1. Mwaha wa heeni ootheene hiyo nintthuneyaahu okhalano miruku sa Muluku? (Miruku 4:7)

 NYUWO mwatthunaka opaka soothanla sooreera mweekumini mwanyu, moohihovela nyuwo munnavekela miruku—eyo etthu yooreera. (Yak. 1:5) Ti yeeyo yaamweerinhe Salomoni olepa weera: “Erimarima ya miruku ori okumanyera miruku.” (Mmusome Miruku 4:7.) Salomoni khaahima osuwela ori poothe, mene aahima osuwela wa Yehova. (Mir. 2:6) Neereke osuwela iwo onkhuma wa Yehova onoonikhavihera oviriha maxupo ninkumanaahu, araaya pooti onikhavihera? Nave, tiyeeyo ninkelaahu woona mpuwa mwa yoosomeene yeela.

2. Moota heeni nneraahu nikhaleno miruku?

² Nnoowera okhalano miruku nisomaka ni ovarihela muteko ele ninsomaahu. Vano ninkela woona ntakihero na Salomoni. Biblya onhima weera “Muluku anvaha Salomoni miruku ni owera otokotoko.” (1 Mam. 4:29) Avinyaka ninkela woona ntakihero na Yesu, mulopwana ootepaxa osuwwela aakhala vaalaponi. (Math. 12:42) Eprofesiya emoha ya Yesaya, emuulumaka Yesu, yenre ha: “Munepa wa Yahvéh onomukhuruwele yowo: munepa wosuwela ni wothanla, munepa wooloka ni wolipiha, munepa womusuwela ni womòva Yahvéh.”—Yes. 11:2.

3. Eheeni ninkelaahu woona mpuwa mwa yoosomeene yeela?

³ Muluku ahaavaha osuwela alopwana eeli Salomoni ni Yesu. Mwa yeeyo, awo aavaha miruku sootepa otthuneya wa hiyo: Mpuwa mwa yoosomeene ela, ninkela woona itthu tthaaru woohima sa musurukhu, muteko ni mwaneenaahu.

4. Mukhalelo woohima sa muhakhu wa Salomoni waavirikanne hayi ni wa Yesu?

⁴ Salomoni aari mulopwana amuhakhu ni aakhalano itthu sootheene aatthunaawe. (1 Mam. 10:7, 14, 15) Moovirikana ni mukhalelo mukina, Yesu aari ni ekumi yookhweya mpaka khaakhalanne empa, nnamwera vaareene hiiho, alopwana ale eeli yaakhalano mukhalelo wooreera woohima sa musurukhu. (Math. 8:20) Mwaha wooweera osuwela waya wakhuma wa—Yehova Muluku.

5. Moonelo heeni Salomoni aakhalannaawe a eriyari-neeriyari woohima sa musurukhu?

⁵ Salomoni aahimme weera “musurukhu muttusi.” (Koh. 7:12) Ni musurukhu nnoowera othuma itthu hiyo nintthunaahu ni iye nihintepaahu ohaawela mene ntthunaka. Ni sookumanano saawe, owo aahimme weera musurukhu kheiyono etthu yootepa ootthuneyaxa. Owo olempe ha: “Nsina noottittimiheya ninnampwaha mihakhu sintxipale ni orera murima epratha ni etxikuku.” (Mir. 22:1) Salomoni ahoonelela weera atthu a mihakhu onnaaxupa ohakalala ni itthu akhalannaaya. (Koh. 5:10, 12) Nave-tho, aahima weera nihuupuweleke weera musurukhu etthu yootepa otthuneya mwaha wooweera, owo pooti omala moowaakuveya.—Mir. 23:4, 5.

