MWAAKHA ovinre, aathanliwa anna anceene wira akhale axitokweene aahiiso arummwa oorumeela olumwenku wotheene. Akhala wira mwa mutokweene aahiiso murummwa oorumeela, tthiri munnihakalala omurumeela Yehova ni anna.

Akhala wira munnixankiheya, khamukhanle mekhinyu. Mmiravo oniihaniwa Jason yoowo ori mutokweene onihimya so: “Okathi kaathanliwe aka kaahixanka mwaha wa muritti ole musya kaavahiwe aka”. Nave Moise ni Yeremiya yoona wira khiyaarowa owerya omaleliha muteko yaavahiwe aya ni Yehova. (Okhuma 4:10; Yeremiya 1:6) Akhala wira munoona siiso, exeeni enrowa wookhaliheryani ohoovelela ni okela vahoolo? Munoowerya wiixutta ni ntakiheryo na Timootheyo.​—Miteko 16:1-3.

Woonasa wene, Timootheyo aapacenrye weetta ni murummwa Paulo orina ene iyaakha 20. Vaavo Timootheyo aalattuliwe awe, oona wira khaarowa owerya wiixuttiha ni ovaha miruku mwaha woowi aari mmiravo. (1 Timótheyo 4:11, 12; 2 Timótheyo 1:1, 2, 7) Masi aahivikaniha wunnuwa momunepani, nto nuuvira iyaakha 10, Paulo aahaaleela anna a oFilipi wira: “Kinniroromela mw’Apwiya Yesu, wira kinowerya wovelelihani nanano Timótheyo”. Xeeni Paulo ohalaka olavula siiso? Owo aatthokihenrye so: “Khavo mukina oniwetetelani nyuwo ni murima wothene ntoko yowo”.​—aFilipi 2:19, 20.

Xeeni Timootheyo ori awe ntakiheryo nooloka wira axitokweene atthareke? Ninrowa othokorerya mathowa 6.

1. Timootheyo aanaathokorerya saana atthu. Moone wira Paulo aahaaleela anna a oFilipi wira Timootheyo ‘aniwetetela’ ni murima wotheene. (aFilipi 2:20) Timootheyo, aaphavela wira anna ale avikaniheke okhalana wataana wooloka ni Yehova, tivonto aamananiha awe wira aakhaliherye.

William, yoowo ovirinhe iyaakha sinivikana 20 ori ene mutokweene, ommakela waaleela axitokweene a niinaano wira: “Mwaaphenteke anna. Mwaakhaliheryeke anna ohiya paahi ophavela omaleliha muteko anyu”. Muhikhaleke ntoko mutthu oneettiha ekaaro yoowo oniphavela ophiya ostasau okathi wooreerela, masi ohinaweemererya atthu owela mukaaroni.

2. Owo aanihela nipuro noopacerya muteko wa Yehova. Paulo ohimmye wira Timootheyo khaalikana ni atthu akina ‘yaphavela sawaya, ohiya sa Yesu Kristu’. (aFilipi 2:21) Paulo aahoona wira anna anceene yaaluttuweliwa paahi ni soophavela saya. Okathi mukina, awo yaanihela nipuro noopacerya soophavela saya ohiya sa Yehova. Masi Timootheyo khaapaka eyo! Moohipisa nuumala okhalana eparakha ya wuncererya muteko anvarela awe Muluku, Timootheyo aahiivahererya ntoko profeta Yesaya, yoowo aahimmye wira: “Miyo kiri va: kirumekeni”.​—Yesaya 6:8.

Munrowa okhalana sai moonelo wooloka vaavo munithokorerya anyu soophavela sanyu ni sa mmulokoni? Yoopacerya, muhaana otthara miruku sa Paulo sini: “Musuweleke othanla itthu sintepa ophwanela”. (aFilipi 1:10) Muheleke nipuro noopacerya muteko wa Yehova. Ya nenli, musyakeke miteko sikhanle oowookhulumulani ni oviriha okathi munceene. Paulo aahimuleela Timootheyo wira: “Muhitthareke sohiloka s’omiravo: mutthareke exariya, wamini, ophenta, murettele”.​—2 Timótheyo 2:22.

