1-2. Akina aniikoha eheeni?

 NYUWO mohinto wiikoha waari weera Yehova onnaakhula mavekelo anyu? Wakhala weera muhinto wiikoha, nyuwo khamukhanle meekhaanyu. Asinna antxipale ahimme weera ahinto wiikoha eyo, otepaxa wene emaara yaavirihaaya maxupo. Emaara ninvirihaahu maxupo ntoko awo onnakhala wooxupa osuwela moota Yehova onaakhulaawe mavekelo ahu.

² Yoosoma ela nnoorowa woona mwaha wa heeni nintthuneyaahu ororomela weera Yehova onnaakhula mavekelo aarumeyi awe. (1 Yoh. 5:15) Nave-tho, nnoorowa wiiwa waakhuliwa wa makoho ala: Mwaha wa heeni ikwaha ikina nnuupuwelaahu weera Yehova khanaakhula mavekelo ahu? Ni moota heeni Yehova onaakhulaawe mavekelo ahu mahikwaano?

3. Mwaha wa heeni Yehova ontthunaawe weera nimwaattameleke moorweela munivekeloni?

³ Biblya onnaroromeliha weera Yehova onnasivela vantxipale hiyo, ni weera hiyo tootthuneya wa yoowo. (Hag. 2:7; 1 Yoh. 4:10) Ti vawonto owo onnaniwopaawe, weera nimwaattameleke moorweela munivekeloni. (1 Ped. 5:6, 7) Yehova onnatthuna vantxipale onikhavihera, weera nivireleleke omwaattamela. Ni weera niwere ovilela maxupo ahu a mweekumini.

4. Ninsuwela moota heeni weera Yehova onnaakhula mavekelo aarumeyi awe? (Nwehe efootu.)

⁴ Mbiblyani ninnaphwanya sooweereya sintxipale sinoonihera weera Yehova, aahaakhula mavekelo aarumeyi awe. Neereke nyuwo munnawera wuupuwelela yooweereya emoha ya yeeyo? Apaale nyuwo munuupuwela ntakihero na Davidi. Mpuwa mwa ekumi awe, owo aaviriha otthara-tthariwa ni amwiittani awe ni ikwaha sintxipale, owo aavekela nikhavihero wa Yehova  moorweela munivekeloni. Ekwaha tiiyo owo aavekela ha: “Yahvéh mwìwe nivekelo naka, mutheterele naru nayu wikhupanyera waka. Mororomeleyani mwanyu mukàkhule mowiwanana ni exariya anyu.” (Nsal. 143:1) Yehova ahaakhula nivekelo na Davidi ni aamwaakiha mwa soowoopiha. (1 Sam. 19:10, 18-20; 2 Sam. 5:17-25) Ti vawonto Davidi aalempaawe ha: “Yahvéh ori vakhiviru ni yale othene anamwìtthana.” Hiyo tho pooti okhalano nroromelo nimoharu Davidi aaraaweno.—Nsal. 145:18.

5. Neereke Yehova annaakhula mavekelo aarumeyi awe akhalayi ntoko awo yaawehereraaya? Nvahe ntakihero. (Nwehe efootu.)

⁵ Apaale Yehova khanrowa waakhula mavekelo ahu ntoko hiyo naatthunelaahuno. Yaari yeeyo ene yeereñye ni murummwa Paulo. Owo onvekela Yehova weera anvenxe ‘mwiiwa mweerutthuni mwawe.’ Aavekela ikwaha tthaaru weera avenxe mwiiwa owo. Neereke Yehova aahaakhula nivekelo nna? Aani, mene khaakhunle moota murummwa Paulo aavekelenlaaweno. Ohiya omaliha maxupo ale a Paulo, Yehova anvañhe owera weera avirelele onvarela muteko Yehova moororomeleya.—2 Akor. 12:7-10.

6. Mwaha wa heeni ikwaha ikina nnoonaahu weera Yehova khaakhunle mavekelo ahu?

⁶ Ikwaha ikina Yehova, pooti ohaakhula mavekelo ahu wa moota naawehereraahu. Mene nroromeleke weera Yehova oosuwela etthu heeni eri yooreera wa hiyo. Owo pooti oneerela itthu “votepaxa seiye ninvekahu nari nnùpuwelahu.” (Aef. 3:20) Ti vawonto, Yehova pooti waakhula mavekelo ahu ewoora ni moota hiyo nahaawehereraahu.