6. Mukhalelo heeni wa eriyari-neeriyari Yesu akhalannaawe? (Matheyo 6:31-33)

⁶ Yesu tho, aakhalano moonelo wa eriyari-neeriyari woohima sa musurukhu. Owo wannamusivela yootxa yooreera ni emaara ekina owura. (Luka 19:2, 6, 7) Mpaka mwiiriira woopatxera aapankaawe waari otatuxa—maahi evinyu. (Yoh. 2:10, 11) Mene nihuku arowaawe wiiviwa, owo awaanre ikuwo sootepaxa oreera. (Yoh. 19:23, 24) Yesu khaahiñye itthu saweerutthuni sikhalaka sootepa otthuneya mweekumini mwawe. Owo ahaalela atthareli awe weera: “Khavo onawera wàrumela asipwiya eli . . . Nyuwo khamunarya omurumela Muluku ni muhakhu.” (Math. 6:24) Yesu ooxuttiha weera, nahelaru Omwene wa Muluku  nipuro noopatxera, ikinaiyo nnimwaatxeereriwa.—Mmussome Matheyo 6:31-33.

7. Eheeni yaakhumelenle mwaha wa Daniyeli othanla ekumi yookhweya?

⁷ Otthara miruku woohima sa itthu sa werutthuni, wohaakhavihera asinna ni asirokora. Moone ntakihero na munna Daniyeli. Emaara araawe mmiravo, owo ohimme ha: “Itthu soomunepani sinkela okhala nipuro noopatxera.” Mwaha woothanla ekumi yookhweya, Daniyeli aapaka ele onweraawe weera onvarele muteko Yehova. Ntoko ovara muteko woowakhavihera atthu oothowiwa ni ovara oBetheli. Daniyeli onnaatxeerera eraaka: “Ekhaikhai weera miyo kaahereke ophwanya musurukhu muntxipale mene nkaarowa okhalano eparakha yowaasuwela asinthamwene ntoko kaasuwenlaaka olelo va. Kihihimaka tho ohakalala kimphwannyaka mwaha woohela nipuro noopatxera muteko wa Yehova. Khuwaavo musurukhu mulaponi kinlikanxeraaka ni mareeliho onkivahaawe. Moohihovela, ti wooreera owehexexa itthu soomunepani ni ohela nipuro noopatxera mweekumini mwahu ohiya itthu sa weerutthuni.”

8. Ninsuwela hayi weera Salomoni aakhalano moonelo wa eriyari-neeriyari woohima sa muteko? (Koheleti 5:18, 19)

⁸ Salomoni enre, “muteko onnamuhakalaliha mutthu ni yovaha ya Muluku.” (Mmusome Koheleti 5:18, 19.) Owo tho aahima: “Muteko ori wothene onnaruha etthu.” (Mir. 14:23) Salomoni aasuwela etthu aahimaawe. Owo avara muteko mutokotoko, apaka impa, aphatteya iviinya, olima imatta sa ithutu, aahithipela ihime ni apaka icidade. (1 Mam. 9:19; Koh. 2:4-6) Muteko owo wootheene, waamuhakalaliha Salomoni mene aasuwela weera, khaiyo paahi muteko yoowo wamphwanyiha ohakalala. Mene wannatthuneya opaka etthu ekina. Mwa yeeyo, owo ahivoloyihera itthu soomunepani. Mwa ntakihero, owo aari ohoolo wa epewe yooreera aakokhoreliwa neere, olapeliwa Yehova Muluku, epewe yeeyo yaamanle iyaakha—ithanu ni piili—etekiwaka! (1 Mam. 6:38; 9:1) Mwaha wa sookumanano sootheene Salomoni aakhalannaawe, aawera woonelela weera, etthu yootepa otthuneya ori onvarela muteko Yehova. Owo ohimme ha: “Masu òmalihera a sotheene yiwiwemo t’ala: omòve Muluku ni okhapelele masu awe.”—Koh. 12:13.

