Apapaka ni ameyaka, yaari makatoolika. Mene vaavo yaaxuttenraaya mBiblyani weera nsina na Muluku ti Yehova, ooweeli aya yaakhala Anamoona a Yehova oowiilipihera. Apapa yaahiya opattha ineneeru sa Yesu. Ohiya opaka eyo, awo yaavarihela osuwela waya muteko wa ocarpintaria weera emutxentxe andar oopatxera a empa ahu weera ekhale Empa ya Omwene oSan Juan del Monte, muttetthe yoowo woowaattiwa wa oManila ekapitaale ya oFilipinas.

Kiyariwakaru eyaakha ya 1952, asitiithi aka yannakixuttiha vantxipale itthu soomunepani seiyo yaaxuttihaaya asinnaka axexe ni asirokoraka araru. Vaavo kunnuwaaka, apapa yaakooperera weera nenne nri nihiku kisomeke ekapiitulu emoha ya mBiblyani, nave nannasoma vamoha irevista sintxipale soovirikana. Ikwaha ikina, vaavo asitokweene a esirkwiitu ni asinna a osede mundial yaaxekuraaya miloko, asitiithi aka yannaawopa weera ephiye owaani. Ntoko emusi, hiyo nannahakalala ni nannalipihiwa vantxipale ni sooweereya sa asinna ala seiyo yaanileelaaya, yeeyo yaaneerinhe ohela nipuro noopatxera mweekumini mwahu muteko woolaleera.

Asitiithi aka aakihiyera ntakihero nooreera na nroromelo. Ameyaka ekhwaakaru mwaha wa eretta, miyo ni apapa naapatxera ovara ntoko mapioneiru eyaakha ya 1971. Menento eyaakha ya 1973 vaavo kaaraakano iyaakha 20, apapa yaakhwa. Waayeleela asitiithi aka, waakeeriha wiisoona okhala meekhaaka. Mene yooweherera ‘yeekhaikhai ni yoolipa’ emphwanyeya mBiblyani, yaakikhavihera ovirelela okhala oomaaleleya ni oolipa moomunepani. (Aheb. 6:19) Evirakaru etempu vakhaani apapa ekhwiiyeene, kaahaakhulela yoothanleliwa ya opioneiru woothanleya yeeyo kaavaraaka oIlha ya oCoron, eprovinsiya ya oPalawan.

Vaavo kaaraakano iyaakha 21, kaaphiya oCoron. Okhala weera kaakhovelela okhala mucidade, kaatikiniheya vaavo koonelenlaaka weera eilha ele khiyaakhanleno energia mapuro mantxipale naari khiyaakhanleno itorneira mapuro mantxipale nave khisaakhanlewo ikaaro sintxipale naari amootu. Nnaamweera yaariwo asinna vakhaani, miyo nkaakhanleno nthamwene aka aari pioneiru, nto ikwaha  ikina kannakhuma muteko woolaleera meekhaaka. Mweeri woopatxera, kaahinkheliwa vantxipale ni amusi aka ni asinthamwene aka. Ohiyu kannaweha erimu yoosareya ithenyeeri ni kannapatxera omoriha maithori. Mpaka miyo kannatthuna ohiya muteko ole kaavaraaka weera kitthikele owaani.

Emaara yeeyo kiisoonaaka okhala meekhaaka, miyo kannamuhulela murima aka Yehova. Miyo kinnuupuwela masu oolipiha yaawo kaasommaaka mBiblyani ni irevista sahu. Ikwaha sintxipale miyo kannuupuwela Nsalmu 19:15 [19:14, Tradução do Novo Mundo]. Miyo kaahoonelela weera Yehova aamukhala “Mwala aka ni Nvulux’aka” wakhala weera kamphimelela itthu simmuhakalaliha ntoko miteko sawe ni mikhalelo sawe. Mwaha wa A Sentinela yoowo oneera “Nunca está sozinho” a waakikhavihera vantxipale. Miyo kannasoma veeli-veeli. Mwa mukhalelo ola, imaara sene seiya miyo kaakhala meekhaaka ni Yehova, nto miyo kannakhalano eparakha yoovekela, osoma ni ophimelela.

Evirakaru etempu vakhaani vaavo kaaphiñyaaka oCoron, kaathanliwa ntoko mutokweene a mmulokoni. Okhala weera mutokweene a mmulokoni kaari meekhaaka, kaapatxera ohoolela isemana sootheene mithukumano sa eriyari ya esemana, muthukumano wa muteko woolaleera, yoosoma ya mmulokoni ni yoosoma sa Nwehereri. Miyo-tho kannapaka nyaha isemana sootheene. Ekhaikhai tiyooweera, miyo nkaakhanleno etempu yoowiisoona okhala meekhaaka!

