1. Vaavo nnuupuwela ahu itthu sotheene Yehova opattunxe awe, woonasa wene nikoho xeeni nniikoha ahu?

VAAVO nnuupuwela ahu olumwenku yoowo opattuxiwe ni Yehova, woonasa wene ninnikhalana moonelo mmosaru aarina awe nasalimo Davidi. Okathi omosa, owo aahinvekela ni aahimukoha Yehova wira: “Vanwehaka erimu, muteko wa matat’anyu kònaka mweri n’itheneri sipwehalyanyu-vo, kinnithamala wira: ‘Oniphwanela-ni mutthu, wira ùpuweliwe ni nyuwo? Omphwanela-ni mwanadamu, wira akhapeleliwe ni nyuwo?’” (Esal. 8:4, 5) Ntoko Davidi, vaavo ninweha ahu wira khanreere oyeva nailikanyiha ni olumwenku Yehova opattunxe awe, pooti wiikohaka akhala wira Yehova onninivaha efaita. Masi, ntoko ninrowa ahu woona mwaha ola, Yehova khahiyo paahi aavaha efaita apinaatamu oopacerya, Adamu ni Eva, masi-tho aahiweemererya wiirela mpantta emusi awe.

2. Muteko xeeni Yehova aavanhe awe Adamu ni Eva?

² Adamu ni Eva, yaari anamwane oopacerya a Yehova valaponi. Nave Yehova, aari Tiithi aya oophenta a wiirimu. Nave-tho Yehova aaphavela wira awo avareke muteko. Eyo ti etthu yaamwiirinhe waaleela wira: “Mwayareke an’inyu, munjerereyeke: musareyeke mulaponi mothene. Mwettiheke elapo yothene”. (Maph. 1:28) Eversiikulu ela, ennooniherya wira Adamu ni Eva, yaahaana waayara anamwane ni okhapelela elapo. Vaakhanle wira yaahimwiiwelela Yehova ni yaahivara muteko aavanhe awe, Adamu ni Eva ni osuulu aya khiyaarowa ohiya wiirela mpantta emusi ya Muluku.

3. Etthu xeeni enniiriha ohimya wira Adamu ni Eva yaahikhalana opuro wa faita mweemusini mwa Yehova?

³ Adamu ni Eva yaahikhalana opuro wa efaita yinceene mweemusini mwa Yehova. Esalimo 8:6, Davidi oohimya etthu ya faita yinceene emwiirinhe Yehova waapattuxa atthu. Owo ahimmye so: “Nyuwo mompattuxa mutthu onihala vakhani olikana ni nyuwo: momusariha ovuwa ni nttittimiho”. Ekeekhai wira apinaatamu  kharina owerya, osuwela ni mikhalelo ntoko malaikha. (Esal. 103:20) Hata vari siiso, apinaatamu khatepenxe ovirikana ni malaikha oowerya. Tthiri eyo etthu yoohakalaliha! Okathi Yehova aapattunxe awe anamuyari ahu oopacerya Adamu ni Eva, owo aahaavaha okumi woohakalaliha.

4. Etthu xeeni yaawiiranenle Adamu ni Eva? Mwaha ola, ninrowa othokorerya exeeni?

 ⁴ Mooriipiha murima, Adamu ni Eva yaahihiya wiirela mpantta emusi ya Yehova. Eyo yookumiherya mixankiho sinceene osuulu wotheene wa Adamu ni Eva, ntoko ninrowa ahu oweha mwaha ola muhoolo. Hata vari siiso, ele Yehova oniphavela awe kheturukeyale. Mpakha-va, Yehova oniphavela wira apinaatamu oowiiwelela akhale anaawe mahiku otheene. Mwaha ola, wanipacerya ninrowa oweha etthu Yehova opanke awe wira ooniherye wira onninivaha efaita yinceene. Nuumala-vo, nnooweha etthu nikhanle ahu oopaka wira nooniherye wira ninniphavela wiirela mpantta emusi ya Yehova. Wanikisa, ninrowa othokorerya mareeliho anamwane a Yehova valaponi anrowa aya ophwanya mahiku otheene.

