1-2. Eheeni yeereñye vaavo atthareli eeli a Yesu yaarowaaya wEmawusi?

 AARI 16 a Nisani 33 Kristu awiiyeene. Oohusera a Yesu yaaxupeya vantxipale nave yannoova. Eeli a yaawo yaahikhuma oYerusalemu erowaka wEmawusi muttetthe yoowo waarino ikilometru 11 soorakamelana ni oYerusalemu. Alopwana awo yaaxupeya mwaha wooweera Yesu, mulopwana yoowo yaamuttharaaya, aahiiviwa. Itthu yaawehereraaya weera Mesiya ampaka, waakhala ntoko saamala, mene alopwana ale yaatikiniheya.

² Mulopwana mmoha yahaamusuwelaaya aawaattamela ni aneetta ni yaawo. Oohusera ale yaamuleela oxupeya waya ni etthu yeereñye ni Yesu. Mulopwana ole aapatxera wuuluma naawo etthu yeeyo yaatxentxiye ekumi aya. “[Apatxeraka ni] Mose ni maprofeti othene,” owo aahaaleela weera Mesiya wannatthuneya ohaawa ni okhwa. Emaara alopwana ale araru yaaphiñyaaya wEmawusi, mulopwana ole yahaamusuwelaaya aahiisuwanyeiha weera aari Yesu aavinyererihinwe mookhwani! Hiyo ninnawera wuupuwelela moota oohusera ale yaahakalanlaaya vaavo yaasuwenlaaya weera Mesiya aavinyererihiwa! — Luka 24:13-35.

3-4. Eheeni yaakhumelenle ni atthareli a Yesu, ni eheeni ninrowaahu woona mwa yoosoma ene yeela? (Miteko 1:3)

³ Yesu aahiisoonihera imaara sintxipale wa atthareli awe mpuwa mwa mahiku awe 40 oomalihera valaponi. (Musome Miteko 1:3.) Mpuwa mwa etempu ene yeeyo, Yesu aahaalipiha atthareli awe yaawo yaari ooxupeya ni oowoova, ni awo yaahihakalala ni  yaalipa murima weera elaleereke ni oxuttiha mitthenka sooreera woohima sa Omwene wa Muluku. a

⁴ Hiyo nnoowera ottottela mureerelo nsomaka woohima sa etempu eyo yoohakalaliha ya ekumi ya Yesu. Mwa yoosoma ene yeela, nnoorowa woona moota Yesu aavarihenlaawe etempu eyo (1) weera aalipihe atthareli awe, (2) weera aawiiwanyeihe moowiixera soolepa, ni (3) weera aatxentxerihe atthareli awe wa miritti yaarowaaya okhalano. Mwa epontu eri poothe, nnoorowa woona moota ninkelaahu otthara ntakihero na Yesu.

MWAALIPIHEKE ATTHU AKINA

5. Mwaha wa heeni atthareli a Yesu yaatthuneyaaya olipihiwa?

⁵ Atthareli a Yesu yannatthuneya olipihiwa. Mwaha wa heeni? Akina a yaawo yaahihiya impa saya, amusi aya, ni anakoso aya weera emutthare Yesu itempu sootheene. (Math. 19:27) Akina yannathokororiwa moohixariya mwaha wooweera yaahikhala atthareli a Yesu. (Yoh. 9:22) Awo yaahipaka itthu iya mwaha wooweera, yannaroromela weera Yesu aari Mesiya aalaiherinwe. (Math. 16:16) Mene emaara Yesu iivinwaawe, awo yaahixupeya nave yaakhulumuwa.

6. Eheeni Yesu aapankaawe avinyererihiwakaru?

⁶ Moohihovela, Yesu aahoona oxupeya wa atthareli awe, khaiyene weera awo khiyaalimpe moomunepani, mene yaarooxupeya mwaha woomuyeleela Yesu. Tivawonto nihiku nenno aavinyererihinwaawe, owo aapatxera waalipiha asinthamwene awe. Mwa ntakihero, owo aahiisoonihera wa Maria Madalena emaara yeeyo inlaawe areene va nihiyeni. (Yoh. 20:11, 16) Nave-tho owo aahaakhumelela atthareli awe eeli yaale ehimmwale woopatxerani wa yoosoma ela. Nave aamukhumelela murummwa Pedru. (Luka 24:34) Ninxuttera eheeni ni ntakihero na Yesu? Moone etthu yaakhumelenle vaavo iisooneihalaawe wa Maria Madalena.

7. Moovarihana ni Yohani 20:11-16, eheeni Yesu aamonnaawe Maria apakaka oxeexelo 16 a Nisani, ni eyo yaamweerinhe opaka eheeni? (Nwehe efootu.)