Muteko aka woolaleera wannakhumela nnene oCoron. Anamasoma aka akina a Biblya yaapatisiwa. Mene-tho kaaviriha maxupo. Ikwaha ikina miyo kanneetta iwoora sintxipale vanihikuni weera kiphiye muttetthe naalaleeraahu. Kihisuwelaka nipur kaarowaaka okona kaphiya vale. Muttetthe wa muloko ahu, wannahela-tho mpuwa iyiilha sintxipale ikhaanini. Ikwha sintxipale, miyo kanneetta mparkuni mpareya mwemmo yaaviraaya epheyo yoowuupa weera kiphiye muttetthe naalaleeraahu, nnamweera kahasuwenle orapela! Mpuwa mwa maxupo ootheene ala, Yehova ookikosoopa ni ookikhavihera. Muhoolo mwaya kohoonelela weera Yehova aamukireherera wa maxupo matokweene yawo kaarowaaka okumanano mwa yoothanleliwa aka yoottharelana.

Eyaaka ya 1978, kaahithanleliwa oPapuwa oNova Guiné onorte wa Austrália. OPapua oNova Guiné, elapo yoosareya miyaako ntoko wEspanha. Kaatikiniheya vantxipale kisuwelakaru wera atthu ookwana imiliyawu 3, yannuuluma muulumo oopwahaka 800. Etthu yoohakalaliha ti yooweera atthu antxipale yuuluma nuulumo na Pidgin Melanêsio, nenno nsuwelinwe okhala Tok Pisin.

Mpuwa mwa etempu vakhaani, kaathanleliwa muloko wa Enkelexi ekapitaale ya oPort Moresby. Menento kaatxentxa kirowaka muloko wa Tok Pisin ni kaasoma nuulumo nno. Kaavarihela muteko ele kaaxutteraaka musaala mmutekoni moolaleera. Eyo yaakikhavihera oxuttera nuulumo nne moowaakuveya. Ehivinreene etempu yintxipale, miyo kannapaka miyaha sa vanlakani kivarihelaka nuulumo na Tok Pisin. Nkuupuwelani moota oraaya wootikiniha, ehivinreene eyaaka emoha vaavo kaaphiñyaaka oPapua oNova Guiné, kaathanleliwa okhala mutokweene a esirkwiitu a miloko sa Tok Pisin mpuwa mwa iprovincia sintxipale.

Okhala weera miloko saari soorakamela, miyo wannatthuneya waareherera assembleya antxipale a esirkwiitu ni oviyajari vantxipale. Woopatxerani, miyo kanniisoona okhala meekhaaka mapuro yaawo kahaasuwenlaaka, elapo enyowani, nuulumo nnyowani  ni sookhovelela inyowani. Miyo nkaawera orowa miloko iyo keettaka vathi, mwaha wooweera misewe saari mmiyaakoni ni wannaxupa weettamo. Nto miyo wannatthuneya oviajari kinwelaka aviyawu isemana sootheene. Imaara ikina, miyo kaakhala meekhaaka mwaaviyawuni mukhaanini oohivareleleya. Weetta mwaaviyawuni wannakinyoonyiha vantxipale hiihaale ntoko keettaaka mparkuni.

Yaari atthu vakhaani yaarinono telefooni, nto mwaha wa yeeyo miyo kannuuluma ni miloko kivarihelaka muteko ikaarta. Imaara sintxipale miyo kannaphiya ikaarta saka sihinaaye ophiya, ni kannatthuneya okoha weera kaaphwanye asinna. Vaavo kaaphwanyaaka asinna, awo yannakaakhela ni nsivelo ni eyo yannakuupuxera mwaha wa heeni kiilipiheraaka ovara muteko ole. Kannoona nikhavihero na Yehova mwa mikhalelo soovirikana ni onthamwene aka nuuwo waahaatxeerereya vantxipale.

Ekwaha yoopatxera kaaphiñyaaka eilha yeeyo eniitthaniwa Bougainville, ntheli nimoha naakaattamela ntheyaka ni naakikoha, “Nyuwo munnanuupuwela?” Miyo kaahuupuwela weera kaahilaleera ntheli nne vaavo kaaphiñyaaka oPort Moresby. Miyo kaapatxeriha yoosoma ya Biblya ni ntheli nne kihaakunveene onvaha munna a elapo ene yeele. Voottharelana ootheene yaapatisiwa, nna naari nreeliho wa mareeliho mantxipale yaawo kaakhenlaaka mpuwa mwa iyaakha tthaaru oPapua oNova Guiné.

