mwaapakeke apatthani asya. — Owehaweha 07/2024, ipaax. 26-28.

Nniixutta exeeni ni malikanyiho mararu ari Matheyo ekapiitulu 25?

Nlikanyiho na ipwittipwitthi ni ipuri, ninniixuttiha okhala oororomeleya. Nlikanyiho na imwali sa ankhi ni iye sahaarina ankhili, ninniixuttiha wiira nihaana okhala atthu oowiilokiherya ni oowehaweha. Nave nlikanyiho na italento, ninniixuttiha wiira nihaana ovara muteko ni nthiti ni wiilipiha. — Owehaweha 09/2024, ipaax. 20-24.

Tiivi yaari erakamelo ya niphiryo na etemplo Salomoni aatenke awe?

2 Wahala 3:4 onihimya wiira niphiryo Salomoni aatenke awe, naarina “ikoovatu 120” eyo yooniherya wiira niphiryo nno, naarina imeeturu 53 erakamelo aya. Masi soolepa sikina, sinihimya wiira niphiryo nne naarina “ikoovatu 20” ephavelaka ohimya wiira naarina imeeturu 30 sa erakamelo aya. Yoohimwa ela yookiserya, ennivarihana ni ekurusuura sa ixiri sa etemplo. — Owehaweha 10/2024, epaax. 31.

Enitaphulela exeeni murumeyi ookhaliherya okhala ‘mulopwana orina muthiyana mmosa’? (1Tim. 3:12)

Eyo enitaphulela wiira owo ohaana omuthela muthiyana mmosa ni osyaka orupihana woohiloka. Ohiya-vo, owo ohaana osyaka osiveliwa ni athiyana akina. — Owehaweha 11/2024, epaax. 19.

Xeeni ninhimya ahu wiira moolumo ari Yohani 6:53, khonaahimya atthu anikhuura ephaawu ni aniwurya eviinyu nihiku na Eyoolya ya Ohiyu ya Apwiya?

Yohani 6:53, onnooniherya efaita erina aya okhuura erutthu ni owurya ephome ya Yesu. Owo aahilavula masu awo, mwaakha wa 32 Nuumala Kristu Orwa oGalileya, masi aaleela ayuda yaawo yaapirisari omwaamini yena. Tivonto, Eyoolya ya Ohiyu ya Apwiya yaapakiwe nuuvira eyaakha emosa nuumala olavula masu ale, oYerusalemu. Yesu aalavula ni ale anrowa olamulelaka nuuwo wiirimu. — Owehaweha 12/2024, ipaax. 10-11.