⁷ Mmusome Yohani 20:11-16. Nihiku na 16 a Nisani oxeexelo, asithiyana antxipale oororomeleya yaarowa nipuro Yesu aavithinwaawe.  (Luka 24:1, 10) Harowe nthokorore yooweereya ya muthiyana mmoha, Maria Madalena. Vaavo Maria aaphiñyaawe omahiye, khaaphwannyewo etthu. Owo moowaakuveya aarowa omuleela Pedru ni Yohani ni alopwana ala eeli yaatthimakela omahiye, nave Maria aahaatthara. Yoonelelakaru weera khiyaakhanlewo etthu omahiye, alopwana ale yaatthikela owaani, mene Maria hooye, owo aahala inlaka. Owo khaasuwela weera Yesu annamoona. Yesu annoona winla wa muthiyana ola oororomeleya ni ammorela ikharari, mwa yeeyo, owo aahiisoonihera wa Maria ni aapakavo etthu yaamulipinhe vantxipale Maria. Owo anvaha muritti wootepa otthuneya, waaleela asinna awe woohima sa ovinyererihiwa wawe. — Yoh. 20:17, 18.

8. Moota heeni ninrowaahu omutakiha Yesu?

⁸ Moota heeni ninrowaahu omutakiha Yesu? Hiyo pooti opaka itthu sintxipale weera naalipihe asinna ni asirokora weera evirelele onvarela Yehova wakhala weera nnoosuwela maxupo aya ni wuuluma ni awo mooreera murima. Moone yooweereya ya murokora mmoha oneeriwa Jocelyn, yoowo munnawe ampanke acidente mpaka okhwa. Owo enre: “Wa miyeeri sintxipale, miyo kannaxupeya imaara sintxipale mwaha wookhweliwa.” Menento munna mmoha ni mwaarawe, yaahinwopa owannyaya, yannamwiiwelela mooreera murima nave yaahimmaaliha emuupuxeraka moota owo araawe ootthuneya vamaithoni va Muluku. Jocelyn ohimme ha: “Waari ntoko miyo kaari ephareya ya epiphi ni yaavira epheyo etokweene, mene Yehova anvarihela muteko munna ole ni murokora weera ekivuluxe. Awo yaakikhavihera otthikihera yoolakela aka ya ovirelela onvarela Yehova.” Hiyo-tho nnoowera waalipiha atthu akina niwiiwelelaka moomaaleleya vaavo ennihulelaaya murima aya, nave nuulumaka mooreera murima ni yoolakela ahu ya waalipiha mmutekoni mwaya enanvarelaaya Yehova. — Arom. 12:15.

WAATXEERERA OSUWELA WAYA SOOLEPA

9. Maxupo heeni atthareli a Yesu yaavirihaaya, ni moota heeni Yesu aakhavihenraawe?

⁹ Atthareli a Yesu yaahaakhulela masu a Muluku nave yanniilipihera ovarela muteko mweekumini mwaya. (Yoh. 17:6) Nnaamweera vareene hiiho, awo khayiiwexexa mwaha wa heeni Yesu iivinwaawe ntoko nakirime va mwirini wa nihaaxero. Yesu aahisuwela weera ohiiwexexa waya khawaataphulela weera khiyaarino nroromelo, mene khayiiwexexa soolepa. (Luka 9:44, 45; Yoh. 20:9) Tivawonto aaxuttinhaawe wiiwexexa soolepa. Moone moota aapankaawe eyo vaavo iisooneinhalaawe wa atthareli awe eeli mphironi wa Emawusi.

10. Moota heeni Yesu aakhavihenraawe atthareli awe ororomela weera owo aari Mesiya? (Luka 24:18-27)

¹⁰ Mmusome Luka 24:18-27. Moone weera Yesu khaisuwelinhe moowaakuveya wa atthareli awe, ohiya opaka eyo owo aapakenle makoho. Mwaha wa heeni? Pooti weera owo aatthuna weera awo yuulume etthu yuupuwelaaya ni yaari vamurimani vaya, ni awo yaapaka eyo. Awo yaahima weera yaaweherera weera Yesu aamurowa onvuluxa Israeli oweriwa wawe ni Aroma. Vaavo yuulumaaya itthu saaxupa, Yesu aavarihela soolepa weera aakhavihere alopwana ale wiiwexexa etthu yeereñye. b Muhoolo mwaya ohiyu, Yesu aaviriha etempu vamoha ni atthareli akina awiiwanyeihaka ikhaikhai iya. (Luka 24:33-48) Etthu heeni ninxutteraahu ni yooweereya ela?

11-12. (a) Itthu heeni ninxutteraahu ni moota Yesu aaxuttihaawe ikhaikhai sa mBiblyani? (Nwehe efootu.) (b) Moota heeni munna aamusomiha Biblya Nortey aamukhavihenraawe?