5. Ninrowa wooniherya sai oxukhurela mwaha wa Muluku onipattuxa iilikanyihaka mmansawe?

⁵ Yehova onipattunxe iilikanyihaka mmansawe. (Maph. 1:26, 27) Hiyo apinaatamu, nipattuxiwe nilikanyihiwaka ni Muluku. Nto Yehova oonivaha owerya wa okhalana ni wooniherya mikhalelo sawe. Mikhalelo seiyo sinnikhaliherya okhala atthu onaaphavela awe mweemusini mwawe, ntoko ophenta, othunku, ororomeleya ni exariya. (Esal. 86:15; 145:17) Vaavo nniimananiha ahu wooniherya mikhalelo iyo, ninnimooniherya Yehova wira ninnimuxukhurela mwaha woonipattuxa iilikanyihaka mmansawe. (1 Ped. 1:14-16) Nto eyo, enninikhaliherya omuhakalaliha Tiithi ahu a wiirimu ni okhalana okumi wooloka ni woohakalaliha.

6. Enamuna Yehova opattunxe awe elapo, enooniherya sai wira onnaavaha efaita apinaatamu?

⁶ Yehova oolokiherya opuro wooloka wira nikhaleke. Ohinatthi ompattuxa mulopwana oopacerya, Yehova aahipaka elapo wira apinaatamu akhaleke. (Yobi 38:4-6; Yer. 10:12) Okhala wira Yehova, Muluku oophenta ni oovaha, owo oohela valaponi itthu sinceene sooloka seiyo sinnihakalaliha. (Esal. 104:14, 15, 24) Okathi Yehova aaweha awe itthu sotheene aapattunxe awe vathi-va, owo “ahòna wira sothene sari sorera sana”. (Maph. 1:10, 12, 31) Yehova ohooniherya wira onnaavaha efaita yinceene apinaatamu, mwaha woowi ‘ohavaha owerya’ woweettiha wala okhapelela itthu sotheene opattunxe awe valaponi. (Esal. 8:7) Muluku oniphavela wira apinaatamu oomalela wala ahirina etampi, akhapeleleke mahiku otheene itthu sootikiniha opattunxe awe. Niireke nyuwo munnixukhurela yooleiherya eyo ya Yehova?

7. Yoxuwa 24:15, onooniherya sai wira apinaatamu aakhalana eparakha ya othanla mootaphuwa?

⁷ Yehova oonivaha eparakha ya othanla mootaphuwa. Hiyo pooti othanla ele nimphavela ahu opaka mookumini mwahu. (Mmusome Yoxuwa 24:15.) Nto Yehova onnihakalala vanceene vaavo ninthanla ahu omurumeela wala omukokhorela. (Esal. 84:12; Mir. 27:11) Hiyo pooti orumeela othanla wahu mootaphuwa wira nipake soothanla sinceene. Nrowe niwehe ntakiheryo Yesu onivanhe awe.

8. Okathi omosa, Yesu aarumenle sai othanla wawe mootaphuwa?

⁸ Nimutakihaka Yesu, hiyo pooti ohela nipuro noopacerya soophavela sa atthu akina ohiya sawihu. Okathi omosa, Yesu ni arummwa awe khiyaareere okhulumuwa. Nto yaahirowa nipuro noomaaleleya wira yaphumurye vakhaani. Masi khivaaweryaneyale opaka eyo. Mwaha woowi muttitthi muulupale wa atthu waahaatthimakela ni waaniphavela wiixuttihiwa ni Yesu. Nto niireke Yesu aahinyoonyiheya? Nnaari. Ohiya onyoonyiheya, Yesu aahiwoonela othunku atthu ale.  Nto Yesu aapanke exeeni? Owo “aahipacerya owiixuttiha itthu sinceene”. (Mar. 6:30-34) Hiyo pooti otthara ntakiheryo na Yesu nirumeelaka okathi ahu ni ikuru sahu wira naakhaliherye atthu akina. Akhala wira nnoopaka eyo, nnoomuhakalaliha ni onvuwiha Tiithi ihu a wiirimu. (Math. 5:14-16) Nave, nnoomooniherya Yehova wira ninniphavela wiirela mpantta emusi awe.