7. Mwaha wa heeni emaara ekina nintthuneyaahu otxentxa itthu ninvekelaahu? Nvahe ntakihero.

⁷ Apaale ikwaha ikina onnatthuneya hiyo otxentxa moota hiyo nimpakaahu mavekelo ahu, noonelela vale tiivi eri yootthuna ya Yehova wa hiyo. Nwehe ele yeereñye ni munna Martin Poetzinger, athelakaru aatthukiwa anaroihiwa nipuro yaahiwaayawo maperesu a manazista. Woopatxerani owo aavekela Yehova weera amukumihe nipuro nne na maperesu, weera aakosoopeke amwaariye ni avireleleke ovara muteko woolaleera. Mene ivirakaru isimana piili, aahoonelela weera eyo khahiyono yaari yootthuna ya Yehova. Nto owo aapatxera onvekela Yehova ha: “Txontte Yehova mukoonihere tiivi eri yootthunaanyu wa miyo.” Avinyaka vaavo owo aapatxera owuupuwelela asinna akina-tho yaatthukinwe yaari maperesu. Antxipale a yaawo yannaxupeya vantxipale ni asaaraya ni anamwane aya. Avinyaka vaavo munna Martin aavekela: “Yehova asantte vantxipale mwaha wookivaha yoothanleliwa aka ela  enyowani. Mukikhavihere weera kaalipihe asinnaka ala.” Owo aaviriha iyaakha 9 apakaka etthu eyo.

8. Etthu heeni nintthuneyaahu wuupuwelela emaara nimpakaahu mavekelo ahu?

⁸ Ontthuneya wuupuwelela weera Yehova onookwanihera yootthuna awe nihiku ni ewoora owo othanliyaawe. Yootthunaawe eyo enhela mpuwa omaliha maxupo ootheene annitannyera ohaawa, ntoko irisa sa ephattu, iretta ni okhwa. Yehova onrowa okwanihera yootthunaawe eyo avarelaka muteko Omwene wa Muluku. (Dan. 2:44; Apok. 21:3, 4) Niwehereraka nihiku nno, Yehova aneereke ovirelela waakhulela weera omwene wa Satana olamuleleke. b (Yoh. 12:31; Apok. 12:9) Waari weera Yehova oomaliha maxupo atthu ankumanaayano mahukwaano, eyo yaakela woonihera weera omwene wa Satana onnakhumela nnene. Eyo enoonihera weera ontthuneya onweherera Yehova weera aakwanihere anatiri akina owo aamannaawe. Mene eyo, khentthuna ohima weera Yehova khanrowa onikhaviheraka. Nnoorowa woona moota mukina Yehova onnikhaviheraawe, mahukwaano.

9. Yehova onnikhavihera moota heeni naatthunaka opaka yoothanla? Mukomentari yooweereya ehimmwale.

⁹ Yehova onnanivaha miruku. Yehova oolaihera weera onoonivaha miruku weera niwereke opaka soothanla sooreera. Ni hiyo ninnahaawela vantxipale miruku sa Yehova weera niwereke opaka soothanla sootepa otthuneya sa mweekumini. Mwa ntakihero, emaara yeeyo ninthanlaahu waari weera nnoovirelela okhala muttiye, naari waari weera nnoothela kapena nnootheliwa. (Yak. 1:5) Nwehe yooweereya ya murokora mmoha muttiye oneeriwa Maria. c Owo aavara muteko wa opiyoneiru wa nthiti, avinyaka aamusuvela munna mmoha. Owo ohimme ha: “Hiyo naakhala asinthamwene ni vahoolo vaya naapatxera osivelana mukina ni mukhwaawe. Miyo kaasuwela weera wannatthuneya opaka yoothanla. Nto mwaha wa yeeyo, kaapaka mavekelo mantxipale kinvekelaka Yehova, miyo kaatthuna weera Yehova akeettihe, menento kaasuwela weera Yehova khaarowa opaka yoothanla vanipuroni vaka.” Maria onnoona weera Yehova aahaakhula mavekelo awe. Owo aaphwanya nyaha saamukhavihenre ophwanya waakhuliwa wa makoho awe. Nave owo-tho aahiiwa miruku sooreera aavahinwaawe ni ameyawe. Itthu sootheene iya saamukhavihera Maria wuupuwelela itthu soothesene owo aavirihaawe, ni woomaliheroni owo aapaka yoothanla yooreera.

