1. Yehova onvanhe exeeni khula murumeyi awe oororomeleya?

MOOPHENTA Yehova onvaha opuro mmulokoni khula murumeyi awe oororomeleya. Nnaamwi khula mutthu mmulokoni orina ene muritti awe, otheene ahu nookhalana efaita ni nihaana okhaliheryana mukina ni mukhwaawe. Murummwa Paulo oonikhaliherya osuwela eyo. Moota xeeni?

2. Moovarihana ni aÉfeso 4:16, xeeni vari aya vooloka ovahana efaita ni ovara mowiiraana?

² Ntoko ninweha ahu yoolepa ya mwaha ola, murummwa Paulo ohooniherya oratteene wira khuuvo murumeyi a Yehova okhanle onweha mukhwaawe onahimya wira: “Miyo nkinophavelani”. (1 aKor. 12:21) Naaphavelaka wira okhale murettele mmulokoni, nihaana ovahana efaita mukina ni mukhwaawe ni ovara mowiiraana. (Mmusome aÉfeso 4:16.) Vaavo otheene ahu ninvara ahu mowiiraana, khula mutthu onnoona wira onniphentiwa ni muloko onnilipa vanceene.

3. Mwaha ola, ninrowa othokorerya exeeni?

³ Mwa inamuna xeeni ninrowa ahu wooniherya wira ninnaattittimiha maKristau makina mmulokoni? Mwaha ola, ninrowa woona moota axitokweene anrowa aya wooniherya wira annaattittimiha axitokweene akhwaaya. Nuumala-vo, ninrowa woona moota otheene ahu ninrowa ahu wooniherya wira ninnaattittimiha anna ahithenle ni arokora ahitheliwe. Wanikisa waya, ninrowa woona moota nikhanle ahu oowaattittimiha anna ni arokora ahinsuwela olavula oratteene nttaava nahu.

4. Miruku xeeni Paulo ovanhe awe siri aRoma 12:10, axitokweene anireerela aya otthara?

⁴ Axitokweene otheene mmulokoni anithanliwa ni munepa wootteela wa Yehova. Hata vari siiso, khula mutokweene ookhalana mikhalelo sawe ni itthu onsuwela awe. (1 aKor. 12:17, 18) Akina athanliwe niinaano wira akhale axitokweene, nto kharina sookumanana sinceene. Axitokweene akina khaniwerya opaka itthu sinceene ntoko khalai mwaha wa owereyasiwa aahiiso mwaha wa wuuluvala. Hata vari siiso, ohikhale nnakhala mutokweene mmosa okhanle onweha mutokweene mukhwaawe onahimya wira: “Miyo nkinophavelani”. Ohiya-vo, khula mutokweene ohaana otthara oratteene malakiheryo a murummwa Paulo ari aRoma 12:10.—Mmusome.

5. Axitokweene anrowa wooniherya sai wira annaattittimiha axitokweene akhwaaya? Xeeni vari aya vooloka opaka eyo?

⁵ Axitokweene animooniherya wira annaattittimiha axitokweene akhwaaya yaawiriyanaka oratteene. Otepexa wene okathi axitokweene anthukumana aya wira athokorerye myaha suulupale mmulokoni. Mwaha wa xeeni? Nwehe ele erevista The Watchtower (Owehaweha) ya 1 a Outubro a 1988 yaahimmye aya eriki: “Axitokweene ahaana osuwela wira Yesu pooti orumeela munepa wootteela wira omukhaliherye khula mutokweene ohimya malakiheryo a mBiibiliyani, anrowa waakhaliherya axitokweene otheene woona yoopaka ni opaka yoothanla yooloka. (Mit. 15:6-15) Munepa wootteela onnaakhaliherya axitokweene otheene ohiya mmosa paahi”.

6. Exeeni enrowa waakhaliherya axitokweene ovara moowiirana? Okathi anipaka aya eyo, muloko onittottela sai mureerelo?

⁶ Mutokweene onaattittimiha axitokweene akhwaawe, khoneererya omakela okhala oopacerya olavula okathi axitokweene anithukumana aya. Owo khonilavula ikwaha sinceene ni khonoona wira okhala wene moonelo awe tori wooloka. Ohiya-vo, owo onnihimya moonelo awe moowiiyeviha ni moowiisuumaaliha. Nave onnaawiriyana oratteene okathi axitokweene akhwaawe anilavula aya. Ti vooloka  otthara malakiheryo a mBiibiliyani ni malakiheryo anikumiheriwa ni “murumeyi òroromeleya ni ànkhili”. (Math. 24:45-47) Vaavo axitokweene aniphentana aya ni ottittimihana okathi anithokorerya aya myaha, munepa wootteela wa Muluku onnikhala naawo ni onimwaakhaliherya opaka yoothanla enrowa olipiha muloko wotheene.—Yak. 3:17, 18.