Kihaakunveene okhuma oCoron eyaakha ya 1978, kaamusuwela murokora mmoha ooreera ni anthiti eeriwa Adel. Owo aari piyoneira anthiti ni aakhalano anamwane eeli Samuel ni Shirley, emaara emoharu, annaakosoopa ameyawe oowuuluvala. Mweeri wa Maio eyaakha ya 1981, kaatthikela oFilipina weera kathelane ni Adel. Nthelanakaru naahikhala mapiyoneiru ni nannakosoopa emusi vamoha.

Nnaamweera naareene ni emusi, eyaakha ya 1983, kaathanliwa ntoko piyoneiru oothanleya ni kaathanleliwawa orowa eilha ya oLinapacan, eprovinsiya ya oPalawan. Emusi ahu yootheene yaahirowa nipuro nna, weiwo yahaakhanlaayawo Anamoona a Yehova. Ameyawe Adel, yaahikhwa evirakaru eyaakha emoha. Menento, naahaatteliwa ni muteko woolaleera ni eyo yaanikhavihera vaavo naakhwelinwaahu. Naapatxeriha soosoma sintxipale sa Biblya seiyo saarowa vahoolo oLinapacan. Ehivinreene etempu yintxipale hiyo nannahaawela Empa ya Omwene, nto naahiteka empa. Sivirakaru iyaakha tthaaru niphiyakaru, naahakalala vantxipale owoona atthu yaakwanela 110 yoonelaka mutthukumano wa Wuupuwelela. Nipwahakaru, antxipale a yaawo yaarowa vahoolo mpaka opatisiwa.

Eyaakha ya 1986, miyo kaaathanliwa weera kirowe eilha emoha ya oCulion weiwo yaaraayawo atthu antxipale yaarino eretta ya makokho. Noovira etempu, Adel aathanliwa okhala piyoneira oothanleya. Woopatxerani hiyo naanyoonyiwa mwaha woowaalaleera atthu yaawo yaarino eretta ya makokho. Mene Anamalaleera a elapo ele, yaanileela weera atthu ale yaarino eretta ele yaahaakhela etratamento ni khiyaarowa waavaliha atthu akina. Atthu akina yaarino eretta ele, yannoonela mithukumano empa ya murokora mmoha. Noovira etempu, hiyo naahiikhoveleliha ni naahoona okhala wooreera waaleela yooweherera ahu ya mBiblyani atthu yaale yoona weera khempwatthiwa ni Muluku naari ni atthu. Yaari etthu yootepa ohakalaliha owoona atthu yaawo yaarino eretta ele, ephwanyaka ohakalala vantxipale mwaha woosuwela  weera muhoolo enookhalano ekumi yooreera. — Luka 5:12, 13.

Moota heeni anamwane ahu yaarowaaya wiikhoveleliha ekumi ya oCulion? Aani, Adel ni miyo naahaawopa asirokora eeli asimwali weera ekhaleke ni hiyo weera anamwane ahu ekhaleno onthamwene wooreera. Samuel, Shirley ni asirokora ala eeli yannakhumela nnene mmutekoni moolaleera. Esomaka ni anamwane antxipale, ni miyo ni Adel naasomihaka asitiithi aya anamwane awo. Mweekhaikhai hiyo nannasoma ni imusi 11, mwa etempu vakhaani hiyo nannapakiha soosoma sintxipale seiyo saakela vahoolo mpaka opaka muloko munyowani.

Woopatxerani, mutokweene a mmulokoni kaari meekhaaka muttetthe ole, mwa yeeyo, efiliyaale yaakivekela weera kihooleleke mithukumano sa vasemanani wa anamalaleera 8 yaakhala oCulion ni weera kipakeke emoha-moharu wa anamalaleera 9 yaakhala muttetthe yoowo wiitthaniwa Marily. Weera mutthu awere ophiya iwo, waatthuneya oviriha iwoora tthaaru anvarihelaka parku. Samala mithukumano, emusi ahu nanneetta iwoora sintxipale niviraka mapuro yaawo oosareya miyaako weera napakihe soosoma sa Biblya muttetthe yoowo wiitthaniwa Halsey.

Noovira etempu, naahoona weera soohepha saahaatta vantxipale oMarily ni oHalsey ni naateka Impa sa Omwene mittetthe soomiili. Ntoko oLinapacan, asinna ni ale yaarino ntthuno yannavaha itthu saya weera ekhavihere muteko wooteka. Empa ya Omwene ya oMarily, wannawereya othukumana atthu ookwanaka 200 ni yaari etokweene, ni eyo yaaheeriha weera nivariheleke weera naapakeke asembleya ahu mwemmo.