9. Etthu xeeni anamuyari anireerela aya ohiliyala?

⁹ Yehova ohaavaha apinaatamu eparakha ya waayara anamwane ni owiixuttiha omphenta ni omurumeela. Akhala wira nyuwo mwa paapa wala mwa maama, niireke nyuwo munnixukhurela eparakha eyo nvahiwe anyu? Ekeekhai wira Yehova oovaha iparakha sinceene malaikha, masi khovanhe eparakha ya waayara anamwane. Nto anamuyari, ahaana ovaha efaita yinceene eparakha arina aya ya waahuwa anamwane. Waahuwa anamwane ni ‘owiixuttiha attharaka malakiheryo a Yehova’, eparakha yuulupale avahiwe aya anamuyari nave owo muteko woowaarya. (aEef. 6:4; Otum. 6:5-7; Esal. 127:3) Wira akhaliheriwe anamuyari, mutthenkeso wa Muluku onnikumiherya ikaruma sinimutthokiherya Biibiliya, ntoko iliivuru, iviidiyu, masipo ni myaha siri va jw.org. Vannooneya oratteene wira Tiithi ihu a wiirimu ni Mwanawe Yesu Kristu annaavaha efaita yinceene amiravo. (Luka 18:15-17) Vaavo anamuyari animuroromela aya Yehova ni aniimananiha aya waahuwa oratteene anaaya, Yehova onnihakalala. Nave anamuyari awo, ahaana waakhaliherya anaaya wiirela mpantta emusi ya Yehova mahiku otheene!

10-11. Orumeelaka mukuttho wowoopola, eparakha xeeni Yehova onivanhe awe?

¹⁰ Yehova oovaha ekumi ya Mwanawe onimphentexa awe wira nitthikele wiirela mpantta emusi awe. Ntoko niwenhe ahu  ettima 4, Adamu ni Eva yaahihiya wiirela mpantta emusi ya Yehova. Etthu emosaru ehiiraneya ni osuulu aya wotheene. (aRom. 5:12) Adamu ni Eva yaaniphwanela okumihiwa mweemusini mwa Yehova, mwaha woowi yaaroolakelela ohimwiiwelela Yehova. Masi ankhi osuulu aya? Yehova onnaaphenta vanceene apinaatamu. Nto, oopaka mareheryo orumeelaka mukuttho wowoopola wa Yesu Kristu wira apinaatamu oowiiwelela yiirele mpantta emusi awe. (Yoh. 3:16; aRom. 5:19) Mukuttho wa Yesu, onniwiiriha apinaatamu 144.000 oororomeleya okhala anamwane a Muluku.—aRom. 8:15-17; Wiis. 14:1.

¹¹ Olelo-va, ohiya paahi makristau oothanliwa, imilyau sinceene sa atthu oororomeleya anniimananiha opaka ele Muluku oniphavela awe. Nto, awo annilipelela wiirela mpantta emusi ya Muluku nuumala ovira weehereriwa wookiserya nuumala iyaakha ekonto emosa. (Esal. 25:14; aRom. 8:20, 21) Nave, okhala wira akhalana nlipelelo nno, awo pooti omwiitthana Yehova okhala ‘Tiithi aya’. (Math. 6:9) Ohiya-vo, ale anrowa ohihimuxiwa, anookhalana eparakha ya wiixuttihiwa ele Yehova oniphavela awe. Nto akhala wira anoothanla omwiiwelela, awo animwiirela mpantta emusi ya Yehova.

12. Nikoho xeeni ninrowa ahu waakhula?

¹² Ntoko niwenhe ahu, Yehova ohooniherya mwa inamuna soovirikana wira onnaavaha efaita yinceene apinaatamu. Owo onniwiiriha makristau oothanliwa okhala anaawe ni ohaavaha atthu a “muttitthi muulupale” eparakha ya okhala anaawe elapo esya. (Wiis. 7:9) Etthu xeeni nikhanle ahu oopaka niinaano-va wira nimooniherye Yehova wira ninniphavela wiirela mpantta emusi awe mahiku otheene?

