1-2. Eheeni nintthuneyaahu ovirelela opaka nnaamweera ni Batizinweene?

 NEEREKE nyuwo munnareherera empa anyu muhinaaye othaamela? Moohihovela, nyuwo munnareherera nnenesene. Nto nkuupuwelani waakhanle weera nyuwo khamureherenre, moohihovela saahereke okhala itthu ntoko malaxi, mantulu, awalisi ni anaporokho. Nto naatthunaka okhala empa yooreera nintthuneya oreherera.

² Emoha-emoharu naatthunaka okhalano minyuupuwelo ni mikhalelo sinimusivela Yehova nintthuneya ovirelela wiilipihera. Ekhaikhai weera hiyo nihinaaye obatiziwa noopaka matxentxo mweekumini mwahu weera “nìrapihe wa sonanara sothene sa erutthu ni sa munepa.” (2 Akor. 7:1) Mahikwaano hiyo nintthuneya otthara miruku sa murummwa Paulo sa ovirelela “oyariwa wa naveli ni mmunepani wa miruku sanyu.” (Aef. 4:23) Mwaha wa heeni ontthuneyaaya opaka eyo? Ti wootthuneya opaka eyo mwaha wooweera nahikosoope mikhalelo ni minyuupuwelo soonanara pooti ovoleela ekumi ahu. Weera eyo ehineerele hiyo nintthuneya omusoma Biblya mahuku ootheene, wuupuwelela ele ninsomaahu ni owehexexa mikhalelo sahu ni sootthuna sahu.

3. “Owara omutthu onyowani” ontaphulela eheeni? (Aroma 12:2)

³ Ninkela okhalano hayi minyuupuwelo inyowani, naari  neere, owara omutthu onyowani? (Mmusome Aroma 12:2.) Ohiya okhalano mikhalelo sooreera paahi hiyo nintthuneya owehexexa omutthu nikhalannaahu va murimani ni ovirelela opaka matxentxo mweekumini mwahu weera nimuhakalalihe Yehova nipakeke eyo moohihiyerera.

4. Eheeni nintthuneyaahu opaka weera elapo ela ehivoleele inyuupuwelo sahu?

⁴ Nakhala atthu oomalela, hiyo nneereke opaka itthu sootheene simmusivela Yehova. Mene nto vaanaano va, hiyo ontthuneya wiilipihera weera nimusivelihe Yehova, va Aroma 12:2. Murummwa Paulo enre: “Murukunuxe murima anyu wera monemo yotthuna ya Muluku”, hiyo khontthuneya ohiya elapo ela evoleelaka ekumaahu, nto ti yeeyo nintthuneya ahu owehexexa waari weera sootthuna sahu sinnavarihana ni yootthuna ya Yehova,—naari elapo ela,—enlamuleliwa ni Satana.

5. Makoho heeni nintthuneyaahu wiipakela weera noone waari weera ninkhala mahuku oomalihera? (Nwehe efootu.)

⁵ Nkuupuwelani ela: Yehova ontthuna weera nuupuweleke ‘owa wa nihiku nawe’. (2 Ped. 3:12) Nto mwiikoheke ha: ‘Moota miyo kinvarelaaka muteko ekumi aka, neereke miyo kinnuupuwela weera kinkhala mahuku oomalihera? Soothanla saka naari okela waka vahoolo neereke kinnoonihera weera kinnahela nipuro noopatxera Omwene wa Muluku? Neereke kinnaroromela weera Yehova onokithokorora miyo ni amusi aka ni onivaha itthu sinnithowa naari miyo kinaasaasa mihakhuru paahi?’ Mweekhaikhai Yehova onnamusivela vaavo onnoonaawe niilipiheraka weera nipakeke yootthunaawe.—Math. 6:25-27, 33; Afil. 4:12, 13.

