Seera sivinreene iyaakha soophiyeraka 70 atthu antxipale a wIsraeli etthikenleene oYerusalemu, menento atthu akina yeera ekhalaka mapuro oovirikana a omwene wa oPersia. Mmoha a ana a Israeli awo, aari namakeya Ezra, yoowo aaxuttiha atthu malamulo a Yehova. Ezra aahiiwa weera ana a Israeli yaari oYerusalemu, khayiiwelela malamulo a Yehova, nto owo aalakela orowa iwe weera aakhavihere. Mwene oPersia eeriwa Artaserse, aamweerela ha Ezra: ‘Muluku ohoovaha owera weyo weera oxuttiheke malamulo awe. Oroweke, ni akhala mutthu ontthuna orowa ni weyo, omukuxeke.’ Nto Ezra aahaathukumanya atthu ootheene yaatthuna otthikela oYerusalemu. Awo yanvekela Yehova weera akosoope mukwaha aya, ni yaattimula.

Sivinreene miyeeri 4, awo yaaphiya oYerusalemu. Asitokweene yaamuleela Ezra yeeraka: ‘Ana a Israeli khammwiiwelela Yehova, ni aathelana ni athiyana enaakokhorela amuluku eethiru.’ Asuwelakaru eyo, Ezra aakokhora ohoolo wa atthu ni aavekela eeraka: ‘Yehova, nyuwo moonipakela itthu sooreera hiyo, menento hiyo ikwaha sootheene nimpaka itthu muhintthunaanyu.’ Ana a Israeli yaattharuwa, mene yaatthikela opaka itthu soonanara. Mwa yeeyo, Ezra aahaathanla asitokweene ni aphuki weera yuulume mwaha ole. Ni miyeeri 3 saattharelana, atthu yahaamukokhorela Yehova, yaahoomoliwa.

Nto, saavira iyaakha 12. Mpuwa mwa etempu ene yeele, ixiri sa oYerusalemu saatekiwa. Avinyaka, Ezra aahaathukumanya atthu ootheene weera asome malamulo a Muluku. Emaara aamuhunlaawe liivuru, atthu ootheene yaaheemela. Ezra aahinvuwiha Yehova ni atthu ootheene yaahaakhulela. Emaara owo aasomaawe ni otaphulela malamulo, atthu ootheene yannakhala oomaaleleya weera yiiwe. Ana a Israeli yaahaakhulela weera awo khayaamwiiwelenle Yehova ni ikwaha ikina ni yaahinla. Nihiku naattharelana, Ezra aasoma-tho veeli malamulo ale ohoolo wa atthu. Ana a Israeli yaahoona weera yaahanle vakhaaneene ophiya efeesta ya mikottha. Awo khiyaayelenle etempu, yaapatxera wiireherera wa efeesta ele etokweene.

Wa mahiku 7 a efeesta, ana a Israeli yaahakalala vantxipale ni yaamuxukurela Yehova mwaha wooreeliha itthu yanlaaya. Ekwaha yoomalihera ana a Israeli yaapankaaya efeesta ya  mikottha ntoko ela, yaari mahiku a Yehoxuwa. Emalakaru efeesta ele, atthu yaathukumana ni yaavekela yeeraka: ‘Yehova, nyuwo moonivenxa wExipitu, mwaanivaha yootxa onikareni ni moonivaha nipuro nna nootepa oreera. Mene imaara sootheene khanaawiiwelelani. Nyuwo mwannaarumiha maprofeta anyu weera enleele, mene hiyo khanaatthuna wiiwa. Nnaamweera vareene hiiho, nyuwo mwaavirelela okhala oopixa murima, ni mookwanihera ele mwaamulaihenraanyu Abrahamu. Vano, hiyo ninnoolaiherani weera nnoorowa owiiwelelani.’ Avinyaka, awo yaalepa itthu sootheene iya. Nto weera yoonihere weera atthu ootheene yaamurowa okwanihera itthu sootheene iye, asitokweene, alevi ni anamakeya, yaapaka nivarihano.