Yowiiraneya eri Otumererya 22:25-27, khenittittimiherya ohikhalana nthowa wa mulopwana mwaha woowi mulopwana owo aanooniwa wira ookhalana nthowa. Nlamulo ninhimmwa iveersu iya ninlipiherya ohikhalana nthowa wa muthiyana. Vano nrowe nithokorerye oratteene yowiiraneya eri yoolepa ela.

Iveersu siri wanipacerya sinimulavula mulopwana aamurupiha muthiyana “mmuttettheni”. Mwaha woopaka eyo, mulopwana owo aanivahiwa nthowa mwaha woowi muthiyana owo aakameliwe aathokoreriwa ntoko muthiyana ootheliwa. Ankhi muthiyana? Yowiiraneya enihimya wira “khakhuwenle avekelaka okhaliheriwa”. Vaakhanle wira aahikhuwela, atthu akina yaamunwiriyana ni yaamoorwa omwaakiha. Okhala wira “khakhuwenle avekelaka okhaliheriwa”, owo nave aanivahiwa nthowa ohiya paahi mulopwana mekhawe.​—Otum. 22:23, 24.

Nave Nlamulo naanihimya yowiiraneya ekina yoovirikana ni ela. Naahimya so: “Vano, wakhalá mmathalani mulopwan’owo omphwannyawe-mo mwali akameliwe ni mulopwana mukina, khumukuxerya owali wira amurupihe, mulopwana pahi ìviwe, yowo amurupinhe mwali uwo. Vano muhimwìrihe etthu mwali yowo, mana khapanje mulattu onimphwaneliha wiviwa. Vanlikana ni mutthu onimutuphela mukhw’awe, khumwiva. Tthiri mulopwan’owo ahimphwanya mwali uwo mmathalani: muthiyan’owo akameliwe ahikhuwela, vano khavo orwenle omwakiha”.​—Otum. 22:25-27.

Akhala wira eyo yaaniiraneya, nlamulo khinanvaha nthowa mwali owo. Mwaha wa xeeni? Mwaha woowi, owo “ahikhuwela, vano khavo orwenle omwakiha”. Nto eyo enooniherya wira khaararunwe. Masi mulopwana owo aanivahiwa mulattu wa omutuphela ni omuraruxa mwali owo mwaha woowi ‘ahimukuxerya owali wira amurupihe’.

Tivonto, nnaamwi nlamulo nihinvahaka nthowa muthiyana, yowiiraneya ela enihimya ekeekhai vaavo enilavula aya wira mulopwana aanikhalana nthowa na omutuphela ni omuraruxa mwali owo. Ekeekhai wira aphuki ‘yanikohakoha orattene’ mwaha owo ni yaanipaka yoothanla attharaka malakiheryo oowiiwanyeya Muluku aavanhe awe ikwaha sinceene.​—Otum. 13:14; 17:4; Okhum. 20:14.