•   Come che te te senti quando i altri i parla robe sporche?

  •  Mi gnanca no me nicorto, parché tuti i parla.

  •  Mi no me piase tanto, ma assa star.

  •  Me fà fastìdio e no son mia bon de parlar robe cossita.

•   Quando che te parli robe sporche?

  •  Mai

  •  Dele volte

  •  Sempre

•   Te pensi che l’è bruto parlar robe sporche?

  •  No

  •  Si

 Fursi ti te pensi: ‘No me par mia bruto parlar robe sporche. Ghen’è robe pi importante nel mondo par preocuparse. E tuti i parla robe cossita!’ Ma sarà che elo vera?

 Pol esser che te fà fadiga creder, ma ghen’è gente che no parla mia robe sporche parché lore le sa un per de robe che fursi no te ghè mai pensà sora. Par esémpio:

•  Quel che te parli mostra come che te sì. Se te parli robe sporche, te mostri quel che ghen’è rento el to cuor e che no te bada mia quel che i altri i sente. Sito una persona cossita?

   La Bìblia la dise: ‘Tuto quel che vien fora dela boca, vien del cuor.’ — Mateo 15:18.

•  I altri fursi i ndarà pensar mal sora ti. Un libro che parla sora le robe sporche che le persone le dopera ancoi el dise: “La maniera che noantri parlemo mostra chi che sarà i nostri amighi, se le nostre amicìssie le sarà pròpio bone, se le persone le ndarà rispetarne, se saremo boni de ciapar un laoro e cossa che i altri i ndarà pensar de noantri.” Alora, proa domandarte: ‘Sarà che le to amicìssie le saria pi bone se no te parlessi mia robe sporche?’

   La Bìblia la dise: ‘Gavé de cavar via el parlar che ofende.’ — Efesi 4:31.

•  Parlar robe sporche no l’è mia bel come fursi te pensi. Nel libro Che Stùpido! (How Rude!), el scritor Alex Packer el ga dito: “Restemo stufi de scoltar una persona che la seita a parlar robe sporche.” Se una persona la ze bona de discorer sensa parlar robe sporche, la sarà bona de mostrar che la ze furba, che la pensa dela maniera giusta e che la se preocupa coi altri. Magari, se te parli robe stùpide e sporche, anca quel che te pensi el sarà cossita.

   La Bìblia la dise: “No ga de vegner fora dela vostra boca gnanca una parola rugna.” — Efesi 4:29.

•  Pensa quel che te toca cambiar. Cossa pénsito de fermarte de parlar robe sporche nte un mese o manco ancora? Te pol scriver do nte un caderno o nte un marca giorno quel che te si stà belche bon de cambiar. Magari, ghen’è anca altre robe che te toca far. Varda un per de esempi.

•  No stà divertirte con filmi, mùsiche e altre robe che parla robe sporche. La Bìblia la dise: “Le brute compagnie le rovina i boni comportamenti.” (1 Corinti 15:33) Podemo dir che queste “compagnie” le ze anca i filmi che vardemo, quel che giughemo o le mùsiche che scoltemo. Kenneth, de 17 ani, el ga dito: “Pol esser che te sì drio cantar una mùsica che te piase tanto sensa nicorderte che la parla robe sporche.”

•  Mostra che te sì pròpio bravo. Arquanti gióveni i parla robe sporche par mostrar ai altri che i ze belche gente granda. Ma, ghemo de ricordarse che brave persone ‘le ga le so capassità de dissernimento trenade par saver la difarensa tanto del giusto come del sbalià’. (Ebrei 5:14) Quei che i ze bravi no i parla robe sporche par sprosiarse.

 Quando noantri parlemo robe sporche, l’è come se sporchéssino i nostri pensamenti e i pensamenti dei altri. Ma savemo che ghen’è robe sbaliade che basta nel mondo. Un dei libri che ghemo belche parlà prima el ga dito: “Alora, fà de manco parlar robe sporche. Pitosto, sìpia sicuro che quel che te parli sarà bon par i altri. Cossita, te sarè pi contento e le persone le pensarà robe bone de ti.”