Yezabeli aakhalano mwaana mmoha mwaamuthiyana iitthaniwa Athaliya. Athaliya aari oonanara murima, ntoko ameyawe, ni aatheliwa ni mwene oYuda. Owo akhwaakaru, mwanawe Athaliya aakhala mwene. Mene mwanawe-tho aahookhwa. Vano, Athaliya aalakela okhala pwiyamwene oYuda. Mwa yeeyo, owo aawiiva atthu ootheene yaawo aawoonaawe weera yaarowa okhala mwene, mpaka asisulu awe. Atthu ootheene yannamoova owo.

Yehoyada, namakeya mutokweene, ni amwaarawe Yehoxeba yaasuwela weera itthu sootheene Athaliya aapakaawe saari soonanara. Nto, awo yaari oolipa murima. Awosa yaavitha mutemplu osuulu mmoha wa Athaliya, mwaana mmoha yoowo iitthaniwa Yowasi, ni yaannamukosoopa owo.

Emaara Yowasi aaraaweno iyaakha 7, Yehoyada aahaathukumanya alopwana ootheene ootthuneya oYuda ni aaweerela: ‘Nwehaweheke milako sootheene sa otemplu ni muhimuhiye mutthu mmoha naari avolowaka.’ Nto, Yehoyada ampaka Yowasi mwene munyowani oYuda ni aamuhela ekorowa mmuruni mwawe. Nto atthu oYuda yaakhuwela yeeraka: ‘Avuwihiwe mwene!’

Pwiyamwene Athaliya aawiiwa atthu ekhuwelaka ni aatthimakela otemplu. Amoonakaru mwene munyowani, owo aapatxera okhuwela eeraka: ‘Mookirukunuwela! Mookirukunuwela!’ Avinyaka, asilopwana akina yanvara Athaliya emukumiheraka vaate va etemplu ni yaamwiiva. Mwene oYuda aari ootaphuwa ni pwiyamwene ole oonanara murima, mene khaiyene ni itthu soonanara owo aapakaawe. Etthu heeni Yehoyada aarowaawe opaka?

Yehoyada ni atthu ootheene yaalaihera omukokhorela Yehova paahi. Avinyaka, awo yaapwexa etemplu ya Bayali ni ilataratho sootheene. Avinyaka, Yehoyada aahaathanla anamakeya, alevi ni makwaarta a mulako weera yavareke mutemplu mwa Yehova. Vano, atthu yaaheereke omukokhorela Yehova mwa mukhalelo wooreerela.  Avinyaka, Yehoyada ni alopwana akina yaamukuxera Yowasi owaani ni yaamuhela veehitxene. Atthu ootheene oYuda yaahakalala vantxipale. Vano, awo yaaheereke omukokhorela Yehova ahikhanle Athaliya ni ohikhanle okokhorela wa Bayali waaxupaka. Mohoona keera? Olipa murima wa Yehoyada waahaakhavihera atthu antxipale.