6. Eheeni nintthuneyaahu ovirelela opaka?

 ⁶ Hiyo nintthuneya owehexexa moota nnoonelaahu itthu ni opaka matxentxo. Murummwa Paulo olempe ha: “Mwikoheke mekhinyu, mwarino nlelo wiwelela [nroromelo]: moneke asinenanyu!” (2 Akor. 13:5) Okhalano nroromelo khoontaphulela paahi orowela mithukumano ni orowa olaleera. Nroromelo ninhela mpuwa itthu nimpakaahu ninwehexexaahu ni ninroromelaahu weera sookhala. Ti vawoonto ontthuneyaawe wiilipihera omusoma Biblya weera nrukunuxe murima ahu nave oxuttera wuupuwela ntoko Yehova onuupwelaawe ni wiilipihera opaka ele ninweraahu weera nimuhakalalihe Yehova.—1 Akor. 2:14-16.

7. Moovarihana ni a Aefeso 4:31, 32, etthu heeni nintthuneyaahu opaka, ni eheeni eyo eraaya yooxupa?

⁷ Mmusome Aefeso 4:31, 32. Hiyo “nintthuneya owara omutthu onyowani.” (Aef. 4:24) Weera nipake eyo nintthuneya wiilipihera weera nisepe onyoonyiwa ni ommira supi, nto khahiyono ti wookhweya opaka eyo mwaha wooweera itthu ikina hiyo nookhovelela opaka, Biblya onhima weera “mutthu owali onnera sohureya sintxipale.” (Mir. 29:22) Mutthu okhalanne mikhalelo iya mweekhaikhai ontthuneya wiilipihera nnaamweera obatiziweene, ninkela woona eyo eparagrafu enttharelana.

8-9. Moota heeni ntakihero na Stepheni nnooniheraaya otthuneya waya owanano mikhalelo sa khalayi, nnaamweera nibatizinweene?

⁸ Munna mmoha oneeriwa Stepheni onnamuxupa mukhalelo wa owali, owo ohimme ha: “Nnaamweera kibatizinweene miyo kintthuneya owanano mukhalelo owo. Nihuku nimoha kireene mmutekoni woolaleera, mulopwana mmoha aamwiiya radio aka mukaaroni mwaka, miyo kaamutthimakiha ni kamwaattamenlaka aamuhiya radio vathi ni aatthawa, vaavo kaalenlaaka asitokweene yaakikoha, ; ‘Stepheni, Mwamphwannye namwiiya ole mwaakela omutekela heeni?’ Nikoho nne naakeriha wuupuwela weera miyo kinnatthuneya okhala oopixa murima.” b

⁹ Ntoko enooniheraaya yooweereya ya munna Stepheni, nnaamweera hiyo niilipihenreene ohiya mikhalelo soonanara. Nto iyo pooti okhumelela vaavo nihinwehereraahu, wakhala weera eyo yooweerelani muhikhulumuwe muupuweleka weera nyuwo khamuhiyono mukristu eekhaikhai. Murummwa Paulo aahaakhulela eyo eeraka: “Miyo kintthunaka opanka sorera . . . nto kinnona ikano sikina mwa impari sa erutthu aka . . . sikikhalihaka kaporo a ikano sa yottheka.” (Arom. 7:21-23) Ntoko noonnaahu woopatxerani nahivirelela okwesa mpaani mwahu, pooti otthikela axitthu ni ikokhola ntoko, awalisi, anaporokho ni malaxi. Emoha-emoharu mwaha woohimalela, mikhalelo soonanara pooti onitthikela, nto ontthuneya wiilipihera weera niwine. Ninkela opaka moota heeni eyo?

10. Eheeni nintthuneyaahu opaka weera nisepe mikhalelo soonanara? (1 Yohani 5:14, 15)

¹⁰ Wakhala weera nyuwo mookhalano mukhalelo woonanara, munvekeleke nikhavihero Yehova ni muroromeleke weera owo onimookhaviherani. (Mmusome 1 Yohani 5:14, 15.) Ekhaikhai weera Yehova khankela ovinxa mukhalelo owo, mene nto owo onimoovahani ikuru weera nwaneno mukhalelo owo. (1 Ped. 5:10) Nave-tho, mpakeke itthu moovarihana ni mavekelo anyu musepaka  itthu seiyo seera sitthikihere mikhalelo sa khalayi. Ntoko osepa woonela iviidiyu naari osoma iliivuru seiyo sinihima mikhalelo seiyo nyuwo munwananaanyu, nihiyeleeleke etempu ahu nuupuwela itthu soonanara.—Afil. 4:8; Akol. 3:2.