9. Ninsuwela hayi weera Yesu aakhalano moonelo wa eriyari-neeriyari woohima sa musurukhu?

⁹ Yesu aari mutthu oovara muteko ni emaara aaraawe mmiravo, owo aari kalipinteeru. (Mar. 6:3) Moohihovela, owo annaakhavihera asitithawe yaawo yaakhalanne muritti wookosoopa emusi etokotoko. Mwaha woowera owo aari mutthu oohiyariwa ni yoottheka, annavara muteko nnene nave oweharu, pooti weera, atthu yannawopa weera aavarele muteko. Yesu wannamusivela muteko awe, nnaamweera vaari hiiho, owo annasunka etempu awe weera athokorore itthu soomunepani. (Yoh. 7:15) Yesu apatxerakaru olaleelara, ahaalela atthu yaamwiiwa weera: “Mweteteyeke khaiyene nthowa na eyotxa enariheya, mene, nthowa na eyootxa enavaha ekumi yoohimala.” (Yoh. 6:27) Mwaha yesu aapankaawe va mwaako enre: “Muthukumanye muhakhu wa wirimu.”—Math. 6:20.

10. Wakhala weera khanniikosoopa, eheeni enkela okhumelela mmutekoni mwaahu mwa Yehova?

¹⁰ Osuweela onkhuma wa Yehova onnanikhavihera okhalano moonelo wa eriyari-neeriyari woohima sa muteko. Akristu aasuwela  weera, onnatthuneya ovara muteko ni “opaka . . . , muteko worera.” (Aef. 4:28) Emaara ekina, macheefi ahu ni ale anihoolela, annoona weera hiyo anamuteko oororomeleya ni annanittottopela. Ni yootthuna yooreera, hiyo pooti waatxeerera ovara muteko ahu weera cheefi ahu akhaleno moonelo wooreera woohima sa Anamoona a Yehova. Mene napaka eyo, pooti ohikhalano ehuhu weera nikosoope etthoko ahu ni muteko wa Yehova. Mwa yeeyo, onnatthuneya okhala—eriyari-neeriyari.

11. Eheeni wiliam oxuttenraawe woohima sa okhala eriyari-neeriyari ni muteko?

¹¹ Munna mmoha oneeriwa William, ooxuttera wamoha ni ntakihero na mutokweene a mmulokoni avaranaawe muteko. Owo ohimme ha: “[Munna ola] ntakihero nooreera na mutthu orino moonelo wa eriyari-neeriyari woohima sa muteko. Nave munna ola onnavara muteko muntxipale. Mene mwaha wooreera ekumi awe ti yeeriyari-neeriyari, owo onniiwanana ni makiliente awe, nave oxekuwa onnakosoopa etthoko awe ni onnawehexexa itthu soomunepani. Moosuwela etthu emoha? Mene owo mutthu mmoha oohakalala kimusuwenlaaka!” *

12. Eheeni yoonihenre weera Salomoni khakhalanne mukhalelo wa eriyari-neeriyari woohima sa yoowo ni eheeni yaamukhumelenle?

¹² Emaara Salomoni anvarelaawe muteko Yehova nimurima wootheene, aakhalano moonelo wa eriyari-neeriyari woohima sa yoowo. Mene emaara aaraawe mmiravo, aasuwela weera sookhala itthu ahaaweraawe opaka nto mwaha wa yeeyo, owo anvekela nikhavihero Yehova. (1 Mam. 3:7-9) Salomoni apatxerakaru olamulela, owo annoova omorela muraakho wa wisunnuwiha. Owo olempe ha: “Wikuxa onnahola otholowa, ni wisona onnahola oriheya.” (Mir. 16:18) Mooripiha murima, Salomoni ahiya otthara miruku iya.  Moovira ehuhu, owo aapatxera wisunnuwiha ni ohiya weetteela malamulo a Muluku. Malamulo makina yaahima weera, alopwana khuwaatthuneya waathela athiyana antxipale weera “murima aya ohihapuxiwe.” (Ola. 17:17) Salomoni atupha malamulo awo ni ahaathela athiyana 700 nave aakhalano amwaaseta ookwana 300, antxipale a yaawo yahaamulapela Yehova! (1 Mam. 11:1-3) Araaya Salomoni uupuwela weera, khiyavo exumpe “soothene saari nnene.” Mene yaaphiya ehuhu owo yaamukhumelenlaaya maxupo mwaha wohiwelela malamulo a Yehova.—1 Mam. 11:9-13.