13. Etthu xeeni nikhanle ahu oopaka wira niirele mpantta emusi ya Muluku? (Marko 12:30)

¹³ Mooniherye omphenta wanyu Yehova mmurumeelaka ni murima wotheene. (Mmusome Marko 12:30.) Mwaha wa oreera wawe murima, Yehova ohaavaha itthu sinceene apinaatamu. Etthu yuulupale onivanhe ahu eri eparakha ya omukokhorela. Hiyo ninnooniherya wira  ninnimphenta Yehova ‘neettelaka sooruma sawe’. (1 Yoh. 5:3) Yooruma Yehova oniphavela awe wira neetteleke eri yooruma Yesu onivanhe awe ya waapaka awiixutti ni waapatisa. (Math. 28:19) Nave, oonivaha yooruma ya ophentana mukina ni mukhwaawe. (Yoh. 13:35) Atthu otheene oowiiwelela anrowa wiirela mpantta emusi ya Yehova ya olumwenku wotheene mahiku otheene.—Esal. 15:1, 2.

14. Ninrowa wooniherya sai wira ninnaaphenta atthu akina? (Matheyo 9:36-38; aRoma 12:10)

¹⁴ Mwaaphenteke atthu otheene. Ophenta mukhalelo muulupale wa Yehova. (1 Yoh. 4:8) Yehova topacenrye oniphenta hata okathi yoole nahaamusuwela ahu. (1 Yoh. 4:9, 10) Nto nnoowerya omutakiha Yehova naaphentaka atthu akina. (aEef. 5:1) Enamuna emosa ya wooniherya wira ninnaaphenta atthu, ori waakhaliherya omusuwela Yehova okathi ohimanle. (Mmusome Matheyo 9:36-38.) Nto akhala wira nnoopaka eyo, nnimwaavaha eparakha ya wiirela mpantta emusi ya Muluku. Hata nuumala mutthu owo opatisiwa, nihihiye omphenta ni omuttittimiha. (1 Yoh. 4:20, 21) Ninrowa owerya sai opaka eyo? Enamuna emosa ori omuroromela mutthu owo. Mwa ntakiheryo, akhala wira oopaka etthu nihinsuwela ahu mathowa amwiirinhe opaka eyo, hiyo nihuupuweleke wira opanke wira iiphwanyihe mireerelo mmensawe. Ohiya-vo, nihaana omuttittimiha munna owo, nimutthokoreryaka okhala muulupale onivikana hiyo.—Mmusome aRoma 12:10; aFil. 2:3.

15. Tani ninreerela ahu waamorela ikharari ni waareerela murima?

¹⁵ Mwaamoreleke ikharari ni waareerela murima atthu otheene. Naaphavelaka okhalana eparakha ya omwiitthana Yehova okhala Tiithi ihu, nihaana weettela mookumini mwahu itthu sotheene nniixuttiha ahu mBiibiliyani. Mwa ntakiheryo, Yesu ohimmye wira nihaana waamorela ikharari ni waareerela murima atthu otheene waahela muhina awanani ahu. (Luka 6:32-36) Okathi mukina, pooti onivila opaka eyo. Nto akhala wira vanninivila, nihaana wiixutta okhalana moonelo ni muupuwelo wa Yesu. Vaavo nniimananiha ahu omwiiwelela Yehova ni omutakiha Yesu, ninnimooniherya Tiithi ihu a wiirimu wira ninniphavela wiirela mpantta emusi awe mahiku otheene.

16. Ninrowa okhapelela sai mweettelo wooloka wa emusi ya Yehova?

¹⁶ Mukhapeleleke mweettelo wooloka wa emusi ya Yehova. Vatthokoni, mmiravo pooti omutakiha muulupale awe. Nto akhala wira mwaana owo muulupale onneettela mookumini mwawe malakiheryo a mBiibiliyani, ononvaha ntakiheryo nooloka muhima awe. Masi, akhala wira mwaana owo muulupale onnipaka itthu soohiloka, pooti onvaha ntakiheryo noohiloka muhima awe. Etthu emosaru enniiraneya mweemusini mwa Yehova. Nkahaya muupuwele wira mukristau yoowo aari oororomeleya onnipakeya namavaanyiha. Nto onnipacerya okhalana mweettelo woohiloka ni onnipaka itthu sikina soohiloka. Eyo pooti owiiriha atthu akina otthara ntakiheryo nawe noohiloka. Atthu anipaka itthu iyo soohiloka, annihonona mweettelo wooloka wa emusi ya Yehova. (1 aTes. 4:3-8) Nto nihaana okhootta moomalela matakiheryo oohiloka ni oheemererya nnakhala etthu emosa enivalaanyihaka ni Tiithi ihu oophenta a wiirimu.