7. Yesu aathokorerya sai ale ahithenle wala ahitheliwe?

⁷ Olelo-va, mmulokoni aakhala anamathelana ni imusi sinceene. Nave akhala anna oohithela ni arokora oohitheliwa. Nto naathokorerye sai anna oohithela ni arokora ahitheliwe? Nrowe niwehe moota nikhanle ahu ootakiha moota Yesu aathokorerya awe atthu oohithela ni oohitheliwa. Okathi wa muteko awe woolaleerya valaponi, Yesu khaathenle. Owo aahirumeela ikuru sawe ni okathi awe ovaraka yoothanleliwa awe. Yesu khotonko wiixuttiha wira othela wala ohitheliwa yooruma. Masi aahimmye wira maKristau makina annithanla ohithela wala ohitheliwa. (Math. 19:11, 12; Math. 19:12) Yesu aanaattittimiha vanceene ale yahaathenle wala otheliwa. Owo khuupuwela wira ale ahithenle wala ahitheliwe kharina efaita aahiiso yookhala etthu enaahaleela mookumini mwaya.

8. Moovarihana 1 aKorinto 7:7-9, murummwa Paulo aatumerenrye maKristau opaka exeeni?

⁸ Omutakihaka Yesu, okathi wotheene wa muteko awe woolaleerya, murummwa Paulo khaathenle. Musuweleke wira murummwa Paulo khotonko wiixuttiha wira ti voohiloka othela. Maana aanisuwela wira owo mwaha wa mutthu mwaneene. Paulo aahaatumererya maKristau woona akhala wira yanwerya omurumeela Yehova ahithenle wala ahitheliwe. (Mmusome 1 aKorinto 7:7-9.) Eyo enooniherya wira Paulo khuupuwela wira maKristau oohithela wala oohitheliwa khiyaarina efaita. Paulo aahimuthanla mmiravo Timootheyo, munna oohithela wira ovareke muteko muulupale wa Yehova. * (aFil. 2:19-22) Tthiri waarowa okhala voohiloka wuupuwela wira munna owo onniphwanelela wala khoniphwanelela ovara etthu eyo mwaha woowi khothenle wala oothela.—1 aKor. 7:32-35, 38.

9. Etthu xeeni nikhanle ahu oohimya sa othela wala ohitheliwa?

⁹ Yesu ni murummwa Paulo khatonko wiixuttiha wira muKristau ohaana othela wala ohithela. Nto, ankhi othela wala ohithela? Erevista Owehaweha  1 a Outubro 2012, yaahaakhula oratteene nikoho nno, vaavo yaahimmye awe wira: “Tthiri akhale [ale athenle wala ahithenle] ahaana woona eparakha arina aya ntoko yoovaha ya Muluku. . . . Yehova khoniphavela wira ale ahithenle ahittittimihiweke wala ariipiweke murima mwaha woowi khathenle wala khatheliwe”. Nuupuwelaka eyo, nihaana waattittimiha vanceene anna oohithela ni arokora oohitheliwa mmulokoni.

10. Akhala wira ninnaattittimiha anna ni arokora oohitheliwa, ninrowa osyaka opaka exeeni?

¹⁰ Ninrowa wooniherya sai wira ninnittittimiha moonelo ni makhalelo a anna oohithela ni arokora oohitheliwa? Nihaana osuwela wira maKristau makina oohithela wala oohitheliwa aroothanla ohithela wala ohitheliwa, nto nihaakhanyereryeke. MaKristau makina anniphavela othela wala otheliwa, masi aroohimphwanya mutthu anireerela aya othelana. Nave mooriipiha murima atthu akina aakhweliwa ole yaathelanne aya. Moohicikha etthu eniwiiriha ohithela wala ohitheliwa, niireke ti vooloka waakoha anna wala arokora ahitheliwe nthowa naya ahinthela aya wala yaaphavelaka nikhaliheryo wira amphanye mutthu oothelana? Ekeekhai wira anna ni arokora akina pooti ovekela nikhaliheryo. Akhala wira khanivekeliwe nikhaliheryo aahiiso miruku, niireke ti vooloka onvaha miruku munna wala murokora oohitheliwa? Akhala wira nnoopaka eyo, onrowa woonela sai? (1 aTes. 4:11; 1 Tim. 5:13) Nrowe niwehe etthu ahimmye aya anna oohithela ni arokora oohitheliwa oororomeleya.

11-12. Mwa enamuna xeeni naarowa ahu waakhulumula anna oohithela wala arokora oohitheliwa?

