Quasi tute le fameie le ga règole che i fioi i ga de obedir. Par esémpio, ora par rivar casa, quanto tempo che i pol sfrugnar nel selular o come che i ga de tratar i altri.

 Ma, e se te ghè desobedio a una de queste règole? L’è vera che no te ghè come cambiar quel che te ghè fato. Ma te pol far qualcossa par no assar la situassion restar pedo. Varda arquanti consili che i pol giutarte.

•  Quel che no te ghè de far

•  Fà cossita che l’è meio

•  Cossa altri gióveni i dise

•   Se i to genitori no i sa mia che te ghè desobedio a lori, fursi te cati che l’è meio sconder quel che te ghè fato.

•   E se i to genitori belche i sa che te ghè desobedio a lori? Pol esser che te vol catar fora scuse o darghe la colpa a nantra persona.

 No stà mia far cossita. Parché? Parché se te scondi quel che te ghè fato o se te cati fora scuse, vol dir che no te sì mia una persona maura. E cossita i to genitori i va pensar che te ghè ancora tanto de imparar.

 “Dir busie l’è una ciavada. Parché una ora o l’altra i to genitori ndarà saver la verità e cossita sarà pedo ancora par ti.” — Diana.

•   Dighe la verità. La Bìblia la dise: “Le robe no ghe ndarà ben a quel che el sconde i so pecati.” (Proverbi 28:13) I to genitori i sa che no te sì mia perfeto, ma i vol che te sìpia de fidarse.

   “Se te ghe disi la verità, sarà pi fàcile che i to genitori i te perdone. Quando te ghe conti pròpio quel che ga sucedesto, lori i savarà che i pol fidarse in ti.” — Olivia.

•   Domanda scusa. La Bìblia la dise: “Gavé de mostrar tanta umiltà.” (1 Piero 5:5) Te toca esser ùmile par domandar scusa e no seitar proar spiegar quel che te ghè fato de sbalià.

   “Col tempo, persone che sempre le cata fora scuse no le va pi nicorderse de quando le fà robe sbaliade. Pin pian, no le sentirà pi colpa par quel che le fà de sbalià.” — Heather.

•   Aceta le consequense. La Bìblia la dise: “Scolté la dissiplina.” (Proverbi 8:33) Aceta la dissiplina dei to genitori sensa sbrontolar.

   “Sarà pedo par ti se te sbrontoli del castigo che te ghè ricevesto. L’è meio acetar la situassion e no seitar pensarghe in quel che te ghè perso.” — Jason.

•   Sfòrsate par esser una persona de fidarse. La Bìblia la dise: “Gavé de cavarve via la vècia personalità, la vostra maniera de viver del passà.” (Efesi 4:22) Se i to genitori i vede che te sì drio sforsarte par far bone dessision, lori i va fidarse in ti nantra volta.

   “Col tempo, se te fè bone dessision e no te fè i medèsimi sbali, to genitori i tornarà a fidarse in ti.” — Karen.

 PROA FAR COSSITA: Fà tuto quel che te pol par mostrar che te sì de fidarse. Cossita, i to genitori i va tornar a fidarse in ti. Par esémpio, quando te sì drio tornar casa, avisa i to genitori che te sì drio rivar, anca se l’è vanti dela to ora de tornar casa. Cossita, lori i va capir che i pol fidarse in ti nantra volta.