3. Aaniluttuweliwa ovara muteko wa Yehova. Paulo aahimuttottopela Timootheyo  oriki: “Owo ahivara muteko ni miyo, alaleyaka ehapari yorera, ntoko mwana sinimurumelawe tithi awe”. (aFilipi 2:22) Timootheyo khahiyo wira aari mutthu oowoolowa. Maana aaniluttuweliwa ovara muteko ni murummwa Paulo ni yaahilipiha wataana waya.

Olelo-va, mmutthenkesoni mwa Yehova khoreere muteko woovara. Muteko owo, onniniphwanyiha ohakalala ni onninikhaliherya wataana ni anna ni arokora. Tivonto okathi wotheene “mutepeke okelela oholo mmutekoni mw’Apwiya”.​—1 aKorinto 15:58.

4. Aanivarihela muteko ele iixutta awe. Paulo aahimuleela Timootheyo wira: “Nyuwo motthara itthu siwixuttihalyakani: muhettela makhalelo aka ni mupuwelo aka, wamini waka, ovilela waka, ophenta waka, nthiti naka”. (2 Timótheyo 3:10) Tthiri Timootheyo aaheettela ele iixutta awe, nto eyo yaahimwiiriha ovahiwa miritti sinceene.​—1 aKorinto 4:17.

Niireke ookhala mutokweene munimoona anyu okhala ntakiheryo nooloka otthara? Tom, yoowo ori mutokweene mwa iyaakha sinceene, onnuupuwela wira mutokweene mukina aarina sookumanana sinceene aanimuthokorerya saana ni aahimwiixuttiha itthu sinceene. Owo onihimya so: “Kaamakela onvekela miruku ni kaanivarihela muteko. Eyo yaahikiiriha ohoovelela”.

5. Aanivikaniha wiina nikuruta. Murummwa Paulo aahinvaha Timootheyo miruku iya sini: “Wìne nikuruta” ni omoova Muluku. (1 Timotheyo 4:7, Biblya Exirima) Hata mulipa ootthimaka okhalanaka treinador, owo ohaana wiina nikuruta mekhawe. Murummwa Paulo aahimutumererya Timootheyo wira: “Muthokorerye wasomela atthu solempwa ni walalèrya n’uwixuttiha. . . . Muthokorerye itthu iya, mukhaleleke nthiti seiyo, wira atthu othene yoneke otepa wanyu orera murima”.​—1 Timótheyo 4:13-15.

Nave nyuwo muhaana wuncererya itthu sinisuwela anyu. Mwiimananiheke omusoma Biibiliya, mutthareke malakiheryo a niinaano anivahiwa ni mutthenkeso ahu. Musyake wiiroromelexa. Vaarowa okhala voohiloka wuupuwela wira mookhalana sookumanana sinceene muhinatthuneya otokosa wira mpake yoothanla yooloka. Ntoko Timootheyo, “mwipasope mmansinyu n’itthu sinixuttihanyu”.​—1 Timótheyo 4:16.

6. Aaniroromela munepa wa Yehova. Olavulaka sa muteko woolaleerya wa Timootheyo, murummwa Paulo aahimuupuxerya wira: “Musukeke maxuttiho èkekhai n’ikuru s’eroho yowarya [munepa wootteela] enkhala mwa hiyo”. (2 Timótheyo 1:14) Eyo enooniherya wira Timootheyo aahaana ororomela munepa wootteela wa Muluku.

Donald, yoowo ori mutokweene mwa iyaakha sinceene onihimya wira: “Alopwana oothanliwa ahaana okhapelela wataana waya ni Muluku. Nto awo anoowerya ‘olipa’ vanceene. Nave akhala wira annivekela munepa wa Muluku ni okhalana yoowiima ya munepa, anrowa otepaka waakhaliherya annaya”.​—Esalimo 84:8; 1 Pedru 4:11.

Tthiri ti voolipiha waaweha arummwa oorumeela ni axitokweene a niinaano avikanihaka okela vahoolo muteko wa Yehova. Jason, yoowo nimulavunle ahu wanipacerya onihimya so: “Okathi wotheene ovinre kiri ene mutokweene, kihiixutta itthu sinceene ni kooxintta woovelela waka. Vano kinnisiveliwa ni muritti aka ni kinnoona okhala eparakha yuulupale!”

Niireke munoovikaniha wunnuwa momunepani? Akhala wira munootthara ntakiheryo na Timootheyo, munoowerya waakhaliherya anna ni arokora.