Niireke moosoma oratteene irevista sootheene sa Owehaweha sa mwaakha ola? Akhala wiira ti siiso, nwehe akhala wiira munniwerya waakhula makoho anittharelana:

Mireerelo xeeni ninrowa ahu ophwanya vakhala wiira nnooviriha okathi nivaanelaka ni Yehova, onwiriyana ni wuupuwelela sa Yena?

Nnoopaka soothanla sooloka, okhala atthu oosuwela wiixuttiha, nnookhalana waamini woolipa ni omphenta wahu Yehova onimuncerereya. — w22.01, ipaax. 30-31.

Mareeliho xeeni ninrowa ahu ophwanya vakhala wiira nnoomuroromela Yehova ni atthu aathanlale awe wiira yaahooleleke arumeyi awe?

Ola okathi nikhanle ahu oomuroromelaka Yehova ni moota onipaka awe itthu, nittharaka malakiheryo awe ni soothanla anipaka aya axitokweene. Nto vakhala wiira munoororomela malakiheryo munaakhela anyu, ni wiiwelela moohiixinliha hata muhiiwexexaka, woonasa wene munoowerya opaka etthu emosaru okathi wa maxakha maalupale. — w22.02, ipaax. 4-6.

Exeeni nlaikha naaphavela aya ohimya ni moolumo oowi: “nluku nothanliwa mmatatani mwa [Guvernatoro] Zorobabeli”? (Zak. 4:8-10)

Nlaikha naaphavela ohimya wiira nnaamwi atthu yuupuwela wiira etemplo ele ya niinaano yaari yaamukhaani ovikana ya khalai, yammalihiwa otekiwa, nave Yehova aamweemererya okokhoreliwaka mutemplo mmo. — w22.03, ipaax. 16-17.

Munnivaha “ntakiheryo nooloka . . . [ni] moolumo anyu”? (1 Tim. 4:12)

Nilavuleke mooreera murima ni mwa nttittimiho okathi ninlaleerya ahu, nikomentariki mithukumano sootheene, niipeke ni murima wootheene. Nilavuleke ekeekhai, nihilavuleke moolumo ooveeha, nilavuleke mwa enamuna enaalipiha akina. — w22.04, ipaax. 6-9.

Xeeni enama yoowali eniromoliwa Wiisuupulula 13:1, 2, erina aya mikhalelo simosaru sa inama xexe (ikuvernu), siniromoliwa ekapiitulu 7 ya Daniyeli?

Enama eyo eniromoliwa Wiisuupulula ekapiitulu 13, khentaphulela ekuvernu emosa paahi ya mulaponi. Enama eyo enithoonyerya anamalamulela ootheene a epoliitika yaalamulenle apinaatamu okhuma khalai mpakha olelo-va. — w22.05, epaax. 9.

Ninrowa wooniherya sai wiira ninniroromela exariya ya Yehova?

Okathi mutthu mukina onniveeha awe wala onitthekela, khanimphavela opweha mathowa, nnakhala wunla ikuhu. Masi nimphavela omuhiyerya Yehova wiira onoophuka itthu sootheene mwa xariya. Ohiya-vo, ninnikupali wiira Yehova onoomaliha -mixankiho sootheene sikumiheriwe ni etampi. — w22.06, ipaax. 10-11.

Okathi munna onivekeliwa awe opaka nivekelo mmuthukumanoni, exeeni ohinreerela awe oliyala?

Okathi munna onivekeliwa awe opaka nivekelo mmulokoni, kaahiyo para ovaha miruku muloko aahiiso opaka soohimmwa. Nto munna onipaka nivekelo, otepexa wene wanipacerya wa mithukumano, ohaana osyaka olavula “moolumo manceene”. (Math. 6:7) — w22.07, ipaax. 24-25.

Moota xeeni “ale avanre miteko sootakhala” anrowa aya ohihimuxiwa wiira ‘aphukeliwe’? (Yohani 5:29)

Ale anrowa ohihimuxiwa, khanirowa ophukeliwa sitthariwaka miteko avanre aya ahinatthi okhwa. Masi awo anrowa ophukeliwa sitthariwaka moota anrowa aya ovarihelaka muteko malakiheryo anrowa aya wiixuttihiwaka elapo esya nuumala ohihimuxiwa. — w22.09, epaax. 18.

Moolumo xeeni oovara murima munna Rutherford alavunle awe okongresuni a Setembro a 1922?

Kongresu aapakiwe oCedar Point Ohio, wEstados Unidos, munna Rutherford aahimmye so: “Mwene onnilamulela! Nyuwo mookhalana muritti woowaaleela atthu. Nto mmulaleye, mmulaleye, mmulaleye Mwene ni Omwene awe!” — w22.10, ipaax. 3-5.

Itthu xeeni tthaaru siniromoliwa Yesaya ekapiitulu 30, Yehova onirumeela awe wiira onikhaliherye ovilela mixankiho?

Ekapiitulu eyo ennooniherya wiira Yehova, (1) onniwiriyana saana mavekelo ahu ni onnaakhula, (2) onninivaha malakiheryo ni (3) onninreeliha olelo-va ni onoonireeliha muhoolo. — w22.11, epaax. 9.

Xeeni ninhimya ahu wiira masu ari Esalimo 37:10, 11, 29, yaahiiraneya khalai ni animwiiraneya muhoolo?

Iversiikulu iya sinnooniherya mareeliho yaakhanle okathi wa aisarayeli a khalai ni okathi wa olamulelo wa Salomoni. Oromolaka eversiikulu 11 Yesu aahihimya wiira yaamukhumelela eparayiisu muhoolo. (Math. 5:5; Luka 23:43) — w22.12, ipaax. 8-10, 14.