¹¹ Mutokweene a esirkwiitu ohithenle ni onikhumela saana muteko awe, onihimya wira aakhala mareeliho manceene mutthu ohithenle orina awe. Masi owo ohimmye wira onnikhulumuwa vaavo anna ni arokora animukoha aya wira: “Xeeni muhithelaka?” Munna ohithenle onirumeela oBetheli ohimmye so: “Okathi mukina, anna ni arokora akina annuupuwela wira ti vootakhala ohithela. Nto eyo enniiriha okhalaka ntoko wira ohithela muxankiho ohiya okhala yoovaha wala eparakha”.

¹² Murokora mmosa oohitheliwa onirumeela oBetheli ohimmye so: “Anna ni arokora akina anuupuwela wira atthu ahithenle wala ahitheliwe okathi wotheene animphavela mutthu oothelana aahiiso okathi onthukumaniwa aya animphavela mutthu oothelana. Okathi omosa kaaronwe aka elapo ekina wira kavare muteko kaarummwale aka ni eBetheli, kaahirowela mithukumano ohiyu ole. Nto murokora kaamanke aka owannyawe aahikileela wira yaahikhala anna anli a mmulokoni yaarina iyaakha ntoko miyo. Murokora ole aahikileela wira khahiyo aakaavyerya mutthu oothelana. Masi nuumala okela mpaani mwa Omwene, owo aahikiroiha nipuro yaari aya anna ale wira kaawehe paahi. Etthu ele yaahikixankiha vanceene miyo ni anna ale”.

13. Ntakiheryo xeeni nimulipinhe murokora mmosa oohitheliwa?

¹³ Murokora mukina onirumeela oBetheli ohimmye so: “Kinnaasuwela mapioneero oohithela arina moonelo wooloka, soolukama, aniphavela waakhaliherya atthu akina ni anihakalala vanceene. Tthiri awo annikhaliherya vanceene muloko. Awo aakhalana moonelo wooloka voohimya sa ohithela. Nave khanuupuwela wira aakhalana efaita waavikana atthu akina mwaha woowi khathenle aahiiso wuupuwela wira khanrowa ohakalala mwaha woowi khathenle wala kharina anamwane”. Ti voohakalaliha okhala muloko munivahiwa anyu efaita ni ottittimihiwa vanceene. Maana munnisuwela wira anna ni arokora khaniwonani okhala mutthu ootakhala, khanoosyakani wala khanuupuwela wira nyuwo mookhalana efaita waavikana awo. Etthu munisuwela anyu ti yoowi khula mutthu ookhalana opuro awe mmulokoni.

14. Ninrowa wooniherya sai wira ninnaattittimiha anna oohithela ni arokora oohitheliwa?

 ¹⁴ Anna oohithela ni arokora oohitheliwa anooxukhurela vanceene akhala wira ninnaavaha efaita ni waattittimiha nittharaka mikhalelo saya sooloka ohiya mwaha woowi khathenle wala khatheliwe. Ohiya owoonela othunku, nihaana waavaha efaita mwaha wa ororomeleya waya. Nto napaka eyo, anna oohithela ni arokora oohitheliwa khanrowa wuupuwelaka wira nnaaleela wira: “Miyo nkinophavelani”. (1 aKor. 12:21) Ohiya-vo, awo animoonaka wira ninnaattittimiha ni ninnivaha efaita opuro aya mmulokoni.

15. Marukunuxo xeeni anna akina anipaka aya?

¹⁵ Iyaakha iya sookiserya, anna ni arokora anceene anniixutta nttaava nsya wira yincererye muteko aya woolaleerya. Wira apake eyo, awo annipaka marukunuxo manceene mookumini mwaya. Anna ni arokora awo annikhuma muloko ninlavuliwa nttaava naya wira yarumeeleke miloko soothowa anamalaleerya nihinlavuliwa nttaava naya. (Mit. 16:9) Awo annipaka yoothanla eyo wira amurumeeleke moomalela Yehova. Nnaamwi siviraka iyaakha sinceene wira asuwele olavula oratteene nttaava nsya, awo annikhaliherya muloko mwa inamuna soovirikana. Mikhalelo sooloka ni itthu anisuwela aya sinnaalipiha anna ni arokora mmulokoni. Tthiri ninnaavaha efaita anna ni arokora awo!

16. Exeeni enrowa omwiiriha munna wira okhale mutokweene wala murumeyi oorumeela?

¹⁶ Nikhuuru na axitokweene nihooveleleke omuthanla munna wira okhale mutokweene wala murumeyi oorumeela mwaha woowi khonsuwela olavula oratteene nttaava ninlavuliwa muloko owo. Axitokweene ahaana onvarerya munna owo attharaka ele Biibiliya onihimya awe wira munna okhale mutokweene wala murumeyi oorumeela ohiya akhala wira onnisuwela olavula oratteene nttaava na muloko owo aahiiso nnaari.—1 Tim. 3:1-10, 12, 13; Tito 1:5-9.

