Silempwale ni Yohani 12:1-50
12 Ehalelaka mahiku 6 weera aphiyere Mpaasika, Yesu aaphiya oBetania, weiwo aaraiyewo Lazaro, yoowo Yesu anvinyererinhaawe mookhwaani.
2 Yaamwaapeela yootxa, Marta aavara muteko, ni Lazaro aari mmoha aatthu yaatxa* vamoha ni Yesu.
3 Maria aakuxa emeya* ya eliitru ya makhura oowinkhela yaapakiwa ni nardo, ni yaari oorikaxa, aakuxa makhura awo anahela manaani a Yesu, ni aapuputta ni maihi awe. Nto empa yootheene yaasareya winkhela wa makhura ale.
4 Vano, Yuda Iskarioti mmoha atthareli awe, yoowo aakela onvariha, aaheera:
5 “Mwaha wa heeni makhura ala oowinkhela ehitumihinwaaya ni itenaariyu 300, ni musurukhu ene yoowo ovahiwa alipa oohaawa?”
6 Mweekhaikhai, Yuda khaiyene aahima masu ala mwaha wooweera annaapwattha atthu oohaawa, mene mwaha wooweera aari latarawu,* ni ti yoowo aakosoopa ekaaxa yaaheliwa musuruku ni anniiya musurukhu waaheliwa mmo.
7 Vano, Yesu aaheera: “ mmuhiye apake eyo, woona weera onreherera nihiku na ovithiwa waka.
8 Mwaha wooweera nyuwo muneereke okhala ni atthu oohaawa mahiku ootheene, mene ni miyo khamunrowa okhalaka mahiku ootheene.”
9 Menento muloko mutokotoko wa ayuda waasuwela weera Yesu aari oBetania, ni yaarowa iwo, khaiyene paahi mwaha wa Yesu, mene-tho weera yamoone Lazaro, yoowo Yesu anvinyererinhaaye mookhwaani.
10 Asitokweene aanamakeya yaalaihana* weera emwiive-tho Lazaro,
11 mwaha wooweera waari mwaha wa yoowo ayuda antxipale yaamuroromelaaya Yesu, woona weera yannarowa iwo omoona Lazaro.
12 Nihiku naattharelana, muloko mutokotoko waatthu waaronwe ofeestani, waasuwela weera Yesu annarowa oYerusalemu.
13 Vano, atthu awo yaakuxa makukhu amavare ni yaarowa okumana ni yoowo, ni yaapatxera okhuwela yeeraka: “Txontte Muluku, ninnoovekelani, munvuluxe! Ooreeriwa ti yoole onwa mwa nsina na Yehova! Ooreeriwa Mwene a wIsraeli!”
14 Yesu amphwanya puuru mwaaxaana ni anwela, ntoko hiiho elempwalaaya:
15 “Muhoove, mwaana mwaamuthiya oSiyoni. Mwiiwe!*mwene anyu onnawa, anwenleene mwaaxaana apuuru.”
16 Woopatxerani, atthareli awe khayiiwexenxe etthu ele, mene, Yesu avuwihiwakaru, awosa yaahuupuwelela weera itthu iya saalempwa woohima sa yoowo ni weera sammweereela itthu iya.
17 Atthu yaamonne Yesu amwiitthanaka Lazaro mmahiye weera akhumele vaate ni anvinyererihaka mookhwaani, yannahelela onamoona.
18 Ni waari mwaha wa yeeyo, muloko mutokotoko waaronwaaya okumana nuuwo. Mwaha wooweera waahiiwa weera owo, aapaka mwiiriira owo.
19 Menento, afarisi yaaheerelana yaaworu: “Nkawehani, va nihiwenraahu opaka etthu. Moonekento, atthu ootheene ennamutthara owo!”
20 Yaakhala akereku akina wa atthu ale yaawiiye omukokhorela Muluku nihiku na efeesta.
21 Awo yaamwaattamela Filipe yoowo aari oBetisaida wa oGalileya, ni yanvekela yeeraka: “Apwiya, nintthuna weera nimoone Yesu.”
22 Filipe aarowa omuleela eyo Andreya. Vano, Andreya vamoha ni Filipe yaarowa wuuluma ni Yesu.
23 Mene Yesu aawaakhula eeraka: “Yoophiya ewoora weera Mwaana a Mutthu avuwihiwe.
24 Kinnooleelani ekhaikhai weera: Enuku ya tiriku yamorela vathi ehinakhwa, ennavirelela okhala enuku emoha; mene, yakhwa vale, eyo enniimiha soowiima sintxipale.
25 Ole onsiveliwa ni ekumi awe onooyeleela,* nto ole ohinsivela ekumi awe mwa elapo ela, onoosukera* weera aphwanye ekumi yoohimala.
26 Ole ontthuna okhala murumeyi aka, akitthare; ni, weiwo kinkelaaka okhalawo, murumeyi aka anaakhale weiwo-tho. Mutthu ontthuna okhala murumeyi aka, Atiithi enrowa omuttittimiha.