¹¹ Moota heeni ninrowaahu omutakiha Yesu? Yoopatxera, emaara munaaxuttihaanyu anamasoma a Biblya, mpakeke makoho oophwanelela yaawo enrowa oweeriha ohima etthu enuupuwelaaya ni etthu eri vamurimani vaya. (Mir. 20:5)  Mwiiwexexa vale etthu enuupuwelaaya, nwoonihereke moota woophwanya soolepa sa mBiblyani seiyo sinrowa waakhavihera mwa itthu envirihaaya ni musepeke waaleela etthu yoopaka. Opwaha mwa yeeyo, mwaakhavihereke wuupuwelela soolepa ni woona moota enrowaaya ovarihela muteko miruku sa mBiblyani mweekumini mwaya. Moone yooweereya ya munna mmoha oGana oneeriwa Nortey.

¹² Vaavo Nortey aaraaweno iyaakha 16 aapatxera omusoma Biblya, muhoolo mwaya amusi awe yaapatxera omutthara-tthara. Etthu heeni yaamukhavihenre ovirelela okhala oolipa? Munna aamusomiha Biblya anvarihela Matheyo ekapiitulu ya 10 weera amukhavihere wiiwexexa weera akristu eekhaikhai enootthara-tthariwa. Nortey ohimme ha: “Vaavo kaapatxeraaka otthara-tthariwa, miyo kannaroromela weera koophwanya ekhaikhai.” Munna aamusomiha Biblya, anvarihela-tho Matheyo 10:16 weera amukhavihere weera emaara aakelaawe wiiwanyeiha soororomela sawe owannyawe, aatthuneya okhala oowiikosoopa ni anttittimiho. Apatisiwakaru, Nortey aatthuna okhala pioneiru, menento apapawe yaaweherera weera owo aamurowa osoma wuniversidade. Ohiya omuleela etthu yoopaka, munna aamusomiha Biblya ampakela makoho yaawo yaamukhavihenre ophimelela miruku sa mBiblyani. Yookhumelelaaya? Nortey aalakela ovolowa muteko wa ehuhu yootheene. Apapawe yaamoomola owannyaya. Nortey onoonela moota heeni sooweereya iya? Owo ohimme ha: “Kinnaroromela weera koopaka yoothanla yooreera.” Vaavo hiyo ninvarihelaahu etempu ahu weera naakhavihere atthu akina ophimelela soolepa, nnoowera waakhavihera okhala akristu oolipa moomunepani. — Aef. 3:16-19.

MWAAKHAVIHERE ATTHU AKINA WEERA EKHALE OOLIKANEENE ‘WAAKHAVIHERA AKINA’

13. Etthu heeni Yesu aapankaawe weera muteko wa Atiithi awe ovirelele opakiwa? (Aefeso 4:8)

¹³ Emaara aaraawe elapo ya vathi, Yesu aavara nnene sene muteko yoowo Atiithi awe yaamurummaaya opaka. (Yoh. 17:4) Mene Yesu khuupuwela weera, ‘Owo meekhaawe paahi taatthuneya opaka’ ele Atiithi awe yaatthunaaya. Mpuwa mwa iyaakha sawe 3 ni emeya avaraka muteko woolaleera, owo aahaaxuttiha atthu akina ovara-tho muteko owo. Ahaakunveene otthikela wiirimu, Yesu aahaavaha muritti atthareli awe, akina a yaawo pooti weeraka yaarinono iyaakha 20, weera ekosoopeke iputtiputthi sootthuneya sa Yehova ni ohoolela muteko woolaleera  ni wooxuttiha. (Mmusome Aefeso 4:8.) Moota heeni Yesu aavarihenlaawe muteko mahiku awe 40 oomalihera weera aakhavihere alopwana ala oowiivaherera, oororomeleya ni oovara muteko weera ekhale oolikaneene ‘waakhavihera atthu’? — Nwehe enoota ya yoosoma ya Aefeso 4:8.

14. Moota heeni Yesu aakhavihenraawe atthareli awe wunnuwa moomunepani mpuwa mwa mahiku awe 40 oomalihera valaponi? (Nwehe efootu.)

¹⁴ Yesu aahaavaha miruku atthareli awe, mene annapaka eyo mwa nsivelo. Mwa ntakihero, akina a yaawo yannahovela nto owo aahaavaha miruku. (Luka 24:25-27; Yoh. 20:27) Owo-tho aahaaleela weera yaatthuneya owehexexaka, otepaxa wene muteko aya woowaakosoopa atthu a Yehova ohiya miteko saya sa nihiku ti nihiku. (Yoh. 21:15) Nave aawuupuxera weera khiyaatthuneya olikanxera itthu yaapakaaya mmutekoni mwa Yehova ni itthu atthu akina yaaweraaya opaka. (Yoh. 21:20-22) Owo aahaavaha miruku woohima sa miyuupuwelo soonanara yaaraayano woohima sa Omwene, ni aahaakhavihera owehexexa muteko aya woolaleya mitthenka sooreera. (Mit. 1:6-8) Asitokweene a mmulokoni enxuttera eheeni ni ntakihero na Yesu?

