Yesu apatisiwakaru, aarowa onikareni. Owo aaviriha mahiku 40 othana ni ohiyu ahitxaaka, ni aavoliwa etala. Menento, Satana aaphiya weera amweerere Yesu ni aamweerela: “Waari weera nyuwo Mwaana a Muluku, mulamule maluku ala weera ethatuwe ipaawu.” Yesu aamwaakhula avarihelaka muteko Soolepa: “Mutthu khankhala ni ekumi mwaha wa epaawu paahi, mene onnakhala mukumi mwaha wa masu enkhuma mmwaanoni mwa Yehova.”

Avinyaka, Satana aamweerera veeli Yesu eeraka: “Waari weera nyuwo Mwaana a Muluku, mwiivonyere vathi, woona wi yoolempwa weera Muluku onoorumiha malaika awe weera yookosoopeni.’ Menento Yesu aavarihela-tho Yoolepa ekina eeraka: ‘Yoolempwa-tho, ohimweerere Yehova Muluku aa.’

Avinyaka, Satana aamweerera Yesu ekwaha yanaararu. Owo aamoonihera Yesu imwene sootheene sa mulaponi ni aamweerela: ‘Kinimoovaha itthu sootheene iya wakikokhorelaru onaamukhala vakhaaniini paahi.’ Mene Yesu aamweerela: ‘Okhume va Satana! Yoolempwa, Omukokhorele Yehova Muluku aa, ni onvareleke muteko yooworu paahi.’

Satana aamuhiya Yesu ni malaika yaawa enanvaha yootxa Yesu. Sivirakaru itthu iye, Yesu aapatxera ovara muteko woolaleya mitthenka sooreera sa Omwene. Owo waari muteko aawiiyaawe ovara elapo ya vathi. Atthu yannasiveliwa ni ele Yesu aaxuttihaawe, ni weiwo Yesu aarowaawewo, atthu yannamutthara.