10. Moovarihana ni Afilipi 4:13, Yehova ompaka eheeni weera aakhavihere arumeyi awe? Nvahe ntakihero. (Nwehe efootu.)

¹⁰ Yehova onnanivaha ikuru weera nivilele. Ntoko hiihaale Yehova enraawe ni murummwa  Paulo, Yehova pooti onivaha ikuru ninhawelaahu weera niwere ovilela maxupo ahu. (Mmusome Afilipi 4:13.) Nwehe moota Yehova aamukhavihenraawe munna mmoha onitthaniwa Benjamim, oviriha ehuhu yooxupa. Benjamim aaviriha emiravo awe akhalaka vamoha ni amusi awe nipuro yaatthawenlaaya ekhotto wAfrika. Benjamim ohimme ha: “Ikwaha sootheene kannavekela Yehova weera akikhavihere ni akivahe ikuru weera kiwereke opaka itthu sooreera. Yehova aahaakhula mavekelo aka akikhaviheraka okhalano murettele ni akivahaka olipa murima weera kiwere olaleera, ni akivahaka iliivuru seiyo miyo kaahaawelaka weera kivirelele okhala oolipa omoonepani. Osoma sooweereya sa asinna akina ni osuwela weera Yehova aahaakhavihera okhala oovilela, waalipiha omuromelawaka Yehova.”

11-12. Moota heeni Yehova okhanlaawe oowaavarela muteko asinna weera aakhule mavekelo ahu? (Nwehe efootu.)

¹¹ Yehova onnaavarihela muteko asinna weera enikhavihere. Ohiyu ahinaaye okhwa Yesu aavekela woohihiyerereya. Yesu khaatthuna weera atthu yuupuweleke weera owo khattittimihe nsina na Apapawe. Mwaha wa yeeyo, owo aanvekela Yehova weera etthu ele eheereye. Mene Yehova ohiya opaka etthu ele Yesu aavekenlaawe, owo aaruminhe nlaika weera nimulipihe. (Luka 22:42, 43) Yehova tho mahikwaano pooti waavarihela muteko asinna weera enlikarele naari enixekure ni yootthuna weera enlipihe. Mweekhaikhai, ootheene hiyo ontthuneya waasaasera ehuhu weera nuulume “Nsu noosiva” naari neere ha, weera naalipihe asinna.—Mir. 12:25.

¹² Nwehe yooweereya ya murokora oniitthaniwa Miriam. Sivirakaru isemana vakhaaneene aiyawe ekhwiyeene, Miriam aari owannyawe aripiweene murima vantxipale. Owo khaawera oomala winla ni annamuhaawela mutthu weera atthekuleno. Murokora owo ohimme ha: “Miyo nkaawera omulikarela mutthu, nto kanvekela Yehova. Kiriki ovekela hiihaale kinlaka, etempu ene yeele telefooni aka aahiitthana, aari mutokweene a mmulokoni yoowo aari nthamwene aka.” Miriam aaphwanya nimaliho mwaha wa nikhavihero avahinwaawe ni mutokweene ole a mmulokoni ni amwariye. Owo khaahovela weera aari Yehova aamweerinhe mutokweene ole a mmulokoni weera amulikarele.

13. Muhime yoowereya enoonihera weera Yehova pooti waavarihela muteko atthu ahimmukokhorela weera aakhule mavekelo ahu.

 ¹³ Yehova pooti waavarela muteko atthu ahimmukokhorela owo weera enikhavihereke. (Mir. 21:1) Yehova pooti waavarela muteko atthu ahimmukokhorela owo weera aakhule mavekelo ahu. Mwa ntakihero, Yehova aamweeriha mwene Artaserse weera amwaakhulele Nehemiya otthikela oYerusalemu weera atthikele oteka ecidade veeli. (Neh. 2:3-6) Olelo va, Yehova pooti oweeriha atthu ahinanvarela muteko owo weera epake etthu emoha-moharu.

14. Moota heeni yooweereya ya Soo Hing yoolipinhaayani nyuwo? (Nwehe efootu.)

¹⁴ Murokora mmoha oneeriwa Soo Hing aahoona moota Yehova aamukhavihenraawe anvarelaka muteko meediku mmoha. Mwanawe amweerakaru asidente, owo aakhalano maxupo a mmuupuweloni. Avinyaka vaavo murokora ni aiyawe yaalakela ohiya muteko yaavaraaya weera emukosoope mwanaya. Nto mwaha wa yeeyo, awo yaapatxera okhalano maxupo a othoiwa musuruku. Soo Hing ohimme weera yaaphiya etempu oonaawe weera khaarowa tho owera ovilela etthu ele aavirihaawe. Mene ovinya vaavo owo anvekela Yehova ni murima awe wootheene, anvekelaka nikhavihero. Meediku aamukosoopa mwanawe, aalakela weera aamwaakhavihera awosa, nto mwaha wa yeeyo, Soo Hing ni aiyawe yaawera okhaviheriwa ni guvernu ni yaaphwanya empa yookhala. Omamaliheroni, murokora owo ohimme ha: “Hiyo nohoona moota natata na Yehova nnikhavihenraaya. Mweekhaikhai owo, ‘onniwa mavekelo.’”—Nsal. 65:3 [65:2, NM].

