Asinna oosiveleya:

Ootheene hiyo nimmukokhorela Yehova, onnanisivela Biblya. Ninnaroromela weera sooweereya sootheene nimphwanyaahu mmasuni a Muluku, teekhaikhai. Ni miruku sawe ti soororomeleya nave iyo sinoonihera nsivelo ntokweene Yehova oraaweno wa hiyo. (Nsalmu 119:105; Luka 1:3; 1 Yohani 4:19) Hiyo nintthuna waakhavihera atthu ootheene osuwela ikhaikhai sootthuneya sa mBiblyani. Mwa yeeyo, noohakalala vantxipale orehera eliivuru ela, “Muxuttere ni sooweereya sa mBiblyani.” Nnoorowa wooleelani vakhaani woohima sa eliivuru ela.

Eliivuru ela yoolempwa yuupuweleliwaka otepaxa wene anamwane. Nave eliivuru ela, pooti waakhavihera atthu atokweene antthuna oxuttera woohima sa Biblya. Naari wa hiyo nixuttenre ekhaikhai khalayi, onoorowa okhala wooreera wiisuupuxera sooweereya iya. Biblya, eliivuru envareleya muteko wa atthu ootheene, ni sooxuttiha sawe sinoonikhavihera ophwanya ohakalala.

Ivareliwaka muteko iparte ikhaanini sa mBiblyani, eliivuru ela ennahima sooweereya sa atthu ovinyera epattuxiwakaru. Enniiwanyeiha sooweereya sa mBiblyani mookhweya ni moovarihana ni moota seereñyaaya.

Mene eliivuru ela khenhima paahi sooweereya sa mBiblyani. Soolepa ni ifootu, soorehereriwa weera saakhavihereke alipa oosoma okhala moovarihana ni sooweereya sa mBiblyani ni wiihela nipuro na atthu anromoliwa.

Eliivuru ela ennanoonihera weera Biblya eliivuru enthaliha woohima sa atthu yaamwiiwelenle Yehova ni yahaamwiiwelenle. Ela enoonikhavihera woona itthu nintthuneyaahu oxuttera woohima sa atthu ene yaawo. (Aroma 15:4; 1 Akorinto 10:6) Eliivuru ela yookhalano iparte 14. Yeele eri eparte, yookhalano wuuluula wa ele ninrowaahu oxuttera.

 Mwaareene tiithi naari maaye, musome sooweereya iya ni mwaninyu ni mutthekule woohima sa ifootu. Avinyaka, musome ootheene Soolepa sa mBiblyani siri okhwipi wa yeele eri yooweereya. Mmukhavihere mwaninyu weera awere wiiwexexa moota Soolepa iya sinvarihanaaya ni sooweereya sa eliivuru ela. Nyuwo-tho, pooti opaka etthu emoharu wakhala weera mummukhavihera mutthu mutokweene, wakhala weera ontthuna osuwela itthu sintxipale woohima sa Biblya.

Ninnaweherera weera eliivuru ela yaakhavihere atthu ootheene, anamwane ni atthu atokweene oxuttera masu a Muluku. Ale anrowa ovarela muteko itthu anxutteraaya mBiblyani, anoorowa omukokhorela Yehova ni weerela eparte atthu yaawo owo onaasivelaawe.