Muluku aaroromeliha woopatxerani weera nloko na Abrahamu naamwaatta mpaka okhala nloko ntokotoko. Mene ohoolowaya, nloko n’Abrahamu nanniitthaneliwa nloko na ana Israeli. Yehova aathanla nloko nna, weera envareleke muteko. Tivaavo waatthuneyaaya omwiiwelela ni omukokhorela yoowo paahi. (Nsalmu 147:19, 20) Mene moorwela mwa nloko nna, maloko ootheene a elapo ya vathi, yaamwakhela nikhavihero na Muluku. — Mmusome Ephattuwelo 22:18.

Muluku ahaathanla ana Israeli weera ekhale anamoona awe. Tivaavo moorwela mwa nloko na ana israeli, maloko makina aatthu, yaammusuwela Yehova. Nto sooweereya sa nloko nna, nnoonihera weera onnatthuneya wiiwelela malamulo a Muluku. — Olaleya 4:6. — Mmusome Yesaya 43:10, 12.

Noovira ehuhu, ana Israeli yaahiya wiiwelela malamulo a Muluku. Vano, eheeni yaakhumelenle ohoolo waya? Yehova aahemexera nloko na ana israeli okhala anamoona awe, mene aathanla mukutthula wa atthu akina. (Matheyo 21:43; 23:37, 38) Olelo va, Yehova onnavarihela makristau eekhaikhai weera ekhale anamoona awe. — Mmusome Miteko 15:14, 17.

Yesu areene elapo ya vathi, ahaakhavihera oohusera awe weera elaleyeke omwene wa Muluku ni waapaka “oohusera akina wa amalapo.” (Matheyo 10:7, 11; 24:14; 28:19, 20) Okhwipi wa elapo ela yoonanara wohaattamela, tivaavo elapo yootheene ya vathi, makristau ekhaikhai enavirelelaya olaleya omwene wa Muluku. Mapuro ootheene a elapo ela, Yehova okhalano imilhões sa atthu. (Apokalise 7:9, 10) Opwaha mwa yeeyo, makristau ekhaikhai ennakhaviherana  mukina ni mukwaawe mwaha woowiiraana. Nto naamwi evirikannene ilapo enkhalaaya, awo anaxuttera etthu emoha paahi, ya mBiblyani. — Mmusome Aheberi 10:24, 25.

Muloko mukhanene wa alipa oomusoma Biblya, waapatxera wiiwexexa soolempwa eyaakha ya 1870. Yaahiiwexexa weera Yesu, ontthuna weera makristau elaleyeke omwene wa Muluku. Ohoolo waya, awo yaapatxera olaleya omwene wa Muluku elapo yootheene. Mene eyakha ya 1931, awo yaapatxera wiitthaneliwa nsina na Anamoona a Yehova. — Mmusome Miteko 1:8; 2:1, 4; 5:42.

Okhuma khalai, Yesu mwene a makristau ekhaikhai. Otthuli, owo ahaathanla alopwana weera exuttiheke miloko sa ekristau. Atthu awo yathanliwe, yaari arummwa ni asitokweene ammulokoni. (Miteko 16:4, 5) Mahikwaano, aakhala alopwana a miruku anireherera miteko sa Anamoona a Yehova. Vano muloko owo mukhaanene onisuweliwa okhala, Mukuttula woolamulela. Nto atthu ene yaawo, anniwehexexa miteko sa otaphulela, wiimprimiri, ni okawela wa ibuuku sinipwaha muulumo 750, ya elapo yootheene. Mukuttula Woolamulela, onninvarihela muteko Biblya weera exuttiheke miloko 110.000 sa ekristau. Wa miloko sene seiya, aakhalamo alopwana anithanliwa okhala asithokweene. Anna awo toorera murima ni annakhavihera iputthiputthi sa Muluku. — Mmusome 1 Pedru 5:2, 3.

Ntoko arummwa akhalayi yalaleyaya empa ni empa, olelo va Anamoona a Yehova ennalaleya omwene wa Muluku. (Miteko 20:20) Mene hiyo tho ninaaxuttiha Biblya atthu ootheene anitthuna oxuttera sa Muluku. Opwaha mwa yeeyo, Anamoona a Yehova aanihiya okhala ettiini, awo ari ntoko emusi arino tiitthi otxeketta. Hiyo na anna ni arokora ninkhaviherana mukina ni mukwaawe. (2 Atesalonika 1:3) Mene hiyo na emusi yoohakalala elapo yootheene ya vathi, mwaha wooweera, ninaakhavihera atthu osuwela moota woopaka yootthuna ya Muluku. — Mmusome Nsalmu 33:12; Miteko 20:35.