15. Etthu heeni murokora aapankaawe weera emukhavihera woonelela weera Yehova annaakhula mavekelo awe?

¹⁵ Ikwaha sintxipale, Yehova khanaakhula mavekelo ahu ntoko naawehereraahu. Mene moota Yehova onaakhulaawe mavekelo ahu onnanikhavihera okhala oororomeleya wa yoowo. Ti vanto, muhule maaru ni muhule maitho weera nwehexexe moota Yehova onaakhulaawe mavekelo anyu. Murokora mmoha oniitthaniwa Yoko uupuwela weera Yehova khaakhula mavekelo awe. Nto mwaha wa yeeyo, owo aapatxera olepa itthu sootheene owo anvekenlaawe Yehova. Evirakaru etempu owo aakuxa elista ele, ni aahoonelela weera Yehova aahaakhula mavekelo mantxipale owo aapankaawe mpaka mavekelo owo aattiwanlaawe. Ti vawonto, nihipiseke owehexexa weera noone moota Yehova onaakhulaawe mavekelo ahu.—Nsal. 66:19, 20.

16. Moota heeni mukina nnooniheraahu weera nookhalano nroromelo? (Aheberi 11:6)

 ¹⁶ Hiyo ninnoonihera weera nookhalano nroromelo, emaara yeeyo nnavekelaahu Yehova. Mene ninnoonihera-tho weera nookhalano nroromelo emaara yeeyo hiyo nnakhulelaahu moota Yehova onaakhulaawe mavekelo ahu. Nihipwatthaka waari weera ohaakhula moota hiyo naatthunelaahuvo kapena hooye. (Mmusome Aheberi 11:6.) Nwehe ntakihero na Mike ni amwaariye Chrissy, awosa yaakhalano yooluluwanya ya ovara muteko oBetheli. “Hiyo naaprieencheri epetisau weera navareke muteko oBetheli mwa iyaakha sintxipale, ni nannavekela woohima sa mwaha owo.” Mene khanintale wiitthaniwa weera navareke oBetheli. Mike ni Chrissy yannaroromela weera Yehova annasuwela nipuro heeni awosa yeeraaya evareleye muteko. Awo yaavirelela opaka ele anweraaya evaraka muteko ntoko opiyoneiru wanthiti mapuro oothowa anamalaleera ni okhavihera muteko wooteka Impa sa Omwene. Olelo va, awosa anvara muteko wa esirkwiitu. Mike onnavirelela ohima ariki: “khaiyene ikwaha sootheene Yehova annaakhula mavekelo ahu ntoko hiyo naatthunelaahuvo, mene moota owo aakhulaawe waari wooreera ni moota hiyo nahaawehereraahu.”

17-18. Moovarihana ni Nsalmu 86:6, 7, nintthuneya ororomela eheeni?

¹⁷ Musome Nsalmu 86:6, 7. Davidi aasuwela weera Yehova anniiwa ni annaakhula mavekelo. Nyuwo-tho pooti okhalano nroromelo nimoharu. Sooweereya nonnaahu mwa yoosomeene yeela, sinnanroromeliha weera Yehova pooti onivaha miruku ni ikuru nihaawelaahu weera nivirelele okhala oororomeleya. Owo pooti waavariherala muteko asinna, mpaka atthu ale ahimmukokhorela owo weera enikhavihere hiyo.

¹⁸ Ekhaikhai weera khaiyene ikwaha sootheene Yehova onrowa waakhula mavekelo ahu ntoko hiyo naatthunelaahuno, mene nroromeleke weera owo onimwaakhula mavekelo ahu. Owo onoorowa onivaha etthu ninhaawelaahu ewoora yoophwanelela. Nto nvireleleke ovekela ni nroromelo muroromelaka weera Yehova onoorowa wookosoopani nyuwo viinaano va ni elapo enyowani, onoorowa okwanihera ‘sootthuna sa itthu sootheene siri neekumi.’—Nsal. 145:16.