13. Eheeni ninxutteraahu ni ntakihero na wiiyeviha wa Yesu?

¹³ Yesu aakhalano mukhalelo wa eriyari-neeriyari ni aari oowiyeviha. Yesu ahinaaye owa elapo ya vathi, owo aakhalano eparakha ya opaka itthu sootikhiniha anvarelaka muteko Yehova. Biblya onhima weera, “okhala wera mwa yowo sòpattuxiwa sothesene wirimu ni vathi vava.” (Akol. 1:16) Emaara aBatiziwaawe, Yesu ahuupuwela itthu sootheene apankaawe ni apapawe. (Math. 3:16; Yoh. 17:5) Mene Yesu khiisunnuwinhe emaara uupuwenlaawe itthu sootheene iyo. Mweekhaikhai, khanante wisupuwela okhala ootthuneyaxa waapwaha atthu akina. Opwaha mwa yeeyo, ahaleela atthareli awe weera, “kharwenle orumeliwa mene orumela ni ovaha ekumi awe ntoko nlivo nowavuluxa atthu antxipale.” (Math. 20:28) Nave-tho, ahoonihera wiiyeviha vaavo aahimmaawe weera, khawera opaka etthu meekhaaweru. (Yoh. 5:19) Moohihovela, Yesu aari mutthu owiiyeviha nave oonihiyera ntakihero nooreera weera nitthareke.

14. Yesu aathalinhe heeni woohima sa okhalano moonelo wa eriyari-neeriyari woohima sa mwaneene ahu?

¹⁴ Yesu ahaaxuttiha atthareli awe okhalano moonelo wa eriyari-neeriyari wooohima sa asinneenaaya. Ekwaha emoha, owo aleenle ha: “Mene wa nyuwo, maihi wothe othene mmuruni mwanyu àhàlakhanyiwa.” (Math. 10:30) Mene masu ala annanimaaliha vantxipalexa vaavo nikhalannaahu moonelo wohisoonelamo woohima sa mwaneene ahu. Masu ala, anoonihera weera, tithiihu Yehova onnampwattha  mutthu ti mutthu a hiyo. Nave, nookhalano mwiitti vaavo anilenlaawe weera nnophwanela okhala elapo enyowani. Vano, hiyo taani oophwanela onvaanya?

15. (a) Mukhalelo heeni wa eriyari-neeriyari A Sentinela ahimmaawe nintthuneyaahu okhalano? (b) Ntoko enoniheraaya elataaratho ya epaaxina 24, wakhala weera nniixuupuwela meekhiihuru, mareeliho heeni ninkelaahu oyelela?

¹⁵ Mwa iyaakha 15 sivinre, A Sentinela aathalinhe ha woohima sa okhalano moonelo wa eriyari-neeriyari woohima sa hiyo: “Aani, nto khanintthuneya wisuupuwelela muneenaahu mpaka ophiyera wisunnuwiha. Naari-tho, okhalano moonelo wohiisonelamo. Opwaha mwa yeeyo, nintthuneya okhalano moonelo wooreera woohima sa hiyo. Nikhalakano moonelo wooreera woohima sa itthu iye ninweraahu opaka ni iye nihinweraahu opaka. Murokora mmoha ohimme ha: ‘Miyo nkihiyo mutthu ootthuneyaxa nave kookhalano mikhalelo sooreera ni soonanara ntoko hiiho atthu akina akhalannaaya.’” *

16. Mwaha wa heeni Yehova onnivanhaawe miruku?

¹⁶ Yehova onnanvarela muteko Biblya weera anivahe miruku sooreerela. Owo ompaka eyo mwaha woooweera, onnansivela ni ontthuna weera hiyo nihakalaleke. (Yes. 48:17, 18) Yoothanla nneeraahu nipake ori ohela nipuro noopatxera Omwene wa Yehova, ni tiyeeyo enkela oniphwaniyha ohakalala. Opwaha mwa yeeyo, enoonikhavihera osempa maxupo yaawo anrweela waakhala weera ninwehexexa muteko, musurukhu naari nniiwehexexa mwaneenaahu. Vano, muthanleke opaka itthu mwa miruku weera muhakalalihe murima wa Yehova!—Mir. 23:15.