11. Etthu heeni nintthuneyaahu opaka weera niware omutthu onyowani

¹¹ Nahiya omutthu wa khalayi, onnatthuneya wiilipihera weera niware omutthu onyowani. Munkela owera hayi opaka eyo? Mukhaleno yooluluwanya ya oxuttera mikhalelo sa Yehova ni otakiha. (Aef. 5:1, 2) Mwa ntakihero, vaavo nyuwo munsoma anyu woohima sa Yehova ntoko olevelela, nyuwo mwiikoheke ha, ‘Neereke miyo ka mutthu olevelela?’ Emaara yeeyo nyuwo munsomaanyu woohima sa moota Yehova onakosoopa awe atthu mwikoheke ha: ‘Neereke miyo kinnaamorela ikharari atthu ni kinnaakhavihera?’ Nvirelele okhalano mikhalelo sooreera ni nware omutthu onyowani, mpixeke murima mwaha wooweera orula omutthu wa khalayi khahiyono ti wookhweya.

12. Stepheni onne hayi owera wa Biblya otxentxaka ekumi awe?

¹² Stepheni, yoole oromolinwe woopatxerani, owo onnaakhulela weera vakhaani-vakhaani aawara omutthu onyowani. Owo ohimme ha: “Kibatiziwakaru, miyo kaaviriha maxupo mantxipale yaawo yakixupa. Nto miyo kaawera oviriha maxupo ale mwaha wooweera kannaasepa atthu ale yaakitannya, eyo tiiyo, kanniimaaliha, nto atthu antxipale waahela mpuwa amwaaraka yaakittottopela moota kawenraka ohiya mikhalelo iye, mpaka mwaneenaaka kannatikhina, nto kahoonelela weera nkaawera otxentxa mwaha wa ikuru saka paahi. Nto eyo ennonihera ikuru Biblya oraaweno soowera otxentxa ikumi sa atthu.”

13. Eheeni enkela onikhavihera owanano mikhalelo soonanara? (Agalata 5:16)

¹³ Mmusome Agalata 5:16. Mene khavankhweya opaka itthu sooreera, nto Yehova onnanivaha munepa awe woottela weera onikhavihere. Naamusomaka Biblya, ninnoonihera weera ninnaakhulela munepa woottela weera onikhavihere, etthu emoha-emoharu ennereya vaavo ninrowaahu woonela mithukumano. Omithukumanoni, hiyo ninnaviriha etempu ni asinna ni asirokora, eniilipihera ntoko hiyo weera epake yoothuna ya Muluku, nto eyo ennanilipiha tthiri. (Aheb. 10:24, 25; 13:7) Emaara yeeyo hiyo ninvekelaahu Yehova weera nihiye mukhalelo woonanara, owo onoonivaha munepa awe woottela weera nivirileleke owana ni mikhalelo soonanara. Omusoma Biblya ni woonela mithukumano ni ovekela khonkela omaliha mikhalelo soonanara, mene nto itthu iya sinkela onikhavihera owanano, ntoko onihimaawe Agalata 5:16 “mwetteke mwa munepa ni khamunrowa wakhulela sotthuna sa erutthu.”

14. Mwaha wa heeni oraaya wooreera ovirelela wasa mikhalelo sooreera?

¹⁴ Nakhalano sookhovelela sooreera sa opaka ittthu soomunepani, ti wootthuneya wiilipihera weera nihihiye mikhalelo iyo. Nto onnatthuneya opaka eyo mwaha wooweera mikhalelo soonanara sinnaneerera etempu yootheene, nnamweera niBatiziweene hiyo pooti okhalano mikhalelo seiyo nintthuneya osepa ntoko omweetta phwitta, ohapaliwa ni oweha iviidiyu sa atthu oohiwara. (Aef. 5:3, 4) Mmiravo mmoha mukristu  ohimme ha: “Mukhalelo mmoha kaawanaakano waari osiveliwa ni alopwana akhwaaka, miyo kuupuwela weera waanvira moowakuveya nto nlelo sinnavirelela.” Etthu eheeni nyuwo muntthuneyaanyu opaka wakhala weera munnawanano mikhalelo soonanara?

