Khaatthuna ohima yeeyo. Mweekhaikhai ele Davidi alempaawe yookhala maakha. Moone etthu owo alempaawe eversikulu ela ni iversikulu ikina

“Miyo kini kìpele etxipo nsina nanyu wa mahiku othene, kàtaphulaka nihiku ti nihiku anatiri kàmannaka.” “Kini khothapeleni, Apwiya [Yehova] ni Muluku aka, ni murim’aka wothene ni kini kìnnuwihe nsina nanyu mwa mahiku othene.” “Otthapela nsina nanyu, ehuhu ti ehuhu, vohihiyerereya.” — Masalmu 61:9 [61:8, Tradução do Novo Mundo]; 86:12; 145:1, 2.

Davidi khaatthuna ohima weera owo khaakela okhwa, mwaha wooweera owo aasuwela weera nihuku tinno, aamukhwa. Owo aasuwela weera atthu ootheene ennakhwa mwaha wa yoottheka. Ni Davidi yoola tho, ahaakhulela weera aari namattheka. (Eph. 3:3, 17-19; Nsal. 51: 6, 7 [51:4, 5, NM]) Owo aasuwela weera naari alopwana yaawo yaari oororomeleya ntoko Abrahamu, Isakhi ni Yakobe yaahookhwa. Ni Davidi aasuwela weera nihuku tinno, amukhwa. (Nsal. 37:25; 39:4) Mene masu Davidi olempaawe va Nsalmu 61:9 [61:8, NM] ennoonihera otthuna wawe onvuwiha Yehova wa mahiku ootheene eeraawe akhaleno ekumi. — 2 Sam. 7:12.

Itthu ikina Davidi olempaawe sinuuluma woohima sa sookumanano sawe sa mweekumini. Ntakihero na itthu sene seiya ti seiye nimphwanyaahu va miru sa Masalmu 18, 51, ni 52. Va Nsalmu 23, Davidi onnamuhima Yehova okhala mukukhuli onkosoopa ni oneettiha iputtiputthi sawe. Davidi tho aari mukukhuli ni annatthuna onvarela muteko Yehova wa ‘mahiku ootheene a ekumi awe.’ — Nsal. 23:6.

Nave tho, onnatthuneya wuupuwelela weera itthu sootheene Davidi aalepaawe, uupuxeriwa ni Yehova. Mwa itthu sene seiya owo alempaawe ennaphwanyeya eprofesiya enuuluma woohima sa ele yaakela weereya muhoolo. Mwa ntakihero, Nsalmu 110, Davidi aahuuluma weera nihiku tinno Pwiyawe ‘amukilaathi moono woolopwana wa [Muluku’] wiirimu weera aakhele owera. Owera nno, weera apakeleke eheeni? Weera aawere amwiittani awe ni weera ‘athorihe miloko’ sa valaponi. Davidi aari muhavinraiiye Mesiya, yoowo aakela olamulelaka wiirimu ni okhala “namakeya a mahiku othene”. (Nsal. 110:1-6) Yesu ohimme weera eprofesiya ela ya Nsalmu 110 yaamuhima owo ni weera yaamukhalano okwaniheriwawaya muhoolo. — Math. 22:41-45.

Yehova aamuupuxera Davidi olepa etthu ele, khaiyene weera yaakela okwanelaru etempu ele. Mene tho, yaamukhalano okwanela waya muhoolo emaara yeeyo Davidi oneeraawe ahuhumuxiwe ni okhalano ohakalala ni onvuwiha Yehova wa mahiku ootheene. Nto Nsalmu 37:10, 11, 29 ninnavareleya muteko ehuhu nalemphwaaya wIsraeli wa khalayi, ni tho onnoovareleya muteko muhoolo vaavo Muluku onkelaawe okwanihera soolaihera sawe. — Nwehe eparagrafu 8 ni mwaha onthokororiwa, oneera “Onokhale ni miyo mparadiso” mwa erevista ene yeela.

Masu emphwanyeya va nsalmu 61:9 [61:8, NM] ni iversikulo ikina sinlikana ni eversu ela sinnoonihera tthiri weera Davidi annatthuna onvuwiha Yehova ekumi awe yootheene. Ni masu ala ennoonihera tthiri etthu ele Davidi onkelaawe opaka vaavo Yehova onkelaawe omuhuhumuxa weera atthikele okhala nookumi.