17. Akhala wira imusi sinnithaamela elapo ekina, yoothanla xeeni anireerela aya opaka?

¹⁷ Imusi sikina sa maKristau annitthaamela ilapo sikina mwaha wa mikhalelo soohiloka sa elapo aya aahiiso arowaka ophavelasa muteko. Vaavo eyo eniiraneya aya, pooti wira anaaya anrowa osomaka ixikola sa nttaava na elapo eyo athaamenle aya. Nave pooti wira anamuyari aya ahaana wiixutta nttaava nsya wira aphwanye muteko. Ankhi akhala wira muloko wala ekrupu ya mutteetthe owo ninlavuliwa nttaava naya? Muloko xeeni anrowa aya okhala? Niireke anrowa okhala muloko wa nttaava na elapo eyo wala muloko ninlavuliwa nttaava naya?

18. Moovarihana ni aGalasia 6:5, ninrowa wooniherya sai wira ninnittittimiha soothanla sa ahooleli a itthoko?

¹⁸ Muhooleli a etthoko ohaana othanla muloko emusi awe enrowa aya okhala. Okhala wira yoothanla ela ti ya mutthu mwaneene, owo ohaana othanla etthu enrowa okhaliherya vanceene emusi awe. (Mmusome aGalasia 6:5.) Nto nihaana ottittimiha yoothanla ya ahooleli  a itthoko. Moohicikha yoothanla aya, nihaana weemererya yoothanla aya ni owaakhela saana mmulokoni ni waavaha efaita.—aRom. 15:7.

19. Etthu xeeni ahooleli a imusi akhanle aya oowuupuwela saana ni ovekela?

¹⁹ Imusi sikina sinnithanla orumeela muloko ninlavuliwa nttaava naya, masi anaaya khanisuwela olavula saana nttaava na anamuyari aya. Akhala wira muloko imusi iyo siri aya ninlavuliwa nttaava na elapo eyo, eyo pooti waaxankiha anaaya wiiwexexa ele enilavuliwa mmithukumanoni ni okhalana waataana wooloka ni Yehova. Mwaha wa xeeni? Mwaha woowi, oxikola anaaya anirumeela nttaava na elapo eyo ohiya nttaava na anamuyari aya. Akhala wira ti siiso, ahooleli a itthoko ahaana wuupuwela saana ni onvekela Yehova wira aakhaliherye opaka yoothanla enrowa waakhaliherya anaaya okhalana waataana wooloka ni Yehova ni atthu akina. Aahiiso anamuyari ahaana owiixuttiha anaaya nttaava naya wala ahaana othaamela muloko ninlavuliwa nttaava anaaya aniiwexexa aya oratteene. Moohicikha ele ahooleli a imusi anrowa aya othanla, anna a muloko anithaamela aya ahaana waattittimiha ni waavaha efaita.

20. Ninrowa wooniherya sai wira ninnaavaha efaita ni waattittimiha anna aniixutta nttaava nsya?

²⁰ Mwaha wa itthu sotheene nithokorenrye ahu, miloko sinceene aakhala anna ni arokora aniimananiha wiixutta nttaava nsya. Nto eyo pooti waaxankiha ohimya mootaphuwa moonelo ni muupuwelo aya. Akhala wira khaninweha paahi moota anilavula aya nttaava nsya, nnimoona omphenta waya Yehova ni wiimananiha waya omurumeela. Nto vaavo ninweha ahu mikhalelo iyo sooloka arina aya, nnimwaavahaka efaita ni waattittimiha vanceene anna ni arokora awo. Tthiri khaninrowa ohimya wira: “Miyo nkinophavelani”, mwaha woowi khansuwela olavula oratteene nttaava nahu.

21-22. Mareeliho xeeni nrina ahu?

²¹ Ninnimuxukhurela vanceene Yehova mwaha woowi onvaha khula mmosa a hiyo opuro awe mmulokoni. Hata niri ene alopwana wala athiyana, nithenle ene wala nihithenle, nri ene amiravo wala nuuluvanle ene, nilavulaka oratteene nttaava aahiiso nnaari, Yehova ni atthu akina anninivaha efaita ni oniphenta.—aRom. 12:4, 5; aKol. 3:10, 11.

²² Nihihiye ovarihela muteko itthu sinceene sooloka nniixutta ahu ni nlikanyiho na Paulo voohimya sa erutthu. Nto eyo enoonikhaliherya oweha etthu nikhanle ahu oopaka wira naalipihe anna ni arokora. Nave-tho eyo enoonikhaliherya waaphenta ni waattittimiha okathi wotheene.