La Bìblia la dise: “I vivi i sa che i morirà, ma i morti no i sa pròpio gnente.” (Eclesiasti 9:5; Salmo 146:4) Alora, noantri no seitemo a viver in nantro posto dopo che morimo. I morti no i pensa, no i sente e gnanca i fà qualcossa.

“Ala polver te ritornarè”

 Quando el primo omo, Adon, l’è stà desobediente, Dio el ghe ga dito: “Te sì polver e ala polver te ritornarè.” Alora, l’è questo che sucede quando morimo. (Génesi 3:19) Vanti de Dio crear Adon ‘dela polver’, lu no ghen’era in gnanca un posto. (Génesi 2:7) Dela medèsima maniera, quando Adon l’è morto, lu no l’è ndà par qualche banda ma l’è tornà ala polver.

 La Bìblia la dise sora le persone e le bèstie: “Tuti i ze stati fati dela polver e tuti i torna ala polver.” (Eclesiasti 3:19, 20) Alora, l’è questo che sucede con quei che i more ancoi.

Ghen’è speransa par quei che i ze morti

 Tante volte, la Bìblia la dise che la morte l’è come dormir. (Salmo 13:3; Gioani 11:11-14; Ati 7:60) Quando una persona la ze indormensada, ela no la sa quel che l’è drio suceder intorno. Alora, gnanca i morti no i sa de gnente. Ma la Bìblia la dise che Dio el ga el poder de desmissiarli par far che i viva nantra volta. (Giò 14:13-15) Alora, ghen’è una speransa par quei che i ze morti, parché Dio el ndarà ressussitarli.