27 Vano murima wookiriipa, kinrowa ohima eheeni? Tiithi, mukivuluxe ewoora ela. Nto miyo kiwiiye mwaha wa ewoora ela.
28 Tiithi, nvuwihe nsina nanyu.” Vano, naahiiwanyeya nsu naakhuma wiirimu neeraka: “Miyo koovuwiha ni kinootthikela ovuwiha-tho.”
29 Muloko mutokotoko waatthu waari vale, waahiiwa eyo ni waapatxera weera yompe etari. Mene akina yeera: “Nlaika nuulumme nuuwo.”
30 Yesu aahaakhula: “Nsu nna khaniiwanyeñye mwaha wa miyo, mene mwaha wa nyuwosa.
31 Vano, yoophiya etempu yoothorihiwa elapo ela; ni namalamulela a elapo ela onimoomoliwa.
32 Kakhomeliwa vale va mwirini wa nihaaxero, kinimwiipururela wa miyo atthu a mikhalelo sootheene.”
33 Mweekhaikhai, Yesu aahima masu ala atthunaka ohima okhwa moohaawa aakelaawe oviriha.
34 Vano, muloko mutokotoko waatthu waamwaakhula weeraka: “Nohiiwa mu Nlamuloni weera Kristu anaakhale wa mahiku ootheene. Vanonto, moota heeni nyuwo munhimaanyu weera Mwaana a Mutthu onookhomeliwa vamwirini? Mwaana a Mutthu ene taani?”
35 Vano, Yesu aawaakhula eeraka: “Muthuko onaavirelele okhala ni nyuwo mwa etempu vakhaaniini. Mweetteke nlelo muthuko oreenevo weera epiphi ehoophwanyeni; ole oneetta veepiphini khansuwela woowiini onkelaiyewo.
36 Nlelo okhanleene muthuko, muroromeleke muthuko owo, weera mukhale anamwane amuthuko.”
Yesu ahimakaru itthu iya, aapwaha anarowa wiipitha.
37 Nnaamweera owo aapanke miiriira sintxipele vamaithoni vaya, awo khayaamuroromela,
38 eyo yeereñye weera ekwanele masu a profeta Yesaya, eneera: “Yehova, taani ororomenle ele ninlaleyaahu?* Ni taani othoonyerinwe moono wa Yehova?”
39 Yesaya-tho aahima nthowa naya neera niweeriheke ohiroromela:
40 “Owo oheeriha maitho aya ohoona ni ohummiha murima aya, weera ehooneke ni maitho, naari ehiiwexexeke ni murima aya, ni ehittharuwe, ni weera miyo kaavuluxe.”
41 Yesaya aahimme itthu iya woohima sa Kristu mwaha wooweera aahoona otokweene* awe.
42 Nto, mpaka ahooleli antxipale aayuda yannamuroromela Yesu, mene, mwaha woowoova afarisi, awo khayoonihera vaatthuni, weera ehoomoliwe musinakooka,
43 woona weera wannaasivelaxa ovuwihiwa ni atthu ohiya onvuwiha Muluku.
44 Menento, Yesu aahuuluma ni masu oowiiwanyeya eeraka: “Ole onkiroromela miyo khaiyene paahi onkiroromela miyo, mene-tho onnamuroromela ole okiruminhe;
45 ni ole onkoona, onnawoona-tho Ale ekirumme.
46 Miyo kiwiiye ntoko muthuko wa elapo ya vathi, weera ootheene ale eneera ekiroromeleke miyo ehivirelele okhala mweepiphini.
47 Mene, wakhala weera mutthu onniiwa masu aka ohineettela, miyo nkimmuthoriha; woona weera nkiwenle othoriha elapo ya vathi, mene ovuluxa elapo.
48 Mutthu onkikhootta ni ohinaakhulela ele kinhimaaka, yookhala etthu eneera yamuthorihe. Masu kinlaleyaaka eneera yamuthorihe nihiku noomalihera.
49 Mweekhaikhai, nkuulumme kikumihaka mmuruni mwaka, mene Attithi yaawo ekiruminhe, ti yaawo ekivanhe nlamulo woohima sa etthu yoohima ni yoowuuluma.
50 Ni miyo koosuwela weera malamulo awe entaphulela ekumi yoohimala. Menento, itthu sootheene miyo kinuulumaaka, kinuuluma hiihaawo ntoko Atiithi ekilenlaaya.”
Footnotes
^ Naari: “yaatxa vamoha vameesa.”
^ Naari: “haafu.”
^ Naari: “namwiiya.”
^ Naari: “yampaka palano.”
^ Naari: “moone.”
^ Naari: “onoonyaanya.”
^ Naari: “onoovitha.”
^ Naari: “ninhimaahu.”
^ Naari: “ovuwa.”