15-16. (a) Mwa mukhalelo heeni asitokweene a mmulokoni enrowaaya otthara ntakihero na Yesu? Muthalihe. (b) Moota heeni Patrick aattottenlaawe mureerelo miruku aavahinwaawe ni mutokweene a mmulokoni?

¹⁵ Moota heeni asitokweene a mmulokoni enrowaaya omutakiha Yesu? Awo entthuneya waatxentxeriha ni waakhavihera asinna waahela mpuwa ale eri amiravo, weera ekhale oolikaneene okosoopa miritti sitokweene. c Asitokweene a mmulokoni, khentthuneya owehereraka weera ale enaatxentxerihaaya ekhale oomalela. Awo entthuneya waavahaka miruku sa nsivelo weera amiravo awo esuwele itthu sintxipale nave yooneke otthuneya waya okhala oowiiyeviha, oororomeleya ni oolikaneene waakhavihera atthu akina. — 1 Tim. 3:1; 2 Tim. 2:2; 1 Ped. 5:5.

¹⁶ Moone moota munna oneeriwa Patrick aattottenlaawe mureerelo miruku. Emaara aaraawe mmiravo, owo annuuluma ni opaka itthu moohireerela ni atthu akina, waahela mpuwa asirokora. Mutokweene mmoha a mmulokoni aahoonelela maxupo a Patrick ni anvaha miruku  mooreerela mene soowiiwanyeya. Patrick ohimme ha: “Kinnahakalala mwaha wa munna ole okivaha miruku. Miyo kannakhulumuwa vaavo kaawehaaka asinna akina yaakhelaka miritti mmulokoni seiyo kaahaawelaaka. Mene miruku sa mutokweene a mmulokoni ole sookikhavihera woona otthuneya waya waakhavihera asinna ni asirokora moowiiyeviha ohiya waakhela miritti mmulokoni.” Yookhumelelaaya, Patrick oothanliwa ntoko mutokweene a mmulokoni areene ni iyaakha 20 naari opwahamo. — Mir. 27:9.

17. Moota heeni Yesu oonihenraawe weera annaaroromela atthareli awe?

¹⁷ Yesu aahaavaha yoothanleliwa atthareli awe, ohiya paahi olaleya, mene-tho oxuttiha. (Nwehe enoota ya yoosoma “mwaaxuttihaka” ya Matheyo 28:20.) Atthareli a Yesu pooti weeraka yoona weera khiyaawera okwanihera yoothanleliwa eyo. Menento Yesu annaroromela weera awo yaamurowa owera ovara muteko owo, ni owo aahaaleela ni nroromelo eeraka: “Ntoko Atithi ekirummaya miyo, siso miyo tho kinnorumani nyuwo.” — Yoh. 20:21.

18. Moota heeni asitokweene a mmulokoni enrowaaya otthara ntakihero na Yesu?

¹⁸ Moota heeni asitokweene a mmulokoni enrowaaya omutakiha Yesu? Asitokweene a mmulokoni amiruku, ennaathanlela asinna miritti. (Afil. 2:19-22) Mwa ntakihero, asitokweene a mmulokoni pooti waavoleihera amiravo vaavo ompakiwaawe limpeza ni orehereriwa Empa ya Omwene. Asitokweene a mmulokoni, pooti omuthanlela munna muteko ni omuxuttiha moota woopaka muteko owo, ni muhoolo mwaya, eroromeleke weera munna owo onoowera opaka muteko owo nnene. Mutokweene mmoha a mmulokoni a viinaano yoowo oneeriwa Matthew, onnaxukurela mwaha wa asitokweene a mmulokoni omuxuttiha moota woopaka miteko sintxipale sa mmulokoni ni emuroromelaka weera onoowera opaka miteko iyo. Owo ohimme ha, “Vaavo kahaapakaaka itthu nnene awo yannakikhavihera oxuttera ni itthu iyo kahaapankaaka nnene ni muhoolo opaka nnene itthu iyo.” d

19. Nlakeleke opaka eheeni?

¹⁹ Yesu aavarihela muteko mahiku awe 40 oomalihera valaponi weera aalipihe, aaxuttihe ni waatxentxeriha atthu akina. Nikhale oolikaneene weera ntthare ntakihero na Yesu. (1 Ped. 2:21) Owo onoorowa onikhavihera opaka eyo mwaha wooweera, onroromeliha eeraka: “Miyo kiri ni nyuwo mahiku othene mpaka emalihero ya olumwenku.” — Math. 28:20.