Eyaaka ya 1993 vaavo anamwane yunnunwaaya, miyo ni Adel naapatxera ovara esirkwiitu ya oFilipina. Voottharelana, eyaakha ya 2000, miyo kaarowela Exikola ya Anamalaleera a Omwene weera katxentxerihiwe weera kikhale muxuttiha a exikola ene yeeyo, miyo kanniisoona ohikhala oophwanelela wa muteko ene yoowo. Menento Adel ikwaha sootheene annakilipiha, owo aakuupuxera weera Yehova aamurowa okivaha ikuru weera kiwere okwanihera yoothanleliwa ele enyowani. (Afil. 4:13) Adel annuuluma eyo mwaha wa sooweereya sawe sa mweekumini, mwaha wooweera owo annawera okwanihera soothanleliwa sawe nnaamweera aaviriha maxupo a ekumi awe.

 Eyaakha ya 2006 emaara yeeyo miyo kaaxuttihaaka, Adel yamphwanya eretta ya Parkinson. Hiyo naaxupeya vantxipale! Emaara miyo kaatthunaaka ohiya yoothanleliwa ahu weera kimukosoopeke Adel, owo aakeerenle ha, “Txontte mumphwanye meetiku yoowo onrowa okikhavihera ni eretta aka, ni koosuwela weera Yehova onoonikhavihera ovirelela.” Mwa miyeeri 6 saattharelana, Adel aavirelela onvarela Yehova ahiikhupanyeraka. Emaara yeeyo ahaaweraawe weetta owo annalaleera areene vakaterani vawe ya iroota. Emaara yeeyo ahaaweraawe wuuluma nnene, annaakhula ni masu mamoha naari meeli mmithukumanoni mpaka okhwa wawe eyaakha ya 2013. Adel emaara eri yootheene annaakhela mensagem ooxukureliwa mwaha wa ntakihero nawe nooreera na ovilela. Miyo kooviriha iyaakha soopwahaka 30 kireene ni amwaaraka oororomeleya ni ansivelo, mene ekhwaakaru, miyuupuwelo sooxupeya ni omeekha sookitthikela-tho.

Adel aatthuna weera kivirelele ovara yoothanleliwa aka, nto kaapaka eyo. Ni kaahaatteliwa ni muteko woolaleera ni eyo yaakikhavihera owina maxupo a omeekha. Ovinyera eyaakha ya 2014 mpaka eyaakha ya 2017, kaathanleliwa oxekura miloko seiyo suuluma nuulumo na Tagalog ilapo seiyo muteko ahu waakhoottihiwaaya. Avinyaka kaaxekura miloko sa nuulumo na Tagalog oTaiwan, wEstados Unidos ni oCanada. Eyaakha ya 2019, kaasomiha kivarihelaka nuulumo na Enkelexi Ixikola sa Anamalaleera a Omwene, wIndia ni oTailandia. Kaahakalala vantxipale mwa soothanleliwa iya sootheene. kinnahakalala vantxipale vaavo kinaatteliwaaka ni muteko wa Yehova.

Mwa yoothanleliwa eri poothe, miyo kannaasivela asinna ni asirokora yaayo kaasuwenlaaka, nto onnakhala wooxupa waahiya. Mwa etempu ene yeeyo, miyo kooxuttera omuroromela Yehova ni murima aka wootheene. Miyo kohoona moota aakikhavihenraawe ni eyo yookikhavihera waakhulela ni murima aka wootheene matxentxo eri poothe yaakhumelela. Olelo miyo ka piyoneiru oothanleya oFilipinas. Miyo kiri muloko munyowani yoowo ori ntoko emusi ya nsivelo ni yoopwattha. Nave-tho kinnahakalala vantxipale onweha Samuel ni Shirley etakihaka ororomeleya wa ameyaya. — 3 Yoh. 4.

Aani, miyo kooviriha maxupo mantxipale mweekumini mwaka, ohela mpuwa onweha mwaaraka oosiveleya ahaawaka mpaka okhwa mwaha wa eretta. Nave-tho miyo wannatthuneya wiikhoveleliha ni mikhalelo sintxipale inyowani. Menento miyo kohoona weera Yehova ‘khakhanle ottayi ni mutthu ori poothe a hiyo.’ (Mit. 17:27) Ntata na Yehova ‘khanikhuveñye’ weera aakhavihere ni waalipiha arumeyi awe nnaamweera ereene mittetthe soorakamela. (Yes. 59:1) Yehova yoowo ori Mwala aka, ori ni miyo mpuwa mwa ekumi aka yootheene, ni kinnamuxukurela vantxipale. Miyo nkaakhanle meekhaaka.