15. Mwaha wa heeni oraaya woolipiha osuwela weera soowinlela murima sinnaaphwanya “atthu ootheene?” (Nwehe efootu.)

¹⁵ Wakhala weera nyuwo munwanano mikhalelo soonanara muupuweleke weera khamukhanle mekhaanyu Biblya ohimme, “wereriwa wothene wophwannyeni khopwahiye ikuru sa mutthu.” (1 Akor. 10:13a) Masu ala Biblya onnataphulela moota mukineene eeraka: “wereriwa wothene munviriha anyu asinna othene anereriwa hiho” masu ala yaalepelinwe asinna oKorintu, akina a yaawo yaari anamattompe alopwana anakonihana yaworu, athiyana athiyanaru ni anamuhapaliwa. (1 Akor. 6:9-11) Neereke awo ebatiziwakaru nyuwo munuupuwela weera khiyakhanleno yootthuna ya opaka itthu iya? Ekhaikhai weera awo yaari akristu oothanliwa, mene nto mwaha woohimalela imaara ikina awo yannakhalano yootthuna ya opaka itthu iya, osuwela eyo pooti onikhavihera. Mene hiyo khanimpwattha mwaha wooweera asinna akina yaawera oviriha maxupo awo, nroromelo nahu pooti olipa nasuwela weera “asinna a elapo yootheene annaviriha maxupo mamoha-moharu.”—1 Pedru 5:9.

16. Muraakho heeni nihintthuneyaahu omorela ni mwaha wa heeni?

¹⁶ Muhimorele mmurakhoni muupuwelaka weera khaavo onoona maxupo munvirihaanyu. Nto muupuwelo ntoko ola pooti oweerihani wuupuwelela weera khamunkela oviriha maxupo ni oweerihani wuupuwelela weera khamunwera ovilela soowinlela sa murima. Nkoonani ele Biblya onhimmaawe: “Siso mowereriwani mwanyu Muluku onimovahani  ntthawelo, wera nwere ovilela.” (1 Akor. 10:13b) Eyo entthuna ohima weera nnaamwi mikhalelo soonanara sooweelakani ikwaha sintxipale, nyuwo pooti owina mukhaviheriwaka ni Yehova.

17. Nnaamweera nihiweraka ohiya moomalela sootthuna soonanara, etthu heeni nintthuneyaahu opaka?

¹⁷ Mwaha woohimalela hiyo khaninkela ohiya wuupuwelela mikhalelo soonanara moomalela, mwakhalano vale soowinlela sa murima musepeke moowakuveya. Hiihaale ntoko Yosefe aatthanwaawe amwaarawe Potifari. (Eph. 39:12) Nyuwo muhihiye sootthuna sa murima anyu sootthekihakani.

18-19. Vaavo nniilipiheraahu orukunuxa minyuupwelo sahu, makoho heeni nintthuneyaahu wiikoha?

¹⁸ Nireherere minyuupuwelo sahu, weera nikhaleno minyuupuwelo sooreera ni opaka itthu simmusivela Yehova. Minyuupuwelo sahu ni soopaka sahu simusiveleke Yehova, nto weera nipake eyo nintthuneya owehexexa miteko sahu ni wiikoha ha: ‘Neereke soopaka saka sinnoonihera weera kinkhala mahiku oomalihera? Neereke kinnawera owara omutthu onyowani? Neereke kinnaakhulela munepa woottela wa Yehova okikhavihera weera kihipake yoottheka?’

¹⁹ Mwiipakaka makoho ala muhiweherereke okhala oomalela, mene nto muhakalaleke mwaha wa wiilipihera wanyu. Moonelela weera wookhala mukhalelo muntthuna anyu otxentxa muhikhulumuwe mutthareke miruku siri va Afilipi 3:16: “Vakhalaru siso, yeyo niphiyerahu’mo, mwemmo ene nètteleke’mo.” Mwapaka eyo musuwele weera Yehova onimooreelihani.