Mene sookhala ittiini sintxipale mulaponimu, ni mwemmo tho aakhalamo atthu entthuna omuhakalaliha Muluku. Nto Muluku onnaapwattha atthu ene yaawo. Mene ekhaikhai eri yooweera ittiini sinnapaka itthu soowuliha muru. (2 Akorinto 4:3, 4; 11:13-15) Mitthenka sa elapo sinoonihera weera, ittiini sinnakhala siwoopopihaka ni siwiivaka atthu oohittheka ni sinnarowa okhotthoni. Nave mpakana Mapaadere, ni anamahoolela a ittiini, ennaararuxa anamwane. Atthu enamusivela Muluku yoonaka itthu iya seereyaka, onnatepa waariipa murima. — Mmusome Matheyo 24:3-5, 11, 12.

Opwaha mwa yeeyo, ittiini sintxipale sinnamoothera Muluku voohima sa nookhwa. Omoothera Muluku ori othowa nttittimiho. Yehova Muluku nave antthuna weera atthu esuwele ekhaikhai. Ti vaavonto ettiini yeekhaikhai enxuttihaaya ele eri mBiblyani. — Mmusome Ezekiyeli 18:4; 1 Timotheyo 2:3-5.

Ittiini sinahima soowotha sinoomala moohilekela, mwaha wooweera Muluku annoona itthu sinpakaya ittiini sene seiyo. Tivaavo, khontthuneya waasa wuuluma vayanoni weera ennamusivela Muluku, eriki ehipakaka yoothunaawe. (Yakobe 4:4) Ittiini sootheene soowotha, mBiblyani sineeriwa “Babilonia mutokweene,” nitho, onnattottopela ariki, ittiini sene seiyo sinoopwexiwa moohilekela. Babilonia, waari muttette yoowo woowaatta atthu a ehuhu ya Nowa. Onhima tho weera, ti muttetteene yoowo saakhumelenlaya ittiini soowotha ohoolo wa epula ya mirupi. — Mmusome Apokalise 17:1, 2, 5, 16, 17; 18:8.

 Ninkha atthu ale entthuna opaka yootthuna ya Muluku eneera erene mwe ettiinini yoowotha? Yehova khaattiwanle naari khanaattiwala. Onnavaha ehuhu weera exuttere ekhaikhai eri mBiblyani ni ekhumemo mwe ettiini yoowotha. — Mmusome Mikeya 4:2, 5.

Ankha atthu ootheene esuwenle ni entthuna otthara ekhaikhai, eneera ereene mweettinini yoowotha? Yehova onawooperera weera ekhumemo moowaakuveya. Yehova onnaatthuna vantxipale atthu ene yaawo. Tivaavo ale enamusivela Muluku ennakhulela ele Muluku onhimaawe. — Mmusome Apokalise 18:4.

Ehuhu ya oohusera a khalayi, atthu antxipale yaaxuttera sa mitthenka sooreera sa Muluku. Mene atthu ene yaawo yaaxuttera ni enakhala antoko Yehova aatthunaawe, nave-tho aakhala ni eparakha yookhalano ekumi yoohimala. Tivaavo ontthuneyaaya opaka emoharu. Etthu yootthuneya vantxipale, ori omwiiwelela Yehova. — Mmusome 1 Atesalonika 1:8, 9; 2:13.

Mene Yehova onnatthuna vantxipale weera atthu, ekhumemo mu ittiini soowotha ni yankanyerane ni arumeyaawe. Nto mwapakaru hiiho munookhala nthamwene a Yehova, nave okhala ni muloko awe enthonyera okhalano ekumi yoohimala. — Mmusome Marko 10:29, 30; 2 Akorinto 6:17, 18.

Mitthenka sooreera tiiya, ittiini sootheene sa elapo ya vathi sinoopwatiwa. Eyo entaphulela weera atthu enookhala ootaphuwa, nave enoonihera weera khaavo oneera ootothiweke. Ehuhu ene yeeyo atthu ootheene enaamukokhoreleke Muluku mmoha paahi. — Mmusome Apokalise 18:20, 21; 21:3, 4.