17. Muupuwelo xeeni woohiloka ninreerela ahu okhootta ni mwaha wa xeeni?

¹⁷ Mmuroromeleke Yehova ohiya itthu sa weerutthuni. Yehova, oonileiherya wira akhala wira nnoohela nipuro noopacerya Omwene awe ni omwiiwelela, owo onoonivaha yoolya, ikuwo ni opuro wookhala. (Esal. 55:23; Math. 6:33) Nuupuwelaka eyo, nihaana osyaka wuupuwelaka wira itthu sa weerutthuni sinikumiheriwa ni olumwenku ola, sinooniphwanyiha ovareleleya ni ohakalala wekeekhai. Hiyo, ninnisuwela wira enamuna emosa ya ophwanya murettele wa  mmuupuweloni, ori opaka ele Yehova oniphavela awe. (aFil. 4:6, 7) Hata nirina ene musurukhu munceene wira nithume itthu sinceene, nihaana oweha akhala wira nnookhalana okathi ni ikuru wira nikhapeleleke itthu iyo nithumme ahu. Niireke hiyo na atthu ninvarexexa itthu sa weerutthuni nirina ahu? Muhiliyale wira Muluku oniphavela wira nikhale atthu a emusi awe anivara muteko. Nto, niheemererye itthu sikina sinihapuxaka. Tthiri hiyo khanimphavela okhala ntoko mmiravo ole aakhoottale eparakha ya omurumeela Yehova ni okhala mwanawe, mwaha woowi owo aavarexexa itthu sa weerutthuni aarina awe!—Mar. 10:17-22.

18. Eparakha xeeni ni mareeliho xeeni anrowa aya okhalana apinaatamu oowiiwelela?

¹⁸ Apinaatamu oowiiwelela anookhalana eparakha yuulupale ya omphenta ni omukokhorela Yehova mahiku otheene. Ale arina nlipelelo na okhala mahiku otheene valaponi, anoohakalala vanceene okhapelela elapo ela, yeeyo Yehova opattunxe awe wira apinaatamu akhaleke. Moohipisa, vaavo ninrowa ahu olamuleliwaka ni Omwene wa Muluku, elapo enrowa okhala nipuro nooloka. Nave Yesu onoomaliha mixankiho sotheene sikhumelenle nuumala Adamu ni Eva ohiya wiirela mpantta emusi ya Muluku. Ohiya-vo, Yehova onimwaahihimuxa atthu imilyau sinceene akhwiiye ni onimwaavaha eparakha ya okhala mahiku otheene arina ene okumi wooloka ni elapo eri ene eparayiisu. (Luka 23:42, 43) Vaavo apinaatamu oowiiwelela anrowa aya okhalaka oomalela, awo anookhalana “ovuwa ni nttittimiho” ntoko Davidi olempe awe.—Esal. 8:6.

19. Nihaana olakela opaka exeeni?

¹⁹ Akhala wira nyuwo muniirela mpantta “muttitthi muulupale” mookhalana nlipelelo noohakalaliha. Muluku onnoophentani vanceene ni oniphavela wira mwiirele mpantta emusi awe. Nto mpakeke sotheene muniwerya anyu wira mmuhakalaliheke Muluku. Khula nihiku muupuweleke ni muhele vamurimani vanyu sooleiherya sa Muluku. Muxukhureleke eparakha murina anyu ya omukokhorela Tiithi ihu oophenta a wiirimu. Nave nvaheke efaita nlipelelo murina anyu na onvuwiha Yehova mahiku otheene!