Geovà l’è el vero Dio dela Bìblia, el Creador de tute le robe. (Apocalisse 4:11) I profeti Abraon e Moisè i lo adorea, compagno de Gesù. (Génesi 24:27; Ésodo 15:1, 2; Gioani 20:17) Geovà l’è el Dio de “tuta la tera” e nò sol de una scianta de persone. — Salmo 47:2.

 La Bìblia la dise che Dio el ga nome Geovà, un nome che sol lu el ga. (Ésodo 3:15; Salmo 83:18) El vien de un verbo ebraico che se traduse “deventar”. E tanti studiosi i ga dito che “Geovà” vol dir “Lu el fà deventar”. Questa tradussion la ze giusta parché Geovà l’è el Creador e parché el porta avanti el so propòsito. (Isaia 55:10, 11) La Bìblia la ne giuta anca a capir e cognosser chi che l’è Geovà come persona, un Dio che la so pi granda qualità l’è el amor. — Ésodo 34:5-7; Luca 6:35; 1 Gioani 4:8.

 El nome Geovà l’è una tradussion in talian dele quatro létere del nome de Dio in ebraico יהוה (YHWH), cognossesto come el Tetragrama. No savemo come che se disea el nome de Dio ntela léngua ebraica vècia, ma podemo dir che la tradussion “Geovà” la ze la maniera pi doperada al di de ancoi in talian. a

Parché no savemo ben come che se disea el nome de Dio ntela léngua ebraica vècia?

 La léngua ebraica vècia se scrivea sensa vogai. Chi che doperea el ebraico savea che vogai doperar par leder. Ma dopo che ze stà scrite le Scriture Ebraiche (el Vècio Testamento) arquanti giudei i ga tacà doperar la superstission che dir el nome personal de Dio l’era sbalià. Quando i ledea in voce alta un testo che gavea el nome de Dio, i lo cambiea par spression come “Signor” o “Dio”, e col tempo se ga spaià questo costume e l’è ndà perso come che se disea el nome de Dio. b

 Arquanti i pensa che el nome de Dio se disea “Iavè” o altre maniere che ghe someia. Nte un Rolo del Mar Morto se cata un toco de Levìtico, scrito in greco, ndove catemo la tradussion Iao. Altri scritori grechi antighi i traduse Iae, Iabé e Iaoué. Ma no ghen’è maniere de saver come che se disea ntel ebraico vècio. c

Idee sbaliade sora el nome de Dio ntela Bìblia

 Stòria: El nome de Dio no’l gavaria de esser doperà ntela Bìblia, parché nissuni sa ben come se disea ntel ebraico vècio.

 Verità: Questa maniera de pensar la vien fora de quei che i dise che se gavaria de doperar el nome de Dio tuti dela stessa maniera, no vol dir che léngua te parli. Ma la Bìblia ne mostra che servi de Dio del passà, che i parlea léngue difarente, i disea el nome de Dio de maniere difarente.

 Vardé el esémpio del nome de Giosuè, un giuis del passà. I cristiani del primo sècolo che i parlea ebraico fursi i disea Yeoshùa, invesse quei che i parlea el greco i disea Iesoùs. La tradussion greca dele Scriture la dopera el nome ebraico de Giosuè tradusio in greco. Questo ne fà capir che i cristiani i doperea el nome dele persone come che se capia e disea ntela so léngua. — Ati 7:45; Ebrei 4:8.

 El stesso discorso podemo farlo par traduser el nome de Dio. Pi de star là capir come se disea el nome de Dio, l’è tanto pi importante darghe el giusto valor che el ga ntela Bìblia.